JEREMIAH 51 - KHYINGEI PU'TLOU Bible (BSI)

Babylon'ne Israellei Doura Borh Touwurnei Pichar

¹ Umpune asitoubi yunlei: “Thilak, Keine Babylon'yei doura heirou Leb-qamai rapbei doura karhani maangyernei lhawaiya toufyourou.

² Heitoubi Keine miram-mithril rapya Babylon'ra malhetlhakrou; heiyanungri yarapne heiyei thimi rapya hulmtraiwurbi, heitoubi yai ramya kontlum'rouwa; kouweiyo toulanungri Babylon'ne klah-mrim nangei kheenrouri yarapne lhanglim bi kantangrei yaya karhani louleirou.

³ Babylon'yei malaa-taak shin raallui rapya malaa-taak shinyermaka, heirou aiyei raallui rapya raal-shamb bangbine kanthouyermak; heini aiyei kartlang douwa rapya hathakhi maleiyermak; aiyei raallui rapya namtomma hatdurlaka.

⁴ Heineri yarap namyari Chaldea rapbei ramra hatdurchilaksu, heitoubi yaiyei khukarthillei khullamra hichilaksu.

⁵ Kouweiyo toulanungri Israel raple Judah'yei ramra Israel rapbei Khying Pu Dunpuei mit'thrilna maibongra borh lhou chungwani leiyabikhi, yayari khingurkhoumaklei.

⁶ Babylonia hangrouwei trukkuralo, heitoubi nani mimiyei rongchanya kalthunglaklo. Aiyei lhangaimak heinung'tlim maangnara maangthungmaklo. Kouweiyo toulanungri kheen awari Umpuei khlang lhaknei trumme; Babylon'yei phabom thukya Umpune klah'man mallengpirouwa.

⁷ Babylon'ri Umpuei hutra shinbi klei sinaei daarkok khat khoini tlaipang lim nammaya mongmlipyernaksi leikhou; tlaipang lim rapne aiyei tulya mongrilkhou; heingammei limrap nammari pongurchibi yuntlungmak thimirap hoiwurchiya.

⁸ Tallengni Babylon kanellura heitoubi baiwurbi mangura. Anung'tlim kanrelbi chapbalo. Aiyei hemwurna bira teinungei louh heilhakpilaklo; heiyanungri aiyei kna heiwari damkurkhi kya.

⁹ ‘Kane Babylon'ya kna damnanungei bulpi, heiya ari kna damkur touri naimaklei; Babylon'ya horkhoulaka; heitoubi ai'aiyei ramra minung-minung chalaka. Kouweiyo toulanungri anungei toukur pichar heiri nungthounak choume, heirou thangwan kaphawura.’

¹⁰ Umpune kaiyei tharmu chimya urthutpiwurla; heineri wawalo, kani Zion'ra kaiyei Dunpu Umpuei touwurkhou lhou rapya shunthutpiyase!

¹¹ Malaa'chei rapya mur khya'raatlaka, heitoubi chung rapya shinmarshiklaka! Umpune Medes'yei krung rapbei ukningya toufyouwurla. Ngamri Aiyei kningri Babylon'ya yanimakni toumaangurnungei rangura; kouweiyo toulanungri awari Umpuei khlang lhaknei lhou. Aiyei Pucheemya touborhwurnei khlang lhakkur.

¹² Babylon'yei raalpal rapya karhani fral khangbaanglak; raal ngaknei lhouya mantrangyerlak; raalngak thimirap chungni khoulhaklak. Munne raal mrimbi, wachangbine raal dananungei marshiklaka! Ngamri Umpune Babylon'rei thimi rapbei ngamrou wairangbi shunthutdurkhou tloubom heiwaya lhou khoini shuimakni touthutrouwa.

¹³ Kungrui phaikara paalbi klei laldun Babylonia'rap, naiyei hungdongnanungei trumri hungtlungura. Nane limdei raprei muchabi kleiri donglum phala.”

¹⁴ Thangwan-Shimleiyei Pu Umpu Ai'mshani kantomwurla: “Tanghakpani Keine Babylon neiyei ramra yeekna thimirap khaorul chungnaksine bil thimyerrouwa. Heitoubi yani neidoura raal maninei raalpaoya ungraoyerrou.”

