JEREMIAH 5 - KHYINGEI PU'TLOU Bible (BSI)

Dunpuei Thimi Rapbei Lhangaimak

¹ Jerusalemei khullamra kyongle-kale chanchabine, karyouni thiphalak, heitoubi heiyei yuntlangmai kantangra yenchangheibine raphathutlak; kounakpi nangni thimi napung-khat karthangbi, heirou kounakpi ani tharmu chimmei lhouya toubi, heirou ukning khyingni chimya raphathimi hoiyanungri, Keine Jerusalem'ya kalpikur kya.

² Heirou yani, “Umpune ringliyenri Ane mupilaksu,” toubi yunbinekhi, yani mandalbi tlou kantomlei.

³ O Umpu, Nangri thimi raprouwei tharmu chimya thipha nimako? Nangne Judah'yei thimi rapya klah-knangni norwurlei, heiya yari koukhi lhawai lahpimaklei. Nangne yaya kontlummurlei, heiya yaneri touchimpikhi loulhakpimaklei. Heinung tlimri yani yaiyei solungya thlungnakni kalyerwurbi, ukningkhi hungnimaklei.

⁴ Heirouri keine kyun, “Yari kanring thimithil, koukhi muheimaklei. Kouweiyo toulanungri yani Umpuei lamya mumaklei, heirou Aiyei chaytlouei lammit rapkhi mumaklei.

⁵ Heineri keine tang thimi rapnungei warouwa, heitoubi yaya shunrouwa; kouweiyo toulanungri yani Umpuei lamya kmu, heirou Dunpuei chaylamei lammitkhi kmu.” Heiya ruipi purap nammanekhi khatsi khoini malnabi Umpuei chaylamya toubaiwurla, heitoubi Airouwei yakril tloubom rapya toubaiwurla.

⁶ Ngam heineri yangkong khatne kulkung lhangrei hungthukbine heitoubi yaya threlmairouwa, heirou yekshang khatne ramthingrei wathukbine yaya toumaangrouwa. Heirou hume khatne yaiyei khukarthil rapya chakngaakbine leiyura. Heirou yairouwei huhuni wathukkur yaowanungri ayari harhar threlchaallouwa; ngamri yaiyei borhri chungachakura. Heirou yaiyei Umpurei hil-karshonkuri chungachakura.

⁷ “Awinung'tlim koutoubi Keine naya kukpirou? Neiyei chanapawa rapneri Keiya khingurkhoula, heitoubi Dunpukhi nimak thrailha rapbei minra kantomwurla. Keineri yaya ukthoni picha-pimaikhou, heiya yaneri chorit naimakei lhouya loutouwurla, heitoubi chorit naimak napuiya rapbei cheemra polhakbi yarekur(masa chaklhakur).

⁸ Yarapri sapuk pa rapne marnamtekbi pui lhaophakur heinaksine, ai'aiyei cheemlhunrei minu rapbei leinara wachangurchiya.

⁹ Heinaksi thimi rapya heinung'tlim Keine tanti pimakrouko?” toubi Umpune paothutlei. “Heirou heinaksi lhouya toubi klei lim rapyari Keimshani khlang lhakmakrouko?”

¹⁰ “Aiyei darkha trungei lingshaang tlakra pochabine heitoubi konchaalwurlak, heiya kluiniri kontlumpimak. Aiyei banrap heiri shaatsundawurlak, yarap heiri Umpuei nimaklei.

¹¹ Kouweiyo toulanungri Israellei cheemkhur-bommai raple, Judah'yei cheemkhur-bommai rapri yunnungei makni Keinungei malungam khoupimakura,” toubi Umpune paothutlei.

¹² Yane Umpuei ngamrou leh'ne, “Ane kanungei koukhi toumakrou, kaidoura koukhatkhi klah-knang(shuikngam) thukmakrou, heirou kani raalkhi nimanung butaam toukhi muphamakrou!” toubi chimmakya yunpiwurla.

¹³ “Thimkhui rapri koukhi karshukmak marthee naksine hoirouwa, heirou Dunpuei tloulhangri yaiyei solungra yaomaklei; yaiyei shunthutkur tloulhangrap heisibil yaidoura hungdalakasu!”

¹⁴ Ngam heineri Thangwan-Shimleiyei Pu Umpune yunlei, “Yane tloulhang heiwaya yunwurnei ngamrou, thilak, Keiyei tloulhang rapya Keine naiyei maleira mei holyerrouwa, heitoubi thimirap heiyari meiyu heengrap hoirouwa, heitoubi yaya heiwani kaangtlum'rouwa.

¹⁵ Thilak, O Israellei cheemmai-bommairap, Keine naidoura tlatnarei lim khat yenlhakbi raal dayerrou,” toubi Umpune paothutlei. “Limrap heiri hutmantrang limkhat, heirou lim heiri bongei youbi louklei. Lim heiyei tlouri nani mumak, heirou yai kyunkhi nani mayekmakrou.

