JEREMIAH 50 - KHYINGEI PU'TLOU Bible (BSI)

Babylon'yei Doura Tantiyei Pichar

¹ Babylon'yei ngamrou heirou Chaldea rapbei rammei ngamrou thimkhui Jeremiah'nung shunpikur Umpuei tloulhang heiri asitoubi leilei.

² “Tlaipangpal lim rapbei hangra paothutlak, heirou phral khangbaangbine muyerlak. Koukhatkhi yulkhoumakni shunthutpilak, Babylon'ri raal manlouheila. Baal thraiyari rikrai phayerwurla, Marduk thrairi chiwurbi chaalsundawura, heirou Babylon'yei thrailha rapri rikrai phawurla, heitoubi heirapri harhar dane chaalsunda'wurchiya.”

³ “Kouweiyo toulanungri khalu lhangrei lim khatne aidoura yanimakni hungthukkura; heitoubi lim heiwani Babylon'yei ramya raal dawurbi kontlumbi maangyerrouwa; heirouri ram heiwari thimi hukhatkhi paalthramakarou. Tlaipang thimikhi heirou ramyaa rapkhi ram heirouwei trukwurchibi kanchairouwa!”

⁴ “Umpune yunlei touri heiyei tlainirap heirouri Israellei chanao raple Judah'yei thimi rapne pulni hungkartilheirou, heitoubi yarapne chapthotho yaiyei Dunpu Umpuya yenraphaheirou.

⁵ Yarapne Zion lhangra mai kallekbine heilhangra chananungei lam ngaiphaheirou; heitoubi ‘Wawalo, kane Umpura wakartilbi, heitoubi Umpura kalui malummakni khounungei tlou kantom khouwase’ toubine yunheirou.”

⁶ “Keiyei thimi rapri kanwaibi mangkur yaonaksi hoiyura, yaiyei yaosilpu rapne yaya ruipheiloubi heitoubi yani lam kanwaiwurbi lhungdou khatrouweini lhunglim khatra ranchabi tamungurchiya, heingammei yaiyei rehna yaoshangri koulhang'rangawo toukhi ningmumakni bibal naimakurchiya.

⁷ Yaya tlakarthang thimirap nammane yaya madulloula; heirou yaya yeekna thimi rapne kyun, ‘Kari kou'mralkhi makme, ngamri yane yaiyei patar rapbei malungamkhou Pu Dunpu, yaiyei mathrilna bom cheem Umpuya karhani borh lhou touwurkhoula.’

⁸ “Babylon'rouwei trukthutlaklo, heirou Chaldea rapbei ramya lakurkhoubi truklakalo; heitoubi tlangrulya lam ruipi tlangpanaksine wathukkuralo!

⁹ Kouweiyo toulanungri thilak, Keine khalu lhangrei mantrangkur lim rapya toufyouwurbi Babylon'yei doura karhani yenlhakrouwa. Heitoubi ya rapne Babylon'ya raal dananungei raalbomra lingshaang ringrouwa. Heitoubi bi heirouwei aya raal manibi manloueirouwa. Yaiyei malaa-chei rapri raal chabi hutdingni(hakthilni) yenkallengmak sireikhei lhouwa naksithil.

¹⁰ Heirou Chaldeari mulouheibi luklouheichila; heirou aya muchakur thimi rapne malungpilchirou,” toubi Umpune paothutlei.

Babylon Kanelkur

¹¹ “Nane Keiyei Cheem-kei, lalthum rapya mulouheinei ngamrou, hal-kalla rapne namh shaithotho kallaocha naksine, heirou sapuk pa rapne khungbi chuncha naksine nari hakrao-nungkngaini heirou langthouni ungraochalei.

¹² Heiya nai nuwiri rikrai pharouwa, heirou neiya yukpukpikur a heiwiri rikraiwurbi philu khumheirouhui. Thilak, Babylon'ri lim rapbei hangra yerrouwei khmei hoirouwa, heirou a heiri kouramkhi pukmak thleitar ramthing khat khoini leirouwa.

