JOHN 1 - KHYINGEI PU'TLOU Bible (BSI)

Khring Chaanyei Tlou

¹ Tlaipang kanrebongnang Tloulhang louklei, Tloulhang heiri Dunpukou louklei, heitoubi tloulhang heiwari Dunpuhak.

² Tloulhang heiri kyou'rouweini Dunpukou louklei.

³ Airouwei Dunpune put namyerya sheemthutkhou; Airouwei nimakne Dunpuei hutsarap namyerwa heiya khatchatomkhi sheemthutkhoumak.

⁴ Tloulhang ari khring chaan waiyouna, heitoubi khring chaan heine tlaipang thimi rapnung kwaar yenpi.

⁵ Kwaar heine albi kmehya waaryerlei, heirou kmeh heine kwaar heiyei alya kouniroukhi mityerchangmak.

⁶ Dunpurei yenmalhetpikur napawa, aiyei minri John toubi ung, Paocha thimi khat pothutkhou.

⁷ Ane thimi rapnung kwaar heiyei ngamrou shunthutpikhou, heine thimi namyerni Lhangai Pao-laaya mayekbi uklumrou.

⁸ Ahakri kwaarri nimak; heiya ane kwaar heiyei ngamrou shunthutpinanungei yongpi.

⁹ Kwaarhak heiri tlaipangpalla yongbi heirou thimi rapbei doura waaryerlei.

¹⁰ Tloulhang heiri tlaipangra louleikhou, heirou Dunpune Airouwei tlaipangya kanrethutyerya hoiyanungkhi, tlaipang thimi rapne Aya mupimak.

¹¹ Ane Ai'rammei thimi rapnung'tlim yongpi, heiya Aiyei thimi rapne Aya loulhakpimak.

¹² Heisiya hoiyanungkhi, Aya loulhakbi uklum thimirap namyernung, Dunpuei chanaorap hoichangnanung mantrangya piwurla.

¹³ Yari tlaipang sharungei yu-cha rapya yenranna heeyei hilthungei nimak, heitoubi thimiyei kningei hilthungei pukkurkhi nimak, heiya Dunpuei kning hilthungei pukkur thimirap.

¹⁴ Heitoubi Tloulhang heiwari tlaipang sharung khoine pukbine, kringknale, chimne bilthimni, kaihangra thrungkhoula. Heitoubi Ane Pawa'rouwei phakur, Aiyei khatchatom khoi Chanapawa khat khoine Aiyei thang'al heiwaya kane muphawurla.

¹⁵ John'ne Aiyei ngamrou muthungkur heiwaya tlou khoine ane paothutkhou, “Keine shuthutdeinung atoubi kyunri Aiyei ngammei, ‘Keihilla hungbi klei A heiri keiya beimak duiyei tang thimi khat, ngamri A heiri keiya pukbongei waiyoubi louklei thimi.’ ”

¹⁶ Heirou Aiyei bil thimbi klei kringpiyei phorya kanungei waiknaine piwurla.

¹⁷ Dunpune Moses'nung Tloulamya pikhou, heiya kringpile, chim heirapri Jesu Christa'nung piwurla.

¹⁸ Thimi hukhatnekhi Dunpuya muthimakhui, heiya khatchatom khoi, Dunpuei bomra klei Chanapawa heinungtom Ane kanrethutpila.

Yui Luppi John'yei Pao-laa Shunthut

¹⁹ Jerusalem'ra klei Jehudi rapbei Upa rapne Suipipu thale Levirap thaya John'yei leinara heimalhetbi, ‘Nangri huwo?’ toubine wangaikyer.

²⁰ Heirou John'ne koukhi karlheimakne mallangbi, tanghakpane louyunthutpikur, “Keiri Messiah nimakme.”

²¹ Heirouri yane “Heiyanungri nangri huwo? Elijahko?” toubi kngai. “Keiri Elijahkhi nimak,” toubi John'ne loumallangkur. “Heiyanungri nangri Thimkhuiko?” toubi yane hanui ngaithu, “Nimak, keiri Thimkhuikhi nimak,” toubi John'ne loumallangkur.

²² “Heiyanungri nangri huwo, kanungei bei yunpilak,” toubi yane anung kngai. “Kane neiyei kyun heiwari kaya heimalhetkur thimi rapnung pao mallengthunungme. Neiyei ngamrou nangne koutoubi yunkni leileiyo?”

²³ John'ne Isaiah thimkhuiyei yunthutkhou heiwaya mintlangbi loukyun, “Keiri ramhangrei ungraochabi karwaicha thimime: ‘Nane Dunpuei chananungei lamya maryengyerlak!’ ”

²⁴ Heirouri Lhangai karsa thimi rapbei heimalhetkur paocha rapne John'nung hanuikhi kngai,

²⁵ “Heiyanungri nangri Messiah'khi nimak, Elijahkhi nimak heirou thimkhuikhi nimakme toulanungri, koutounei nangne miya yui luppikuro?”

²⁶ Heirou John'ne loumallangkur, “Keine yuira luppi, heiya nai hangra nai mitne muphamak thimi khatri mayungbine leilei.

²⁷ A heiri keihilla hungeirouhui, heiya keiri Aiyei horei khorkhang rui thiksutpiyakhi mtikchamaklei.”

