JONAH 1 - KHYINGEI PU'TLOU Bible (BSI)

Jonah'ne Dunpuei Shunya Chanthungmakur

¹ Amittai'yei chanapawa Jonah'nung Umpuei tloulhang rapya atoubi yukshunpikur:

² “Kanthoubi Kholil Nineveh'ra wachangalo, heitoubi yaidoura ungraochani paolaa shunthutpilaklo; kouweiyo toulanungri, yaiyei lhangaimak lhou toukur heiwari Keimaibongra ka'tlungura.”

³ Heiya Jonah'neri kanthoubi Umpuei maibongrouwei Tarshish lhangranung trukkur, heitoubi ani Joppa'ra yukur; heirouri ani Tarshish'ranung charou kyou mali khat karthangkur; heitoubi ani mali tungnanungei yuwaltuy piwurbi, heirou ane rilla yuchangurbi Tarshish'ranung charou kyou thimi raple kalhonne tungbi Umpuei maibongrouei trukkur.

⁴ Heiya Umpuneri samadru doura lhimnung-martheetang katfyoubi, samadru yuimai doura thuithikur yuilhoutang katfyoukur heirouri mali heiwari bairouleithakni martlaochakur.

⁵ Heisi tounarouri malihul thimi rapri chirilwura, heitoubi thimi kantangni mimiyei thrai minya shulbine ungraochakur; heitoubi yani maliyei putkhrit kanthrityerna'nungei toubine mali rillei putchei rapya yuiwaira waiknaini khinglhakurchila. Heiya Jonah'ne maliyei chikokna khatra yuchangbine, na mherni iplhakbi heiklei.

⁶ Heitounei ngamrou malihul thimi upawane aiyei leinara hungchangbine aya hungshun, “O ip'thimiwa, nangya kouweiyawo, ipbine leikurya? Kanthouwalo, heitoubi neiyei Dunpunung shunchalaklo, heiyanungri Dunpune kaya loumayekbi, kari himakhi kyame.”

⁷ Heirouri yani khatle khat yunrilkur, “Soh, hungalo, kani meirui deekbi thiyase, heitoubi huwei ngamrou kaidoura anaksi thuithikur klah dayerkurro touri kane murou.” Heisitoubi yane meirui thinarouri Jonah'nung hungdakur.

⁸ Heisi tounarouri yane anungei shun, “Kaidoura anaksi thuithiyei klah dakur awari huingameiyo? Kanungei bei yunpilaklo. Nangri koulhou tou thimi? Heirou nangri koulhangrei leibi kwa? Heirou neiyei ramri koulhangra klei? Heitoubi nangri kou limyei thimi?”

⁹ Heitounei ani loumallangbi yanungei yunpikur, “Keiri Judah'rei Hebrewame, heirou keiri samadruya heirou thleiya Sheempi Pu, Thangwan-Shimleiyei Umpu, Dunpuya khrum thimime.”

¹⁰ Heitounarouri thimi rapne yunnungei makni chirilwurchiya, heitoubi yani anungei shunkur, “Neitoukur awaya kouwo?” Kouweiyo toulanungri, thimi rapne a heiri Umpuei maibongrouei trukkurme touri muwurla; ngamri ane yai maibongra yunthutdurla.

¹¹ Heirouri yane anungei shunkur, “Samadruei yuilhaoya touneemna'nungei kane neiya koutouserou? Ngamri samadruei yuilhouri duiduini thuithiyura.”

¹² Heirouri ane loumallangbine yanungei kyun, “Keiya khangloubine samadrura khinglhakurlaka, heiyanungri nanungei yuilhou yennimrou; kouweiyo toulanungri, keine mulei touri keiyei ngamni naidoura thuithikur yuilhou katfyoukuralei.”

¹³ Heisiya hoiyanungkhi malihul thimi rapneri manileiyen mali heiwari yuiruira yenhulthutna'nungei toubi kalthi mareknakur, heiya yane yenhulthut'changmakur; ngamri yuilhou heiwari yai maibongra duiduine louthuithikur.

¹⁴ Heingamei yane Umpu'nungei khrumbi ungraochani shunchakur, “O Umpu, kane buchaleime; napawa awayei mralnung'tlim kaya maangyerpimaklo; heirou thimi heiwayei mralri kaidoura dayerpimaklo; kouweiyo toulanungri, lhouthuk namyerwa heiri Neiyei kning hilthungni thukkurdikme.”

¹⁵ Heisitoubi yane Jonah'ya khaanglouheibi samadrura khingsundakur; heirouri samadruei yuilhou heiwari yentrimkur.

¹⁶ Heirouri thimi rapri Umpuya yunnungei makni chiwurchiya; heirou yani Umpunung khrumnaput makatbine, heitoubi yani Anungei tloukhi kantomrilkur.

¹⁷ Heirouri Umpune Jonah'ya madulna'nungei thangatang khatkhi marshikpikur. Heisitoubi Jonah'ne thanga ukrilla tlaini khyumnile masa khyumnibil leiwurkhou.