¹³ Umpuei meithukni malungkhawurnei ngamrou Babylon'ri hunikhi yuldathramakna rambi hoirouwa, heiya a heiri yertleng horwurbi hangwalni leirouwa. Babylon'ra heikral thimi kantangni ngakchirouwa, heitoubi aiyei deekbai thukkur namyerwa heiya mubi yane yaiyei lu khngaakbine decharouwa.

¹⁴ “Malaa taak kuimanringkur raalluirap na nammane Babylon'ya raal dananungei lhanglim kantangrei lingshaang katringlaka. Heitoubi naiyei mala chei rapya hathakhi maleiyermakni anungei heimalhetlak. Kouweiyo toulanungri ani Umpuya karhani borh touwurkhoula.

¹⁵ Naiyei raalsonei raalpao heiwari lhanglim kantangrei aidoura hei'ungraolaklo! Babylon'ri hutlhangbine lourochawura, ngamri aiyei raal'daang shutlai rapri deeksundani kanelwurchiya, heirou aiyei raalpal rapkhi deekbaibi kallangurchiya. Kouweiyo toulanungri awari Umpune aidoura raal-khlang lhakurame; aidoura khlang lhaklaka, heitoubi ani minungei toupiwurkhou heinaksine anungeikhi heisibil toupilaka!

¹⁶ Babylon'ya trunwai lung tuk thimi rapya louthutdurlak, heirou chamche shinbi trunluk thimi rapyakhi louthutdurlak. Marhotpi thimi rapbei raalshonya mubine yani ai'aiyei thimi rapnung hollhakrillouwa, heitoubi yane mimiyei ramra truk-kallengrouwa.”

¹⁷ “Israellei yangkong rapne hulchekloukur yaorulnakni hoiyura. Lamkrirouri Assyria'yei krungni aya mailoukur. Heitoubi hilluirouri Babylon'yei krung Nebuchadnezzar'ne aya thru rapkhi chikchaallurbi mailoukur.

¹⁸ Ngam heini Israellei Dunpu Thangwan-Shimleiyei Pu Umpune asitoubi yunlei, ‘Thilak, Keine Assyria'yei krungya tanti pikurnakni asinungri Keine Babylon'yei krungya heirou aiyei ramyakhi tanti pirouwa.

¹⁹ Heirou Israelya Keine aiyei chak lamshaina phungtungra hanuikhi ruimallengpitou, heirou ani Carmel Lhungdoura heirou Bashan Lhungdoura namh shaibine leirouwa, heitoubi ani Lhungdou ram Ephraim'ra heirou Gilead'ra kropilni chamairouwa.’

²⁰ Umpune asitoubi yunlei: ‘Kheen heirouri heirou tlainirap heirouri thimi rapne Israellei mral rapharou, heirou Judah'yei borhya raphathutrou; heiya yaiyei mralri koukhi phamakrou, heirou borhkhi raphathut manemakrou. Kouweiyo toulanungri Keine himaleiyerbi lakkurkhou Israellei heirou Judah'yei thimirap thacha heiyei borh mral rapri Keine kukpirouwa.’ ”

Babylon'yei Doura Dunpuei Pichar

²¹ “Kabine Merathaim'yei doura raal dalaka, heitoubi Pekod'yei thimi rapya raal dabine tumni hatdurbi toumaangurlak,” toubi Umpune paothutlei; “heirou Keine neinungei chay piwurkhou hilthung ya nammaei doura lhou toulak.

²² Ram heiyei rilla raalsonei houle, tumni deekbai thukkurnei houni thimmura.

²³ Asinungri tlaipangpal namyerrei mantrangdui shektang heiwari koutoubi deekbi baikurawo? Koutoubi Babylon'ne lim rapbei hangrouwei chi'knaei shakrung khoini thuithini manyerwurla. Neiya raphathutbine manphopburla, ngamri nangni Umpuya yanimakni raal youwura.

