JOHN 7 - KHYINGEI PU'TLOU Bible (BSI)

Jesu'le Aiyei Teinaorap

¹ Heihillou Jesu'ne Judea'yei ramra chanemaknei ngamrou, Ane Galilee'yei ramranung chakur; ngamri bi heirou Jehudiyei lhou'urpu rapne Aya hatninei ngaakbi louklei.

² Heirouri Jehudi rapbei Pukhrumna Cheemchangnei Knei tounanungei kheenkhi yennakura,

³ heitounei ngamrou Jesuei teinaowa rapne Anung kyun, “Nangne bi aya lakurkhoubi Judea ramra wawalo. Heitoulanungri neihil chanthung thimi rapne neiyei toubi klei lhourap heiya mupharou.

⁴ Thimi napung-khatne ai'mshaya khulbung karshilyernianungri, huyakhi muyermakne munne lhou toumaklei. Heini nangne heinaksi lhou rapya toubi klei heiya mubi, tlaipang thimirap nammane neiyei ngamrou mulaksu!”

⁵ (Kheen heinungri aiyei teinaowa rapnekhi ayari uklumpimakhui.)

⁶ Heirou Jesu'ne yanung shun, “Keiyei kheen hungtlungmakhui, heiya nanungeiri karyomne hunglhungbi leiyura.

⁷ Tlaipangni nayari karhalmaklei, heiya Keiyari kalthi karhallei, ngamri Keine aiyei lhangaimak lhou toubi klei heiya karyom shunthutpikur.

⁸ Nane Pukhrumna Cheem changnei Knei heirou yuyaowalo, heiya Keiri bi heirou yumarou, ngamri keinungei kheen heiri hungtlungmakhui,”

⁹ Ane asi yunbi Galilee'ra yarekkur.

Jesu'ne Pukhrumna Cheemchang Knei Kyao

¹⁰ Aiyei teinao rapne Knei heirou yaonanungei yukur hillouri, Jesukhi yukur; heiya Ane thimi deiya muthungyermakne munne yukur.

¹¹ Knei bi heirou Jehudi'yei lhou'urpu upa rapne aya thiphabi, “A heiya kourangawo?” toubine ngaiphakur.

¹² Heirou thimi chung rapbei lhakra aiyei ngamrou munne kalthi rakalrilkur, heirou thimi thane, “Ari lhangai thimime,” toubi kyun, heiya thimi thaneri, “Nimakme, Ari lhangaimak thimime, A heiri miya lam tamungkyer thimime,” toubine yunrilkur.

¹³ Heiya thimi hukhatnekhi aingamrou baora khyingne yunthutchangmak. Ngamri yane Jehudiyei lhou'ur upa rapya chirilkur.

¹⁴ Heirou Knei heiri tlailam hungphayei kaalnung Jesu'ne Pukhrumna cheemra polhakbi marnopi waiyoukur.

¹⁵ Heirouri Jehudiya rapbei lhou'ur upa rapne kalthi ngakurbi heirou yane yunrilkur, “Napawa heiwane koukhatkhi marnomakne kousitoubi Ane heinaksi tlou rapya shunmatupi manekurreiyo?”

¹⁶ Heirou Jesu'ne loukyun, “Keiyei marnopikur tlourap ari keitamtomei mukheiya marnopi nimakme, heiya Keiya yenmalhetpikur Dunpurei Keine phabine marnopi.

¹⁷ Dunpuei touyerkniya toubi klei thimi rapne Keiyei marnopikur ari Dunpu'reiyo nimanung keitamtomei mukheiyei yunthutdo touri murou.

¹⁸ Thimi hukhatne aitamei mukheine yunthutkur heiri aitamei thangya kanyerchane thimiso. Heiya aya yenmalhetpikur Pu heiwayei thangya kanyerpi'kni thimi heiri ukning khying thimiso, heitoubi anungei klal touri koukhatkhi makrou.

¹⁹ Moses'ne nanungei Tloulamya pikhou nimaka? Heiya na hukhatnekhi aiyei tloulamya chanthungpimaklei. Heiyanungri kousi toubi nane Keiya hatnanungei wairaangkurawo?”

²⁰ “Neinungei lhangaimak krao leinei ngammeime. Heirou hune bi arou neiya hatnanungei waikrang leileiyo?” toubi thimi rapne loumallangkur.

²¹ Heirou Jesu'ne loukyun, “Keine kngakei lhoukhat toupinarouri, na namyerwane ngakur.

²² Mosesrei nimanungkhi (bongei nutar-patar rapbei chaanrei louyounakhou khoine), ane nanungei chay pibine heirou nane Mathrilna Tlainirou naiyei chanapawa rapya murdannei lhou toukhou.

²³ Heisitoubi napawacha khatya Mathrilna Tlainirou murdinyei lhouya toupinarou Moses'yei Chaylamra koukhatkhi karhamanungri, heinakrimni Keinekhi Mathrilna Tlainirou napawa khatya kna buldampinarou nane Keidoura malungkhapinung bomri kou leileiyo?

²⁴ Heitoubi nane baorei shakrungya thibine pichar touya lakurkhoubi, chimmei picharya toulaklo.”

A Heiri Messiahko?

²⁵ Heirou Jerusalem'rei thimirap thane wakyun, “Jehudi rapbei lhou'ur upa rapne hatnanungei wairaangkur napawari heiwari nimakeiko?

²⁶ Thilak, Ane thimi chungna hangra shunmatubi leileime, heiya ya hukhatnekhi aiyei kyunya loumallangmaklei! Heirou yanekhi A heiri Messiahme touri muwurnei ngammei hoikurako?

