JOSHUA 1 - KHYINGEI PU'TLOU Bible (BSI)

Umpu ne Joshuaya Watlhou Silnabi Watyilkur

¹ Asinungri asitoubine hungthukura, touri Umpuei ruishik Moses hikur hillouri, Umpune Moses'yei putruiwa, Nun'yei chanapawa Joshua'nungei atoubi shun:

² “Keiyei ruishik Mosesri hiyura, ngam heineri asinung kanthouwalo, heitoubi nangni thimirap heile kalhonni Jordan kungya heiralthutlaka, heitoubi Keine yanungei, touri Israel rapnungei piroukyou ramra wachanglaklo.

³ Heirou Keine Moses'nung shunpiwurkhou heinakrimni, naiyei honi trumkhouna bi kantangwa heiri Keine nanungei piwurla.

⁴ Ramthingei khate lhang'rouweini khalu lhangrani Lebanon kaphani, heirou Samadru'tang heirouweini Euphrate Kungtang wa'tlungni, Hittia rapbei ram nammakhi, heirou Kulrel lhangei Samadru'tang waphani naiyei ram rikarchunna hoiyerrouwa.

⁵ Heitoubi neiyei chaan khatrekrou thimi hukhatnikhi neimaibongra maironi mayungchangmakrou. Keine Moses'ya kalhonpikhou heinaksini, neiyakhi Keine kalhonpirou; Keine neiya lakkhoumakrou.

⁶ Neiyei ukningra krakni mantranglaklo, kouweiyo toulanungri, Keine yai patar rapbei bira yanungei piroume toubine kantompiwurkhou ram heiwaya nangni thimi rapbei paalnanungei yanungei yerkhaipirou da.

⁷ Neiyei ukningyatom khrilchetni krak hoilak, heitoubi mantrangalo; heirou Keiyei ruishik Mosesne neinungei shunpiwurkhou chaylamrap nammaya mukheini ngakbini chanthunglak; heirap'rouwei thya lhangrakhi heirou thyoi lhangrakhi kallekthutdurmak; heiyanungri neiyei chana-hungna bi kantangra likarsui lhangai hoirou.

⁸ Ayillei lailik awari neiyei murrouwei karkhaiwurnungei yamakrou; heiya nangni heirapya msa-nunghang naimakni khalbini leirou da; heiyanungri nangni heirouwei mayelhakkur nammaya mukheini chanthungbi lhou toulanungri, neinungei tangbang-choubangkna hoirou.

⁹ Neinungei Keine chay piwurkhou nimakka? Neiyei ukningra krakni mantranglak; heitoubi chiwurbi neimalung kanchunmak! Kouweiyo toulanungri, neiyei Dunpu, Umpune neiyei chana-hungna bi kantangra kalhonpilei.”

Joshuani Thimi Rapnung Chay Piyoukur

¹⁰ Heirouri Joshuane thimi rapbei ruichingpi pu rapya chay pibini kyun:

¹¹ “Rungbom karyouni karwaichabi khulpaolak, heitoubi kulyom rapnungei chay pibini shunpilak: ‘Neineiyei chak-an chamainungei kroni marshiknalak; kouweiyo toulanungri, tlaini khyumniyei rilla nani Jordan kung heiralthutnanungei tourou dawura, heitoubi naiyei Dunpu, Umpune nanungei piroukyou ramra nani wachangbi ram kallou dalei.’ ”

¹² Heitoubi Joshuane Reuben'le, Gad heirou Manasseh'yei cheemkhur lhang'khatdei thimi rapnungei shun:

¹³ “Umpuei shikrui Moses'ne nanungei chay piwurkhoubi, ‘Naiyei Dunpu, Umpune naya mathrilyernanungei ram heiwaya nanungei piwurkhoume’ toubi shunpikur tlou rapya nani ningthutlak.

¹⁴ Naiyei nu raple, naiyei chanao raple, heirou naiyei halrul-yaorul rapri Moses'ne nanungei piwurkhou ram, Jordan kungei kulkung lhangra heileithungyerrou, heiya nani raalla yaomani napawa touwei'mkhei nammani, raal shambya mansambini, heitoubi maibong lhangra louchabi naiyei teinao rapya raal pangpirou da.

¹⁵ Umpune naiyei teinao rapnungei piwurkhou ramya raal manibi lukbongyen, Umpune naya klah mathrilyernaksini, yanikhi klah mathril phabongyenri raal paangbi kardourillou da. Heiyanungri nani naiyei ramra yenkallengbi, Umpuei shikrui Moses'ne nanungei piwurkhou ram, Jordan kungei kulkung lhangrei klei ramra nani paalrou da.”

¹⁶ Heirouri yani loumallangbini kyun: “Nangni kanungei chay pibini shunpikur tloubomrap namma heiwaya kani chanthungrouwa, heirou neiyei watyilna bi kantangrou kani charouwa.

¹⁷ Lhoulam kantangrou kani Moses'yei shunya hil-chanthungkhou heinaksini, kani neiyei shunya chanthungrouwa; Umpune Moses'ya kalhonpikur heinaksini neiyei Dunpu, Umpune neiyakhi kalhonpilaksu.

¹⁸ Neiyei chaytlouya karhani lhoutou thimiri, heirou neiyei anungei chay pikur tlou rapya chanthungmak thimi heiyari hatrou da; heirou neiyei ukningyatom krakni mantranga!”