¹⁵ “Aiyei mantrangni tlaipangpalya sheempikhouri Umpu Ahoume. Aiyei khyal-roushingne tlaipangya phunbaangkhoume, heirou Aiyei shingkhei-mukhei heiwani nungthou-thangwan rapya thikmherkhoume.

¹⁶ Ane Aihou kat'ungraoyei kheenrouri nungthourei yui rapne hou lou'klung; heitoubi Ane ramei rapya tlaipangpal wadongna ram'rouweikhi katfyoukur; heirou Ane Aiyei lalkeirei nung ronanungei liptlai kat'alkyer, heitoubi martheekhi thiyoukur.

¹⁷ Tlaipang thimirap nammari koukhi mu'tlungmak(khyal kwat), heirou yuntlungmak thimirap hoiwurchiya. Heirou sina lhangsa rapkhi yaiyei sathut-sheemthutkur thrailha rapbei ngamri rikrai phawurchila. Kouweiyo toulanungri yaiyei iksoubi sheemthutkur lha rapri mandallei thraithil, heirou yari rilla kounilkhi somak.

¹⁸ Thrai lharap heiri ukningrei ningthutbi sheemthutkur koukhatkhi karshukmak putcheirap; heitoubi yaya pichar tounei tlainirouri yertlengwa maangchirouwa.

¹⁹ Heiya Jacobei Pu Dunpuri heinaksi thrailha naksiri nimak. Kouweiyo toulanungri Ari tlaipangei putcheirap nammaya sheempi Pu. Heirou Israel rapri Aiyei yu-charap, heirou ‘Thangwan-Shimleiyei Pu Umpu’ touri Aiyei minthul.

Israel'ri Sheempi Puei Hutshu

²⁰ “Nangri Keiyei raalchei, heirou Keiyei raal-hutshu; Neiyari Keine lim rapya toumaangnara yrengcha, heirou Keine neiyari Krungbom rapya toumaangyerkhou.

²¹ Heiya neiya yrengchabine sapukya heirou heiyei doura tung thimiya toumaangyerkhou.

²² Heirou neiya yrengchabi sapuk kaariya heirou heiwaya taangpi sapukya Keine toumaangyerkhou. Heirou neiya yrengchabi napawa rapya heirou napuiya rapya toumaangyerkhou; heirou neiya yrengchabi thimi upa raple heirou douwa rapyakhi toumaangyerkhou. Heirou neiya yrengchabi kartlang douwa raple nangaka rapyakhi toumaangyerkhou.

²³ Heirou neiya yrengchabi yaorul puyale heirou aiyei yaorul rapya Keine umhatdurpi. Heirou neiya yrengchabi loutrun thimiyale heirou aiyei yhinglamya Keine toumaangyerkhou. Heirou neiya yrengchabi Keine rampu rapyale heirou lhou'urpu rapyakhi toumaangyerkhou.”

Babylon'ne Klah Dabi Mangkur

²⁴ “Heiya Babylon'yari heirou Chaldea'ra yuldabi klei thimirap nammayakhi yani Zion'ra nai mabongra lhangaimak borh touwurkhounei ngamrou Keine churneiman pirouwa,” toubi Umpune paothutlei.

²⁵ “O mang-taakbi klei Babylon'yei Lhungdou, thilak, Keine neiya yanimakni leiyura; nangni tlaipangpal nammaya maangyerkurme,” toubi Umpune paothutlei; “Heirou Keiyei hutri neidoura karhani tlangthutrouwa; heitoubi neiyari Keine tringlhangna tlakra maletlhakrouwa, heitoubi neiyari Keine kaangtlumkur lhungdou hoiyerrouwa.

²⁶ Neirouwei yani cheemmunra lilshutlai khoini bunnungei thlungtum khatchakhi khulmumakrou, heirou cheemmunra tomnungei thlungtum khatchakhi raphamumakrou. Heiya nangni kheenserrei khoini kalui naimakni maangurouwa,” toubi Umpune paothutlei.

