JOEL 3 - KHYINGEI PU'TLOU Bible (BSI)

¹ “Kouweiyo toulanungri, heiyei tlaini raprouri, heirou trum heirouri, Judah'le Jerusalem'rei raal manloubi kul chalphopkur thimi rapya Keine yenmallengei kheenrou;

² heirou limrap namyerei thimi rapya ungkartilbi, heitoubi Jehoshaphatyei phaikara yenruisundarou; heitoubi bi heitamrou Keine yaidoura pichar toubine, Keiyei thimi Israel rapbei ngamrou shunrou; ngamri yani Israel rapya lim dei rapbei hangra hulcheklhakur, heitoubi Keiyei ramkhi yani yerkhailoukur.

³ Heitoubi yani Keiyei thimi rapbei doura meirui thirilbi, napawa douwaya chorit naimak napuiyayei hutra pilhakkur, heitoubi napuiya douwayari tulkou kartlengrilbine yani mongmalipbi leikur.

⁴ “O Tyre, Sidon heirou Palestia'rei thimirap, Keile naleri kouthuknarillei? Keine nanungei koukhat toupiwurnei ngamrou nani keinungei khlang lhakrouko? Nane keinungei khlang lhakrou ningchawanungri, naiyei touwurkhou heinung'tlim, mitrup khatdei rilla Keine naiyei ludoura yongdayerreise!

⁵ Kouweiyo toulanungri, nani Keiyei sinakhi lapakhi louheichila; heirou Keiyei manklu lalthum rapkhi namma mulouheibi naiyei Pukhrumna Cheemwaira peilhakurchila.

⁶ Heirou Judah'le Jerusalem'rei thimi rapyakhi, yaiyei ram'rouwei nani manlouheibi, Greek rapbei hutra yaya yorlhakurla.

⁷ Heiya asinungri Keine yaya fyoupirouwa, heitoubi nani yaya yorlhakkurna ram heirouwei yani raal youbine, yaidoura nani marhotdurkhounei khlang heiri Keine naiyei ludoura yongdayerouwa.

⁸ Heitoubi naiyei chanapuiya, chanapawarap heiri Keine Judah'yei chanao rapbei hutra yorlhakrouwa; heitoubi yanikhi tlatna ramrei klei Sabea rapbei hutra louyorlhakthurou. Ngamri Umpune heisibil yunkhou.”

⁹ “Gentile rapbei hangra nane atoubi paothutpilak: Raal marshiklaklo, hut-ho mantrang thimi rapya thoubanglak; Raalluirap nammaei pongra wachanglaka; Yane maibong lhangra heitonlhaklaksu!

¹⁰ Naiyei louhuina thir louhin harap heiri raalshon'nungei sheemlaka; Heitoubi naiyei longkhumrap heiri raal cheipak khoine sheemlaka; Mantrang shul thimi rapnekhi ‘Keiri lhouwame’ toubine yunlaksu!

¹¹ Khrangni wawalo, ram karyouwei klei limrap na nammane wathukbine bi khatrou lokpani kartillaka. Neiyei raallui rapya yensundapilo, O Umpu!

¹² Lim deidei rapkhi fyourillaksu; heitoubi Jehoshaphat'yei phaikara maibong lamkrine loukartillakasu; heitoubi bi heirou omkarhungbi klei Lim rapya Keine pichar toupiheirou.

¹³ Chamche sheemlakalo, ngamri trunwai maraowurchiya. Wawalo, darkha heiyui shumlakalo, ngamri heikhung heiri thimmura. Heirou heiyui khangkhi pahoiwurchiya. Heinakrimne yai lhangaimakur heiwari yunnungei makkura!”

¹⁴ Thimi'chungei, thimichungni thimmura! Pichar luilhakna phaikar heiwari! Pichar luilhakna Phaikar heirouwei Umpune pichar tounei Tlaini heiwari yennakkura.

¹⁵ Kinnikhi heirou tanglakhi yenmehrouwa; heitoubi sorwa rapkhi kwaar almakkarou.

¹⁶ Umpune Zion'rei yukrangrou, heirou Jerusalem'rei Aiyei hou chouni ungraorou; heirouri Thangwankhi, heirou tlaipangpaalkhi Aihoune kartlinrou. Heiya Umpuri Aiyei thimi rapbei kallena bi, heirou Israel rapbei raalpal hoina bi khatme.

Umpu ei Thimi Rapnungei Phor Pi

¹⁷ Heiyanungri nani murou touri, Keiri naiyei Dunpu, Umpu, Khyingei Lhungdou Zion'ra thrungbi klei Pume; heineri Jerusalem'ri Khyingei bom hoirou da; heitoubi miram-mithril hukhatnikhi bi heirou raalbine chachangmakarou.

¹⁸ Heitoubi tlaini heirouri asitoubine hungthukrou, touri lhungdou molshang rapne darkha heiyui ran yenkungsundarou, heirou lhungdou rapne nushungyui yenkungsundarou; heirou Judah'yei kungbanrap nammakhi yui bil'thimne chanrouwa; heitoubi Umpuei Pucheem'rouwei yuina khat heiputthutrou, heitoubi Shittim'yei Phaikar karyouni yui khrepirou.

¹⁹ “Heitoubi Egyptri thleitaar ram hollouwa, heirou Edom'khi karsukmak ramthing hollouwa; kouweiyo toulanungri, yani Judah'yei chanao rapya thuithini mareknakhou; ngamri yani Judahyei ramra mral mak thimi rapya hee dayerwurkhoula.

²⁰ Heiya Judahri yuimit-meimit'bongyen paallou; heirou Jerusalemkhi chaanserrei tatkur-khamkur naimakne paalrouwa.

²¹ Heitoubi yani hee dayerwurkhounei khlang lhakkhoumak heiri Keine khlang lhakrouwa; ngamri Umpuri Zion'ra thrungbine klei.”