JOHN 9 - KHYINGEI PU'TLOU Bible (BSI)

Jesu'ne Puknarouwei Mitdeo Napawa Khatya Raiyer

¹ Jesu'ne lam heisi tlayeinung, puknarei waiyoubi mitdeo napawa khatya mulhakur.

² Heirou aiyei ruishik rapne anungei kngai, “Upawa, napawa heiya mitdeone pukur heiri huwei borh leineiyo? Ai'mshaei borh leineiyo nimanung aiyei pui-payei borh leinei ngammeiko?”

³ Jesu'ne loumallang, “Aya mitdeokyer heiri ai'mshaei borh leineikhi nimak, heirou aiyei pui-payei borh leiwurneikhi nimakme. Heiya aiyei mitdeokur heiri, airouwei Dunpuei mantrangya mutnanungei toukurme.

⁴ Tlainine khuwaarleiyenri, Keiya yenmalhetpikur heiwayei lhouya kane churbi leirouda.

⁵ Heitoubi Keine tlaipangpalla leiliyenri, Kei ari tlaipangpallei kwaar.”

⁶ Ane tlou heisi yunbi, heirou thleira matil mathukdokbi, heitoubi matil heine thleibul mankonbine, heirou Ane thleibul heiya napawa heiyei mitlungra nalphaangbi,

⁷ heirou Ane shun, “Nangne wabi Siloam yuiphumra neiyei mai machaammurlak,” toubi shunbi heihilkur. Heisi tounarou napawa heine wawurbi, aiyei mai lhamathaikur, heirou aiyei mitdeo hei mumanewurbi yenkallengkur.

⁸ Heirouri aiyei cheemlhunyei thimi rapne, heirou heibongnung ane bucha-bumaibi leikhouya kmu thimi rapne kngai, “Napawa ari ombi bucha-bumaibi leikhou heiwari nimakeiko?”

⁹ Heirou thimi thane loukyun, “Moi, napawa heiwarime,” heiya thimi deine kyun, “A heiri nimakme; heiya thiyeinung aya kmal napawame.” Heitounarou napawa heine aitam kyun, “Keihakme.”

¹⁰ “Asinung neiyei mitdeo heiri koutoubi mumanekurro?” toubi yane anung loukngai.

¹¹ Heirou ane loukyun, “Jesu toubi ung napawa heine thleibul mankonbi, heirou keimitra fnalpikur, heitoubi Ane keiya, ‘wabi Siloam yuiphumra mai lhamathai'wurlaklo’ toubi shunpinarou, keine wawurbi keiyei mai lhamathaikurle tallengne keiyei mitdeo awari mumanekur.”

¹² “A heiri koulhangrangawo?” toubi yane anungei kngai. “Keiri mumakurame, koulhang'rangaeikhiyo,” toubi ane loumallangkur.

Lhangai Karsa Thimi Rapne Kna Raiyerwurnei Ngamrou Tlou Darphakur

¹³ Heirouri yane mitdeobi leikhou napawa heiya lhangai karsa thimi rapbei maibongranung ruilouheila.

¹⁴ Jesu'ne thleibul fnalphaangbi aiyei mitdeokur heiya lhangaiyerkur tlaini heiri Mathrilni hoikur.

¹⁵ Heirouri hanuikhi lhangai karsa thimi rapne aiyei mitdeo heiri koutoubi raikurro toubi tlou ngaithikur. Heirou ane yanungei louyunpikur, “Ane Keiyei mitra thleibul teipikur, heitoubi Keine mai lhamathaikur, heisi tounarouri Keiyei mitdeo ari mumanekur.”

¹⁶ Heirou Lhangai karsa thimirap thane kyun, “heinaksi lhouya toukur napawa heiri Dunpurei kyongri nimakrou, koungameiyo toulanungri ane Mathrilna tlainiyei Tloulamya chanthungmaklei.” Heiya hoiyanungkhi, thimi deine kyun, “Hunaksi borh thimi khatneri heinaksi kngakei lhouya toumanerouko?” Heisitoubi yaihangra karhourilbine lhang-lhang darilkur.

¹⁷ Heitounei ngamrou lhangai karsa thimi rapne napawa heinung hanui kallengne tlou ngaithikur, “Neiyei mitdeo heiri ane lhangaiyerkurme toubi nangne yunlei - heiyanungri lhangaiya, nangneri aingamrou kousitoubi yunkni leilei?” “Ari Thimkhui khatme,” toubi napawa heine loumallangkur.

¹⁸ Heiya hoiyanungkhi, Jehudi rapbei lhou'urpu rapneri heitoubi kyun heiya tloukhoine loupinimak, touri yane aiyei pui-paya ungbine heitoubi yanungei tlou kngai,

¹⁹ “Napawa ari nakhu shangramei chanapawa nimakeiko? Naneri aya mitdeoni pukthutme toubi yunlei; heiya asinungni kousitoubi aiyei mitdeohei mumanekurro?”

