JOEL 2 - KHYINGEI PU'TLOU Bible (BSI)

¹ Nane Zion'ra pengkul sakhunglak, heitoubi Keiyei Khying Lhungdoura paochilnei pengkul houya shakhunglak; ram heirouwei paalbine klei thimirap nammani loumayekbi chi-kanchunlaksu; koungameiyo toulanungri, Umpuei Tlaini hungura, ngamri tlaini heiri beimakne nakkura.

² Heiyei Tlaini heiwari kmeh'le lhawai klahni, heirou rameine hubphopbi chi'knayei shakrungei kmehni thimrou. Ningshun kulkabi lhunglim rapya kat'alkur heinakne, Mantrangkur raalluichung hungthukrou; heinaksi thimi chungri bongei chaanrouri tekkhi thukkhoumakhui, heirou hillei hungrou kyou chaanroukhi tekkhi thukkhoumakrou.

³ Yai maibongra meine loukanglei, heirou yaiyei hil-lhangrakhi meithlanni heileekthunglei; tlaipangpal heiwari yaiyei maibongrari Eden yekul naksine hoiyura; heirou yaiyei hil-lhangrane shitnrui ramnakne taarwurchiya; heisiyame, yaiyei maibongrari koukhatkhi kartleichangmakrou.

⁴ Yai mairung rapri sapukei mairung'naksilei, heirou sapuk'tung thimi rapbei mairung naksilei; heingammei yari raallei sapuk naksine kyaangni chanchanglei.

⁵ Sapuk kaari rapbei hounakne yane lhungdourakhi chunbaangeirou; heirou shapul mei kaangnei hou thuknakne, heirou raalluirap chungwane raalsobine raalbomranung wachangeirou.

⁶ Yai maibongrari Lim namyerrei thimi rapri klahyei shakrungne, yaiyei mairung rapkhi mongyim yenmehrouwa.

⁷ Mantrang raallui lhouwarap naksine yane raalsobi heitonlhakrou, lhouwarap naksine yani raalpal doura raanbaangrou; yane mimiyei lingshaang knaine charou, heirou yani lam tatkartlikmakni charou.

⁸ Yane khatle khat karnengrilmakni, mimiyei holhak tatkartlikmakni chalei; yai raalshon maibongra wachangbikhi, hunikhi yayari touyemkur manemakrou.

⁹ Yane khukarthillei rilla kyongle-kale chancharou; yane raalpal dourakhi rancharou; yane cheembung dourakhi raanbaangrou, heitoubi mucha thiminakne khamputra ranlhakbine cheemwairakhi wachangrou.

¹⁰ Yai maibongrari tlaipangpal linglang khngaaknakne kanthingrou; thangwan ramkhi kanthingrou; kinnikhi, tanglakhi heirou sorwa rapkhi kwaar almakkarou.

¹¹ Heirouri Umpune Aiyei raallui rapbei maibongra nungkhungnei hounakne ungraobi chay pilei; ngamri Aiyei raallui rapri mshing sherchichangmakni chunglei; kouweiyo toulanungri, chay yukpikur Pu heiwari Mane-Mantrangei Pu; ngamri Umpuei tlaini heiri tanglei, heirou chi'knayei shakrungkhi hoilei; heiwaei maibongrari hune loumayungchangrou?

Ukning Hungnanungei Ungpi

¹² Ngam heineri asinunghak Umpune shunlei: “Nai ukning-lhawai kyaoni, heirou chara hilbine, kanrelni chapbine Keinungei kallenglhakalo.”

¹³ Heitoubi naiyei phirul-phishambya sheetchalkur nimakni, naiyei ukningya toubailak; heitoubi naiyei Dunpu' Umpunungei kalleklhaklak; ngamri Ari malungshipikhei, heirou kringpikhei; malung-khatermak, heirou chutnaimakei malungshipi heiwari Anungei klei, heirou Ari lhangaimak lhou tounimak.

¹⁴ Huni kmu? Aiyei ukningni holwurbi, hillou phor pikurkhi kya; heirou naiyei Umpu, Dunpunung makatnungei malanput ankhi, heirou trunwai lung rapkhi phayerpikhi kya.

¹⁵ Zion'ra pengkul shakhunglak, heirou chara yilbine marthingthutlak, heirou yama kulyomya ungkartillak.

¹⁶ Khulpam kulyomya ungbine marthingthutnei khultillak; heitoubi yama Krung rapya ungtillak; douwa rapyakhi ungthutlak; heirou nu pompibi klei naoshun-naopar rapyakhi ungthutlak; nu loutir mashalla douwa rapnekhi ai'aiyei cheem'rouwei wathuklaksu; heirou shal duntir napuinu douwa rapnekhi aiyei bomtho'rouwei wathuklaksu.

