JEREMIAH 52 - KHYINGEI PU'TLOU Bible (BSI)

Jerusalem Maangurnei Lhouthuk Rapya Kallengni Ningthutkyer

¹ Zedekiah'ne krung hunghoiyei kheenrouri ai'mshaei kum somnile-khat tlungura, heitoubi ani Jerusalem'ra kum chiple-khat thrungkhou; Heirou aiyei puiwiyei minri Libnah'rei Jeremiah'yei chanapuiya Hamutal ung.

² Heirou Zedekiah'nekhi Umpuei mit'thrilnara Jehoiakim'ni touwurkhou heinaksine lhangaimak borh lhourap namma toukhou.

³ Kouweiyo toulanungri tanghakni Umpuei malungkhakur heiyei ngamni Jerusalem'le heirou Judah'rakhi heinaksi klah-knang namma hungthukkurbi hilluiri yaya Umpuei maibongrouwei khingthutdurpi. Heirou Zedekiah'ne Babylon krungei doura karhani raal youkur.

⁴ Heirouri Zedekiah'ne krung hoibi takotam tlung kummei chiptam tlung tanglaei chiptam tlung tlainirou Babylon'yei krung Nebuchadnezzar'ne aiyei raalluirap nammale toubi Jerusalem'yei doura raal dananungei wachangkur, heitoubi Khulil heiwaya karhilni rungbom sheembine heiwaya kulchalnanungei raalpal sakoolphopkur.

⁵ Heisi toubine Khulil heiwari Zedekiah'yei krungchaan kum chiple-khat phani kulchalbi khoukur.

⁶ Tlunphali tlung tanglaei takoni tlung tlainirouri Khulil heiyei rilla beimak thuithini butaam thukkurbi, ram heiyei thimi rapne chanung-mainungei tsai-an koukhatkhi makkura.

⁷ Heirouri Khulil heiyei raalpal nambaiwurbi, heitoubi raalluirap nammane heirouwei trukthutkur. Heirou Chaldea rapne Khulil heiwaya koolphopbi leiyeinung, yani masanung krungei par-yekul paangei chiekpal khintamei tlakra klei palshung pongra trukthutkur. Heitoubi yani Arabah lhangranung yuchumkur.

⁸ Heiya Chaldea rapne krung Zedekiah'ya chanthungbi, yani aya Jericho'yei phaikara chanphawurbi hulmankur, heirouri aiyei raalluirap namma heiri airouwei trukchekkur.

⁹ Heirouri Chaldea rapbei raallui rapne Zedekiah'ya manlouheibi heitoubi aya Ramath'yei ram Ribla khukarthilra Babylon'yei krung Nebuchadnezzar'yei leinara yenruiheikur, heitoubi ani Zedekiah'yei doura tanti tounei pichar loutoupikur.

¹⁰ Heirou Babylon'yei krungni Zedekiah'yei chanapawa rapya aiyei mit rungrung muthungni aiyei maibongra hatdurpi, heirou ani Judah'yei lhou'ur purap nammayakhi Ribla'ra hatdurpi.

¹¹ Heirouri ane Zedekiah'ya mitlung kholthutdurpi, heitoubi aya thir-ruine msuiphopkur, heitoubi Babylon'yei krungne aya Babylon'ra yenruiheikur, heitoubi ane hibongyen kulla chalphopbine khoupikur.

¹² Babylon'yei krung Nebuchadnezzar'yei krungchaan chiple-tako tlung kummei tlun-phanga tlung tanglaei chipni tlung tlainirou, Babylon'ra krungei watlhoura raallui upa khoiyei klei Nebuzaradan'ne Jerusalem'ra yukur.

¹³ Heitoubi ani Jerusalem'ra klei Umpuei Pucheemkhi, krungei krungkulkhi, heirou Jerusalem'rei cheemrap nammakhi heirou Cheemtangrap nammakhi mei shulhakbine kaangtaakyerkur.

¹⁴ Heisi toubi raallui chaylampu upawakou kalhonkur Chaldea'yei raalluirap nammane Jerusalem karhillei klei raalpal rapya nangbaikur.

¹⁵ Heirouri raallui chaylampu upawa Nebuzaradan'ne yerrouwei kanring thimirap nammale, heirou Babylon krungnungei wachangbi rochakur thimi rapyle, heirou hutsakhei lhangsarap nammale kalhonni Babylon'ranung raalman khoini urloukhei.

¹⁶ Heiya raallui chaylampu upawa Nebuzaradan'ne yerrouwei kanring thimirap thayari darkha yekul trunnanungei, heirou phailou khuinanungei toubi horkhoukur.

¹⁷ Heirouri Umpuei Pucheemra louklei kulshan shutlairap, meitharl rapkhi heirou Pucheemyei lapathir Samadru Lhingtangwa heirap nammaya Chaldea rapne harhar umbaiwurchi, heitoubi heiyei lapathir rapya yani Babylon'ranung urlouheikur.

