JEREMIAH 7 - KHYINGEI PU'TLOU Bible (BSI)

Jeremiah'ne Lim Rapbei Doura Umpu ei Pichar Paothutpikur

¹ Jeremiah'nung Umpurei kyong tloulhang rapne atoubi shunpilei:

² “Umpuei Pucheem shumtrumra mayungbine heitoubi tloulhangrap awaya paothutbi, ‘Pucheemyei shumtrumra Umpuya khrumrou wachangkur Judah'yei thimirap na nammane Umpuei tloulhangya louningpilaklo!’ toubine shunpilak.”

³ Israellei Dunpu, Thangwan-Shimleiyei Pu Umpune atoubi yunlei, “Naiyei chorit lamya yengni touchimlak, heitoubi naiyei lhou touya touchimlak; heiyanungri Keine naya ram arou paalyerrou.”

⁴ Thimi rapne mandalbine, “Awari Umpuei Pucheem, awari Umpuei Pucheem, awari Umpuei Pucheemme,” toubi kyun tloulhangya malungammak.

⁵ Kounakpi nani tanghakpani naiyei chorit lamya touyengbi, naiyei lhou rapya touchimlanungri, heirou nani khatle-khatle tharmu chimni pichar toupirillanungri;

⁶ Heirou kounakpi nani ram arouwei ramtangbi klei miram-mithrilya, heirou pui-pa mak saracha rapya heirou trulmeiwi rapya marhotpi toumakanungri, heirou mralmak thimi rapya hee da'kyer toumakanungri, heirou naya maangyernanungei thrai dei rapya hil chanthungmakanungri;

⁷ Keine nai patar rapnungei klui naimakni paalnanungei piwurkhou ramra naya paalyerrou.

⁸ “Heiya thilak, nani koukhi karshukmak mandallei tlouya malungambine uklumwurla.

⁹ Nane mucharouko? Thimi hatrouko? Minu-micha lalrilnei chorit naimak lhouya tourouko? Chimmakni klallei tlouya kantomrouko? Baal thrainung malamput makatrouko? Heirou nani shak mumak thraidei rapya hil chanthungbi khrumrouko?

¹⁰ Heiyanungri nani heinaksi machinknaei lhou rapya toubine Keiminya loubine thulkur Keiyei Pucheemra wachangbine Keiyei maibongra mayungbine, ‘Kayari kalthutdurla,’ toubine yunchangrouwa?

¹¹ ‘Keiyei khalthutkur Pucheem awari naiyei mit'thrilnarari mucha thimi rapbei rabu hoiyurako? Thilak, heiwaya Keine mit'thrilbi kleime touri nane kmu,’ toubi Umpune paothutlei.

¹² ‘Heiya nani asinung Shiloh'ra lamkrini Keiyei minya loubine phunbaangkhou bira wawalo, heitoubi bi heirou klei Keiyei thimi Israel rapne lhangaimak chorit naimaknei ngamrou Keine kou touwurkhouwo touri nani wathilak.

¹³ Heirou asinungri, Judah'yei thimirap nanekhi anaksi lhangaimak lhourap nammaya touwurkhoula,’ toubi Umpune paothutlei. ‘Keine aya kalleng-kallengni shunwurla, heiya naneri tekkhi ninglhakpimaklei, heirou Keine naya ungpikur, heiya naneri tekchakhi lourulpimaklei.’

¹⁴ Ngam heineri, Keiminra phunbaangurkhou Pukhrumna bi heiwaya Keine toumaangrouwa. Bi heiwaya Keine naiyei nuer-patar rapnungei piwurkhou, bi heiwaya nani tangni malungambine leilei, heiya bi heiwaya Keine Shilohya maangyerkur heinaksine maangyerrouwa.

¹⁵ Heirou Keine Israelrap nayari Ephraim cheemkhurrei naiyei karnakril teinao rapya khingthutkur heinaksine Keine nayakhi Keiyei mit'thrilnarei khingthutdurou.”

Thimi Rapbei Shun Ningmak

¹⁶ “Jeremiah nangni thimirap heinung'tlim shunchapimak, heitoubi yanungei'tlim ungraobi shunchapikhi toumak, heirou yanungei'tlim nangni Keinungei tlou numbi buchakhi toumak; kouweiyo toulanungri neiya ninglhakpimakrou.

¹⁷ Yane Judah'yei khukarthil rapbei rilla heirou Jerusalemei khullam rapra kou toubi kleiyo touri nangri muleiko?

¹⁸ Chanao rapne heeng yendeeklhaklei, heirou pa rapne mei fyoubi lukpoplei, heitoubi puiwi rapne thrai -leimawinung(krung-nu) makatnungei mumtol ngoumarshiklei, heitoubi yani thrai rapbei maibongra yuikhying bunsundabi Keiya toumalungkhalei.

¹⁹ Heiya yaiyei toumalungkhakur heiri Keiya'hako?” toubi Umpune paothutlei; “Heiwari yaitamtomni toumalungkhabi, yaitamya rikrai phayerkna nimako?”