¹⁷ Suipipu rapkhi, Umpuei watlhou tou thimi rapnekhi, Pucheem yuntlangmaile khrahpal tlakra mayungbine mityui dani chapbi atoubine yunlaksu: “O Umpu, Neiyei thimi rapya kalpilaklo; Neiyei chanao rapyari rikrai phayerpimaklo; nimanungri lim deini yaya kul chalphopburbi laonapiroume, heitoubi yani, ‘Naiyei Dunpuri kourangawo?’ toubine yunnaroume.”

Israelya Kukpibi Kalpirou

¹⁸ Heiyanungri Umpune Aiyei ramya pamuwurbi, heitoubi Aiyei thimi rapya Ane kringpiheirou.

¹⁹ Moi, Umpune Aiyei thimi rapnungei asitoubi louyunpirou: “Thilak, Keine nanungei tsai-an, darkha heiyui heirou Olive shirek marthumni phayerpirou; heirouri nari kropil hoirouwa; heitoubi Keine nayari lim dei rapbei maibongra rikraikhi phayermakrou.

²⁰ Heiya Keine khalu lhangrei klei raallui rapya nairouwei tlatni louthutrouwa; heitoubi yayari yui makna shitnrui ramthingra hulthutpirouwa; heirou yaiyei maibongra lamruipi thimiyari kulkungei Khiyei Samadrura khinglhakpirou; heitoubi hillhangrei lamruipi thimiyari kulrellei Mediterranea Samadrura khinglhakpirou. Yane napal tangei lhou touwurkhounei ngamrou, khilhung chulnei thuithikur khrim heiwari yaihangra katnamthutrouwa.

²¹ Chimaklo, O Tlaipangpal; heiya nungkngaine langthouwalo; koungameiyo toulanungri, Umpune lhoutang toupirou.

²² Yaalim-yoolim, nakhi uksamaklo; kouweiyo toulanungri, ramhangrei namhkhi katmaryemchiyame, heirou heengna-ronakhi hei heiyouwa, heirou khyudhei trungkhi, darkha yamkhi marthumni heiyouwa.

²³ Heiyanungri, Zion'rei chanaorap, nakhi harao-nungkngaini, naiyei Dunpu Umpuei bomra langthouwalo; koungameiyo toulanungri, Ane nanungei kummei nung yenroyerlei; heisitoubi Ane nanungei halleinakne, manthrallei nung, nungchurrei nung, heirou sowangei nung toubine kum'kummei kheen chani kumranyei heirou kum'khmei nung royerpirou.

²⁴ Heirou ruitlairakhi trunwai lung thimne hungkar'umrou; heirou darkha yuikhi heirou Olive shirekhi khangkhlong thimne shunglhaknungei leirouwa.

²⁵ Heirou youkur kum rapbei rillakhi Keiyei raalluirap khoine naihangra yenmalhetpikur khungtrik-khungwai, khaorul, khaothao, heirou ramphul-khlung rapne shaitumloukur namyerwa heiya Keine nanungei mallenglhakpithurou.

²⁶ Heirouri nane chanung-mainungei marthumni phabi naiyei malungkhrah hoirou; heitoubi nanungei kngakei lhouya toupiwurkhou naiyei Dunpu, Umpuei minya chouni mathanglak; heiyanungri Keiyei thimi rapne kouniroukhi rikrai phakhoumakrou.

²⁷ Heirouri, ‘Keine Israel rapbei hangra leilei’ toubi nane mupharou, heirou ‘Kei Awari naiyei Dunpu Umpu, deiri hukhatkhi maklei,’ toubikhi nane murouwa; heiyanungri Keiyei thimi rapne kouniroukhi rikrai phakhoumarou.”

Umpu ei Tlaini

²⁸ “Heitoubi hillouri asitoubine hungthukheirou, touri Keine thimi kantangei doura Keiyei Lhawai shungsundapirou; heirouri naiyei chanapawa raple, naiyei chanapuiya rapne Pu'tlou shunthutrou, heirou naiyei upa rapne rmong manrou, heitoubi naiyei kartlanga rapne kar'anbi murou.

²⁹ Heitoubi heiyei tlaini hunganungri, Keine shok napawa raple shok-napuiya rapbei dourakhi Keiyei Lhawai shungsundapirou.

³⁰ Heirou Thangwan'rakhi heirou tlaipangpallakhi Keine kngak lhou rapbei hutlha khoine, hee, mei, heirou meikhuyei shutlai khoine muyerheirou.

³¹ Umpuei chi'kna shakrungei tangkur tlaini hungbongnung kinnikhi yenmehrou, heirou tanglakhi hee yenhollouwa.

³² Heirouri asitoubine hungthukrou, touri huhuni Umpuei minya unglanungri aya kalpirou. Ngamri Umpuei yunkur heinakne, ‘Zion'yei Lhungdoura heirou Jerusalem'yei rilla himaleithungkur thimi rapne Umpuya unglanungri, yaya kalpirou.’ ”