JEREMIAH 41 - KHYINGEI PU'TLOU Bible (BSI)

Gedaliah'ya Hatkur

¹ Asinungri asitoubi hungthukkura, touri tangla tlun-eni tlungei kallou Elishama'yei chanapawa Nethaniah'yei chanapawa krungei shullamrei thimi, heirou krungei lhou'urpu upa rapbei hangrei khatkhi khoi Ishmael'ne Mizpah'ra, Ahikam'yei chanapawa Gedaliah'yei leinara wakur. Heirouri yani Mizpah'ra pulni omkarhungbi chak chamalnabi leiyei kheenrou,

² Nethaniah'yei chanapawa Ishmael'ne akou kalhonbi klei napawa napung chiple kalhonni kanthoubine heiroubi Shaphan'yei chanapawa Ahikam'yei chanapawa Babylon'yei krungni Judah'yei ramra Rampu khoini khalbangpikur thimi Gedaliah'ya raalshon'ne shatbi hatkur.

³ Ishmael'ne Mizpah'ra Gedaliah'le leimalkna Jehudia'rap nammayakhi hatdurpi; heitoubi bi heirou klei Chaldea'yei raallui rapyakhi hatdurpi.

⁴ Gedaliah'ya hatkur hillei tlainirou, thimi hukhatnekhi muthungbongnung asitoubi thukkura;

⁵ Touri, Shechem'rei, Shiloh'rei heirou Samaria'rei napawa napung somshrini yaiyei lu (murkhmul) ngoumathaiwurbi, heitoubi yai sarung rapya pottatdurbine, heitoubi yaiyei linglik-phi'up rapkhi threlchaalwurbine, Umpuei Pucheemra makatnungei yaihutra trunwai lungrap heirou mrohkun heilhakbine wachangkur.

⁶ Heirouri Nethaniah'yei chanapawa Ishmael'ne yaya murilnungei toubi Mizpah'rouwei chap-chapni louwathukkur. Heirouri ani yaya lourobine yanungei, “Ahikam'yei chanapawa Gedaliah'yei leinara wachangpiyalo!” toubi loushunkur.

⁷ Heisitoubi yani Mizpah'yei khukarthil rilla wachangkur heirouri, Nethaniah'yei chanapawa Ishmael'ne ale kalhonbi louklei napawa rapne yaya louhatdurpi, heitoubi guha yuknara khinglhakkur.

⁸ Heiya yaihangrei napawa napung chipni Ishmaelnung, “Kayari hatpimaklo, kouweiyo toulanungri kari phailoura trunwai lungrap, gehu, chanal, shirek heirou khuiningkhi chapongra marpeibine khouleihui,” toubi shunchakur. Heisi tounarouri ani yayari hatmakni dongurbi, yai palui raple hichokyermakkur.

⁹ Asinungri Ishmael'ne Gedaliahle hatmalnakur thimi rapbei khi'lhung rapya khinglhakurna yuiphum heiwari beimakni marya, heiwari krung Asa'ne Israellei krung Baasha'le raal kardourilyei kheenrou raal lousounanungei utyukkur yuiphum. Heiya asinungri Nethaniah'yei chanapawa Ishmael'ne khi'lhung rapya khinglhakbine heiwaya thimyerwurla.

¹⁰ Heirouri Ishmael'ne Mizpah'ra klei thimirap nammaya, krungei chanapuiya raple, heirou krungei raallui chaylampu upa Nebuzaradan'ne Mizpah'ra Ahikam'yei chanapawa Gedaliah'yei hutra thikulnanungei lakkhoubi silnakur thimirap nayeryakhi raalman khoini urlouheikur. Heisitoubi Nethaniah'yei chanapawa Ishmael'ne ya rapya raalman khoini urlouheibi, heitoubi Ammonia rapbei ramranung heiraalkur.

¹¹ Heiya Kareah'yei chanapawa Johanan'ne heirou akou kalhonni louklei raallui chaylampu upa rapnekhi Nethaniah'yei chanapawa Ishmael'ne toupikur lhangaimak lhourap nammaya mayekkurla.

¹² Heisi tounarouri yani raalluirap nammaya ruilouheibi Nethaniah'yei chanapawa Ishmaelya raal dananungei chakur, heirouri yani aya Gibeon'yei yuiphumtang pongra heichanphakur.

¹³ Asinungri asitoubi thukkura, touri Ishmael'ne raalman khoini urlouheibi louklei thimirap nammane Kareah'yei chanapawa Johanan'le akou kalhonni raallui chaylampu upa rapya loumukur heirouri beimakni nungaiyura.

¹⁴ Heisi tounarouri Ishmael'ne Mizpah'rei raal manloukur thimirap nammane truk-kallengurbi Kareah'yei chanapawa Johanan'yei leinara yenchankur.

¹⁵ Heiya Nethaniah'yei chanapawa Ishmael'ne akou kalhon thimi napung-khatri kartleiwurbi Ammonia rapbei leinara truklhakkur.

¹⁶ Heisitoubi Kareah'yei chanapawa Johanan'ne aiyei raallui chaylampu upa rapne, Nethaniah'yei chanapawa Ishmael'ne Mizpah'ra Ahikam'yei chanapawa Gedaliah'ya hatdurbi raalman khoini urloukur thimi rapya kalthungkur. Yarap heiyei hangra himalei raallui raple, napuiyarap, naoshun-naopar rapkhi, heirou krungkullei lhou'urpu msha holkur napawarap kyao. Heisitoubi Johanan'ne ya rapya Gibeon'rei yenruimallengkur.

¹⁷ Heirou yani Egypt'ra yunanungei marshik khoini wathukwurbi Bethlehem pongra Geruth Chimham'ra leiwurkhou.

¹⁸ Ngamri yani Babylonia rapya kalthi chirilkur, ngamri Babylon'yei krungni Ahikam'yei chanapawa Judah'yei ramra Rampu khoini khalbangbine bom lhakpikhou Gedaliah'ya Nethaniah'yei chanapawa Ishmael'ne hatdurpi.