JOEL 1 - KHYINGEI PU'TLOU Bible (BSI)

¹ Pethuel'yei chanapawa Joel'nungei Umpuei tloulhang asitoubi yukshunpikur.

² Tara-tartrui'rap, nane kyun awaya louningpilaklo; ram heirou klei thimirap na nammakhi khna khangchoubine louninglaklo. Nai chaanrou anaksi lhou rapya thukkurkhou leiyurako? Nimanung naiyei nutar-patar rapbei chaanroukhi heinaksi lhou thukkurkhou leiyurako?

³ Nane tlouthuk heiwaya naiyei chanao rapnungei shunpilak; heirou naiyei chanao rapne yaiyei chanao rapnungei loushunpirou; heitoubi yaiyei chanao rapnekhi yaihillei yu-cha rapnungei tlou heiwaya louyunpirou.

⁴ Touri khungtrik-khungwai rapbei shairom heiwari khaorul rapne shailoula, heirou khaorul rapbei shairom heiwari khaothao rapne shaiwurla; heirou khaothao rapbei shairom heiwari ramphul-khlungni shaiwurchila.

⁵ Tul malip thimi, nane kanthoubi chaplaklo, heitoubi tul kmong thimirap na nammani tul ranya phananungei lhawai klahni kanrellaklo. Kouweiyo toulanungri, asinungri naimurne tul mongphamakura.

⁶ Ngamri toumane mantrang klei thimi'chung Lim khat Keiyei ramra wachangura; Aiyei hari hume hanaksi, heirou yangkongei khru kyao hakamnaksi.

⁷ Ane Keiyei darkha yam rapyakhi kontlummurchila; heirou Keiyei khyudhei trung rapyakhi kuideekurchibi, heengkhor rapkhi threlshailouchila, heitoubi heengban rapri khngoubang taarwurchiya.

⁸ Nu ngaimankhou kartlangani hiwurbi, aiyei nangakani phichun khing-upbine shalya kanrelbi chapnaksi chapbalo.

⁹ Umpuei Cheemra khrumnaput anchum makatkhi heirou anna-louna, heirou darkha hutlha hei makat toukhi makkarou; Suipi purap nanikhi, heirou Puwatlhou tou thimi nakhi heinung'tlim kanrelne chapbalo.

¹⁰ Phailoukhi trunwai lung heimakkura; heirou thleimai taarwurnei ngamrou ram karyouni kanrellura; koungameiyo toulanungri, trunwaikhi hei heimakurchiya, darkha heiyui shumkhi thukmakura, heirou Olive shirekkhi heepburchiya.

¹¹ Naitamne rikrailaklo, O yekul kui thimi nari; kanrelni chapbalo, darkha heiyui shum thimirap nari; ngamri gehu'le chatrung nammakhi, heirou louyaorei trunwaiyei lung nammakhi karsukmakni maangurchiya.

¹² Darkhahei yamkhi yentaarwura, heirou khyudhei trung rapkhi heimakkura; pohei trung rapkhi, heirou kangwoi trung, heituk trung rapkhi, heirou louyaorei heengtrungrap nammakhi yentaarwurchiya; ngamri thimi rapbei ukningra harao-nungkngai toukhi makkura.

Ukning Hungnanungei Ungpi

¹³ Suipi purap, nani phichun upbine kanrellaklo; heirou khrahpal watlhou tou thimirap, nakhi wachangalo, heitoubi phichunya upbine masantan kalletchabi chaplaklo; Keiyei Dunpuei watlhou tou thimirap, nakhi wachangalo; kouweiyo toulanungri, naiyei Dunpuei Cheemra khrumna put anchum makat, heirou trunwailung hutlha hei rapya makatri dongurchiyame.

¹⁴ Nane chara hilbine makatlak, yama kulyomya ungmartilbine khultillak; heitoubi Tara-tartrui rapya ungtillak, heirou ram kantangei thimi rapya ungbine, naiyei Dunpu, Umpuei Pucheemra kartilyerlak, heitoubi Umpunung chapne ungraochabi buchalak.

¹⁵ Ulleiyo, tlaini heinung'tlim kounakei klah! Kouweiyo toulanungri, Umpuei tlaini heiwari nakurame; Tlaini heiwari Yerrouwei Mane-Mantrang Umpurei deekbai hungthukbi kounakne thuithirou.

¹⁶ Dunpuei Pucheemra khrumnaput makat toukhi kaiyei mitni mumakura, heirou Aicheemra ha'krao-nungkngai toukhi makkarou nimaka?

¹⁷ Trunwai mtee lung rapkhi thleidang daakra taarmangrouwa; heingammei chapongrakhi koukhatkhi marpeilhakmakni hangwalni leirouwa; chakei rapkhi deekhrom'rouwa. Ngamri trunwaikhi koukhatkhi luklhaknungei makne taarmaangurchiya.

¹⁸ Yoo-yaa rapkhi kounak klah-mrimni khungbine ungraochayura; ngamri yai shainungei ramkhi taarmangurchiya, heitounei yaorul rapkhi namh shainungei maknarou klah-mrimwurchiya.

¹⁹ O Umpu, Keine Neinungei khrumchabi buchaleime, ngamri ramhangrei halchaak ramna-louna rapkhi namma meine liktaarwurchila, heirou heengtrung-ramtrung rapkhi meithlanne namma kanglouchila.

²⁰ Heineri ramhangrei yoo-waa rapnekhi Neinungei kat'ungraobi leilei; kouweiyo toulanungri, kungrei yuikhi heepburchiya; heitoubi ramthingrei heengna-ronakhi namma meine kaangtaakkurchila.