JEREMIAH 49 - KHYINGEI PU'TLOU Bible (BSI)

Ammonia Rapbei Doura Tantiyei Pichar

¹ Ammonia rapbei ngamrou Umpune asitoubi shunpilei: “Israellei chanapawa rap makme touneiko? Aiyei cha mranglam makura touneiko? Heiyanungri koutounei Milcom'ne Gad'yei ramya kalbine paalkurako? Heirou koutounei aiyei thimi rapne heiyei khukarthil rapra yuldabine paalkuro?”

² Ngam heineri Umpune yunlei, “Thilak, heinaksi tlainirap hungeirouhui touri Keine Ammonia rapbei khukarthil Rabbah'yei doura karhani raalsonei houya mayekyerei kheenroukhi, khukarthil heiwaya raalla deekbaibi marpeikhouna bi hoiyerrouwa, heirou aiyei khukarthil rapya mei shulhakbine kaangtumyerouwa. Heirouri Israel rapne ram heiwaya luklouheirouwa, heitoubi pu hoirouwa,” toubi Umpune paothutlei.

³ “Chapbine kanrellaklo O Heshbon; kouweiyo toulanungri Ai khukarthilri mangurame! Ungraochane chapbalo O Rabbah'yei chanapuiya'rap; naitamni phichun upbine chapkanrellaklo, heitoubi chiekpal rilla kyongle-kale karwaichabine kanrellaklo. Kouweiyo toulanungri Milcomri aiyei suipipu raple aiyei krungcha raple kalhonni raalman khoini chawura.

⁴ O malungamkna yaomakpi chanapuiya, airamrei lalthum rapya thibine, ‘Hune keiya lukchangrouwo?’ toubi kyun thimi, koutounei neiyei phaikar rapnung'tlim tangchakurawo?

⁵ Thilak, Keine neidoura chi'knaei lhouthukya naya karhillei klei kullim kantangrei yenpirouwa,” toubi Thangwan-Shimleiyei Pu Umpune paothutlei; “Heitoubi nayari thimi hukhatnekhi markumpirou maknara Keine hulchekrouwa.

⁶ Heiya hilluirouri Keine Ammonia chanapawa rapbei likarsuiya hanui mallenglhak'pithurou,” toubi Umpune paothutlei.

Edom'yei Doura Tantiyei Pichar

⁷ Edom'yei ngamrou Thangwan-Shimleiyei Pu Umpune asitoubine yunlei: “Teman khukarthilra khyal-roushing klei thimiri tekkhi makkurako? Bi heirouri tlou sempinei shingkheikhi makkurako? Heirou yaiyei roushingya trimmurako?

⁸ O Dedan'rei thimirap, hil kallengbine truklakalo, heitoubi khur yuknara yulluralo! Ngamri Keine aya tantiyei pichar touninung Esau'nungei pikur klah-knang heiwari aidoura Keine yenpiheirou.

⁹ Kounakpi darkha hei lamarkum thimi rapne yekulra changanungri hei thari lakarhulkhoumakrouwa? Heirou mucha thimi rapne muchala'nungkhi yaiyei kroya mulouheibine shalmakrouwa?

¹⁰ Heiya Keineri Esau'ya koukhatkhi lakkhoumakni yertlengwa luklouheila, heitoubi Keine aiyei muei klei bi rapkhi namma kallangyerwurla; heineri ari aitam koukhatkhi muni yulkhouchang'makrou; aiyei yu-cha rapkhi aiyei cheemkhur-teinao rapkhi, cheemlhun thimi raple kalhonni maangyerchirouwa; heirouri Edom'ri himitrouwa.

¹¹ Neiyei sarracha rapri lakkhoulaklo, yayari Keine thikulpiroume; heirou naiyei trulmeiwi rapne Keiya uklumlaksu!”

¹² Kouweiyo toulanungri Umpune asitoubi yunlei: “Thilak, hukounak khatne daarkokya mongbomkhi thukmakni monglanungri nayari daarkokya mongyermakrou marbuleiko? Nayari tanti phayermakri dongkhoumakrou; shuimakni tanti piheirouhui.

¹³ Ngamri Kei'mshani kantomwurkhoula, touri Bazrah khukarthilri mangurbine chi'knaei shakrung khat hoirouwa, heirou maithee phawurbi mine laonana bi heirou manchorilna bi khat hoirouwa; heitoubi khukarthilrap nammakhi waiknaini mangurheirou.”

