JEREMIAH 9 - KHYINGEI PU'TLOU Bible (BSI)

Zion'yei Doura Lhawai Klah'ne Kanrelpikur

¹ “Oh, keiyei lu awane yuiphum louhoithanga'nungri, heirou keiyei mitlungrap awane yuiput louhoithanga'nungri, Keine masa-nunghang naimakni keiyei thimi rapbei chanapuiya hikur rapnungei tlim chapbidik leiserou!

² O keiyei ramthingra ramkheicha thimi rapbei chakna cheem khat louleithanga'nungri, keine keiyei thimi rapya lakkurkhoubine chawurserou! Kouweiyo toulanungri yarap nammane Umpunungei chorit naimakei lhou touwurkhoula, heitoubi yani Umpuya karhani thuithiyei lhangaimak lhouya touwurla.

³ Yaiyei maleiri kuimanringbi khoukurnaksine, mandal tlouyadik yunthutbine, ram heirouri chimtlouri tekkhi yunmakura. Kouweiyo toulanungri yani lhangaimak lhou khatrou'weini lhangaimak lhou khatra chutchabine leiyura. Heitoubi yani Keiya shak mupimakura,” toubi Umpune yunlei.

⁴ “Neineiyei cheemlhun palui rapya mukheini thirochabi tilrillak, heirou neiyei teinaohakyakhi malungammak. Ngamri teinaowa rapkhi mandalthil, heirou palui-teinao rapkhi mandalbi minamnei tlou kyunthil.

⁵ Heirou thimi napung kantangni ai'aiyei cheemlhun rapya minamwurlei, heirou chimtlouri yunmaklei. Yane yaiyei malei rapya mandal tlouya yunnanungei marnowurla; heitoubi yaitamne lhangaimak lhouya toubine lhawai lahwura.

⁶ Jeremiah neiyei paalna ramri mandalbi minamnei hangra hoiyura. Thimi rapne mandalbi minamnei ngamrou yani Keiya munimakura,” toubi Umpune paothutlei.

⁷ Heingammei Thangwan-Shimleiyei Pu Umpune yunlei, “Thilak, Keine Judah'yei thimi rapya thirya meira roulhakbi martambi thinaksine martamthirouwa; heisi nimakniri Keine Keiyei thimi rapnung'tlim dei kouya touheirouhui.

⁸ Yaiyei maleiri malaa-cheimur khraat naksilei; heirapne mandallei tlouyathil yunlei. Thimi napung kantangni ai'aiyei palui rapnungri baora(pura) lhangai tlouya yunlei, heiya ukning rillari yaya hatnanungei muni raangbine mrimlei.

⁹ Heinung'tlim Keine yaya tanti pimakrouko?” toubi Umpune yunlei; “Heinaksi lim rapya heinaknung'tlim Keine yaiyei phabomthuk tantiya pimakrouko?”

¹⁰ “Hangwallei leithungkur lhungdou rapnung'tlim, heirou ramthing rapnung'tlim Jeremiah keine kanrel laa sherbine chaprouwane. Ngamri heirapri hangwalni mangurchiya, heingammei thimi hunikhi bi heirou poraalmakura. Heirou halrul rapbei rungnei houkhi mayekphamakura, heirou nungthourei traichabi klei ramwaa rapkhi heirou ramhangrei yoo-yaa rapkhi trukchekurbi makkura.

¹¹ Heirou Jerusalem'ri Keine deekbai thukbi khingmarpeina bi khat hoiyerrouwa; heirou yekshang rapbei rabu hoiyerrouwa. Heitoubi Judah'yei khukarthil rapyari, Keine thimi palna yamaknungei bi khat hoiyerrouwa.”

¹² “Heinaksi lhou rapya phab dachangrou mukhei thimiri hu leilei? Heirou heinaksi lhou rapya shunthutnanungei Umpune anungei yunpikur thimiri hu leiyura? Koutounei ram heiwari hangwalni mangurbi thimi hunikhi poraalmakni leikurawo?”