¹⁸ Heitoubi yani phuwan rapkhi, meihal shukthutna kulpak, meishar shumitna meishuk rapkhi, daarkok rapkhi, mroh hongna kaikam rapkhi, heirou Pucheem rillei Puwatlhoura yrengchakhou lapathirrei phuwan-shungyangrap nammakhi urlouheikur.

¹⁹ Heirou raallui chaylampu upawane sina-khyingei, lapathirrei sheemthutkur putcheirap, kulpak rapkhi, meihal shukthutna kulpakrap, kulkokrap, phuwanrap, heirou meitharl rapkhi, louhil rapkhi heirou yuikhying bunsundana kulpak rapkhi namma urlouheikur.

²⁰ Heirou Krung Solomon'ne Umpuei Pucheemra yrengnungei sheemthutkhou lapathirrei putchei-shungyang rapya khrit mshingkhi sherchichangmakni, shutlai khintamle, Samadru toubi mu'kna Lhingtangwa khatle, heitoubi heiwaei daakra tomna ho khoini sheemkur lapathirrei halpa rapkhi namma louheichikur.

²¹ Heirou heiyei shutlai rapri khat-khatrou thong chiple chot-chot chou, heirou tangri thong chiple khni-khnine kul, heitoubi thari hutpum phali-phali tha, heirou heirapri rilra putthil.

²² Shutlaiyei msurra mtoknak lapathir mtum thong phanga chou khat tombaang, heitoubi mtok heiwari lapathir bungka-raangle heirou pohei lha rapne karhil mansambanglei. Heirou khintam tlung shutlai heiwakhi khatpa nakrimni pohei lha mansambanglei.

²³ Heirou shutlai heiyei mtok mnakra pohei lha somkole-thruk manyarsunda, heisitoubi pohei lha pulni machakhat bungka raang karhilni mansambaanglei.

²⁴ Heirouri raallui chaylampu upawane suipipu upa Seraiah'le, aiyei thangei suipipu Zephaniah'le kalhonni Pucheemrei Puwatlhou upa napung-khyumya unglouheikur.

²⁵ Heirou ani Khulilrei raallui rapya silpipu chaylampu khatyakhi, heirou Khulilrei krungya tlou sempipu khoiyei klei thimi napung-eniyakhi, heitoubi ram heiyei raallui rapya mshing kansherbi mayelhak thimi khatkhi heirou Khulil heiyei rilla louklei thimirap napung somrukyakhi ruilouheikur.

²⁶ Heisitoubi raallui chaylampu upawa Nebuzaradan'ne thimirap heiya urlouheibi yaya Ribla'ra Babylon'yei krungnung yenruiheikur.

²⁷ Heirouri Babylon'yei krungni yarapya Hamathyei ram Ribla'ra hatkur. Heisitoubi Judah'ya aiyei ram'rouwei raalman khoini ruilouheikur.

²⁸ Nebuchadnezzar'ne raalman khoini urloukur thimi mshingri arapriya: Aiyei krungchaan kum-eni tlungeinung Jehudia'rap napung lishing-khyumle somnile-khyum;

²⁹ Nebuchadnezzar'yei krungchaan kum chiple-chot tlungeinung Jerusalem'rei thimi napung macha-chotle somthumle-khni manloukur;

³⁰ heirou Nebuchadnezzar'yei krungchaan kum somnile-khyum tlungeinung, raallui chaylampu upawa Nebuzaradan'ne Jehudia'rap thimi macha'enile somlile-phangakhi manlouheikur. Heisitoubi yarap pulni thimi napung loshing-phali'le machathrukbil raalman khoini urlouheikur.

Jehoiachinya Raalmanbi Kul Chalphopkhounarei Malhet'thutpikur

³¹ Asinungri asitoubi thukkura, touri Judah'yei krung Jehoiachin'ya raalmanbi kul chalphopkur kum somthumle-eni tlungei, tlun chiple-khni tlung tanglaei somnile-phanga tlung tlainirou, Babylon'yei krung Evil-merodach'ne krung hoinei lamkriyei kumrou, Judah'yei krung Jehoiachinya kringpikhei mutpiwurbi aya kulrillouwei malhet'thutpikur.

³² Heirouri krungni aya lhangaini tlou kallangpibi, heitoubi aya Babylon'ra akou leimalkna krung deirap nammaei doura rikrai khrumknaei Krungbom omnara chouni omyerpikur.

³³ Heisitoubi Jehoiachin'ne aiyei kulrillei leiyei phirul-phishamb rapya martlengurbine, heitoubi aiyei chaan khatrekpa krungei maibongra chaak-an chamalna-maimalnabine leikur.

³⁴ Heisitoubi aiyei yuwaltuy ramphakhi aiyei chaan khatrekpa tlainiserrei khoini hibongyen krungni thilhakpibine thulpikur.