²⁷ “Tlaipangpalla raal maninei fral khangbaanglak, heitoubi lim rapbei raalpaonei pengkul shakhunglak! Lim rapya Babylon'yei doura raal dananungei marshikyerlak; heirou Ararat, Minni heirou Ashkenaz'yei Krungram rapya Babylon'yei maibongra karhani unglhaklak; heitoubi aya karhani raal ruinanungei raallui chaylampu khalthutlak! Raallei sapuk rapya khaorul chungnakni malhetthutlak.

²⁸ Babylon'yei doura karhani raal dananungei Medes'yei krung raple, yaiyei rampu raple, heirou yaiyei lhou'urpu rapya heirou yani kulchalbi paalbi klei ram kantangya ungthutbine raal marshikyerlak.

²⁹ Heitounei ram heiri chiwurbi lhawai klah'ne kanchunnura, ngamri Umpune Babylon'ya thimi paalyermakni hangwalni maangyerna'nungei rangkur lhouwai namyerwa heiri shuimakni aidoura touthutrouwa.

³⁰ Babylon'yei hutmantrang lhouwa rapri raal kardouril dongura, heitoubi yari raalpal rilla rehwurchiya; yari mantrang makkura, heiya yari napuiyanak hoiwurchiya; yaiyei leina bi rungbom rapkhi mei shulhakurchila, heirou aiyei palshung shumtrum rapkhi baiwurbi deeksundawurchiya.

³¹ Raalchi trukcha thimi hukounak khatne loutrukcha khatya chanphananungei chanthunglei, heirou pao-ur thimi khatne pao-ur thimi khatya murilbi Babylon'yei krungya aiyei khukarthil heiwari msur khatrouweini msurkhat wa'tlungni kulchalbi raal luklouheinei paoya shunpinungei chanchalei.

³² Rungbomei raalpal rapkhi kulchalwurchila, heirou raalpal rapkhi mei shulhakkurla, heirou raallui rapkhi mathunbi chitekwurbi trukchekurchiya.”

³³ Israellei Dunpu Thangwan-Shimleiyei Pu Umpune atoubi yunlei: “Babylon'yei chanapuiyari cha'umna bi ruitlainaksilei, beileibi cha-umnei kheen hunganungri ayari ruitlaira tatmnuipirouwa.”

³⁴ “Babylon'yei krung Nebuchadnezzar'ne keiya madulloula, heitoubi keiya chikchaalwurla. Ane keiyari khangkhlong dingnaksine hoiyerwurla; Ane keiya rolpi naksine madulloubine, heitoubi keiyei manikkur miteeya aiyei ukthoni madulloubi, heitoubi keiyari hanui mthathutdurthula.

³⁵ Keinungei thuithiei toupiwurkhou heirou keiya marhotdurkhou heiwari Babylon'nungei toupilakasu!” toubi Zion'ra paalbi klei thimi rapne unheirou; heirou “Keiyei hee heiri Chaldea'ra paalbi klei thimi rapbei doura dalakasu!” toubi Jerusalem'ne unheirou.

Umpu ne Israelya Trungpirou

³⁶ Ngam heini Umpune asitoubi shunlei: “Thilak, neinung'tlim Keine yunkalpirou, heitoubi neinung'tlim khlang lhakpirou. Heirou Babylon'yei Samadruya kaluini heepyerrou, heitoubi aiyei yuiput(yuisho) rapya Keine tipburbi taaryerrouwa.

³⁷ Heirou Babylon'ri deekbai thukwurbi khingmarpeina bi khat hoirouwa; heitoubi yekshangei rabu hoinarouwa; heirou thimi rapne chi-mathunbi (malung kandupburbi), thimi hukhatnekhi yuldabi paalngammakna bi khat hoirouwa.

³⁸ Babylon'rei thimi rapne yangkongrap naksine pulni rangbi ungraocharou, heirou yangkong shunrap naksine karpanchabi ungraorou.

³⁹ Yane langthoubi leiyei kheenrou, Keine yanungei khulluk khang khat marshikpirou, heitoubi yaya malipyerrou, heiyanungri yani harao-nungwaiwurbi, kalui naimaknung iplhakurbi hanui kallengni kanthoumakarou,” toubi Umpune paothutlei.