¹³ Heirou Umpune yunlei, “Ngamri Keine yaiyei maibongra khoupikur chaytlou rapya yani lakkurkhoula, heirou Keiyei houyakhi chanthungpimakura, heirou heirapya hilthungni lhoukhi toumakura.

¹⁴ Heiya yani napal touwurbi yaithukei kningra chawurbine, heitoubi yai patar rapbei shunmatupikhou heinaksine Baal thrailhaya khrumwurla.”

¹⁵ Heingamei Israellei Dunpu, Thangwan-Shimleiyei Pu Umpune atoubi shunpilei, “Thilak, Keine Judah'yei thimi rapya khru kyao heeng-khlung pimairou, heirou khru kyao yuiya pimongrou.

¹⁶ Heitoubi Keine yayari, yanikhi heirou yaiyei patar rapnekhi shak mukhoumak lim dei rapbei hangra hulcheklhakrou; heitoubi yaya hattumchi'bongyen Keine yaihilla raalshon heimalhetrou.”

¹⁷ Thangwan-Shimlei'yei Pu Umpune atoubi yunlei, “Khalthibi khi-kanrel napuiya rapya unglhakpilak; heitoubi thimi malhetbi khi-kanrel'khei napuiya rapya ungyerlaklo!

¹⁸ Heirou khrangtoubi yani kanungei tlim kanthoubi khi-kanrelbi chaplakasu; heiyanungri kaiyei mitlung rapri mityuini thimwurbi, kai mitlungrei mityuini yuiput naksine heikungthutrou.

¹⁹ Kouweiyo toulanungri Zion'rei khi-kanrelbi chapnei houya heimayeklei; ‘ulleiyo, kari maangane! Kaya rikrai phayerwurlane! Kouweiyo toulanungri kari ram awaya lakkurkhoula, ngamri yani kaipaalna ramya toumaangurla.’ ”

²⁰ Asinungri O Judah'yei napuiyarap, Umpuei tloulhangya louninglaklo; heirou naiyei khna khangchoubine Aiyei murrei tloulhang rapya ninglhaklaklo. Heitoubi naiyei chanapuiya rapnungei lhawai klah'ne kanrelya marnopilaklo; heirou ai'aiyei cheemlhun rapyakhi khi-kanrelnei laaya shunpilaklo.

²¹ Kouweiyo toulanungri khi heini khullamra marekbi klei kaiyei chanao rapya hiyernanungei heirou phungtungra kartilbi klei kartlang douwa rapya louheinanungei toubi kaiyei krungkul rilla wachangbi kaiyei shumtrumra ranbangura.

²² Shunpilak, Umpune atoubi yunlei, “Trunluk thimi rapne toudawurkhou chakaorap naksine, thimi khi-lhung rapne phailoura bil-thimni dabine leirouwa. Yarap heiri thimi hukhatnekhi markumpirou makrouwa.”

²³ Umpune atoubi yunlei, “Shingkhei thimini aitamei roushingya tangchanamakniasu, heirou mantrang klei thimini aiyei mantrangya napal toumakniasu, heirou laldun thiminikhi aiyei laldunya kanyerchamakniasu.

²⁴ Heiya heinung tlim tangcha'kni thimini atoubi tangchalaksu, touri a heiri Keiya shak-kmu thimi hoilaksu; heirou Keiri kringpikhei, tharmu chim, heirou tlaipangra chimni pichar toupi Pume touri ani phab dalaksu, ngamri Keiri heinaksi lhou rapya madulei,” toubi Umpune paothutlei.

²⁵ Umpune atoubi yunlei, “Thilak, sarungei sermurya danbikhi yai ukningra murdanmak thimi rapya Keine maangyernanungei tlainirap hunglei.

²⁶ Egyptbei thimirap, Judah'yei thimi raple heirou Ammon'yei chanapawa raple, Moabia'rap, heirou ramthingei ramra paalbi klei ‘Sammun khou’ lim rapri sermur-un danmak thimithil, heirou Israellei thimirap nammakhi ukningra mur danmak thimithil.”