JEREMIAH 38 - KHYINGEI PU'TLOU Bible (BSI)

Jeremiah'ya Khuryuknara Khinglhakkur

¹ Heirouri Mattan'yei chanapawa Shephatiahle, Pashhur'yei chanapawa Gedaliah, Shelemiah'yei chanapawa Jucal, heirou Malchijah'yei chanapawa Pashhur ya napung phalini Jeremiah'ne thimirap nammanungei shunpikur tloulhang rapya mayekthungkur, ani asitoubi kyun.

² “Umpune asitoubi shunpilei: ‘Kholil heirouwei trukmakni leithungkur thimirap heiri raalshonra, butaamra, heirou pharthraiyei chansherra hirouwa; heiya Chaldea rapnung Babylon'ra truklhakkur thimi heiri ringthungrou.’

³ Umpune asitoubikhi yunlei: ‘Kholil awari Babylon krungei raallui rapbei hutra shuimakni pilhakrouwa; heitoubi ane heiwaya manlouheibi urlourouwa.’”

⁴ Heirouri lhou'urpu rapne krungnung shun, “Napawa awari hatdurase; kouweiyo toulanungri ane Kholil aei rilla leithung raallui rapyale thimirap nammanungei heinaksi tloulhang rapya yunbine, yaiyei ukning toukanthritdurla. Heirou ani thimi rapbei lhangaina'nungei raphamakni, yaya maang'yernanungei silkurame.”

⁵ Heingammei Krung Zedekiah'ne loukyun, “Thilak, a heiwari naihutra leikur heiwariya; kouweiyo toulanungri krung keine nai kningya koukhi toudongchangmakrou.”

⁶ Heirouri yani Jeremiah'ya manlouheikur, heitoubi krungei chanapawa Malchijah'yei raal'daang yuntlangmaira klei yuiphum rilla malhetlhakkur. Yane Jeremiah'ya ruifretra churchayerbi kanchumsundabi trukyerkur. Khuryukna yuiphum heiwari yuiri tekkhi yaomak, heiya mayurari thleibulthil, heineri Jeremiah'ri thleibulla heisi yendumlhakkur.

Ebed-Melech'ne Jeremiah'ya Kalthutpikur

⁷ Heiya Ethiopia'yei msha holkur napawa Ebed-Melech'ne krungkulra leiyeinung yani lhou'urpu upa rapne Jeremiah'ya yuiphum rilla laklhakurlame tounei paoya mayekkur. Kheen heirouri krungri Benjamin shumtrumra ombine louklei.

⁸ Heirouri Ebed-Melech'ne krungkulrei wathukbine heitoubi krungnungei pao washunbin atoubi kyun:

⁹ “Keiyei upawa, krung, ‘lhou'urpu upa rapne thimkhui Jeremiah'ya manbine heitoubi thuithini mreknapiwurbi khur yukna rilla khinglhakurpilame.’ Ari khurrilla leibine msulni hirouleiyame, ngamri Kholil heirouri butaam thukbine chaanung-mainungei koukhi makkurame.”

¹⁰ Heirouri krungni chay piwurbi Ethiopia Ebed-Melech'ya shun, “Nangne krungkul arouwei napawa napung somthum ruilouheibine heitoubi thimkhui Jeremiah'ya hibongnung yuiphumrei walouthutbine ara yenruiheilak.”

¹¹ Heisi tounarouri Ebed-Melech'ne napawa napung somthumya ruibine, heitoubi krungkul rilla hungchangbine, chakei daakrei phichun mtum thale rmol mtum thakhi hunglouthutbi, heitoubi heirapya ruifretni msuiphopbine yuiphum rilla Jeremiah'nung yuklaksundapikur.

¹² Heirouri Ethiopia Ebed-Melech'ne Jeremiah'nung yukshun, “Phichun mtum raple rmol mtum rapya ruifretle toubi neiyei khyadaakra yukchebphoplaklo.” Heisi tounarouri Jeremiah'ne yukshunkur heinakrimni louchanthungkur.

¹³ Heisitoubi yani Jeremiah'ya ruifretle toubine yuiphum rillei tangthutbine yenruiheikur, heitoubi Jeremiah'ne raal'daangei cheemra leikur.

Zedekiah'ne Jeremiahle Tlou Kartongrilkur

¹⁴ Heirouri krung Zedekiah'ne thimi heimalhetbine thimkhui Jeremiah'ya walouthutyerkur, heitoubi Pucheemyei khyumtam tlung shumtrumra aya yenruilhakyerkur; heirouri krungni Jeremiah'nung loushun, “Keine neinungei kounaksi tloubom tha ngaithiyeise, nangni keinungei koukhi yulkhoumakni loumallangpilak.”

