JEREMIAH 36 - KHYINGEI PU'TLOU Bible (BSI)

Jeremiah'yei Pu'tlou Lailik-khyo

¹ Heirou Josiah'yei chanapawa, Judah'yei krung Jehoiakim'yei krungchaan kum phali hungtlungei kheenrouri asitoubi hungthukkura, touri Umpurei anaksi tloulhangya Jeremiah'nung yongbine atoubi kyun:

² “Lailik-khyo khat loubine, heitoubi Israellei ngamrou, Judah'yei ngamrou, heirou limrap namyerrei ngamrou, lamkrini Keine neinungei Josiah'yei krungchaan'rouweini angtu rampharou shunthutdurkhou tloulhang rapya namma yukmayelhaklak.

³ Heiyanungri Judah'yei thimi rapne Keine yaidoura yenpirou kyou thuithikur klah-knangya mayekbine, heirou yani ai'aiyei lhangaimak lhourouwei mai kallekthutkurkhi kya; heiyanungri Keine yaiyei borh mralya kukpirou.”

⁴ Heirouri Jeremiah'ne Neriah'yei chanapawa Baruch'ya ungloukur, heitoubi Jeremiah'ne anungei Umpuei shunpikur tloulhangrap nammaya sherthutpibi Baruch'ne lailik-khyo khatra loumayelhakur.

⁵ Heirou Jeremiah'ne Baruchya chay pibine shunkur: “Keiri Umpuei Pucheemra changthramakura.

⁶ Heineri nangni chara hilnei tlainirou Pucheemra wachangbi keine neinungei sherthutbi mayelhakur lailik-khyorei Pu'tlou rapya Pucheemra wachangkur thimi rapnungei pathutpilak. Heitoubi ai'aiyei khukarthil raprouweini Jerusalem'ra wachangkur Judah'yei thimirap nammanungkhi sherthutpilak.

⁷ Heiyanungri yai shunchakur heiwari Umpuei bomra ka'tlungbi, heirou thimirap nammane ai'aiyei lhangaimak lhourouwei kallekthutkurkhi kya; kouweiyo toulanungri Umpune yaidoura yanimakni karhaei paothutkur meithukei malungkha heiwari beimakni thuithilei.”

⁸ Heisitoubi Neriah'yei chanapawa Baruch'ne thimkhui Jeremiah'ne anungei chay pikur hilthungni lailik-khyorei Pu'tlou nammaya Umpuei Pucheem rilla pathutpikur.

⁹ Asinungri Josiah'yei chanapawa, Judah'yei krung Jehoiakim'yei krungchaan kum phanga tlungei tangla lhuntako hungtlungei kheenrou, Jerusalem'rei thimirap nammale, Judah'yei khukarthil kantangrei Jerusalem'ra wachangkur thimirap nammanungei Umpuei bomra chara hilnanungei paothutkur.

Lailik-khyo heiwaya Krungkul rilla pathutkur

¹⁰ Heirouri Baruch'ne lailik-khyo heirouwei Jeremiah'yei shunpikur tloulhang rapya Umpuei Pucheem rilla klei Shaphan'yei chanapawa Gemariah'yei bomthoei yuntlangmaiyei thaklhangra Pucheemyei Ran Shumtrum pongra mayungbi klei thimirap nammane mayeknanungei hou chouni sherthutpikur.

¹¹ Asinungri Shaphan'yei chanapawa Gemariah'yei chanapawa Micaiah'ne lailik-khyorei Pu'tlou rapya mayelhakur heirouri;

¹² Ane krungei Krungkulra yubine, heitoubi Pu'tlou marnopi puei bomthora wachangkur. Heirouri thilak, lhou'urpu uparap namma ombine louklei. Yama uparap heiri krungkullei lailik maye'thimi Elishama, heirou Shemaiah'yei chanapawa Delaiah, heirou Achbor'yei chanapawa Elnathan, heirou Shaphan'yei chanapawa Gemariah, heirou Hananiah'yei chanapawa Zedekiah heirou lhou'urpu yama-krungrap deideikhi kyaoni ombine louklei.

¹³ Heirouri Micaiah'ne Baruch'ne thimi rapbei khnara mayeknungei lailik-khyorei tloulhangrap namyerwaya ani yanungei paothutpikur.

¹⁴ Heirouri lhou'urpu yama-krungrap nammane Jehudi (Nethaniah'yei chanapawa, Shelemiah'yei yu, heirou Cushi'yei yuthun) heiwaya Baruch'yei leinara heiyilbi, ‘Nangne thimi rapya mayeknungei sherthutpikur lailik-khyo heiwaya neihutni shinbine kaileinara wawalo,’ toubi washunyerkur. Heisi tounarouri Neriah'yei chanapawa Baruch'ne lailik-khyo heiwaya aihutne shinloubine heitoubi yaileinara wakur.

¹⁵ Heirouri yani aya loushun, “Ompiyalo, heitoubi lailik-khyo heiri kanungei yukpathutpilaklo.” Heisi tounarouri Baruch'ne lailik-khyo heiwaya yanungei pathutpikur.