¹⁶ Yaiyei thowa heiwari putlhakkur lhanpur naksilei; heirou yari hutmantrang thimithil.

¹⁷ Heirou yani naiyei trunwairap heirou chaak-an rapya chatum-maitum'rouwa; heirou yani naiyei chanapawa heirou chanapuiya rapyakhi madulchirouwa; yani naiyei yaorul-halrul rapyakhi madulchirouwa; yani naiyei darkha yekulrap heirou khyudhei yekul rapkhi kontum'rouwa; heitoubi yani naiyei malungambi klei chiekpalni kuikoolkhou khukarthil rapyakhi raal-shon'ne maangyerrouwa.

¹⁸ “Heisiya hoiyanungkhi kheen heirouri Keine naya tlumni maangyermakhuirou,” toubi Umpune paothutlei.

¹⁹ Heirouri thimi rapne asitoubi yunnei trum hungthukheirou, “Kaiyei Dunpu Umpune kounungei heinaksi lhou rapya kanungei toupikurawo?” Heiyanungri nani yanungei asitoubi louyunpirou da, “Nane Keiya lakkurkhoubi, heitoubi naiyei ramra miramrei thrailha rapya urlhakbi nani khrumwurkhoula, heineri asinungri nani naiyei ramkhi nimakna rilla nani shakmumak miram-mithrilya watlhou tourouwa.”

²⁰ “Jacobei cheemmai-bommainung pao awaya paothutbine shunpilak, heitoubi Judah'nungkhi atoubi yunpilak:

²¹ ‘Pao awaya louningpilaklo, O yuntlungmak heirou khyal-roushing yaomak thimirap. Mitlungri yaolei, heiya muri-mumaklei. Khnabilri leilei, heiya mayekri-mayekmaklei.’

²² ‘Nari Keiya chimakko?’ toubi Umpune yunlei. ‘Nari Keiyei maibongra chiwurbi leoleo kanchunkur nimaka?’ Kouweiyo toulanungri samadruei ri khoini Keine shitnrui marpeikhoulei, heirou Keine shitnruiya ri khoini marpeibi khouwurnei ngamrou, kouniroukhi samadrune ri heiwaya khinghoichangmak; heineri yuilhouni katfyoubikhi ri heiwaya pahoichangmak. Heirou yani kalthi ungraochabikhi heiwaya yani pahoiwurbi kungthutchangmaklei.

²³ Heiya thimirap heiri solung thlungnaksi kal, heirou napaltha, heirou Keidoura raal kyou thimirap; heirou yani kallekthutdurbi lam tamungbi leiyura.

²⁴ Yai ukningra, ‘Asinungri kanungei kumchaanyei nung royerpi Pu, manthralkhi heirou nungchurkhi nung yenpi Pu, heirou kaya ngaakpi-silpibi, trun luknei kumchaankhi yenpi Pu kaiyei Dunpu Umpuya chilakase,’ toubikhi yani yunmaklei.

²⁵ Naiyei lhangaimak lhou rapbei ngamni heirapya lehyerwurla; heirou naiyei borh ngamni nanungei lhangaiya phayermakura.

²⁶ “Kouweiyo toulanungri Keiyei thimi rapbei hangra khril lhangaimak thimirap yaowura. Yane waarui kambi heikngaak naksine, thimi rapya mannanungei chang kambine chakngaakura.

²⁷ Arbura waa bil'thimni manlhakbi khoukur heinaksine, yaiyei cheemrilla mandallei putchei rapne bil-thimni marpeilhakbi khouwurla. Heitounei ngammei yari tang thimi heirou laldun thimirap hoiwurchiya.

²⁸ Yari marnamtekbi yoryor alwurchiya; heirou yani khril lhangaimakei lhouya tounarakhi dongna naimaklei. Yane sarracha rapya lhangainanungei tlou yuntrungpi toukhi maklei; heirou kanring-kanwai rapbei phabom thukyakhi lhangaini toupimaklei.

²⁹ “ ‘Anaksi thimi rapyari Keine tanti pibom thukmakrouko?’ toubi Umpune paothutlei. ‘Anaksi lim rapyakhi Keine khlang lhakbom thukmakrouko?’

³⁰ Kngakei heirou thuithiyei lhou Judah'yei ramra touthutdurla:

³¹ Thimkhui rapne mandalbi chimmakni Pu'tlou shunthutdurla; heirou suipipu rapnekhi yaitamei kningni kulchalbi ruinanungei marshikwurchila. Heirouri Keiyei thimi rapnekhi heinaksi lhou rapya madubi chanthungurchiya. Heiya nani heiyei hungdongnarari kouya touheirou?”