JEREMIAH 6 - KHYINGEI PU'TLOU Bible (BSI)

Jerusalem'ya Maangyernanungei Marshikkur

¹ “O Benjamin'yei cha napawarap, nani ringnanungei Jerusalem'rouwei trukthutlaklo! Heitoubi Tekoa'ra pengkul shakhunglaklo, heirou Beth-Haccerem'ra mu'kna hutlha khoini phral khangbaanglaklo; kouweiyo toulanungri khalu lhangrei lhangaimak yongthukbi tangni maangyernanungei marshikkurame.

² Malungshi'kna heirou pamni'knaei shakrung khoini yukthutkhoupi Zion'yei chanapuiya, neiyari Keine toumaangrouwa.

³ Yaosilpu raple yaiyei yaorul raple kalhonni aidoura karhani hungthukrouwa, heitoubi yani naya karhilni khuiluphi cheemrap sabaangbine leirouwa. Heitoubi yani ai'aiyei ram bira yaorul rapya silbine leirouwa.”

⁴ kyun, “Kanthouwalo, kani aidoura raal dalakase! Kane nunghangnung raal dawase!” Heiya yane yunheirouhui, “Niyo reichanno! Kari lhawai lahnaleine! Kinnikhi yongchipleiyane, rawai yenkarshungurane!

⁵ Kanthouwalo, kane masanung raal dawase, heitoubi Jerusalemei raal'daang rapya, heirou Krungkul rapyakhi toumaangurase!”

⁶ Kouweiyo toulanungri Thangwan-Shimleiyei Pu Umpune atoubi yunlei, “Jerusalemei heengtrung rapya shatdeekchilaka, heitoubi aya raal luknanungei raal'daang katsabaanglaka. Tanti pinungeiri khukarthil ahakriyame. Aiyei rillari thuithiei marhotnei lhouthillei.

⁷ Yuiputrei tuyshir heikungthutnaksine, airouwei lhangaimak borh lhourap wathuklei. Hatril-shurilnei houle deekbai thuknei houni airouwei mayekphalei, heirou kna'saei houle touhyemwurnei houkhi kheenserou Keiyei maibongra mayeklei.

⁸ Tlousherkur awaya louninglaklo O Jerusalem, nimanungri Keiri nairouwei kallekthutdurbi, heitoubi thimi hukhatkhi yuldakur yamaknungei konmangurbi lakkurkhourou.”

Israel Rapbei Thuithikur

⁹ Thangwan-Shimleiyei Pu Umpune atoubi yunlei, “Darkha yamrei heitol rapya lamarkumpha heinaksine, Israel rapbei himaleithungkur thimi thachaya markumlaklo; darkha hei yam hangra hei klah thimi rapne limphathotho raphakur heinaksine, yarapyakhi naihut lamthutbine raphalaklo.”

¹⁰ Hunungei Keine yunserou? Huya Keine tlousherbi shunserou? Huni Keiya ninglhakpirou? Thilak, yaiyei khnabil rapri tipburchila! Heingammei yari mayekmakura. Thilak, Umpuei hou heiwari yanungei malungkhayerkna hoiyurabi, yani heiwaya ningnimakura.

¹¹ Heiya Keinungeiri Umpuei meithukei malungkha heiwani thimmura, heingammei Keiri lhawai klah'ne luiwurla. “Khullamra marekbi klei douwa rapbei doura heiwaya shungsundawurlaklo, heirou lokpa kartilbi klei nangak-kartlanga rapbei doura yongdayerlaklo; kouweiyo toulanungri nu-shal shangram khintamrek, heirou tara-tartrui rapbei dourakhi malungkhanei mei heiwari yongdarouwa.

¹² Heitoubi yaiyei cheem-kei rapkhi mideiyei hoiyurouwa; heirou yaiyei phailou-yekul raple, yaiyei nu-cha rapkhi pulni louheichirouwa. Kouweiyo toulanungri Keiyei hutbang awari ram heirou paalbi klei thimi rapbei doura karhani khangbaangrouwa,” toubi Umpune paothutlei.

¹³ “Kouweiyo toulanungri yaihangrei mandicharou youbine tang thimi rampha ya nammane tuyra khramtang thimithil; heirou thimkhui raprouweini suipipu ramphakhi ya nammane mandalbi klalya shunthutpilei.

¹⁴ Heirou yani Keiyei thimi rapbei khyemkna rapya yunlaibine, ‘Koukhi toumakrou, dam'rouwa,’ toubine yunpilei, heiya koukhi damkur touri maklei.