¹⁴ Keine Umpurei paolaa khat mayekwurla; heirou lim rapbei hangra paocha thimi khat yenmalhetdurla, heitoubi asitoubine shunthutlei: “Naitamni pulni lokpa kartilbine heitoubi naitam kanthoubi aidoura raal dalakalo!

¹⁵ Kouweiyo toulanungri thilak, Keine neiya lim rapbei hangra mandiyerrouwa, heitoubi neiyari thimi rapne horthutrouwa.

¹⁶ Edom neiyei thuithikur heiwani heirou neiyei solungrei tangchakur heiwani neiya minambi lehyerwurla; nangni thlungkhan rapbei doura leibinekhi heirou lhungbung chouna doura malaangnakni rabu sabine leiyabikhi, neiyari Keine nimnara taangsundawurou,” toubi Umpune paothutlei.

¹⁷ “Heirou Edom'ri chi'knaei shakrung khoini deekbai thukbine maangeirouhui, heirouri bi heirouei yenkral thimi rapne heiwaya mulhakbine chimathunrou, heirou thimi rapne aiyei deekbai thukbi mangkur heiwaya mubine ngakchirouwa.

¹⁸ Heirou Sodom'le Gomorrah'ya yale kalhonbi klei ram rapya maangyerkur heinaksine, Edom'yei ram heirouri thimi hukhatyakhi palthungyer'makrou,” toubi Umpune yunlei.

¹⁹ “Thilak, yangkong khatne Jordan kungruirei heengyao thanarei wathukbine yaoshangra wachangkur heinaksine hukounak khatya hungthukyerbine Edom'ya toumathunbine hullourou, heitoubi Keiyei khalthutkur hukhatya aidoura pu hoiyerrou. Kouweiyo toulanungri Keinaksiri hu leilei? Heirou Keiyari huni pichar bira summon ungthutchangrou? Heitoubi Keimaibongra mayungchangrou yaosil puri hu leilei?

²⁰ Ngam heineri Umpune Edom'yei doura kounaksi lhouwai marshikkuro tou heiwaya louninglaklo, heitoubi Ane Teman'ra paalbi klei thimi rapbei doura koulhou karhani rangkuro tou heiwaya louninglak; heirou tanghakpani yani yaorul hangrei mandiyame toubi klei yaoshunya rampha tangthutlourou; heirou tanghakpani Ane yaiyei yaoshang rapyakhi hulchekwurbine toumaangurou.

²¹ Heirou Edom kanelwurnei hou heiwani tlaipangpal thleikhi kartlinheirou. Heirou yaiyei ungraochanei hou heiwari Mrao Samadru ramphara wa'tlungni loumayekrou.

²² Thilak, Umpune malaangnakni trai-kanthumbangbi yukthrillou, heitoubi Aiyei sha rapne Bozrah'yei doura karhani yukmherpakrou; heitoubi heiyei tlainirouri Edom'yei raallui lhouwa rapbei solung rapri naopuknei manshankna napuiya rapbei solungrap naksine hoirouwa.”

Damascus'yei Doura Tantiyei Pichar

²³ Damascus'yei ngamrou asitoubine shunthutlei: “Hamath'le Arpad'yari rikrai phayerwurla, ngamri yani lhangaimak paoya mayekwurla. Yari lhawai lahwurbi ukning kanthritdura; heingammei yari chiwurbi ukningra samadrurei tuylhounak plangurbi trim naimak naksine malung damchangmakura.

²⁴ Damascus'ri tounaram makkura; heitounei ngamrou ani chiwurbi trukrou waiyouwura. Ane chitekwurbi lhawai klah'ne nilshopui hulbine naopukrou kyou manshan kna dou napuiyanak hoiyura.

²⁵ Min chakhou hakrao-nungkngaini bilthim keiyei khukarthil, koutounei thimi rapne neiya malumwurbi khingurkhouwo!

²⁶ Ngam heini heiyei kartlang douwa rapne khukarthil heiyei khullamra hichirouwa; heitoubi raallui lhouwarap nammakhi heiyei tlainirouri hitumchirouwa,” toubi Thangwan-Shimleiyei Pu Umpune paothutlei.

