JOHN 6 - KHYINGEI PU'TLOU Bible (BSI)

Jesu'ne Thimi Lishing-Phangaya Pichakur

¹ Heiyei hillouri Jesu'ne Tibaria toubikhi ung Galilee'yei samadru heiralbi wakur.

² Bi heirou thimi chungne Aiyei hilla heichanthungkur, ngamri Ane kna thimirap kounakya kna raiyernei kngakei lhou toukurya yane mukur.

³ Jesu'ne aiyei ruishik rapkou kalhonbi lhungdoura kabine om'mathrilkur.

⁴ Heirouri Ralthutpinei Kumtlun kheenkhi yennakkura.

⁵ Bi heirou Jesu'ne karhilni thinarouri, thimi chungwane aiyei leinara wakar'umkur heiya Ane loukmu, heisi tounarouri Ane Philip'nung kngai, “Thimichung heiya picha-pimai'nungri kourei louserouwo?”

⁶ Tlou heiri ane Philipbei ukningya thinanungei kyuntomni, heiya Ane kou tourouwo touri lamkrine Ane mubi klei.

⁷ Heirou Philipni loumallangkur, “Thimi napung kantangne thathacha shainungei mumtol lolanungkhi tuyri macha'khni duine changrou.”

⁸ Heirou Aiyei ruishik Simon Peterrei naowane kyun,

⁹ “Bi arou gehuei mumtol tum phangale thanga khintamcha kyao napawa-douwa khat leileime. Heiya heichatomniri thimi heinak chungwanungri romakroume.”

¹⁰ “Thimi rapya tingtou doura omyerlaka,” toubi Jesu'ne shun. (Bi heirou tingtou chungwane pukbi klei.) Heisitoubi thimi rapya tou'omyerkur; bi heirou kleiri thimi lishing-phangayei mal phalei.

¹¹ Heirouri Jesu'ne mumtol loubine Ane Dunpuya mathangkur, heitoubi bi heirou ombi klei thimi rapnung yerpinanungei malanpikur. Heitoubi ane thanga rapkhi heinakrimni yerpikur, heirouri thimi rapne yaiyaiyei kropilne, ukthone chaamaikur.

¹² Heirou yane ukthowurchi hillouri, Ane Aiyei ruishik rapnung shun, “Shai'maleikur mumtolle thanga haarrap heiri markumlaka; maleirap heiri hangwalne khingurmakase.”

¹³ Heisi tounarouri yane mumtol tum phangarei thimi rapne ukthoni shailoubi, heiyei maleikur harrap heiri shangphai chiple-khni bilbil thimni markumthungkur.

¹⁴ Heirou Jesuei touthutkur kngakei lhou heiya munarouri, bi heirou klei thimi rapne kyun, “Tanghakpane tlaipangpal arou yongrou kyou Thimkhuiri ariyalei!”

¹⁵ Heirouri thimi rapne aya manbi Krung hoiyerrou waiyouleime toubi Jesu'ne muwurnarouri, ane bi heirouwei lhungdouranung chutkur.

Jesu'ne Yuidoura Honi Karwaicha

¹⁶ Heinirou yenrawaikur heirouri, Jesuei ruishik rapne samadruranung yongchumkur,

¹⁷ heitoubi yane malira wachangbi, heirou samadru heiralwurbi Caperna-um lhangranung kallengkur. Heirou masa yentheengkur ramphane Jesuri yaileinara hungthukmakura.

¹⁸ Kheen heirouri lhimnung kathukkurnei ngamrou yuilhoukhi katyoukur.

¹⁹ Heirou ruishik rapne mali heiri lamtup khyum-phali'yeimal yenhulbi hungeinung, Jesu'ne yuidoura Aihoni chabi yailhangra yenkarnakkur heiri yane loumukur, heirouri yane kalthi chikur.

²⁰ Heitounei Jesu'ne yanung, “Nari chimaklo, keime!” toubi shunkur.

²¹ Heitounarou yane malungambine aya malira lourobi unglhakpikur, heitoubi tallengne mali heiri yai kartinbi yenchaheina bi heirou hungtlungkur.

Thimi Rapni Jesu'ya Rapha

²² Heithangei tlainirouri samadru ruira kartilbi klei thimi rapne mayekthutkur touri bi heirou mali khatpitom leikhou. Heirou Jesuri mali heiwirou tungmak, heiya Aiyei ruishik raptom tungbine shaalkur, heitoubi ayari lakurkhoulame touri yanekhi kmu.

²³ Heitoubi mali deiri Tibarias'rei wabi, Jesu'ne Dunpuya mathangbi mumtol pishaikur thimirap chungwane kartilkhouna bi shirui heirou wamathrumkur.

²⁴ Heirou thimi rapne bi heirou Jesule Aiyei ruishik rapri makurame toubi munarouri, yane malira wachangbi heitoubi Caperna-um lhangra, Jesu'ya rapharou wakur.

