JEREMIAH 48 - KHYINGEI PU'TLOU Bible (BSI)

Moabei Doura Pichar Tounei

¹ Moabei ngamrou Israellei Dunpu Thangwan-Shimleiyei Pu Umpune asitoubi shunpilei: “Ulleiyo, Nebo'nungeiri lah'knaei lhoume; kouweiyo toulanungri heiwari maangrouwa. Kiriathaim khukarthilri rikrai phayerwurla, heiwari raalla kulchalphopburla. Raalpal kuikoolkhou khukarthilri rikrai phayerwurla, ngamri heiwaya kanelyerwurla.

² Moab'yari hanui kallengni mathangpimakarou; yani Heshbon'ra leibine aidoura karhani maangnanungei rangbine, ‘Wawalo, lim khat hoinarei louthutdurbi maangyeryurase!’ Madmen khukarthil, nangkhi hou thukmakni mul leirouwa; raalshon'ne neiya hulchapirouwa.

³ Horonaim khukarthilrei thimi rapne ungraochabine, ‘Deekkurame! Maangurame!’ toubi yunlei.

⁴ Moab'ri chaallurame. Aiyei naoshun-naopar rapne trungpina'nungei ungraochani ungphaeirou.

⁵ Moabei thimi rapne Luhith lamra kakaeinungri, heisi chapthothoni kakaheirou; heirou yani Horonaimyei lamra yuchumyeinungkhi klah-mrimni chapnei houle ungraochani yuchumkur loumayekrou.

⁶ ‘Khrang'toulaklo! Neiyei rongchanya kalnanungei truklakalo!’ Yane yunlei. ‘Ramthingrei yrao'kalla naksine khrangni truklakalo.’

⁷ “Kouweiyo toulanungri nangni neiyei touthutdurkhou lhou rapya heirou neiyei lalthum rapya malungamnei ngamrou, neiyari raal manipirouwa, heitoubi Chemosh'khi heirou heiyei lhou'urpu rapyakhi raalman khoini urlouheirouwa.

⁸ Heitoubi maangyer-taakyerrou thimi rapri khukarthil kantangei doura hungthukrouwa; heineri khukarthil khatchatomkhi loukartleikur manemakrou. Phaitlai ramkhi maangchirouwa, heirou Umpuei shunpikur heinakrimni chouna ramkhi konmangrouwa.

⁹ Moab'nung trainanungei sha pilaklo, heiyanungri ani aiyei ram'rouwei traithutdurou. Heirou aiyei khukarthilrap heiri takkurbi, heirapbei rilla thimi hukhatkhi paalmakarou.”

¹⁰ “Umpuei watlhou tounara ningnaimak thimi heiri manchoeirou; heirou thimi hatnarei raalshon hangwalni dongyerkur thimi heiri manchoeirou.

¹¹ “Moab'yari douwei waiyoubi nungkngaini leiyerkhou, heirou karbilni kounikhi markholmakni leikhou. Khang khatrouwei khang khatra shungmartlengkur toukhi toukhoumak, Heirou raalshonra malhetkur toukhi leikhoumak. Heingammei aiyei ning-khyak heiwari kamkur toukhi leikhoumak. Heiya aiyei khrimkhi holkhoumak.

¹² “Ngam heineri thilak, heinaksi tlainirap hunglei,” toubi Umpune paothutlei, “Keine anungei khang rapya kuisirbine fleithutrou thimirap yenhilpirou, heitoubi yani aiyei khangya shunglhingurbi heitoubi khang rapya harhar dani khingchaalheirou.

¹³ Heirouri Israelne malungamni ningchakhou Bethel'lei ngamrou rikrai phawurkhou heinakni Moab'khi Chemosh thraiyei ngamrou rikrai pharouwa.

¹⁴ “Koutoubi nani ‘Kari hutmantrang raallui rapme, heirou raalbomrei lhouwa rapme,’ toubine yunchangrouwo?

¹⁵ Moab'ya heirou aiyei khukarthil rapya konmangrou kyou yeekna thimiri ka'tlungura; heirou aiyei khalthutkur raallui kartlang douwa rapri namma hatdurchila,” toubi Krung, Aiyei minri ‘Thangwan-Shimleiyei Pu Umpu’ Ane paothutlei.

