JEREMIAH 8 - KHYINGEI PU'TLOU Bible (BSI)

¹ Judah'yei thuithi borh lhourap Umpune paothutlei, “Heiyei tlainirouri yani Judah'yei Krung rapbei thru rap, heirou yaiyei krungcha rapbei thrurap, suipipu rapbei thrurap, thimkhui rapbei thrurap, heirou Jerusalem'ra paalkhou thimi rapbei thru rapyakhi lhanrouwei phorthutheirouhui.

² Heitoubi yani heiyei thru rapya ukningra malungshini khrumbi watlhou toubi klei nungthourei albi klei nungshara, tangla, heirou sorwa rapbei maibongra mherthutbine phoubine khourou. Yane heirapya markumkhoumarou, heirou phumkhi phumkhoumarou; heiya heirapri thleimaira thlei tuiyerkna khoini leirouwa.

³ Keine raalman khoini hulloubi bi kantangra klei lhangaimak bommairei himalei thimi rapnekhi khringyari hikurya duini maduchirouwa,” toubi Thangwan-Shimleiyei Pu Umpune paothutlei.

Borh heirou heiyei tanti

⁴ Heirou nangni yanungei shunpilak, “Umpune yunlei: Thimi rapne kanellanung, hanui kanthoumako? Thimi rapne chawanung, hanui yenkallengmako?

⁵ Heiyanungri koungammei Jerusalemei thimi rapne chimmakna lamra kalleng-kalleng chabine leikurawo? Yane yaitamei mandalkur tloura chetni malungambi kallengnimakni leiyura.

⁶ Yai kyun rapya Keine ningthiwurla, heiya yari chimtlou tekkhi yunmaklei. Thimi hukhatnekhi ai'mshaei khril lhangaimak lhourouwei ukning hungmaklei; heiya yani, ‘Keine kou touwurlawo?’ toubine yunlei. Sapukne raalbomra chanlhakurnakni, thimi napung kantangni ai'aiyei kning lhoura chabine leiwur.

⁷ Nungthourei traichabi klei ramwaa rapne ai'aiyei kumchaanya kmu; rammathru, waanu, malaang heirou makhao rapnekhi traiwurbikhi yentrai-kallengnei kheenya mulei. Heiya Keiyei thimi rapneri Umpuei chaytlou rapyakhi ningmumakni leiwurchiya.

⁸ Heirou nani, ‘Kari shingkheime, ngamri Umpuei chaylamri kaihutra shinbi khouleime,’ toubi koukumma yunngammo? Heiya thilak, Pu'tlou maye thimi rapne heirapya lehne mayewurbi namma mandalyerwurla.

⁹ Shingkhei thimi rapyari rikrai phayerheirou, heitoubi yayari maithee phayerwurbi manlouheirou. Kouweiyo toulanungri yani Umpuei chaytlou rapya yapimakni khingurkhou. Heineri yanungeiri kou shingkhei leilei?

¹⁰ Ngam heineri yaiyei nu-cha rapya thimidei rapnungei pilhakurou, heitoubi yaiyei yekul-phailou rapya pu ran rapnungei piwurou. Kouweiyo toulanungri tang thimi raprouwei mandi thimi rapkhi nammane ai'aiyei tungchananungei rapha thimithil; thimkhui raprouweini suipipu ramphakhi, thimi napung kantangni mandallei lhouyadik toubine leiwurchiya.

¹¹ Heirou yani Keiyei thimi rapbei chanapuiya rapbei knaya klaini yunbi, ‘Kying hoiyasu!’ toubi yunlei. Heiya koukhatkhi kying touri naimaklei.

¹² Yari yai touthutdurkhou lhangaimak lhounung tlim rikraibom thukmaka? Heiya yari heinungei'tlim koukhi rikraimaklei. Heirou koutoubi neinung tlim rikrairouwo toukhi mumaklei. Heingammei yari tantira mangkur thimi rapbei hangra maangchokrouwa. Heitoubi yaya tanti piyei kheenrou yayari tangsundarouwa,” toubi Umpune paothutlei.

¹³ “Keine yaiyei trunwai rapya shuimakni louheirou,” toubi Umpune paothutlei, “Trunwai khumyeinung darkha yam banra darkha hei popmakarou, heirou khyudhei trungra khyudhei heimakarou. Heirou heengna rapkhi namma taarwurbi trulchirouwa. Heirou Keine yanungei piwurkhou namma heiri yairouwei louheirouwa.

¹⁴ Koungamei kani ningnaimakni mul'ombine leikurawo? Kaitam pulni kartillase, heitoubi chiekpal kuikoolna khukarthil rapbei rilla truklhakase, heitoubi heirapbei rilla hilakase. Ngamri kaiyei Dunpu Umpune maangyernanungei marshikbine, heitoubi kaiyei mongnungei yuira khru lhakpiwurla; kouweiyo toulanungri kani Umpuya karhani borh touwurla.

¹⁵ Kane kying phananungei karngeilei, heiya lhangai touri koukhi phamaklei, heirou kna damyernanungei trumya karngeikhou, heiya thilak, kngaal'ok heirou raal kyouni thimmura!

¹⁶ Dan'rouwei loumayeklei yaiyei sapuk rapbei nilshonei houya, heirou yaiyei sapuk rulchung rapbei ho marhuknei houni thleikhi dirdir karlhinwura. Kouweiyo toulanungri sapuk rapne wabine ram heiwaya, heirou heiyei rillei klei putchei rapyakhi namyerya, heirou heiyei khukarthil rapkhi heirou heirapbei rilla paalbi klei thimirap nammayakhi kontumwurchila.

¹⁷ Thilak, Keine naihangra khru-kyak frul kounak yenmalhetrouwa, heirou rultu kounakhi yenmalhetbi nani heirapya malhimbi toutekhi manimakarou. Heitoubi frul rapne naya chikrouwa,” toubi Umpune paothutlei.

Jeremiah'ne Thimi Rapnung'tlim Lhawai Lahpikur

¹⁸ Keiri lhawai klah'ne douchangmakura. Keiyei lhawai klahwurnei malungra nawura!

¹⁹ Thilak, Keiyei thimi rapbei chanapuiya rapne tlatna ram bi kantangra ungraochani chapnei houya heiningthilak, “Umpuri Zion'ra leimakurako? Jerusalemei Krungri heiyei rilla paalmakurako?” toubi yani yunlei. Heiya Umpune yunlei, “Koungamei yani miramrei heengrei-thlungrei sheemthutkur thrailha rapya khrumbine Keiya toumalung'khakurawo?”

²⁰ “Manthralri hoithutdura, heirou sowangei trun khumlumkhi yenraallura; heiya kari kalpikhi phamakura,” toubi thimi rapne yunlei.

²¹ “Keiyei thimi rapbei chanapuiya rapbei hyemkur heinung'tlim Keiya hyemyerwurla; Keiri kanrelni chapnarou keilhawai lahkurni luiwurla.

²² Gilead'ra kna damyernungei louh makurako? Bi heirouya thim makleiko? Heiyanungri Keiyei chanapuiya rapbei hyemkur birap heiludthutbi damkurri koutouneiyo?”