⁴⁰ “Keine yayari yaopa raple tlangpa raple pulni hatna bira tangsundapirouwa.”

Babylon'yei Likarsui

⁴¹ “Sheshach heiyari koutoubi raal manebi kulchalkur? Heirou tlaipangpal nammane mathangkhou Babylon'ya koutoubi manikur? Heirou Babylon'ri limrap nam'rouwei koutoubi chi'kna shakrung khat hoikurawo?

⁴² Samadru'ne Babylon'yei doura katfyouwura, heirou aiyei thuithikur yuilhouni aya katbokphopburla.

⁴³ Aiyei khukarthil rapri chi'knaei shakrung hoiwurchiya, heirou aiyei ram rapri yui kangurbi thleitar ramthing hollura. Ram heiwari thimi hunikhi paalmakura, heirou thlei taarna ram heirouri tlaipang hukhatnekhi lamtla ralmakura.

⁴⁴ Keine Bel'yari Babylon'yei rilla tanti pirou, heitoubi aiyei madulloukur put rapya Keine aiyei khrukchangrei phorthutlourou. Tlaipang limdei rapya anungei karnoyermarou. “Heirou Babylon'yei chiekpal ramphakhi deekbaisundawura!

⁴⁵ Babylon'rouwei wathukkuralo, Keiyei thimirap! Neineiyei rongchanya kalthungnanungei Umpuei thuithikur meithukei malungkhanarei trukthutlakalo!

⁴⁶ Asinungri nani ram heiyei rilla krung khatne krung khatdei doura yarilmakni karhourilbi raal younei raalpaoya, heirou hatril-norrilnei raalpaoya kum khatrouni laikhat heirou heithangei kumrouni raalpao laikhat toubi loumayeknarouri naiyei solung kanwangbi lhawai lahwurmak.

⁴⁷ Ngam heineri louthilak, Keine Babylon'yei thrailha rapya tanti pinei kheen hungeinungri heinaksi tlainirap hungthukheirouhui, heirou Babylon'yei ram namma rikrai phaheirou, kheen heirou aiyei thimi rapbei khi'lhung rapri aiyei khullamra bilthimni dabine leirouwa.

⁴⁸ Heirouri Thangwan-Shimleine heirou heiyei doura ringbi klei chiwirap nammane Babylon'yei doura raal maninei hakrao-nungkngaiyei houni paobi ungraorouwa. Ngamri khalu lhangrei aya toumaangrou raalluirap hungthukrouwa,” toubi Umpune paothutlei.

⁴⁹ “Babylon'yari Israel rapya hatdurpinei ngamrou tanti pibi hatrouwa, heineri Babylon'yei ngamni tlaipangpal namyerwakhi hiwurkhoula.”

Babylon'yei Rilla Klei Israel Rapnungei Dunpuei Lhangai Paolaa

⁵⁰ “Raalshonrei himakni kartleithungkur thimirap nari shaallura! Tlani karhimkhoumak! Heitoubi tlatna ramrei Umpuya ningthutlak, heitoubi Jerusalem'ya naiyei solungra rielthutbi ningthutlak!

⁵¹ ‘Judah'yei thimirap kari rikraiyura, ngamri kaya manthamakni laoknaei tlouya kani mayeklhakurla. Heitounei kari rikraiwurbi mai khumphopburla. Kouweiyo toulanungri miram-mithril rapne Umpuei Pucheem rilla Khyingei bomra wachangurame.’

⁵² Heitounei ngammei Umpune yunlei: ‘Thilak, Keine Babylon'rei thrailha rapya tanti tounei tlaini rapri khrangni hungrouwa. Heirouri hemkur thimi rapne ram heirou karyouni ungraochani chapbeirouhui.

⁵³ Heirou kounakpi Babylon'ne nungthou katokrouleithak katchoubinekhi, heirou aiyei Khulillei raalpalri mantrangame toubi sabaanganungkhi, aya toumaangpirou thimi rapya Keine yenmalhetrou,’ toubi Umpune paothutlei.”