¹⁶ Heirou yani tloulhangrap nammaya mayekkur heirouri, yani chi'knale kalhonni khatle khat thirilkur, heitoubi Baruch'nung shun, “Kane yulmakni tloulhangrap nammaya Krungnung paotambi shunpirouwa.”

¹⁷ Heirou yani Baruch'nung kngai, “Kringpibi kanungei yunpilak, Nangne tloulhangrap namma ari koutoubi mayekkuro? Arapri Jeremiah'ne sherthutpinarei loumayethungko?”

¹⁸ Baruch'ne loumallang, “Jeremiah'ne keinungei tloulhang kantang heisherpikur, heitoubi keine heirapya mukni toubi lailik-khyo awara loumayelhakkur.”

¹⁹ Heirouri yani Baruchya shun, “Nangle Jeremiah nakhuntari bi kourou khat chawurbine yullaka. Heirou nari bi kourou kleiyo touri thimi hukhatyakhi muyermak.”

Krung Jehoiakim'ne Lailik-khyo Mei Shukur

²⁰ Heisitoubi yani lailik-khyo heiwari krungei lailik maye thimi Elisham'yei bomthora khoulhakurbi, heitoubi Krungkul rilla wachangbine lailik-khyo heiyei ngamrou yani krungnungei wari namma yunpikur.

²¹ Heirouri krung Jehoiakim'ni Jehudiaya watyilbine lailik-khyo heiwaya walouthutnungei shunkur; heitounei Jehudine lailik-khyo heiwaya krungei lailik mayewa Elisham'yei bomthorei walouthutbine heitoubi lailik-khyo heiwaya krungnungle, heirou krungei pongra heimayung lhou'urpu uparap nammanungei pabi sherthutpikur.

²² Kheen heiri tangla tlun-tako tlungei kallou, krungni phalbi nunglumna shangkai rilla meiphu lumbine ombi klei.

²³ Kheen heirouri Jehudini lailik-khyo heiwaya tho khyum-phali yenpathutnarouri, krungni heirapya lailik maye thimi Elisham'yei shon'mandine aattatdurbi heitoubi heirapya meiphura khinglhakbi tlumbongyen hongkaangkur.

²⁴ Heirouri krungnikhi, aiyei shok rapnekhi lailik-khyo heirouwei tloulhang rapya mayekbi hukhatnekhi chirilmakura, heirou yani linglik-phi'up threlwurbi lhawai klah'ne kanrelpikhi toupimakura.

²⁵ Heirou Elnathan'le Delaiah heirou Gemariah'ne krungya lailik-khyo heiwari meira hongkaang'maknungei buchabinekhi, krungni yai shunchakurya ninglhakpimakur.

²⁶ Heirou krungne aiyei chanapawa Jerahmeel'le, Azri-el'yei chanapawa Seraiah heirou Abdeel'yei chanapawa Shelemiah'ya chiwurbi lailik maye thimi Baruch'le, thimkhui Jeremiah'ya manna'nungei shunkur, heiya Umpune yaya yulkhoukur.

Lailik-khyo Hanuikhi Mye'martlengthu

²⁷ Heirouri Jeremiah'ne Baruch'nung shunbine mayekur lailik-khyo heiwaya krungni meira hongkaangkur hilloukhi hanuikhi Umpuei tloulhangni Jeremiah'nung yongbine atoubi shunpikur:

²⁸ “Hanuikhi lailik-khyo loubine Judah'yei krung Jehoiakim'ne meira hongkaangkur haallei lailik-khyorei kyao tloulhangrap namma hei yukmayethulak.

²⁹ Heitoubi Judah'yei krung Jehoiakim'yei ngamrou nangni atoubi shunlak, Umpune atoubi yunlei: ‘Kounungei Jeremiah nangni, Babylon'yei krungni wabi ram awaya tlaipang thimi rapkhi ui-waa, yaa-yoorap nammakhi toumaangrou toubi mayekurro?’ ” toubi yunbine lailik-khyo heiwaya meira hongurla.

³⁰ Ngam heineri Umpune Judah'yei krung Jehoiakim'yei ngamrou asitoubine yunlei, “Aiyeiri David'yei krungbom doura omrou yu-chari koukhi rankhoumakarou, heitoubi aiyei khi'lhung heiwari nunghangnung nungshana paalra, heirou masanungri rdai-chamnara khingthutdurbine phourouwa.

³¹ Keine Jehoiakim'le aiyei chanao rapyale, heirou aiyei lhou'urpu rapyakhi yai mralnung'tlim tanti pirouwa; ngamri yani Keiyei kyunya ninglhakpimak; heineri Keine yaidoura paothutdurkhou klah-knangei tanti heiri yaidourale, Jerusalem'ra paalbi klei thimi rapbei dourakhi heirou Judah'yei dourakhi yongdarouwa.”

³² Heirouri Jeremiah'ne lailik-khyo khat louthutbine Neriah'yei chanapawa lailik maye thimi Baruch'nung pilhakbi silnakur; heitoubi ani lamkriyei Judah'yei krung Jehoiakim'ne meira hongkur lailik-khyorei kyao tloulhang rapkou chapmalknane Jeremiah'yei heishunnarei loumayethungkur.