JEREMIAH 39 - KHYINGEI PU'TLOU Bible (BSI)

Jerusalem Kanelkur

¹ Judah'yei krung Zedekiah'ne thrungei krungchaan kum tako tlungei, tangla lhunchiprou Babylon'yei krung Nebuchadnezzar'ne aiyei raalluirap nammaya urbine Jerusalem'ra kabi Kholil heiwaya koolphopbine lukloukur.

² Heitoubi Zedekiah'yei krungchaan kum chiple-khatdei lhunphali tlung tanglaei takoni tlung tlainirou Jerusalem Kholilyei raalpal heiwaya nambaibi deeksundakur.

³ Heirouri Babylon krungei lhou'urpu uparap nammane Jerusalem krungkul rilla wachangurbine heitoubi tlaitamei palshung shumtrumra wachangkur. Lhou'urpu uparap heiri Nergal-sharezer, Samgar-nebo, Rabsari, Sarechim, Rabmag'rei Nergal-sharezer heirou Babylon krungei lhou'ur purap deidei nammakhi kyao.

⁴ Heirou Judah'yei krung Zedekiah'le aiyei raalluirap nammane yaya mulhakkur heirouri, yani msanung Jerusalem Kholilya lakkurkhoubi krungei yekul lhangei lamthungni wathukkurbi raalpal khintamei tlakra klei palshung shumtrumra loutrukthutkur, heitoubi Arabah lhangra wakur.

⁵ Heiya Chaldea'yei raallui rapne yaya raalchanbi hulthungkur, heitoubi Jericho'yei phaikarra Zedekiah'ya chanphawurbi heitoubi yani aya mankur, heitoubi yani aya Hamath'yei ramra Babylon'yei krung Nebuchadnezzar'yei leina khukarthil Ribla'ra yenruiheikur, heitoubi krungni aidoura pichar loutoubi tanti pikur.

⁶ Heitoubi Babylon'yei krungni Ribla'ra Zedekiah'yei chanapawa rapya aiyei maibongra aiyei mitni muthungni hatdurpi; heitoubi Babylon krungni Judah'yei lhou'urpu uparap nammayakhi hatdurpi.

⁷ Heirouri ani Zedekiah'ya mitlung khintamrek kholthutdurpi, heitoubi aya kulshan thir-ruini phanphopburbine Babylon'ra yentaangheikur.

⁸ Chaldea rapne krungei krungkul heirou thimi rapbei cheem rapkhi namma meini shutaakkur; heitoubi yani Jerusalemei raalpal rapkhi nangbaisundakur.

⁹ Heirouri krungei raallui chaylampu upa Nebuzaradan'ne Jerusalem Kholilra leithungkur thimirap nammale, heirou yanungei rochakur thimirap nammayakhi manlouheibine yaya Babylon'ra raalman khoini urloukur.

¹⁰ Heiya tounaram mak kanring-kanwai thimirap thayari raallui upa Nebuzaradan'ne Judah'yei ramra lakkurkhou. Heitoubi heiyei tlainirou ani yanungei darkha yekul rapkhi heirou pahilou rapkhi silnawurkhou.

Jeremiah'ya Malhetthutkur

¹¹ Babylon'yei Krung Nebuchadnezzar'ne raallui chaylampu upawa Nebuzaradan'nung Jeremiah'yei ngamrou chay pibine atoubi shunkur:

¹² “Jeremiah'ya ruilouheilaka, heitoubi lhangaini thikulpilak; aya thuithini toupinungei yamakrou; heiya ani neinungei kyun-kyunya hilthungni nangni loutoupirou da.”

¹³ Heisi tounarouri raallui chaylampu upawa Nebuzaradanle kalhonni Rabsari'rei Nibushazban, Rabmag'rei Nergal-sharezer'le, heirou Babylon krungei lhou'urpu uparap nammaya watyilbi malhetkur.

¹⁴ Heirouri yani Jeremiah'ya raalngaakna cheemrei waruithutloubine heitoubi Shaphan'yei chanapawa Ahikam'yei chanapawa Gedaliah'nung silnawurbine aya cheemra ruimallengnungei shunkur. Heisitoubi Jeremiah'ne Judah'ra leithungkur aiyei thimi rapkou kalhonbi leikur.

¹⁵ Heirou Jeremiah'ne raalngakna cheemra leiyeinung Umpuei tloulhangni anungei yongbi atoubi kyun.

¹⁶ “Chawalo, heitoubi Ethiopia napawa Obed-Melech'nung pao awaya washunpilak, ‘Israellei Dunpu, Thangwan-Shimleiyei Pu Umpune atoubi shunlei: “Thilak, Keine Kholil aei doura Keiyei shunthutkhou tloulhang rapya hungtlungyerbi, lhangainanungei nimakni thuithiyei klah-knangya thukyerrouwa; heitoubi heirapri neiyei maibongra neimit dodoni hungthukrouwa.

¹⁷ Heiya neiyari heininung Keine kalpirou,” toubi Umpune paothutlei; “Heirou neiyari nangni ningchibi klei thimi rapbei hutra pilhakmakrou.

¹⁸ Kouweiyo toulanungri Keine neiyari shuimakni kalthutpirou, heirou nangri raalshonra himakrou; heiya neiyei rongchanri raalla manlouheikur putchei khoini leirouwa, ngamri nangni Keiya uklumwurla,” toubi Umpune paothutlei.’ ”