²⁷ “Heitoubi Damascus khukarthillei chiekpalya mei shulhakrouwa; heirouri Ben-hadadei raal'daang rapkhi kaangtlumchirouwa,” toubi Umpune paothutlei.

Kedar'le Hazor Khukarthil Rapbei Doura Karhani Shunthutkur

²⁸ Kedar'le Babylon'yei krung Nebuchadnezzar'ne raal maniwurkhou Hazor khukarthil rapbei ngamrou Umpune asitoubi shunthutlei: “Kanthoubi Kedar'ra raal kadalak, heirou kulkung lhangrei thimi rapya tumni hatdurlaklo.

²⁹ Yaiyei khuiluphi cheem raple heirou yaiyei yaorul rapkhi namma louweichirouwa; heirou yaiyei putchei touwei'mkheikhi, cheem-kei rapkhi, putchei-shungyang rapkhi heirou halrul-utrul rapkhi nammakhi urlouheirouwa. Heitoubi thimi rapne yanungei ‘Bi kantangra chi'knaei shakrungni thimmurame!’ toubi ungraobi heishunrou.

³⁰ “Truklakalo, heitoubi tlatna ramra, khur yuknara trukyullaklo, O Hazor'ra paalbi klei thimirap,” toubi Umpune paothutlei. Kouweiyo toulanungri Babylon'yei krung Nebuchadnezzar'ne naidoura karhani lhou wai raangurlame, heitoubi naya maangnanungei sillurame.

³¹ ‘Kanthouwalo, heitoubi hunikhi yaya manimakroume toubi ningnaimakni ningyungbi klei limya raal kadalaklo,’ toubi Umpune shunpilei; ‘Yaiyei khukarthilri palshung-shumtrumkhi naimaklei, heirou cheemkhar hangkhi rotmaklei. Heirou yaitamtom koukhatkhi lhouhoimakni paalbi leilei.’

³² “Heirou yaiyei utrap heiri raalman khoini urlouchirouwa; heitoubi yaiyei halrul-yaorul rapkhi namma maangyerchirouwa. Heirou yayari Keine martheera traikurnaksine tlaipang chikokna bi kantangra hulchekrouwa,” toubi Umpune paothutlei.

³³ “Heirouri Hazor khukarthilri kalui naimakni maangrouwa, heitoubi bi heiwari yekshang rapbei rabu hoinabi leirouwa. Heirou bi heirouri thimi hukhatkhi yuldathrahmakni hangwalni leirouwa; heirou thimi hukhatnekhi bi heiyei rilla polhak'ngammakni leirouwa.”

Elam'yei Doura Tantiyei Pichar

³⁴ Zedekiah'ne Judah'yei krung khoini palyoutirnung Umpuei tloulhangni Elam'yei ngamrou thimkhui Jeremiah'nung yongbine atoubi kyun:

³⁵ “Thangwan-Shimleiyei Pu Umpune atoubi yunlei: ‘Thilak, Elam'yei mantrang hoikna malaa-taakya Keine toudeekrouwa.

³⁶ Heirou Keine Elam'yei doura nungthou chithek phalitamrei lhimnung-martheetang yenthiyerrou, heitoubi yaya lhanglim phalitamei martheera chaichekbi trailouyerrou; heirouri Elam'ya raalman khoini wa'tlungmakna lim kourakhi yaomakrou.

³⁷ Heisitoubi Keine Elam'yari aiyei yeekna rapbei maibongra heirou yaya hatnungei rapha thimi rapbei hutra klah dayerrou. Heitoubi yaidoura deekbai thukyerrou, heirou Keiyei meithukei malungkha heiwaya yanungei mutpirou,’ toubi Umpune paothutlei; ‘Heirou Keine yaya tumni hatchibongyen yaihilla Keine raalshon yenmalhetrou.

³⁸ Heirouri Keine Elam'yei doura krungbom khat phunbaangthurou, heitoubi heiyei Krungyale yaiyei Krungcha rapya hatdurpirou,’ toubi Umpune paothutlei.

³⁹ ‘Heiya hilluiyei tlainirap heirouri asitoubine hungthukheirou, touri Elam'yei likarsuiri Keine mallenglhakpithurou,’ toubi Umpune paothutlei.”