²⁰ Heirou aiyei pui-pa rapne loumallangkur, “Moi, kane kmu, ari kaiyei chanapawa, heirou kane kmu touri a heiri mitdeoni pukkur.

²¹ Heiya asinungri aiyei mitdeo heiri kousitoubi mumanekurro touri kari mumakura, heirou hune aiyei mitdeo heiwaya raiyerkurro toukhi kari mumak. Asinungri nane anungei tlou ngaithipilak; akhi muheiyura, heine nai kngai tlou heiya ane loumallangpirou!”

²² Aiyei pui-pa rapne Jehudi rapbei lhou'urpu rapya chiwurnei ngamrou heisitoubi mallangkur, ngamri yane aya Pukhrumna Cheem'rouwei hulthutroume toubine yarilbi darilkur tloubomkhat klei.

²³ Heitounei ngamrou aiyei pui-pane, “Akhi muheiyarou; heine nane anungei tlou ngaithipilaklo!” toubine loumallangkur.

²⁴ Heirou khnui tlungni yane mitdeoni pukkur napawa heiya ungmallengbi kyun, “Nangne Dunpuei maibongra tlou kantombi chimne yunlak! Neiya mitdeo raiyerkur napawa heiri borh thimime touri kane mulei.”

²⁵ “A heiri borh thimi hoiyo-hoimako touri keiri mumakura,” toubi napawa heine loumallangkur. “Heiya keiyei kmu khatri: Keiri mit deobi leikhou, heiya asinungri keiyei mitdeo awari lhangaiwurbi mumanewurame.”

²⁶ “Aneri neinungei kouya toupikurro?” toubi yane loukngai. “Heirou neiyei mitdeo heiri ane kousitoubi lhangaiyerkuro?”

²⁷ “Keine nanungei yunpiwurla, heiya naneri ninglhakpimaklei, kounungei hanui kallengne nane ningkniyo? Nakhi aiyei ruishikrap hoikni leileisane?” toubi ane loumallangkur.

²⁸ Heitounei ngamrou yane aya manchopibi kyun, “Nanghakme, aiyei ruishik'hakri, heiya kari Moses'yei ruishik rapme.

²⁹ Kane mulei touri aiyei kyunnakne Moses'nungkhi Dunpuei yunpiwurkhou klei, heiya hoiyanungkhi, A heiri koulhangrei hungthuko touri kane mumak!”

³⁰ Napawa heine loumallang, “Heiri ngaknayei bom hoileime! Naneri aya koulhangrei hungthuko touri mumakle, heiya Aneri keiyei mitdeokur aya lhangaiyerwurla!

³¹ Kane mulei touri Dunpune borh thimiyei kyunri mayekpimaklei; heiya aya rikrai khrumkna thimi rapya heirou aiyei kningya toubi klei thimi rapya Ane ninglhakpi.

³² Tlaipang kanretirrei waiyoubi thimi hukhatnekhi mitdeoni pukthutkur thimi rapya lhangaiyerkurri makhui.

³³ Heiya napawa heiwane Dunpurei kyong nimakneri, Ane koukhatkhi toumanemakrou.”

³⁴ Heirou yane loukyun, “Neiyari pukyeinungkhi, heirou yukbaangei kaalnungkhi borhna hangra leiwurbine--heirou angturi nangne kaya shunmatupirou waiyouthuleinu?” Heisitoubi yane ayari Pukhrumna Cheem'rouwei hulthutkur.

Lhawaira Mitdeo Thimi

³⁵ Jesu'ne thukkur lhou heiya mayekkurnarouri, Ane napawa heiya raphamubi anungei kngai, “Nangri Thimiyei Chanapawaya uklumleiko?”

³⁶ Heirou napawa heine loukyun, “A heiri huweiyo keinungei yunpilaklo Upawa, heiyanungri Keine aya uklumrou!”

³⁷ Heirou Jesu'ne anung loushun, “Nangne aya muwurla, heirou asinung nangkou tlou kallangrilbi klei heiri Ahakme.”

³⁸ “Puwo, Keine uklumlei!” toubi napawa heine yunbi heirou ane Jesuei maibongra khuklu kanthrunchabi khrumkur.

³⁹ Jesu'ne kyun, “Keine tlaipangra kyong ari pichar tounanungei kyong, ngam heine mitdeo thimi rapne mumanerou, heirou mit mubi klei thimi rapri mitdeo thimi hoiyurou.”

⁴⁰ Heirou akou kalhonbi klei Lhangai karsarap thane Aiyei kyunya mayekthungurnarou yane anungei kngai, “Tanghakpane neikyun heiri kakhi mitdeo thimirap hoiyura tounei nimakrounu?”

⁴¹ Heirou Jesu'ne loumallang, “Nane mitdeo thimirap louhoiyanungri, nanung koukhatkhi klal makrou; heiya naneri mitdeo thimi nimakme toubine yunlei, heiyanungri nari asilumpha klallei lhoutou thimirap hoileihui.”