¹⁶ Moab'ri khrangni mangrouwa, heirou aiyei hungdongrouri lhamakarou.

¹⁷ “Moab'ya karhillei klei thimirap na nammane, heirou aya kmu thimirap na nammane kanrelbi ungraochani chapbalo. Heitoubi ‘Koutoubi aiyei thang'allei shungkrok heiwari deekkurro?’ toubi yunlaklo!

¹⁸ O Dibon'yei chanapuiya, Neiyei thang'allei krungbom omna dourouwei yongchummuralo, heitoubi thlei tatnara yuikhatne ommuralo. Kouweiyo toulanungri Moab'ya maangyerkur thimiri neidoura karhani wachangurame; heitoubi ani neiyei raalpalni kuikoolkhou khukarthil rapya toumaangurlame.

¹⁹ O Aroeryei thimirap, nani lampalla mayungbine muni thrilthilaklo, heitoubi yentrukthutkur thimi rapnung heirou kartleithutkur thimi rapnung, ‘Kou touwurlawo?’ toubine loungaithilaklo.

²⁰ Moab'yari rikrai phayerwurlame, ngamri aya toumaangurpila. ‘Lhawai klah'ne chapbalo, Moab'ri maangurchiyame!’ toubine Arnon Kungrakhi pao shunpilaklo.

²¹ “Phaitlai ram rapbei doura tantiyei pichar yongura, Pichar heiwari khukarthilrap- Holon, Jahzah, heirou Mephaath'yei doura yongdawura.

²² Dibon, Nebo heirou Beth-Diblathaim'yei dourakhi;

²³ Kiriathai, Beth-Gamul heirou Beth-Meon'yei dourakhi;

²⁴ Heirou Kerioth, Bozrah heirou Moabei khukarthilrap naknarei klei heirou tlatnarei klei nammaei dourakhi pichar yongdawura.

²⁵ Heirou Moabei chee heiwari toudeekwurla, heirou aiyei hutbangkhi toudeekwurla,” toubi Umpune paothutlei.

²⁶ “Ayari tul pimongbi mlipyerlaklo, ngamri ane Umpuya karhani ai'msha-aitamya kanthangnabi mathumbangurla; heiyanungri Moabri mlipburbi aiyei pathutkhounara kalletcharouwa; heirouri a heiri mine laonananungei bomkhat hoirouwa.

²⁷ Moab nangnikhi Israelya laonakhou nimaka? Nangkhi mucha thimi rapya manna hangra manchokkhou nimako? Kouweiyo toulanungri nangni aiyei ngamrou yunleiser neiyei lu khngaakkhou nimaka!

²⁸ “O Moab'ra paalbi klei thimirap, nani khukarthil rapya lakkurkhoubi heitoubi thlungkhan doura pallaklo. Heitoubi thlungpur palla rabu sabine klei ram'mathru naksine hoiyuralo.

²⁹ Moabei tangchakurya kani mayekwurla; ari beimak tangchani kanyerchalei. Aiyei toumane, aiyei tangcha'kna, aiyei khril-thuithi, aitamya mathumbangkna, aiyei napaltou heinaksi nammaya,

³⁰ Keine mulei,” toubi Umpune paothutlei; “Heiya heinak namma heiri koukhi karshukmak; aiyei tangchanei tlouri koukhi karshukmak mandalthil, heirou aiyei touthutkur lhou rapkhi karshukmakei lhouthil.

³¹ Ngam heineri Keine Moab'nung tlim lhawai klah'ne kanrelpirou, heirou Keine Moabei thimirap nammanung tlim ungraobi chaprou. Keiyei solungra Kir-Heres'rei napawa rapnung'tlim kanrellou.

³² O Sibmahyei darkha yam, Keine neinung'tlim Jazer'nung tlim chapkuryakhi duini chaprou! Bongnungri neiyei darkha yam rapri Jazer waphani heiyamkhou, heiya yeekna thimi rapne neiyei manthrallei hutlha hei rapya lalouheibi konmangurchila.