¹⁵ Yai touwurkhou machinkna lhounung'tlim yari rikraibom thukmakrouko? Heiya yanungeiri rikrai touri koukhi maklei. Yanungei rikraiyo touri kouwo toukhi ningmumaklei. Ngam heineri yari khi-thimi rapbei hangra hichokrouwa; Keine yaya tanti piyei kallou yayari khingsundarouwa,” toubi Umpune yunlei.

¹⁶ Umpune atoubi shunpilei, “Nane lamtang ruira mayungbine thrilthilak, heitoubi bongei lamkhman rapya ngaiphalak, heirou lam lhangaiya raphabine heirou chalaklo. Heiyanungri nani nailhawai kyingni mathril pharou. Heiya yani, ‘Kari heiyei lamra chamakrou,’ toubi yunlei.

¹⁷ Keine naidoura thikulpi thimi rapkhi khoupibi kyun, ‘Pengkul houya ninglhaklak!’ Heiya yaneri, ‘Kari ninglhakpimakrou,’ toubine yunlei.

¹⁸ Ngam heineri na nammane louninglaklo, O Limrap! Heirou naihangra kou thukrouwo touri mulaklo, O kulyomrap!

¹⁹ Louningpilaklo, O tlaipang, thilak, Keine Judah thimi rapbei doura yaiyei lhangaimak lhou wairangkur hilthungnimhei khoini thuithiei klah-knangya yenpirouwa. Ngamri yani Keiyei tloulhang rapya ninglhakpimakura, heirou Keiyei shunmatubi marnopikur chaytlou rapkhi yapimakni horthutdurla.

²⁰ Sheba'rei kyen khrim muiknam mrohkun rapne Keinungei kouya tounarou? Heirou ram tlatnarei khrim muiknam shirek rapne Keinungei kouya karshuknarou? Naiyei meira pumni hongnungei malamput rapri Keinungei loulhak yamakrou, heirou naiyei makat putrap heiri Keine madumak.

²¹ Heingammei Umpune atoubi yunlei, ‘Thilak, Keine Judah'yei thimi rapbei maibongra thikmthuikna khat khourouwa, heirouri yani heiwaya thikthuiloubi tapanrouwa. Heirouri puile-pale, heirou chanapawa raple heirou cheemlhun raple, heirou palui rapkhi pulni maangchirouwa.’ ”

²² Umpune atoubi shunpilei, “Thilak, khalu lhangei ramrei raallui rulkhat yongthukrou, heitoubi tlaipangpal wadongna ram raprei lim rapya thouplangbine hungthukrouwa.

²³ Raallui rapne hutra malaa-taak raple raalchei rapya shinbine marshikkura; yari beimakni khril thuithi, heirou kringpikhei toukhi maklei; yaiyei ungraochanei houri samadru yuilhouwei hounaksi. Heitoubi yane sapuk tungbine raalbomra chabine naya kardouril'nungei marshikkurlame, O Zion'yei chanapuiya!”

²⁴ “Kane heiyei paoya mayekwurla, heingammei kari chiwurbi tounaram makkura; naopukei manshan kna doubi klei napuiya naksine kari lhawai klahne thimmura.

²⁵ Ramhangra wathukbi paothutmak, heitoubi lamrakhi chamak; kouweiyo toulanungri yeekna thimi rapne raalshon shinbine leiyura, heirou bi kantangra chi'knaei shakrungni thimmura.

²⁶ O Keiyei thimi rapbei chanapuiya, nani phichun upbine rahui hangra kalletchabine naicha napawa khatpitom hiwurbi chapkur heinaksine, nani hikur thimi rapnung'tlim malung douni khi-kanrelbi chaplaklo. Kouweiyo toulanungri kaidoura loumuthungmakni maangyerrou thimirap hungrouwame!”

²⁷ “Jeremiah keine neiyari Keiyei thimi rapbei hangra thirya iksoubi martamthi thimi khat hoiyerwurla; heineri nangne yaiyei lhoulam rapya mubine, yaya martamrou da.

²⁸ Yarap namyerwa heiri napal tangni Keidoura raal kyou thimithil. Yarapri mandalya yunbine karwaicha thimithil, heirou yarap heiri thirdee chubi souphopkur thir heirou rangkul naksithil. Yarapri namma ukning hyingmak tuycha thimithil.

²⁹ Chi'knaei shakrung khoini pungrungni mei yabpopburla, heitoubi misithir rapri iksouwurla. Heiya lhangaimak thirdee rapri iksoubi shungthut manemaklei.

³⁰ Yarap heiyari horthutkur kulshan hoiyura. Ngamri Umpune yayari horthutbine khingurkhoula.”