²⁷ Heiya Messiah'ne yongeinungri koulhangrei yongrouwo touri thimi hukhatnekhi mumakrou. Heirou ka nammaneri napawa heiri koulhangrei kyongo touri muchilei.”

²⁸ Heirou Jesu'ne Pukhrumna Cheemra heisi shunmatupibi leiyeinung, Ane hou chouni kyun, “Tanghakni nane Keiya muleiko, heirou kei ari koulhangreiyo toukhi muleiko? Heirou Keiri keitamtomei kningne kyong nimak, heiya Keiya yenmalhetpikur pu chimkhat leilei, heitoubi naneri Aya mupimaklei.

²⁹ Heiya Keineri Aya mulei, ngamri Keiri airouwei kyong, heirou Keiyari Ane yenmalhetpikur.”

³⁰ Heirouri yane Aya mannanungei wairaangkur, heiya thimi hukhatnekhi churmanrouri manemak, ngamri Aiyei kheen heiri hungtlungmakhui.

³¹ Heiya thimi rapne Aya malungamnei yane kyun, “Messiahni hungeinungri napawa awaei touthutkur kngakei lhou rapya duine toumaneheirouko?”

Raallui rapya Heimalhetbi Jesu'ya Mannungei Wairangkur

³² Heirouri thimi rapne Jesuei ngamrou yunkrilya lhangai karsa thimi rapne mayeklhakurbi, heirou yane Suipipu raple yarilbi raallui rapya heimalhetbi Jesu'ya mannanungei wairaangkur.

³³ Heirou Jesu'ne loukyun, “Keiri nakou lepcha leikalhonkhoubi, heirou Keiya yenmalhetpikur Puei bira Keine charouwa.

³⁴ Heirou nane Keiya thipharou, heiya nane Keiya muphamarou, ngamri Keiyei charou youna ramra nane chachangmakrou.”

³⁵ Heirouri Jehudiyei lhou'ur upa rapne yaitam yunrilkur, “A heiri kouranung charou waiyoukurawo? Nimanung kane aya rapha muchangmaka'rouko? Nimanungri Ane kai thimi rapbei leina Greekyei khukarthilranung chawurbi, Greek rapnung marnopirou marshikkurako?

³⁶ Heiya aiyei kyunri, kane aya thipharou heiya muphamakrou toulei, heirou kane aiyei leinarakhi chachangmakrou toulei. Heiyanungri aiyei kyun heiri kouwo?”

Khringchaan Phayerna Tuyshir

³⁷ Heirou Knei yenluilhakna lilkhoi tlainirou Jesu'ne mayungbi hou chouni kyun, “Huhune msul-yuihat yaowanungri, keinungei wabi monglaksu.

³⁸ Khyingei Lailikra yunkhounakne, ‘huhune Keiya uklumlanungri, khringchaan phayernei yuiput heiri aiyei malungrouwei heikungthutrou.’”

³⁹ Jesu'ne tloubom heiri Aya uklumkur thimi rapne phanungei Lhawai Khyingei ngamya kyun. Heiya kheen heinungri Lhawai Khyingri pikhoumakhui, ngamri kheen heinang Jesuri thang'alra ringthutmakhui.

Thimi Rapbei Hangra Lhang-Lhang Da'kril

⁴⁰ Thimi rapbei hangra ya thane aiyei kyunya mayeklhakbi heirou yane kyun, “Napawa heiri thimkhuileisame!”

⁴¹ Heirou thimi deine kyun, “Ari Messiahme!” Heiya dei thane kyun, “Messiah'ri Galilee ram'rouwei hungthukrou nimakme.”

⁴² Khyingei Lailikra atoubi yunkhoulei, “Messiah heiri Krung Davidyei shullamrei hungthukrou, heitoubi Davidni thrungkhouna Bethlehem khukarthilla pukrou.”

⁴³ Heisi toubine thimi rapbei hangra lhang-lhang darilkur.

⁴⁴ Bi heirou thimirap thane aya mankni, heiya hukhatnekhi aidoura hut lamthutbi manchangmakur.

Jehudi Lhou-Urpu Rapbei Uklum Mak

⁴⁵ Heirouri raallui rapne yenkallengeinung, Suipi pu raple lhangai karsa rapne loukngai, “Koutounei nane Aya yenmanheimako?”

⁴⁶ Raallui rapne loumallangkur, “Thimi hukhatnekhi napawa heiwaei kyun tlounak yunmakhuime!”

⁴⁷ “Ane nayakhi marmulkhurako?” toubi lhangai karsa rapne yanung loukyun.

⁴⁸ “Jehudi lhou'urpu rapbei hangrei napung-khatne nimanung lhangai karsa thimi napung-khatne aya uklumkurya nane muwurnatam leiyurako?

⁴⁹ Anakei khulbung kulyom awane Moses'yei Tloulamya mumakhuinito, heitounei ngamrou ya namyerwari Dunpuei manchona daakra leiwurchiyame!”

⁵⁰ Haalnungkhi Jesu'ya murillou toubi wakhou Lhangai karsa rapbei hangrei Nicodemus toubi ung napawa heiwane mideinung kyun,

⁵¹ “Chaylamyei hilthungneri kane thimi napung khatya, aiyei kyunya mayek'bongnung heirou ane kouya touwurkhoulawo toubi raphathutmakne aya klal dayernungri yamak.”

⁵² Heirou yane loumallangkur, “Heiyanungri lhangaiya, nangkhi Galilee'rei thimiko? Khyingei lailikya pathilak, heirou nangne murou touri Galilee'rouweiri hu thimkhui khatkhi hungthukmakrouso.”

⁵³ Heirouri thimi rapne ai'aiyei cheemranung minung-minung shaalkur.