JOHN 10 - KHYINGEI PU'TLOU Bible (BSI)

Yaoshilpuei Ngamrou Yailim

¹ Jesu'ne kyun, “Keine nanungei tanghakni yunpilei: Yaocheemyei shumtrumra wachangmakne mnakra ranbangbi wachang thimi heiri mucha thimi heirou routang thimi.

² Heiya shumtrumra wachang thimi heiri yaorulya shilpi puhakme.

³ Heirou yaocheem shumtrum kngaak thimi heine anungei loulatpirou; heirou ane yao rapya khatsol mintlangbi ungeinung yane aihouya louyekmanre, heirou ane yaya ruithutpi.

⁴ Ane yaya heiruithutpibi, heitoubi ane yaimaibongra lamkrine loucharou, heirou yao rapne aihilla chanthunglei, ngamri yane aihouya yekmanrelei.

⁵ Yane dei huihillakhi chanthungmakrou, heinung'tlimri yane heinak thimi raprouwei trukurou, ngamri yane aihouya yekmanremak.”

⁶ Jesu'ne yanungei yailim tlou heiya yunpinarouri, heirou yaneri kouya kyunno touri muheimakura.

Jesuri Lhangai Yaoshil Pu

⁷ Heitounei Jesu'ne hanuikhi kyun, “Keine nanungei chimne yunpilei: Keiri yao rapbei hungchangna shumtrum.

⁸ Keiyei maibongrei loukleirap namyerwa heiri mucha thimi'thillang, heirou routang thimi'thillang. Heitounei ngamrou yao rapne yaihouya mayekpimak.

⁹ Keiri shumtrumhak, huhune keirouwei wachangkur thimini kalpi pharou, ngamri ane wachang-wathuk toubine kalleicharou, heitoubi namh marthumni manbobi leina bira shaipharou.

¹⁰ Heitoubi mucha thimi heine muchana'nungtom, heirou miya hatnanungei heirou maangyernanung tom wachanglei. Heiya Keiri naya khringchaan phayernanungei, heirou na nammaya khringchaan heiya marthumni phayernanungei yongpilei.”

¹¹ “Keiri yao rapnung'tlim hipikur mane lhangaiyei yaoshil Pume.

¹² Heirou yaoshil puhak nimakne, kneek yaoshilpu heineri yaorul heiri aiyeihak nimak toubiri, ane yekshang wachangya loumulanungkhi yaorulya lakkurkhoubi loutrukurou, heirouri yekshang heine yao rapya hulchekkurbi mailourou.

¹³ Kouweiyo toulanungri a heiri kneek yaoshilpu hoinei ngamrou yaorul rapya ane lhou hoipimak, heitounei loutrukur.

¹⁴ Keiri lhangai yaoshil puhakme;

¹⁵ Keiyei Pawane Keiya mulei, heirou Keinekhi Pawaya kmu, heinakrimni Keine Keiyei yao rapya shakrung kanreni kmu, heirou yao rapnekhi Keiyei shakrungya kmu. Heitoubi Keine yao rapnung'tlim hipikurkhi manelei.

¹⁶ Heirou yaorul hangra yaomakei klei Keiyei yaorap deirakhi leileihui. Keine yayakhi urlhakpirouwa; heirouri yane keihouya ninglhakpirou, heisitoubi yakhi yaoshilpu khatdei daakrei klei yaorulkhat hoirouwa.

¹⁷ “Pawane Keiya malungshipiyei ngamri Keine Keiyei rongchanya makatkur mane, heitoubi hanuikhi heiya mallenglhakthurou.

¹⁸ Thimi hukhatnekhi Keiyei lhawaiya keirouwei louthutkur manemakrou. Heiya Keine koumankhi naimakne Keiyei lhawai aya leemni makatdurla. Ngamri Keine heiya makatkur manelei, heitoubi heiwaya mallengkurkhi manelei. Lhou ahakya Keiyei Pawane Keiya touyernanungei Chay piwurkhoula.”

¹⁹ Tloulhangrap heiyei ngamrou thimi rapbei hangra lhang-lhang darilkur.

²⁰ Heirouri kulyom rapne yunrilkur, “Ari lhim popkur thimileime! Ari pongurame! Koutounei nane aiyei kyunya louningkurro?”

