JEREMIAH 40 - KHYINGEI PU'TLOU Bible (BSI)

Jeremiah'ne Judah'ra Gedaliahle Kalhonni Leithungkur

¹ Raallui chaylampu upa Nebuzaradan'ne Jeremiah'ya Jerusalem, heirou Judah'rei thimirap nammale kalhonni Babylon'ra raalman khoini urlouheinarei Ramah khukarthilra aihutrei thirrui msuiya sutbine malhetpikur hillouri, Umpuei tloulhangni Jeremiah'nung kyong:

² Raallui chaylampu upa Nebuzaradan'ne Jeremiah'ya rui'martleiloubine anungei atoubi shun, “Neiyei Dunpu Umpune khukarthil aei klah-knang dananungei paothutdurkhoula;

³ Heitoubi Umpu Ane paothutkur heiwaya Aiyei paothutkur heinakrimni hungthukyerrula. Ngamri Judah'yei thimirap nani Umpuya karhani borh touwurkhoula, heirou Aiyei houya ninglhakpimakura. Heitounei ngamrou anaksi thuithikur klah-knangya naidoura hungthukkura.

⁴ Heiya asinungri thilak, keine neihutrei thirrui msuikurya sutpiwurla. Kounakpi nangni keile kalhonni Babylon'ra warou toulanungkhi, wawalo; heirou keine neiyari lhangaini thikulpirou; heiya kounakpi nangni keile kalhonni Babylon'ra wamakrou toulanungkhi koukhi baimak. Thilak, neiyei maibongra ram namma klei heiwariya, nangni lhangairoume touna ramra, heirou neiyei chanina bira chawalo.”

⁵ Heirou Jeremiah'ne mai khreibine chawurbongnung, ani yunthu: “Heisi nimakanungri Babylon'yei krungni Judah'yei khukarthil rapbei doura thrungpinanungei khalbangpikur Shaphan'yei chanapawa Ahikam'yei chanapawa Gedaliah'yei leinara kallengbine aiyei pongra thimi deirapbei hangra leilaka, nimakanungri, neiyei leinina-chanina bi koukoura chabine leilaka.” Heisitoubi raallui chaylampu upawane anungei tsai-anle hutthulput rapkhi marshikpibi shaalyerkur.

⁶ Heirouri Jeremiah'ne Mizpah'ra Ahikam'yei chanapawa Gedaliah'yei leinara wawurbine, heitoubi ram heirou leithungkur thimi rapbei hangra paalbine leikur.

⁷ Kheen heirouri ramdeira chabine louklei raallui chaylampu uparap nammale yaiyei raalluirap nammanekhi, Babylon krungni Ahikam'yei chanapawa Gedaliah'ya Judah'yei doura Rampu khoini khalbaangurbi, ram heiyei thimirap, napuiya naoshun-naoparrap nammaya, heirou Babylon'ra raalman khoini ruilouheimakni lakkurkhou kanring-kanwai thimi rapyakhi aihutra pilhakbine silnawurlame tounei paoya mayekkurla.

⁸ Heisitoubi yani Nethaniah'yei chanapawa Ishmael'le, Johanan, heirou Kareah'yei chanapawarap Jonathan'le, Tanhumeth'yei chanapawa Seraiah heirou Netophathia Ephai'yei chanapawa raple, Ma-acathia'yei chanapawa Jezaniahle kalhonni Mizpah'ra Gedaliah'yei leinara wakur.

⁹ Heirouri Shaphan'yei chanapawa Ahikam'yei chanapawa Gedaliah'ne yanungle heirou yaiyei napawa rapnungei kantombine atoubi kyun, “Chaldea rapya watlhou tourouri chimak, heirou ram heiyei rilla leibine heitoubi Babylon'yei krungya watlhou toulak; heiyanungri nanungei likarsui lhangai hoirou.

¹⁰ Thilak, keiri Mizpah'ra leibine Chaldea rapbei maibongra nanungei'tlim mayungbine watlhou touweise; heiya nari darkha heiyui shum-mallongbine heirou manthrallei hei lukmallongbine, heitoubi naiyei chapongra heirou darkha heiyui khangra shungmallongbi khoulak; heitoubi nani kulchalbi luklouheikur khukarthil rapra paalbine louleilaka.”

¹¹ Heinakrimni Moabra klei heirou Ammon chanao rapbei hangra klei, heirou Edomra klei, heirou ram deideira klei Jehudearap nammanekhi Babylon'yei krungni Judah'ra thimi thacha lakkurkhoubi yaidoura Shaphan'yei chanapawa Ahikam'yei chanapawa Gedaliah'ya khalbaangbine Rampu khoini thikulyerwurlame tounei pao heiwari mayekurchila.

¹² Heirouri Jehudea'rap nammane yaya hulcheklhakurna ram'rouwei Judah'yei ramra yenkallengbi, Mizpah'ra Gedaliah'nung hungkar'umkur; heitoubi yani ai'aiyei khoini darkha heiyui shumbi mallongkur, heirou manthrallei trunwai hei rapkhi lukmallongbine leraoni marpeibi khoukur.

¹³ Heirouri Kareah'yei chanapawa Johanan'le heirou raallui chaylampu uparap nammakhi lhungdou ramrei leinarouwei Mizpah'ra Gedaliah'yei leinaranung hungthukkur;

¹⁴ Heitoubi anungei hungshun, “Ammon chanao rapbei krung Baalis'ne Nethaniah'yei chanapawa Ishmaelya neekbi neiya hatnanungei heihilkurya nangri koukhatkhi mumakhuiko?” Heiya Ahikam'yei chanapawa Gedaliah'neri yaya koukhi tloukhoini loupimakkur.

¹⁵ Heirou Kareah'yei chanapawa Johanan'ne Mizpah'ra Gedaliah'nung muni kyun, “Keine chabine heitoubi Nethaniah'yei chanapawa Ishmael'ya hatdureise, thimi hunikhi mumakrou! Koutoubi ani neiya hatbine neinungei wakar'umkur Jehudia'rap namma hulchekyerbi, heitoubi himaleithung Judah'ya maangyerrouwo?”

¹⁶ Heiya Ahikam'yei chanapawa Gedaliah'ne Kareah'yei chanapawa Johanan'ya loushun, “Heinaksiri toupimak, kouweiyo toulanungri nangni Ishmaelyei ngamrou kyun heiwari chimmakrou!”