Jesuri Ringnanungei Mumtol

²⁵ Thimi rapne Jesu'ya samadruei khatlhang mnakra raphamukur heirouri, yane Anung kngai, “Upawa, Nangri bi arou koulumei wa'tlungkurawo?”

²⁶ Heirou Jesu'ne loumallangkur, “Keine nanungei tanghakni yunpilei: Nane Keiya raphakur awari, Keiyei kngak lhou toukur heirapya mulhakurnei ngammei nimak, heiya nane mumtolya ukthoni shailounei ngammeime.

²⁷ Leemne dongurou kyou lhangaimak murchak heinung'tlim chanchabi lhou toumak; heinung'tlimri nane klui naimak rongchanyei khring murchaknung'tlim lhou churlak. Anaksi chamairi Thimiyei Chanapawane nanungei piheirou, ngamri Pawa Dunpune Aidoura yapiwurla.”

²⁸ Heingammei yane Anung kngai, “Heiyanungri Dunpune kaya touyerkni heiya tounanungei kane kouya touserouwo?”

²⁹ Heirou Jesu'ne mallangkur, “Dunpune naya touyerkni heiri Aiyei yenmalhetpikur heiwayatom malungamyerkni.”

³⁰ Heirou yane loukyun, “Heiyanungri Neiya kane malungam'nungei Nangne kounaksi kngak lhouya kanungei toupirouwo? Heirou nangne kouya toupirouweiyo?”

³¹ “Bongnungri kai nutar-patar rapne ramhangra manna chamaibi leikhou, heirou Khyingei lailikni kyunnakrimni, ‘Ane yanung Thangmunrei shainung mumtolya yukpisundakhou.’ ”

³² “Keine nanung chimne yunpilei,” toubi Jesu'ne shun, “Moses'ne nanungei Thangmunrei mumtol yukpikhou nimak; heiya Keiyei Pawane Thangmunrei mumtolya nanungei pikhou.

³³ Kouweiyo toulanungri, Dunpuei pikur mumtol heiri Thangmunrei yongchumbine, tlaipangpalnung khringchaan yenpikur A heiwarime.”

³⁴ Heitounei yane anungei kngai, “Upawa, heinaksi mumtolya kanungei karyomne pilaklo,” toubi buchakur.

³⁵ Heirou Jesu'ne yanung loushun, “Keiri khring chaanyei mumtol'hakme, Keinung wachangkur thimi heiri msultou naimakarou; heitoubi Keiya uklum thimi heiri yuikhat toukhi naimakarou.

³⁶ Asinungri Keine nanungei yunpiwurla, touri nane Keiya muwurla, heiya malungampimak.

³⁷ Keiyei Pawane Keinungei pilhakur thimi kantangne keinungei wachangrou, heitoubi keinungei wachangkur thimi kantangya Keine khingthutpimarou,

³⁸ ngamri Keine keitamyei kningya tounanungei Thangmunrei kyong nimak, heiya Keiya yenmalhetpikur Aiyei kningya Keine tourou.

³⁹ Heirou Keiya yenmalhetpikur heiwayei kningri kouweiyo toulanungri, Ane keinungei pilhakur thimirap namyerwaya khatchakhi maangyernung yamaklei, heiya Keine ya namya kluiyei tlainirou khringei chaanra ringthutyerheirou.

⁴⁰ Ngamri Keiyei Pawane touyerkni heiri kouweiyo toulanungri Aiyei Chanapawaya mubi heirou aya uklum thimirap namyerwaya khringei rongchanya phayerkni. Heirou Keine yaya kluiyei tlainirou khringei chaanra ringthutyerpirou.”

⁴¹ “Keiri Thangmunrei yongchumpi mumtol” toubi Ane yunnarou, thimi rapne aingamrou kalthi yanimakne yunrilyoukur.

⁴² Heitounei ngamrou yane kyun, “Napawa heiri Josephbei chanapawa nimakeiko? Kane aiyei pui-payakhi muchilei. Heiyanungri koutounei asinungri ane Thangmunrei kyongme toubi yunthutkuraeiyo?”

⁴³ Heirou Jesu'ne yanung loumallangkur, “Naitamne yeetkril heiri donglaka.

⁴⁴ Kouweiyo toulanungri Keiya yukmalhetpikur Pawane napung-khatya keinungei heiruilhakpikur nimakne, thimi hukhatnekhi keinung wachangkur manemakrou; heirou kluiyei tlainirou Keine aya ringthutyerrou.

⁴⁵ Thimkhui rapne asitoubi mayekhoulei, ‘thimi kantangya Dunpune marnopirou.’ Dunpuei kyunya ninglhakbine, heirou airouwei marnoloukhei thimi heiri keinung wachangrou.

⁴⁶ Heisi toubine a heine Pawaya muwurla touneikhi nimakhui; heiya Dunpuei hoikur thimi heitomni Pawaya muphawurla.

⁴⁷ Keine nanungei chimne yunpilei: Uklum thimini klui naimak khringchaan pharou.