¹⁵ Heirouri Jeremiah'ne Zedekiah'nung loukyun, “Kounakpi keine neinungei chimni shunthutpilanungri, nangni keiyari tanghakpani hatmakrouko? Heiyakhi duinara kounakpi keine neinungei tlou sempilanungri nangni keiya ninglhakpirouko?”

¹⁶ Heiya krung Zedekiah'ne Jeremiah'nung muni tlou kantombine kyun: “Kaya nilsoyerbi ringyerpi Pu Umpune ringliyenri, keine neiyari tekkhi hatpimakrou, heirou neiya hatnungei rapha thimi rapbei hutrakhi neiyari pilhakmakrou.”

¹⁷ Heirouri Jeremiah'ne Zedekiah'nung loushun, “Israel rapbei Dunpu, Thangwan-Shimleiyei Pu Umpune atoubi yunlei: ‘Kounakpi nangni wabi Babylon krungei lhou'urpu upa rapnung wachangurbi rochalanungri, nangri ringrou, heirou Kholil awakhi mei shulhakmakrou; heitoubi nangkhi heirou neiyei cheemkhur-bommai rapkhi himakrou.

¹⁸ Heiya kounakpi nangni Babylon krungei lhou'urpu rapnungei wachangbine rochamaka'nungri, Kholil awari Chaldea rapbei hutra pilhakrouwa; heitoubi yani heiwaya mei shulhakrouwa, heirou nangkhi yaihutrouwei kartleikhoumakrou.’ ”

¹⁹ Heirouri Zedekiah'ne Jeremiah'nung loukyun, “Keiri Chaldea rapbei lhangra yaothungkur Jehudia rapyari beimakni chinawura; kounakpi yani keiyari yaihutra pilhaklanungri keiyari yani thuithini toupibi mreknarouwa.”

²⁰ Heiya Jeremiah'ne shun, “Neiyari yaihutra pilhakmakrou, keine neinungei shunpikur Umpuei chaytlou heiwayatom hilthungni lhou loutoulak; heiyanungri neinungei koukhi shuikngam makrou, heitoubi neilhawaikhi kalpi pharou.

²¹ Heiya kounakpi nangni lhou hoipimakni wathukbi rochanimakanungri, Umpune keinungei kar'anbi muyerkur tlouni atoubi shunpilei:

²² ‘Heirouri thilak, Judah krungei Krungkul rilla horkhoukur napuiyarap namyerya Babylon krungei lhou'urpu upa rapnungei ruithutbine urlouheila;’ heitoubi yani sei shaknabi yunlei: ‘Neiyei malungamkhou palui rapne neiya mandalwurla, heitoubi neidoura karhani leiyura; heirou neihoni thleibul hangra yongdumyeinung, yari heitrukurchiya.

²³ Heitoubi naiyei nurap heirou naiyei chawarap nammayakhi urthutloubine Chaldea rapnungei pilhakchirouwa; heirou neimsha'hakyakhi yaihutrouwei kartleimakarou; heiya Babylon krungei hutni neiya churmanrouwa, heitoubi Kholil awakhi meini shutaakrouwa.’ ”

²⁴ Heirouri Zedekiah'ne Jeremiah'nung shun, “Tloubomrap aei ngamrou thimi hunungeikhi muyermak, heiyanungri nang himakrou.

²⁵ Heiya kounakpi lhou'urpu rapne mayeklhakbi, ‘Nangne krungnung kouya shunpikur, heirou krungni neinungei kou loukyun; kanungei koukhatkhi yulkhoumakni shunthutpilak; heiyanungri kani neiya hatmakrou,’ toubi yunlanungri;

²⁶ Heirou nangni yanungei ‘Keine krungei bomra wachangbi keiyari Jonathanyei cheemra hilhakurnungei hanui kallengni heihillhakpimakalo,’ toubi louyunlak.”

²⁷ Heirouri lhou'urpu uparap nammane Jeremiah'nung wabine tlou ngaithikur. Heisi tounarouri Jeremiah'ne krungni anungei chay pibi shunmtupikur tloulhangrap hilthungni yanungei namma louyunpikur. Heirouri yani anungei koutlou khatkhi yunmakni dongkur, ngamri krungle Jeremiah'yei yunrilkur tloubomrap heiri hunikhi mayekthungmakrou.

²⁸ Heisitoubi Jeremiah'ne raalngaakna cheemra, Jerusalem'ya raal luloukur tlaini hungphabongyen leiwurkhou.