²⁸ Lhourap heiri John'ne yui luppina Jordan Kungei kulkung lhangrei klei Bethany'rei thukkurkhou.

Dunpuei Yaoshun

²⁹ Heithangei tlainirou Jesu'ne John'yei leinara wakurya loumubi ane loushun, “Thilak, tlaipangei borhya urpinanungei Dunpuei yaoshun heiri bi arou leiyura.

³⁰ Keine shunthutpiyei kaalnung atoubi kyun ari Aiyei ngammei, touri, ‘Napawa khat keihilla hungleikhui, A heiri keiya duiyei tangthimi, ngamri A heiri keiya pukbongei youbi louklei.’

³¹ Keihaknikhi A heiri kounaksi thimi hoiroueiyo touri mukhoumak, heiya keine Aya Israellei thimi rapnung muyernanungei toubine yuira luppinei lhouya toupikhou.”

³² Heirou John'ne muthungkur tlou rapya ane yunthutpikur: “Thangmunrei Lhawaine mathru'nakne yongbi, heirou Aidoura chubi klei heiwaya keine loukmu.

³³ Keihakni A heiri huwo touri mukhoumak, heiya keiya yui luppinanungei yenmalhetpikur Dunpune yukshunya keine loumayek, ‘Lhawaine yongchumbi heirou Aidoura chubi klei nangne loumuheirou; heirou Lhawai Khyingne kalhonbi yui luppirouri Ahak heirime.’

³⁴ Keine heiwaya muwurla, heitoubi keimitdei mukur heiya keine nanungei yunpilei touri Dunpuei Chanapawa heiri Ahakme,” toubi John'ne kyun.

Jesuei Lamkri Ruishikrap

³⁵ Heithangei tlainirou hanuikhi John'ne aiyei ruishikrap napung-khnile kalhonne mayungbi leiyeinung,

³⁶ Jesu'ne chabi kleiya mubi ane kyun, “Thilak, Dunpuei Yaoshun heiri arou leiyame!”

³⁷ Ruishik napung-khnine aiyei kyunya mayeknarou yane Jesuei hilla chanthungkur.

³⁸ Heirou Jesu'ne loukallekbi thinarouri, yane Aihilla heichanthungya Ane loukmu, heirou Ane yanung loukngai, “Nari kouya thiphawo?” Heitounei yane mallangmalom loukngai, “Rabbi, Nangri bi kourou kleiyo?”

³⁹ “Nane wabine thilak,” toubi Ane loumallang. Heisi tounarouri yane Akou kalhonne wabi Aiyei leina bi heiwaya wamukur, (kheen heinungri pung phali dalumma). Heitoubi yane tlaini heirouri Akou kalhonne leiwurkhou.

⁴⁰ Yaihang heirou napung khat heiri Simonyei nao Andrew.

⁴¹ Heirouri ane aiyei tei Simonya munarouri ane kyun, “Kane Messiah'ya muwurlame.”

⁴² Heisi tounarou ane Simon'ya Jesuei leinara heiruiheikur. Heirou Jesu'ne aya louthibine kyun, “Nangri John'yei chanapawa Simon nimaka! Heiya neiyari ‘Cephas’ toubi ungrouwa.” (Min ari ‘Peter’ toule khatnakdik, heiya mallengthutri ‘thlung’ touya kyun.)

Jesu'ne Philiple Nathanaelya Ungpikur

⁴³ Thangei tlainirouri Jesu'ne Galilee'ra wananungei kartinkur. Ane Philip'ya murilnarouri anungei shun, “Keihilla chanthungalo!”

⁴⁴ (Philipkhi Andrew'le Peter yakhuntayei leina khukarthil Bethsaida'rei klei thimi.)

⁴⁵ Philip'ne Nathanael'ya murilnarouri ane kyun, “Kane Moses'yei Chaylamra heirou Thimkhui rapne mayekhounarei kyun thimi heiwaya muwurlame. A heiri Nazareth yultlairei klei Josephbei Chanapawame.”

⁴⁶ “Nazareth'rei heinaksi lhangaiya thukrouri leileiko?” toubi Nathanael'ne loukngai. “Wabine thilak,” toubi Philipne loumallang.

⁴⁷ Heirouri Nathanael'ne Jesuei leinara wanarou, Ane loumubi Ai'msha-Aitamei ngamrou loukyun, “Israel thimihakri bi arou leiyame, heirou Anungri klal koukhatkhi makme!”

⁴⁸ Heirou Nathanael'ne Anung loukngai, “Nangri keiya kousitoubi kmu?” Jesu'ne anung louyunpi, “Philipne neiya ungbongnung nangri khyudhei trung holira louklei Keine neiya mukhou.”

⁴⁹ “Rabbi, Nangri Dunpuei Chanapawame! Heirou Israellei Krungleime!” toubi Nathanael'ne loumallangkur.

⁵⁰ Heirou Jesu'ne kyun, “Keine neiya khyudhei trung holira mukhou toubi yunnaroutom nangne Keiya uklumko? Heiya awaya duiyei tang lhou rapya nangne muphaheirouhui!”

⁵¹ Heirou Ane yanungei kyun, “Keine nanungei tanghakpane yunpilei: Thangmun laatbi heirou Dunpuei Thangring rapne Thimiyei Chanapawaei doura kyongle-kale karwaichabi klei heiwaya nane muheirou.”