JOHN 19 - KHYINGEI PU'TLOU Bible (BSI)

¹ Heirouri Pilate'ne Jesu'ya tanglouheibi heirou aya umkur.

² Heitoubi raallui rapne thru lukhup khat sheembine Aiyei lura makhupbangkur; heitoubi yane Anungei linglikchul mrao khat nabangpikur,

³ heirou yane aiyei maibongra wachangbi kyun, “Jehudi rapbei Krungri pulchi hoiniyasu!” Heirou yane aiyei pongra wachangbi Aya maibira phitkur.

⁴ Pilate'ne hanui kallengne thimichung leinara wathukbine kyun, “Thilak, Keine napawa awaya nai maibongra urthutbi nanungei muyerlei touri Keine napawa awayei doura klal dayernanungei aimral koukhatkhi phamaklei.”

⁵ Heirouri Jesu'ne thru lukhup khupbine heirou linglikchul mrao nabi wathukeinung, heirou Pilate'ne yanung kyun, “Thilak! Napawa heiri bi arou leiyurame!”

⁶ Heirou Suipipu raple Pukhrumna cheemmei bomtang thimi rapne Aya loumunarouri, yane ungraobi kyun, “Ayari manyarhatlak! Ayari manyarhatlak!” Heirou Pilate'ne yanungei kyun, “Heiyanungri nane Aya ruilouheibi manyarhatlaka. Heiya keineri Aidoura klal dayernanungei ngamri koukhatkhi phamak.”

⁷ Heirouri Jehudi rapne heimallangthu, “Kaiyei youkna chaylamyei hilthungne Ari hibom thuk thimi khatme, ngamri Aiyei mur'hakni Ari Dunpuei Chanapawame toubine yunthutkhou.”

⁸ Heirouri Pilate'ne heinaksi kyunya mayeknarou ari duiduine chiwurthuwa.

⁹ Ane pichar touna bira yenkallenglhakbi hanuikhi Jesu'nung hungkngai, “Nangri koulhangrei kyong thimiyo?” Heiya Jesu'ne loumallangmak.

¹⁰ Heitounei Pilate'ne anungei shun, “Nangri Keiyei kngai mallangmakrouko? Keine neiyari malhetkurkhi mane heirou manyar'hatkurkhi manelei touri nang mumako?”

¹¹ Heirou Jesu'ne loumallangkur, “Nangne keidoura toumane mantrang klei heiri Dunpune neinungei piwurkhou. Heiyanungri Keiya neihutra pilhakur napawa heiri duiyei borh urthimi.”

¹² Pilate'ne heitoubi kyunya mayeknarouri, ane Jesu'ya malhetdurnanungei lam raphakur. Heiya thimi rapne kalthi hei'ungraokur, “Nangne aya malhetlanungri, nangri Krung Caesaryei paluihak nimaklei! Hukhatne aitamya Krungme toubi yunthutkna thimi heiri kaiyei Krungya karhou thimime!”

¹³ Heirou Pilate'ne kyun heiya mayeknarouri, ane Jesu'ya urthutloubi Hebrew tlouni ‘Gabbatha’ toubi ung pichar touna bira wa'omkur. (Pichar touna bi heiri thleimaira thlungpaak lambine sheem. )

¹⁴ Tlaini heiri Ralthutpinei Kumtlun tlainiyei maibong nunghangei hoikur. Pilate'ne thimi rapnung kyun, “Nai Krungri ariyame!”

¹⁵ Heirou yane ungraobi heikyun, “Aya ruilouheilaka! Aya ruilouheilaka! Heitoubi Ayari manyarhatlaka!” Heirou Pilate'ne yanungei loukngai, “Nane Keiyari naiyei Krungya manyarbi hatyernileiko?” Heirou Suipi pu rapne loumallangkur, “Caesar nimakne, kaiyeiri krung deiri makme!”

¹⁶ Heisitoubi Pilate'ne Jesu'ya manyar'hatnanungei yaihutra pithutkur. Heirouri yane Jesu'ya pura urthutloukur.

Jesu'ya Manyar'hatkur

¹⁷ Heitoubi ane aitamei heeng karbakya urbine, heirou Hebrew tloura ‘Golgotha’ toubi ung bira wa'tlungkur, bi heiri ‘Lu'thru khingna bi’ toubikhi mu'kna.

¹⁸ Bi heirou yane aya manyarhatkur; heitoubi yane bi heirou thimi napung-khniyakhi, Jesu'ya tlailamra khoubi, thyoi-thyara napung khatsol manyarbi hatkur.

¹⁹ Pilate'ne “Nazarethrei Jesu, Jehudi rapbei Krung” toubi mu'kna khat mayebi heengkarbakra hempopkur.

²⁰ Heinaksi mayebi muyerkur heiya thimi rapne pathikur, ngamri Jesu'ya manyarhatna bi heiri khukharthillouwei kalni tlatrilmak. Muyerna tlou heiri Hebrew, Latin heirou Greek tlou rapne mayekur.

²¹ Suipipu rapne Pilate'nung shun, “Jehudi rapbei Krung” toubi mayemaklo, heiri aitamne ‘Keiri Jehudi rapbei Krungme’ toubi yunthutkna.

²² Heirou Pilate'ne loumallangkur, “Keiyei mayekur heiri mayekurra, heisi leiwurlakasu.”