²⁴ Babylonia'rap, nani Keidoura karhani raal kardoulei, heiya nani mumakanungkhi, Keine naya mannanungei chang kamkhounara nari manbine leiyura.

²⁵ Umpune Aiyei hutshu marpeikhouna bi khoiyei klei keiya hatdurbine heitoubi Aiyei meithukei malungkhanei hutshu rapya louthutdurla; kouweiyo toulanung Thangwan-Shimleiyei Pu Dunpune Chaldea rapbei ramra hutshu heiwani lhou khatrou tourouwa.

²⁶ Tlatna ram lhanglim kantangrei wathukbine Babylon'yei doura karhani raal dalaka, heitoubi aiyei lalkei rapya latbine, yaya thlungbungnak marpeibangbine, yaya khathachakhi lakkhoumakni tumni maangyerlak!

²⁷ Aiyei halpadou rapkhi nammaya raalshon'ne shat'hatlaka, yarap nammaya an kamna bira urlhaklaka! Yanungeiri lah'knaei shakrung hoiyurame; kouweiyo toulanungri yaya tanti tounei tlaini hungtlungura!”

²⁸ (Babylon ramrei raalchi truk thimi rapne Zion'ra kaiyei Dunpu Umpune Aiyei Pucheemya norbi toubaikur rapya tanti tounei paoya shunthutnungei waleime, louningpilaklo!)

²⁹ “Babylon'yei doura malaa taak shin thimirap nammaya ungbaanglaka, heitoubi khukarthil heiwaya kuikoollaka, thimi hukhatyakhi kartleiyermak. Aiyei touwurkhou lhou rapbei hilthungni anungei khlang lhaklaka, heirou ani limdei rapnungei touwurkhou namyerwa heiyei hilthungni anungeikhi heisibil toulaka. Kouweiyo toulanungri Babylon'ne Israellei Khatpatom khoi Pu Umpuei maibongra tangchani napal touwurkhoula.

³⁰ Ngam heini aiyei kartlang douwa rapne aiyei khullamra habine khingsundakhourou, heirou aiyei raallui lhouwarap nammakhi heiyei tlainirouri hitumchirouwa,” toubi Umpune paothutlei.

³¹ “O tangcha thimirap, thilak, Keine naidoura karhani leirouwa,” toubi Thangwan-Shimleiyei Pu Umpune paothutlei. “Kouweiyo toulanungri Keine neiya tanti pinei tlaini hungtlungura.

³² Heirou tangcha thimiri tapanbi kanelrouwa, heirou ayari hunikhi khulkanthoupirou makrouwa. Heitoubi Keine aiyei khukarthil rapya mei shulhakrouwa, heitoubi heiwani aya karhillei kleirap nammakhi kaangtlumchirouwa.”

³³ Thangwan-Shimleiyei Pu Umpune asitoubi yunlei: “Israellei chanao raple Judah'yei chanao rapya pulni marhotpiwurla; heirou yaya raal manphopbi khoupikur thimi rapne yayari chetni manphopbine khoupiwurla, heitounei yani yarapya malhetthutnungei yapimakura.

³⁴ Heiya yaya Lhukthutpi Puri heiri mantrangei Pu, Aiyei minri Thangwan-Shimleiyei Pu, Ane yanung'tlim lhangaini tlou yunkalpirou; heitoubi Ane yaya yairamra lhangai-karbilni mathrilyerrou. Heiya Babylon'yei ramra paalbi klei thimi rapyari raalpaoni hou lungyerrou.”

³⁵ Umpune shunlei, “Chaldea rapbei doura heirou Babylon'ya paalbi klei thimi rapbei doura yanimakni raalshon khangbaangurla. Heirou aiyei lhou'urpu upa rpbei dourakhi heirou aiyei shingkhei thimi rapbei dourakhi raalshon khangbaangbine leirouwa.

