JEREMIAH 46 - KHYINGEI PU'TLOU Bible (BSI)

Egyptbei Doura Pichar

¹ Lim dei rapbei ngamrou thimkhui Jeremiah'nung Umpuei shunpikur tlourap:

² Judah'ra Josiah'yei chanapawa Jehoiakim'ne krung khoini thrungei kum-phali tlungeinung Babylon'yei krung Nebuchadnezzar'ne Euphrate kungtang ruira Carchemish'ra Egyptbei krung Pharaoh Neco'yei raallui rapya raal manewurnei ngamrou asitoubi shunlei:

³ “Chung tangkhi, mandikhi shinbine lingshaang ringlaka, heitoubi raalbomranung heitonlhaklaka!

⁴ Sapuk rapbei khutsirui shinlaka, heitoubi sapuk doura tungbaanglaka, heirou naiyei raal-lukhup rapya khuploubine raal sounungei ho trumbine mayunglaka! Raal cheipak msur liplip alni khya'raatlaka; heitoubi raal-shamb rapya baanglaka!

⁵ Keiyei mulhakkurya kouwo? Yari mathunbi chiwurchiya, yari hilla truk'kallengurchiya; heirou yaiyei mantrang lhouwa rapyakhi raal manewurpila. Yane tekkhi loukallekthimakni trukwurchiya - thyoi-thyarakhi chi'knani bil thimmurame!” toubi Umpune paothutlei.

⁶ Chan'khyang thimi rapkhi trukchangmakarou, heirou mantrang raallui rapkhi kartleichangmakarou. Khallu lhangei Euphrate Kungpalla yani tapanloubine kanelwurchiya.

⁷ “Nile Kungtang naksine traikanthoukuri huwo? Kungtangrei yuilhou katfyounaksine karpanchakuri huwo?

⁸ Egypt'ri Nile kungtang naksine kanthoulei, kungtangrei yuilhou naksine kanchekchalei. Heirou ani kyun, ‘Keine kanthoubi tlaipangpal nammaya makhupkhallou. Heitoubi Keine khukarthil rapya kontumrou, heirou heiyei thimi rapyakhi namma konmangurou.’

⁹ Sapukrap raalbomra chawalo, heirou sapuk kaarirap thuithiei khyangni thoubine chalaklo! Chung shinbi klei Ethiopia'le Put ramrei mantrang lhouwarap, heirou malaa taak shinbi klei Lydia'rei raallui lhouwarap, nane maibong lhangra krakni heitonlhaklaklo.

¹⁰ Tlaini heiwari Thangwan-Shimleiyei Pu Dunpuei tlaini, khlang lhaknei tlaini khat, tlaini heirouri Ane Aiyei yeekna thimi rapya tanti pirou. Raalshon'ne malung pilbongyen shat'hatdeirou, heitoubi malung khrahbongyen mongrou. Kouweiyo toulanungri khalu lhangei ramra Euphrate kungpalla Thangwan-Shimleiyei Pu Dunpune thimi chungwani shat'hatdeirouhui.

¹¹ Gilead'ra wabine hilhak(louh) waloulaklo, O Egypt'rei reidangwirap; koukhi karshukmaknarou nani hilhak chungni yrengchalei, heiya heirapne naya koukhi kna raiyerchangmakrou.

¹² Lim dei rapne naiyei rikraiknaya mayeklhakurla. Heirou tlaipangpalri naiyei klah-mrimni chapnei houni thimwurchiya; kouweiyo toulanungri raallui khatne tapanbi raallui khatdei doura kanelbangura, heitoubi yakhuntarek kanelhakura.”

Babylonia Rapne Egyptya Raal Darou

¹³ Babylon'yei krung Nebuchadnezzar'ne Egyptbei ramra wabine raal dabi lukrou younei ngamrou thimkhui Jeremiah'nung Umpuei shunthutpikur tloulhangri asitoubi klei.

¹⁴ “Raalpao awaya Egypt'ra shunthutpilak, heitoubi Migdol'rakhi paothutpilak; raalpao awari Memphis'rakhi heirou Tahpanhes'rakhi paothutbine shunpilaklo, ‘Nane raal marshikbine raal kantrumlaklo; kouweiyo toulanungri naya karhillei klei thimi rapyari raalshon'ne hatdurchila.

¹⁵ Naiyei hut mantrang lhouwa rapri koutounei hiwurchiwo? Yayari Umpune khingsundawurnei ngamrou mayungchangmakura!’