²³ Raallui rapne Jesu'ya manyarhatdurbi, heirou yane Aiyei shamb rapya louheibi shungphali thukni threlkhaibi ya napung khatkhatne shung khatsol yerkhailoukhei. Heirou yane dourei waiyoubi mayuphaei thruina tekhi yaomak phiyeng khatdei linglikchul heiwakhi,

²⁴ yane loubi, “Awari threlkhaimakase, kaihangra hune likarsui lhangai hoileiyo, meirui thinanungei tuypeek khingthiyase, heitoubi louwase,” toubi yunrilbi yerloukur. Ari Khyingei lailikra atoubi yunkhou heiya chimne hungthuknanungei touwurkhou: “Yane Keiyei shambya yaihangra yerrilwurla, heitoubi Keiyei linglikchul heinungtlim meiruikhi thirilwurla.” Yunthutkur tlou heinakrimni raallui rapne touwurkhou.

²⁵ Jesuei heengkarbak pongrei mayungbi leikhou thimirap heiri Aiyei puiwi, Aiyei puiwiyei 'tei, Clopas'yei nu Mary'le heirou Mary Magdalene yarapri.

²⁶ Jesu'ne Aiyei puiwile, aiyei nam'rouwei malungshidui ruishik heiwakhi bi heirou mayungbi heiklei kmu; heirouri Ane Aiyei puiwinung kyun, “Napuiwiyo, neicha napawaya thilak.”

²⁷ Heitoubi Ane ruishik heiwanung shun, “Neipuiya thilak.” Kheen heirouwei waiyoubi ruishik heiwane aiyei puiwiya aicheemra ruilouheikur.

Jesu Hikur

²⁸ Asinung lhou namma luilhakrouwa touri Jesu'ne kmu, heirou Khyingei lailikrei kyun heiya chimne hungthuknanungei ane atoubi yunkhou, “Kei yui hatdura.”

²⁹ Kheen heirouri bi heirou daarpang khatra darkhayui bil'thimni shukbi heikhou; heirouri yane darkhayui kha-khyur heiya phimtum khatra lupdokbine, hyssop heengban msurra yepbi heirou katmalambi Aiyei murra katmandopikur.

³⁰ Heirou Jesu'ne heiwaya loumongloubi kyun, “Awari luikurra!” Heitoubi aiyei lu shikhupbine kat'hikur.

Jesu'nei Onhimra Cheipakni Thunkur

³¹ Heirouri Jehudiyei lhou'ur upa rapne Pilate'nung buchabine manyarhatkur thimi rapbei ho umdeekkureise, heitoubi yai khi'lhungrap heiri heengkarbak'rouwei khingsundawureise toubi washunkur. Koungameiyo toulanungri yane thimi khi'lhungrap heiya Mathrilna tlainirou heengkarbak doura manyarbi khounimak, ngamri hungbi klei Mathrilna tlaini heiri namyerrouwei khyingdui tlaini.

³² Heitounei ngamrou raallui rapne wabi lamkrine Jesule manyarbi hatkanthrinkur napawa napung-khniya waiknaine ho umdeekkur.

³³ Heiya yane Jesuei lhangra hungeinungri Jesuri louhiyurame touri mukur, heingammei yane aiyei ho heiri umdeekmakur.

³⁴ Heiya raallui napung-khatne aiyei cheipakni Jesuei onhimra kat'thunkur, heirouri heele-yuile yenkungsundakur.

³⁵ Thukkur lhou heiwaya muthungkur napawa heine lhouthuk heiyei ngamrou yunthutkhou, heirou Aiyei yunthutkhou heiri chimhakme, heitoubi yunthutkhou heiri chim touri ane kmu, heirou Aiyei kyun heiri chimleime touri nanekhi mubine uklumrou.

³⁶ Tlou awari khyingei Lailikya chimne tlungyernanungei toume; “Aiyei thruri khatchatomkhi umdeekmakrou.”

³⁷ Heitoubi khyingei lailik bi khatra atoubi yunkhoukhi khat klei: “Yane cheine thunkur napawa heiya thimi rapne mit'thrilbi leiheirou.”

Jesu'ya Khi Krui

³⁸ Heihillouri, Arimathea'rei Joseph toubi ung napawa heine Pilate'nung wabi Jesuei khi'lhung heiya anungei pilaklo toubi wabukur. (Joseph heiri Jesuei hilthungkhou napawa khat, heiya ane Jehudi rapbei lhou'ur thimi rapya chinei ngamrou miya muyermakne munne hilthungbi leikhou napawa khat. ) Pilate'ne anungei yapiwurbi khi'lhung heiri loukhei yawaroume toubi loushun, heitounei Josephni wabi khi'lhung heiya waloukhei.

³⁹ Heirou haalnungkhi masa'khatnang Jesuei leinara munne wakhou napawa Nicodemus'khi, muiknam shirekle mroh markapbi tungka khatdeimal heibine Josephle kalhonne wakur.

⁴⁰ Yakhuntane Jesuei khi'lhungya loushundabi, Jehudi rapbei youkna hilthungne khi'lhung heiya muiknam shirekle mrohle marshikbine, heitoubi phaikhring punshelni lhomphopbi, khi heiya ruinanungei marshikkur.

⁴¹ Jesu'ya hatdurna bi heirou yekul khat klei, heirou yekul heiyei rilla thimi hukhatyakhi phummakna lhanran khatkhi louklei.

⁴² Thangei tlaini heiri Mathrilna tlainikhi khoi, heirou lhan heikhi naknara leinei ngamrou, yane Jesuei khi'lhung heiya bi heirou phumkur.