³³ Thlei'tuina Moab ramrei hakrao-nungkngai heirou langthounei lhouri makkura, louthutdurla, darkha heiyui shumnarei darkhayui shumkhi toudongurla; hunikhi darkha hei shumyeinung hakrao-nungkngaini shumrilmakura; houri shaolei heiya harao-nungainei houri nimaklei.

³⁴ “Yane Heshbon'le Ele-aleh'rei hou chouni ungraolei. Ungraonei hou heiri Jahaz ramphani wa'tlunglei; heirou Zoar'rouweini Horonaim heirou Eglath-Shelishiyah ramphani wa'tlunglei; kouweiyo toulanungri Nimrim'ri yui yentaarwurchiya.

³⁵ Keine Moab'ya lukbom-thraibom rapra khrumna putya meira hongbi makatnarei heirou thrai rapnungei mrohkun iknarei dongyerrouwa,” toubi Umpune paothutlei.

³⁶ “Heitounei ngammei Keiyei solungni Moab'nung tlim paasi khungbine khilaa shanaksi kanrellei; Keiyei ukningra Kirheres'rei napawa rapnung tlim paasi khungbine khilaa shanakni lhawai klah'ne kanrelpilei. Ngamri yaiyei taal'lhakkhou lalthumrap namma heiri karshukmakni mangurchiya.”

³⁷ “Lu kantangkhi sham ngoukukurchila, heirou murkhmulkhi ngoumthaiwurchila; heirou hutmayung kantangkhi hee thukwurchiya, shintlak kantangrakhi phichun yitphopbine leiwurchiya.

³⁸ Moabei cheembung kantangra heirou khullam kantangra lhawai klah'ne kanrelnei houni thimmura; kouweiyo toulanungri Moab'ya Keine phuwan khingchalkur heinaksine khingchalwurpila,” toubi Umpune paothutlei.

³⁹ “Awari koutoubi baikuro? Yari koutoubi kanrelni chapkurawo? Moab'ri koutoubi rikrai phawurbi mai kallekkuro? Heisitoubi Moab'ri miyei laonanabom khoini leirouwa, heitoubi yaya karhillei klei thimi rapbei chirilna bom hoirouwa.”

⁴⁰ Kouweiyo toulanungri Umpune atoubi yunlei: “Thilak! Hukounak khatne malaangnak yentrailhakbi Moabei doura karhani aiyei sha rapne yapkhalwurla.

⁴¹ Kerioth khukarthil rapya luklourouwa, heirou mantrangkur raalpal rapya kulchalrouwa. Heirouri Moabei mantrangkur raallui rapbei solungri napuiya naopuknei manshan knadou rapbei solung naksine hoichirouwa.

⁴² Moab'ri lim khat hoinarouwei maangrouwa, ngamri Umpuei doura manthamakni thuithiyei lhouya tangchani touwurkhoula.

⁴³ O Moabei thimirap, nai maibongrari chi'knale, khur yukna bi heirou changni bil thimni leiyurame,” toubi Umpune paothutlei.

⁴⁴ “Hukhatpani chi'kna bom'rouwei trukanungri khur yuknara dalhakrou; heirou khur yuknarei kathuk thimiri chaang kamnara tatlhakbi manrou. Kouweiyo toulanungri Keine Moabei doura heinaksi tantiyei pichar tounei kheen yenpirouwa,” toubi Umpune paothutlei.

⁴⁵ “Heshbonyei kallera yulbi leilei raalchi truk thimi rapne tounaram makni. Heiya Heshbon'rei mei heikaangthutbi heitoubi Sihonrei meithlan heilamthutlei; heitoubi Moabei machalla kangurla; heirou tangcha thimi rapya kaanghatdurla.

⁴⁶ O Moab! Neinungeiri lah'knaei lhouwame! Chemosh'yei thimi rapri mangurchiyame; kouweiyo toulanungri naiyei chanapawa rapri raalman khoini urlouheila; heirou naiyei chanapuiya rapyari kulchalphopburchila.

⁴⁷ Heiya Keine Moabei likarsui lhangaiyernei tlaini hungeirouhui,” toubi Umpune paothutlei. Asitoubi Moabei doura pichar hungluilhakrou.