¹⁶ Yari kalleng-kalleng tapanloubi, heitoubi khatne khatdei doura kanelbaangrillura. Heirouri yane kyun, ‘Kanthouwalo! Kane kai thimi rapnungei kallenglakase, heirou kai ramra kallenglakase. Kaya yeekna thimi rapbei raalshon maibongrouwei truklakase.’ ”

¹⁷ Yane ungraochabi kyun, “Egyptbei krung Pharaoh'ne houlung tomngei, heirou ari tlakcha kheenya hormangurla!”

¹⁸ ‘Thangwan-Shimleiyei Umpu’ toubi min ung Krungne paothutlei, “Keine ringleiyenri, Tabor Lhungdou naksine, heirou Samadru ruirei Carmel Lhungdou naksine Toumani Ruipipu khat shuimakne hungthukeirouhui.

¹⁹ Raalman khoini chananungei naiyei putyum marshiklakalo, O Egypt'ra paalbi klei chanapuiya reidangrap, kouweiyo toulanungri Memphis'ri thimi hukhi paalthrahmak'nungei maangyerwurbi hangwalni leiyerrouwa!

²⁰ Egypt'ri rchao kalla naksine lhangailei, heiya khalu lhangrei tran'khmong khat yentraibi aya raal darouwa!

²¹ Heirou yaihangrei kyao Egyptbei kneek raallui rapkhi halpa marnam naksithillei. Kouweiyo toulanungri yarapkhi hil kallengurbi pulni trukwurchiya; yani ho trumna bira tatmanthrambi raal lousounakura. Kouweiyo toulanungri yaidoura maangna'nungei tlaini heirou tanti tounei tlaini hungura.

²² Frul tulkur heinaksine Egyptbei thimi rapne loutruklei; kouweiyo toulanungri heengshen thimi rapne hutra rei shinbine wachangnaksine yeekna thimi rapne yaipongra heitonlhaklei.

²³ Yeekna thimi rapne Egyptbei raallui rapya heengyao shaat'taakkur heinaksine shat'hatdurlei,” toubi Umpune paothutlei. “Yai mshingri khaorul naksine chungachaknei ngamrou sherchichangma'nungkhi, heirou chungachaknei ngamrou yaihangra wachangma'nungkhi, yarapri muphamakni himaangchirouwa.

²⁴ Egyptbei chanapuiya rapyari rikrai phayerrouwa; heirou yayari khalu lhangrei hut mantrang thimi rapnungei pilhakbi silnarouwa.”

²⁵ Israellei Dunpu Thangwan-Shimleiyei Pu Umpune shunlei, “Thilak, Keine Thebes'rei Amonia rapya, heirou Pharaoh'le Egyptya heirou aiyei thrai rapyakhi, heirou aiyei krung rapyakhi, heirou Pharaoh'yale aya malungampi thimi rapya rampha tanti pirouwa.

²⁶ Heirou yayari Keine yaya hatnungei hulchabi klei yeekna thimi rapbei hutra, heirou Babylon'yei krung Nebuchadnezzar'yei hutra heirou aiyei lhou'urpu rapbei hutra pilhakrouwa. Heiya hillouri Egypt'ri bongei naksine kyingni paalyerthurou,” toubi Umpune paothutlei.

Dunpu'ne Israelya Kalpirou

²⁷ “Heiya Keiyei shikrui Jacob, nangri chimaklo, heirou O Israel, nangri chimathunwurbi lhawai lahwurmaklo! Kouweiyo toulanungri neiyari Keine tlatna ram'rouwei kalpiroume. Heitoubi neiyei yu-cha rapyari yaya raal manphopbi leina ram'rouwei kalthutpiroume; heirouri Jacobni yenkallengbi ayari koukhatnekhi markholmakni hanui kyingni palthuroume.

²⁸ O Jacob, Keiyei shikrui, nangri chimaklo, ngamri Keine neiya kalhonpileime,” toubi Umpune paothutlei. “Kouweiyo toulanungri Keine naya hulcheklhakwurna birouwei lim deirap nammaya toumaangbi hungdongyerou! Heisiya hoiyanungkhi Keine nayari tlumni toumaangmakhuirou! Heiya nayari touchimpiheirou, heitoubi koukouya hoiyanungkhi nayari pichar toumakniri lakkhoumakrou.”