⁴⁸ Keiri khringchaanyei mumtol heirime.

⁴⁹ Naiyei nutar-patar rapne ramhangra Manna chamaikhou, heiya yari hiwurthu.

⁵⁰ Heiya Thangmunrei kyong mumtol heiri anaksime touri huhune mumtol heiya shailoukur thimi heiri hikur naimakarou.

⁵¹ Keiri Thangmunrei yongpikur khringei mumtol heiwari. Huhune mumtol heiya shailanungri, a heiri himakrou. Keine anungei piroukyou mumtol heiri Keiyei sharung heirime, Keine heiya piwurbi tlaipangne khring chaan pharou.”

⁵² Yane tlou heiya yeetrilwurbi yaihangra malungkharilkur. “Kousitoubi napawa heiwane aiyei sharungya chamainungei kanungei pirouweiyo?” toubi yane kngai.

⁵³ Heirou Jesu'ne yanung shunkur, “Keine nanungei tanghakni yunpilei: Thimiyei Chanapawaei sharungya chamaimanung, heitoubi Aiyei heeya mongmanungri, nanungei khringei chaan tou heiri makrou.

⁵⁴ Huhune Keiyei sharungya chamailanung, heirou Keiyei heeya monglanungri, anungei khringei chaan leirou, heitoubi Keine aya kluiyei tlainirou ringthutyerpirou.

⁵⁵ Ngamri Keiyei sharung ari chimmei murchak, heitoubi hee ari chimmei mongnungei murchak.

⁵⁶ Huhune Keiyei sharungya chamaibi, heitoubi Keiyei heeya mongloukur thimi heiri Keinungei klei, Keine anungei klei.

⁵⁷ Ringbi klei Pawane Keiya yenmalhetpi, heirou Aingammei Keikhi ringbi klei. Heinakrimni huhune Keiya chamaikur thimi heiri Keiyei ngamne akhi ringrou.

⁵⁸ Heiyanungri, Ari Thangmunrei kyong mumtol: Mumtol heiri nai nutar-patar rapne chamailoubi, heitoubi hikur heinaksiri nimak. Mumtol heiwaya chamaikur thimi heiri klui naimakne ringrou.”

⁵⁹ Tlou ari Jesu'ne Caperna-um'yei Pukhrumna Cheemra marnopiwurkhou.

Klui naimak Khring Chaanyei Tlourap

⁶⁰ Aihil chanthung thimi chungne Aiyei tlou heiya mayeknarouri yane yunrilkur, “Aiyei marnopikur heiri beimak lulei. Huni heiwaya ninglhak manerouwo?”

⁶¹ Yaihangra tlou heiyei ngamrou kalthi yeetrilbi leikur heiya ya hukhatnekhi anungei yunpimanungkhi, Jesu'ne muwurbi Ane yanung kyun, “Keiyei kyun tlou awane nanungeiri keihilla chanthungnanungei klu hoinaleiko?

⁶² Heiyanungri, Thimiyei Chanapawane haallei Aiyei leikhounara kallengkurya nane muphaheirouko?

⁶³ Heirou khringei chaanya yenpiri Dunpuei Lhawai heiya tlaipangei mane-mantrang heine koukhatkhi karsukmakarou. Keine nanungei yunpikur tloulhangrap heiri Dunpuei khringchaanya yenpikur Lhawai heirime.

⁶⁴ Heiya hoiyanungkhi na hukounakne heiya malungampimaklei.” (Jesu'neri, kyou'rouweini hunekhi aiyei kyunya uklumpimakrou, heitoubi hune Aya yorrouwo touri kmu.)

⁶⁵ Heirou Ane hanuikhi yenyunthu, “Heiyei ngamhakrou Keine nanung yunpiwurkhoula touri, Pawane heihakya tounanungei hoiyerkur nimakne hukhatnekhi keinung wachangmakrou.”

⁶⁶ Heiyei ngamne, Jesuei hilthung thimirap chungwane hil kallengurbi, hukhatnekhi akou kalhonne chamakeirouhui.

⁶⁷ Ngam heine ane aiyei ruishik chiple-khninungkhi kngai, “Heitoubi nanekhi Keiya lakkurkhoubi shaalnileiko?”

⁶⁸ Heirou Simon Peter'ne loumallang, “Upawa, kane neiya lakurkhoubi huileinara charouwo? Neinungri klui naimakei tloulhang klei.

⁶⁹ Heirou kane neiya malungamlei, kane muwurla touri nangri Dunpurei kyong Khying Puhakme.”

⁷⁰ Heirou Jesu'ne loushun, “Keine na napung chiple-khniya khalthutkur nimakeiya? Heiya hoiyanungkhi naihangrei napung-khatne khril lhangaimak thimi hoileihui!”

⁷¹ Ane Simon Iscariotyei chanapawa Judas'yei ngamrou yunkur, ngamri Judas heiri, ane ya napung chiple-khniyei hangra yaothimi hoiyanungkhi, ane Jesu'ya yorchaeirouhui.