³⁶ Klal Pu'tlou shunthutpi suipipu rapbei doura raalshon khangbaangurla, yarap heiri yuntlungmak thimirap hoirouwa, heirou aiyei mantrang raallui rapbei doura raalshon khangbaangurla, yarap heiri maangchirouwa.

³⁷ Yaiyei raal sapuk rapbei doura heirou yaiyei sapuk'kaari rapbei dourakhi raalshon khangbaangbine leiyura. Heirou yai miram-mithrilrei neekbine yenlhakur raallui rapbei dourakhi raalshon tlangbine leiyura; heirou yarapri toumathunbi chitekkur napuiya rapnakni hoirouwa! Aiyei lalkei rapbei doura raalshon tlangurla, heitoubi aiyei lalthum rapya mulouheirouwa!

³⁸ Aiyei yui doura yuikang thukwurbi yui yentaarwurbi heepburou! Kouweiyo toulanungri ram heiri thrailha rapbei ram hoiyura, heirou yari chi'knaei shakrung khoi thrailha rapbei hil chanthungbi ngaowurchibi yuntlungmak thimi hoirouwa.”

³⁹ “Ngam heineri Babylon'ra ramyaa raple yangkong raple pulni leimalnarou, heirou Ostritch waatang rapkhi bi heirou rabu hoinabi leirouwa. Heineri bi heiwari hanui kallengni yul dakhoumarou, heirou chaan khatrekrou thimi paalmakarou.”

⁴⁰ Umpune shunlei: “Dunpu'ne Sodom'le Gomarrah'ya aiyei cheemlhunrei khukarthil raple kalhonni maangyerkur kheenyei naksine, ram heiyei rilla thimi hukhatkhi yuldabi paalmakarou, heirou thimi hukhatkhi bi heirou polhakbine ralkhoumarou.”

⁴¹ “Louthilak, khalu lhangrei thimi rul khat wathukrou, heitoubi tlaipangpal wadongna ram'rouwei mantrangkur lim raple krung rapya toufyoubi hungkartilrou heitoubi raal yourou.

⁴² Yane ai'aiyei malaa-taakle raalchei rapya shinmarshikkurla; yari beimakni thuithi raalluirap; yanungeiri kringpi kheikhi yaomaklei. Yaiyei raalsonei houri samadruei yuilhouei hounaksi; heirou yani raal-shambya baangbi kansambine raal-sapuk rapbei doura tungbaangbine naya karhani wachangleime, O Babylon'yei cha napuiyarap!

⁴³ Babylon'yei krungni yaingamrou paotamkurya mayeklhakurla, heineri ari chiwurbi tounaram makni hutkanchunnura. Lhawai klah heiwani aya kulchalwurla, heirou naopuknei manshan'kna naksine marmullura.”

⁴⁴ “Louthilak, Jordan kungruirei heengyao thana hangrei yangkongnak khat kathukbi ram heiyei yaorul hangra wachangnungei marshikkura, heirouri Keine yaya toumathunbi hulchekrou. Heitoubi Keiyei madu thimi khatya khalthutbine yaidoura Pu hoiyerrou. Ngamri Keinaksiri hu yaolei? Heirou huni Keiya pichar bomra ungthutchangrou? Heirou Keiyei maibongra mayungchangrou yaosil puri hu leilei?

⁴⁵ Ngam heineri Umpune Babylon'yei doura yanimakni waikrang lhou heiwaya louninglak; heirou Chaldea rapbei ramya karhani ningmarshikkur lhou rapya louninglhaklak; tanghakni Ane yaiyei yaoshun mandicha rapyakhi taangthutloubine heitoubi yaiyei ram yaosilna ramya ramphakhi yaingamrou mangchokyerrou.

⁴⁶ ‘Babylon'ya raal manewurbi kul chalwurlame,’ toubi ungraonei houni tlaipangpal kartlinrou; heirou tlaipang lim rapne Babylon'yei ungraochanei houya mayekpharou.”