JOB 3 - KHYINGEI PU'TLOU Bible (BSI)

Job'ne Klah-kanrelnei Umpu nung Tlou makatkur

¹ Hilluirouri Job'ne aya pukna tlaini heiwaya yenningthutbi manchonikur.

² Heirou Job'ne asitoubi kyun,

³ “Keiya pukna tlaini heiwari maanglakasu. ‘Nao napawacha khat urkanthouwame’ toubi yunkhouni masa heiwakhi maangurlakasu!

⁴ Heiyei tlaini heiwari kmeh hoilakasu; Dunpune heiyei tlainiya lhou hoipimakasu. Heiyei tlaini heiwari kwaarkhi almakkasu.

⁵ Heiyei tlaini heiwari khiyei kmeh lhimne makhubphopburlaksu; tlaini heiwaya rameine huphopbi, heirou tlaini heiwari kmehne makhupbi chi-mathunyerlaksu!

⁶ Heiniyei masa heirouri kmehne makhubphopbine kulchallaksu; tlaini heiwari kum khatdei hakrao-nungkngaiyei tlaini hangra kansherchokmakneasu. Tlaini heiwari tangla kanshernarakhi kansherchokmakneasu!

⁷ Thilak, heiyei tlaini heiwari hangwalni leiyurasu; heinirou houklumei houkhi koukhi mayekmakne leilakasu!

⁸ Thuitou thimi rapne heiyei tlainihei mancholaksu. Samadrurei Leviathan rapya tou'fyouchang thimi rapne tlaini heiwaya manchowurlaksu!

⁹ Heini masaei sorwa rapya kwaar alyerpimaklo; kwaarya malungamni karngeibikhi, kwaartou heiri tekkhi phamakneyasu. Heirou nung katwaarnei kulka toukhi makneyasu!

¹⁰ Ngamri keiya pukyei kheenrouri kai nuwiyei shullam tipkhoumak, nimanung keimitra klah-knangya yulkhoupimaklei.

¹¹ “Keiya pukyeinungri koungamei himakuro? Heirou keiyei nuwiyei ukwairei yongthukei kaallou koungamei himakuro?

¹² Kouya tounanungei keiya pukthutdei kaalnung loukhaangloubi pompikuro? Heirou kounungei keiya nuyuine loupomtangpikuro?

¹³ Heinimanungri asinung keiri hiwurbi heirou kyingne leiyurarou;

¹⁴ Angtu tlaipangpallei deekbai thukbi khrommangkur Krungkul rapya sabaangkhou Krung raple, heirou tlaipangei shingkhei tlou sempi pu raple kalhonne keikhi neibi leiyurarou;

¹⁵ Nimanung sina'le, heirou lapathir rapya yaiyei Krungkul cheem thimne marpeilhakur Krung raple kalhonne;

¹⁶ nimanung nao uryeinung rulwurbi phumkur naoshen'naksine, kinni lhakhi tekkhi mukhoumakne phumkur heinaksine keikhi hoiyuraroume.

¹⁷ Heibi heirouri khril lhangaimak thimi rapne marhot toukhi makrou; heitoubi bi heirouri klah-mrim toukhi koukhi makrou.

¹⁸ Bi heirouri kulchalphopkur thimi rapne hikallongbi mathrillei, heirou yane thuithikur pu rapbei houkhi mayekphamak.

¹⁹ Bi heirouri tang thimikhi heirou mandikhi klei; heirou shok rapyari pu rapbei hutrei malhetthutpilei.

²⁰ Kounungei klah-mrimnang thimi rapnungei kwaar yuk'alpirouwo? Kounungei lhawai klah thimi rapnungei khring chaanya pirouwo?

²¹ Hi'kni thimi rapnungeiri hilhengmakrou; heirou yane hi'knine sina-lapa yulkhouya duine khur utyukbi raphalei.

²² Ya rapne lhanyaorei lhanbomya mubine langthouni haraolei.

²³ Lam tamungyerkur thimi rapnungeiri kounungei kwaar yuk'alpirouwo? Dunpune yanungei yulkhoukur lamya kounungei shunmutpirouwo?

²⁴ Kouweiyo toulanungri, klah-mrim awane keiyei chaksiruk hoinakura; heirou keiyei lhawai karhuikur heiri yuinakni kungsundawura.

²⁵ Kouweiyo toulanungri keiyei chibi klei putshak rapri keidoura yongdabaangbi leiyura, heirou keine beimakne chikhou lhouthuk heiwane keinungei hungthukkura.

²⁶ Keinungei kyingo touri koukhi makura, muidane mathril toukhi makura; heiya klah-mrimei lhoune thimmura.”