Babylon Duine Maanglhakkur

⁵⁴ “Babylon'rei ungraobi chapnei houya louninglak, heirou Chaldea rapbei ramra tangni deekbai thuknei houya louningthilaklo!

⁵⁵ Kouweiyo toulanungri, Umpune Babylon'ya hangwalni toumaangrou waiyouwura, heirou aiyei mantrangni kartlinkur houya Ane toutrim'rouwa. Heirou yeekna thimi rapne yuilhou heihalhaknakni ungraochabi, yaiyei houni bi kantangrei heiungraobi mayekyerlei.

⁵⁶ Kouweiyo toulanungri, maangyerou kyou yeekna rapne aidoura, heirou Babylon'yei doura karhani wachangura; heitoubi aiyei hutmantrangkur raallui lhouwa rapyari nammanbi kulchalpirouwa. Heitoubi yaiyei malaa-taak rapri toudeekchirouwa; kouweiyo toulanungri Umpuri khlanglhak Dunpu khatme, heitoubi Ane yanungei pibomthuk tantiya tlungni khlang lhakrouwa.

⁵⁷ Heirou aiyei Krungcha rapya, heirou shingkhei thimi rapyakhi aiyei Ramkulpu rapya aiyei chaylampu rapya, heirou aiyei raallui lhouwa rapyakhi Keine tul pimongbi malipyerrou; heitoubi yayari kanthoukhou naimaknungei kalui naimakni iplhakyerrouwa,” toubi Krung, Aiyei min Thangwan-Shimleiyei Pu toubi ung heiwani paothutlei.

⁵⁸ Thangwan-Shimleiyei Pu Umpune asitoubi yunlei: “Maryakur Babylon'yei raalpal heiwari namyerwa deekbaibi daeirou, heitoubi aiyei choukur Palshung rapkhi namma meini shulhakbine taakchiheirou; heisi toubine thimi rapne lhou kalthi paangbi sabaangeirou, heiya heiwani koukhi karshukmakrou; heirou lim rapbei lhou churrap namyerwa heiri meinidik kaangtlumchibi lhawai lachirouwa.”

Jeremiah'ne Seraiah'ya Chay Pikur

⁵⁹ Mahseiah'yei chanapawa Neriah'ne pukkhou chanapawa Seraiah'ne Judah'yei krung Zedekiah'yei krungchaan kum phalli tlungei kheenrou, ani Zedekiahle kalhonni Babylon'ra kayei kheenrou thimkhui Jeremiah'ne Seraiah'nung shunpikur touri atoubi klei(Seraiah'ri krungei chaak-an silpi wattouwa khoini leikhou).

⁶⁰ Heisitoubi Jeremiah'ne Babylon'yei doura hungtukrou kyou klah-knangei lhouthukrap nammaya lailik-khyo khatra mayelhakurkhou; tloulhangrap namyerwa heiri Babylon'yei doura hungthukrou kyouwei ngamthillei.

⁶¹ Heirouri Jeremiah'ne Seraiah'nung shunmtupikur: “Nangne Babylon'ra wa'tlungle tallengni tloulhangrap awaya namma hou chouni pathutlaka;

⁶² heitoubi yunlak, ‘O Umpu, Nangne ram awaya toumaangurnungei kantomwurkhoula, heineri ram arouwei koukhatkhi paalkhoumakrou, tlaipang thimikhi, heirou ui-waa yoo-yaa rapkhi paalmakni hangwalni taakrouwa.’

⁶³ Heitoubi nangni lailik-khyo awaya pachikurle tallengni asitoubi hungthukrouwa, touri nangni lailik-khyo heiwaya thlung khat suimandoklak, heitoubi heiwaya Euphrate Kungei tlailamra khinglhaklaka;

⁶⁴ heitoubi asitoubine yunlak, ‘Anakrimne Babylon'khi dumlhakurbi hanui kallengni kathukkhoumarou, ngamri Keine aidoura yenpirou kyou thuithini deekbai thukkur heiwani Babylon thimi rapri maangchirouwa,’ toubi Jeremiah'yei tloulhang rapne yunkhou.”