²¹ Heiya thimidei thane yunkril, “Lhimkrao pop thimiri heinaksi tlou yunchangmakrou! Kousitoubi lhimkraoni mitdeo thimiya lhangaiyerkur manerouwo?”

Jesu'ya Yapimakur

²² Heirouri phalbinung, Jerusalem'ra Pukhrumna Cheem marthingnei Knei khat klei,

²³ Tlaini heirou Jesu'ne Pukhrumna Cheemra Solomonyei yuntlangmaira karwaichayeinung,

²⁴ bi heirou Jehudirap chungne loukar'umbi loukngai, “Nangne kaya kounak tlane khalchanayerrouwo? Kanungei chimne yunpilak: Nangri Messiah nimakko?”

²⁵ Heirou Jesu'ne loumallang, “Keine nanungei yunpiwurla, heiya naneri Keiyei kyunya tlou'khoine loupimak. Keiyei Pawane Keiya touyerkur lhourap heine keinung'tlim yunpilei;

²⁶ heiya naneri Keiyei kyunya uklumpimaklei, kouweiyo toulanungri, nari Keiyei yaorap nimakme.

²⁷ Keiyei yao rapne Keiyei kyunya mayeklei, heitoubi Keinekhi yaya kmu, heirou yane keihilla chanthunglei.

²⁸ Keine yanungei khringchaanya pi, heine yane kouniroukhi himakrou. Heirou hukhatnekhi yayari keihutrouwei lungloukhei manemakrou.

²⁹ Keiyei Pawane keinungei pikur heiri nam'rouwei duine tanglei, heirou hukhatnekhi yayari Pawayei hutrouwei lungloukhei manemakrou.

³⁰ Ngamri Pawale Keiri khatsi hoilei.”

³¹ Heirouri thimi rapne thlung khulloubi Aya khinghatrou waiyoukur.

³² Heitounei Jesu'ne yanung loushun, “Pawane keinungei pikur lhangaiyei lhou rapya chungwane nai maibongra touwurkhoula; heitounei ngamrou lhourap heinung'tlim nane Keiyari thlungne khinghatrouwako?”

³³ Heirou yane loumallangkur, “Nangne lhangaiyei lhou rapya touwurnei ngamrou kane neiya thlungne khinghatrou waikyou nimakme, heiya nangne Dunpuya mshitdei tlou yunwurnei ngammeime! Nangri Thimi hoibine, heirou neitamya Dunpume toubi yunkanthangnalei!”

³⁴ Heirou Jesu'ne loumallangkur, “Awari Dunpuei yunkhou touri, naiyei Chaylamra atoubi mayebi leilei: ‘Nari thrai rapme.’

³⁵ Heirou kaneri mulei touri Khyingei Lailikrei kyun heiri klui naimakne chim hoirou; heirou Dunpune lhangaiyei Pao-laaya piwurkhou thimi rapya thrairap toubine ungpirou.

³⁶ Heiya keinungeiri, Pawane Keiya khalthutdurbi tlaipangpalla yenmalhetpiwurla. Heiyanungri koutoubi nane ‘Keiri Dunpuei Chanapawame’ toubi yunwurnei ngamrou minamnei lhou toume toubine Keiya yunkurrawo?

³⁷ Heiyanungri Keiyei Pawane Keiya touyerkni lhou rapya Keine toumakanungri, nane Keiyari malungampimak.

³⁸ Heiya Keine heinakei lhou raypa toukur hoiyanungri, nane Keiya uklumpimaka'nungkhi, Pawane keinungei klei heirou Keikhi Pawanungei kleime toubi hanuitomcha, heirou hillou ramphane nai munanungei Keiyei touthutkur lhouthilla'nungkhi thibine malungampilakma!”

³⁹ Heitounei ngamrou yane hanuikhi Jesu'ya mannanungei wairaangkur, heiya Ane yaihutrouwei karlheithutkur.

⁴⁰ Heirou Jesu'ne hanuikhi John'ne Aya yuiluppina bi Jordan kungra yenkallengbine bi heirou Ane yarekwurkhou.

⁴¹ Bi heirou thimirap chungne wakar'umbi heirou Anung kyun, “Johnri koukhatkhi kngakei lhou touthutkhoumak, heiya hoiyanungkhi heinakei ngamrou aiyei kyun namyerwa heiri chimthillei.”

⁴² Heingammei bi heirou klei thimirap chungne Aya uklumkur.