²⁰ Ngam heineri Pu Dunpune asitoubi yunlei, “Thilak, Keiyei malungkha, meithukei malungkhakur heiri ram heiyei doura, thimi rapbei doura, uiwaa rapbei doura, ramhangrei heengtrung rapbei doura, thleirei heenghei-rohei rapbei doura yongdayerbine heitoubi kaangyerrouwa; heirouri hunikhi mei heiwaya mityerchangmakrou.”

Shunkningri malam putyadui lhangai

²¹ Israel rapbei Dunpu, Thangwan-Shimleiyei Pu Umpune atoubi yunlei, “Meira pumni hongbi makatnungei naiyei malam putra mshing lhakbaanglak, heitoubi heirapbei anchumri nani mailouheilak.

²² Kouweiyo toulanungri Keine naiyei patar rapnungei Egypt ram'rouwei yenruithutyei kheenrouri meira pumni hongbine makatnei ngamrou heirou malam putdei ngamroukhi koukhatkhi yunpikhoumak, chaykhi pikhoumak.”

²³ Heiya Keine yanungei chay piwurkhouri, “Keihouya chanthunglak, heiyanungri Keine naiyei Dunpu hoirou, heitoubi nani Keiyei thimirap hoirou; heitoubi ani Keiyei shunpikur lamrap namyerra chawanungri, nanungei likarsui lhangai hoirou.”

²⁴ Heiya yani hil chanthungkhoumak, heirou yaiyei khnanikhi ninglhakhoumak; heiya yaiyei solungra napal toubi, khril lhangaimakni, yaitamei kningra chawurkhou; heitoubi maibong lhangra tonnung tlimri hil-lhangra yenkarshonkur.

²⁵ Naiyei patar rapne Egypt ram'rouwei shaalthutkur tlainirei waiyoubi angtu rampharou, Keine nanungei Keiyei shokrap, Thimkhui rapya ningshun-rawai yenmalhetpikur.

²⁶ Heiya yaneri Keiya ninglhakpikhoumak, yaiyei khnanikhi mayekpikhoumak; heinung tlimri yani napal thani, ngak khangchoubine, yaiyei patar rapyakhi duini lhangaimak lhouya touwurkhou.

²⁷ “Jeremiah nangni Judah'yei thimi rapnungei tloulhangrap awaya shunpirou, heiya yaneri neiya ninglhakpimakrou; heirou nangni yaya ungeirou, heiya yaneri neinungei lourulpimakrou.

²⁸ Heineri nangni yanungei atoubi shunpilaka, Yaiyei Dunpu Umpuei shunya chanthungpimak limri awari, heirou yaya touchimpinei tloukhi loulhakpimaklei; chim touri maangura, heirou tharmuei tloukhi yai murrouwei louthutdurla.”

Hinnom Phaikara Borhlhou Toukur

²⁹ “Naiyei sham ngoumthaiwurbi khingurlaka, heitoubi lhungbung chounara kakabine kanrelni chaplaka. Kouweiyo toulanungri Umpune Judah'yei thimi rapya khingurkhoula; heitoubi Aiyei meithukei malungkhakur heiwani yaya pichar tourouwa.”

³⁰ “Kouweiyo toulanungri Judah'yei chanao rapne Keiyei mit'thrilna maibongra borh lhouya touwurla,” toubi Umpune paothutlei, “Keiyei minra phunbaangkur Cheemra yaiyei machinkna thrailha rapya dunkhoubine touborhwurla.

³¹ Heirou Judah'yei thimi rapne Ben-Hinnomei phaikar Topheth'ra thraibom rapya sabaangbine, Keine chay pikhoukhi nimakpa, heirou Keiyei ukningrakhi ningthutkhoumak lhouya toubi yani bi heirou yaiyei chanapawa rapya heirou yaiyei chanapuiya rapyakhi meira hongbine makatkhou.

³² Ngam heineri, thilak, bi heiwaya Topheth toubine ungmaknei, heirou Ben-Hinnomei phaikar toubikhi ungmaknei kheen hungeirouhui, heiya ‘Thimi hatnei Phaikar’ toubi ungeirou,” toubi Umpune paothutlei. Ngamri bi heiwarou thimi khi phumbine changmakeirouhui.

³³ Heitoubi Judah thimi rapbei khi'lhungrap heiwari nungthourei ramwaa rapbei ukchaak hoinaheirou, heirou ramhangrei yaalim-yoolim rapbei murchak hoinaheirou; heitoubi yayari thimi hunikhi toumathunpirou makrouwa.

³⁴ Heirouri Keine Judah'yei khukarthil rapbei rilla, heirou Jerusalemei khullam tlaira hakrao-nungkngaiyei houle heirou nulou-chalounei hakraowei laa shanei houkhi, heirou luhongkur nu-shal shangramei haraone ungraochanei houkhi Keine toudongrouwa. Ngamri ram heiwari Keine maangyerrouwa.