JOHN 16 - KHYINGEI PU'TLOU Bible (BSI)

¹ “Keine nanungei anaksi tlou rapya yunpinarou, tlou heine naiyei uklumya kanthrityermakrou.

² Nayari Pukhrumna Cheemrei hulthutdurnungei trumkhi hungeirou, heirou thimi hukhatne naya hatdurbi, heirou aiyei toukur lhou heiri Dunpuei watlhoume toubi ane ningchabi leinei kheenkhi hungeirou.

³ Thimi rapne heinaksi lhou rapya nanungei toupiheirou, ngamri yane Keiyei Pawayakhi heirou Keiyakhi mupimaklei.

⁴ Heiya Keine tlourap heiya nanungei yunpiwurla, touri yane heinaksi lhou rapya tounanungei kheen hungthukeinung, heirou Keine nanungei lamkrine yunpiwurlame toubi nane ningthutdeirou.” “Keine heinaksi lhou rapya haalnung yunpikhoumak, kouweiyo toulanungri Keikhi nakou leimalnakhou.

Lhawai Khyingei Lhoutou

⁵ Heiya asinungri Keiya yenmalhetpikur heiwayei bira Keiri charouwa, heiya naihangra hukhatnekhi Keiya koulhangra charou waiyoukurawo toubine ngaipimaklei.

⁶ Heirou asinungri nanung yunpiwurla, naiyei ukning klahni thimmura.

⁷ Heiya Keine nanungei chim tlouya yunpilei: Keiri nanung'tlim chakurni lhangai; ngamri Keine chamakanungri, nanungei trungpinanung pu heiri yongmarou. Heiya Keine chawuranungri, Keine aya nanungei yenmalhetpirou.

⁸ Heirou ane yongbi, tlaipangpallei thimi rapnung yai toubi klei borhyei lhou rapbei ngamrou, heirou chim lhouwei ngamroukhi heitoubi Dunpuei picharyei ngamroukhi ane shunpirou.

⁹ Yane borhyei lhouya touwurla, ngamri yane Keiya mupimaklei;

¹⁰ yane tharmu klallei lhouya touwurla, ngamri Keine Pawaei bira charouwa, heirouri nane Keiyari kallengne muphamarou,

¹¹ heirou yane chimmei picharkhi toumakura, ngamri tlaipangpallei puyari pichar luilhakurla.

¹² Keine nanungei shunpinung chungne leileihui, heiya asinungri naiyei ninglhaknung chungachakura.

¹³ Heiya Lhawai Khyingne yongeinung heirou ane Dunpuei ngamrou chim tlouya mutpirou, heirou ane naya chimna lhangra ruilhakpirou. Aneri aitamei ngamrou yunmakrou, heiya aiyei mayekkur rapya ane yunpirou, heirou ane hungthukrou kyou lhou rapyakhi yunpiyeirou.

¹⁴ Ane Keiya thang alyerrou, ngamri Ane Keiyei kyunya loulhakpirou heitoubi nanung yunpirou.

¹⁵ Keiyei Pawayei klei namma heiri Keiyei hoirou; heitounei ngammei Keine yunkhou touri Lhawai Khying heinungei Keiyei pikur namyerwa heiya loubi heirou ane nanungei yunthutpirou.”

Ukning Klah Heirou Hakrao

¹⁶ “Kheen lepcha leibi heirou nane Keiyari muphamarou, heitoubi lepchaei hillouri nane Keiya muthurou.”

¹⁷ Heirouri Aiyei ruishik thane yaitam ngairilkur, “Ane kanungei, ‘Lepcha leibi kane Aya muphamarou, heitoubi lepchaei hillouri kane Aya muthurou,’ toubi kyun heiri kouyaeiyo?

¹⁸ Heirou ‘Lepcha’ touri kouya kyunno? Aiyei kyun heiri kouwei ngamyawo kari mumaklei!”

¹⁹ Jesu'neri Aiyei yunkur tlou rapbei ngamrou yane Anungei hanui kallengne ngaithiniwura touri muwurla, heitounei ngamrou Ane yanung shunkur, ‘Lepcha leibi nane Keiya muphamarou, heirou lepchaei hillouri nane Keiya muthurou’ toubi shunkur heiyei ngamrou nane naitam ngairilkurako?

²⁰ Keine nanungei chimya yunpilei: Naneri ungraobi chapbeirou, heiya tlaipangneri haraorou; nane ukning lahrou heiya nai ukning klah heiri haraonei lhangra hollhakeirou.

²¹ Napuiya khatne nao puklum hungphalanungri ane lhawai klah, ngamri aiyei klah-mrim dourou younei trum hungtlungura; heiya nao pukur hillouri, ane aiyei klah-mrimkur heiri malumkur, ngamri ane tlaipangra nao pukurlame toubi hakrao.

²² Heinakrimni nanungei leilei: Asinungri nai lhawai lah'leihui, heiya Keine naya hanui muphaeirou, heirouri nai ukningra nungkngaini thim'rouwa, heinaksi nungkngai heiri hunekhi nairouwei louthutkur manemakrou.

²³ “Heinaksi tlaini hunganungri, nane Keinungei koukhatkhi ngailounung makrouwa. Keine nanungei chimhakya yunpilei: Nane Keiminra koukouya buchalanungri, Pawane nanungei pirou.

²⁴ Asilumpha nane Keiminra koukhatkhi buchamakhui; buchalak, heiyanungri nane pharou, heitoulanungri naiyei hakrao heiri rongtlung hoirou.

Tlaipangya Mane

²⁵ “Keine nanungei anaksi lhou rapya shunpinanungei toubi heinakei mu'kna tloulha rapya yrengbi kyun. Heiya heinaksi mu'kna tloulha rapya yrengmakne yunpina trumkhi hungeirou, heiya Keine Pawayei ngamrou nanungei khminne yunpiyeirou.

²⁶ Heitoubi heinakei tlaini hungeinung, nane keiminra Anung buchaeirou; heirouri Keihakni nanung'tlim Pawanungei buchapiroume touri Keine nanungei yunmaklei.

²⁷ Kouweiyo toulanungri Pawa Ahakne naya malungshipilei. Ane naya malungshipi, ngamri nane Keiya malungshipi heirou Keiri Pawa'rouwei kyongme toubi nane Keiya uklumpila.

²⁸ Keine Pawa'rouwei tlaipangra yongpilei; heirou asinungri Keine tlaipangpalya lakurkhoubi Pawayei bira kathurouwa.”

²⁹ Heirouri Aiyei ruishik rapne Anung kyun, “Asinung Nangne kanungei mu'kna tloulharap yaomakne yertleng yunpiwurla.

³⁰ Asinungri kane muchila touri Nangri namma muwurla; heine hukhatnekhi Neinungei tlou ngaithibom thukmaklei. Awane kaya uklumyerla touri Nangri Pawayei bom'rouwei yongpilei.”

³¹ Heirou Jesu'ne yanung loukngai, “Nane asinungri uklummuranu?

³² Kheen heiri asinunghak hungtlungura, arouri na nammane Keitamya lakurkhoubi, minung-minung trukchekurbi ai'aiyei cheemra kallengrouwa. Heiya Keiri Keitamtom leithungmarou, ngamri Pawane Keiya kalhonpibi leilei.

³³ Keine nanungei anakya yunkhoupila touri nane Keile marapbi leiyanungri nanungei kying hoirou. Tlaipangpalne naya mrim-nangyerreirou. Heiya nane kanthrambi leiyalo! Kouweiyo toulanungri Keine tlaipangpalya manekhoula.”