JEREMIAH 34 - KHYINGEI PU'TLOU Bible (BSI)

Zedekiah'yei Doura Karhani Shunthutkur

¹ Babylon'yei Krung Nebuchadnezzar'ne aiyei raallui raple, heirou aiyei koolphopbi klei krungram nammale thimirap nammale kalhonni klei Jerusalem'le, heiyei karhillei klei khukarthil rapbei doura raal dabi leiyei kallou Umpuei tloulhangni Jeremiah'nung yongbine kyun:

² “Israellei Dunpu Umpune shunlei: Wabine Judah'yei krung Zedekiah'nung: Umpune asitoubi yunlei, ‘Thilak, Keine Jerusalem Khulil awaya Babylon krungei hutra pilhakrouwa, heitoubi ani heiwaya mei shulhakbi kaangtaakyerrouwa.

³ Heirou nangri aiyei hutrei kartleichangmakrou; kouweiyo toulanungri neiyari shuimakni manrouwa, heitoubi aihutra pilhakbi silnarouwa; heirouri nangri Babylon krungya neimit rungrungni murouwa, heitoubi nangni ale maile-mai murilbine tlou kallangrillouwa, heitoubi nangri Babylon'ra charouwa,’ toubine shunpilak.”

⁴ Heiyanungkhi Umpuei tloulhangya louninglaklo, O Zedekiah, Judah'yei krung! Umpune neingamrou asitoubi shunlei: “Nangri raalshonra himakrou.

⁵ Nangri kyingni hirouwa, heitoubi thimi rapne neiyei maibongra krung khoini thrungkhou naiyei patar rapya rikrai khrumknani mrohkun hongbi khi ruikhou naksine neiyakhi mrohkun hongbi khi ruipirou; heitoubi neinung'tlim, ‘Ulleiyo upawa!’ toubi yunbine khi kanrelpirou. Ngamri awari Keine kantomwurkhoula,” toubi Umpune paothutlei.

⁶ Heirouri thimkhui Jeremiah'ne tloulhangrap namma heiya Jerusalem'ra Judah'yei krung Zedekiah'nung shunpikur.

⁷ Kheen heirouri Babylon krungei raallui rapne Jerusalemei dourale heirou Judah'yei khukarthilrap nam'rouwei maleithung khukarthilrap Lachishle Azekahyei dourakhi raal dabine leiyei kallei thukkur lhou. Kheen heikallei lukchangmakei maleithung Judah'yei mantrang khukarthilri khintam heithilngei.

Shok rapya thuithini mareknapikur

⁸ Jerusalem'ra klei thimi rapya shok hoina bom'rouwei malhetthutpinei tloubomya paothutnanungei krung Zedekiah'ne yanungei tlou kantombi mardingrilkur hillou, Jeremiah'nung Umpurei tloulhangrap yongbine asitoubi shunpikur:

⁹ Touri thimi napung kantangni ai'aiyei Hebrewa teinao rapya, napawa rapya hoiyanungkhi, heirou napuiya rapya hoiyanungkhi, shok napawa heirou shok-napuiya khoini khounarei malhetthutpilaksu, heisitoubi thimi hukhatnekhi ai'aiyei teinao Jehudia khatya shok khoini khoumakniasu!

¹⁰ Heisi tounarouri kantomrilkur tlouya mardingnara yaokur lhou'ur purap nammale, heirou kulyomrap nammane tloubom heiwaya chanthungurbi, thimi napung kantangni ai'aiyei shok napawa rapya heirou shok-napuiya rapyakhi malhetthutpinungei yarilkur. Heisitoubi thimi hukhatnekhi yaya shok bomra kulchalbi khoumaknungei yani tloubom heiwaya hil-chanthungbi yaya shok hoinarei malhetthutpikur.

¹¹ Heiya hillouri yani hanui hollurbi, heirou yani malhetthutkhou thimi rapya hanui loulhakurthubi, heitoubi yaya shok napawa heirou shok-napuiya hoiyerwurthu.

¹² Heirouri Umpuei tloulhangni Jeremiah'nung yongbi asitoubi kyun:

¹³ Israellei Dunpu Umpune asitoubi yunlei: “Keine naiyei patar rapya Egypt ram'rouwei shok hoina bom'rouwei yenruithutpiyei kheenrou Keine yanungei mardingbi asitoubi shunkur:

¹⁴ ‘Kum-thruk hungluiyei'serrou thimi napung kantangni ai'aiyei shok Hebrewa teinao rapya shok bom'rouwei malhetthutpirou da; kounakpi yani nanungei shok khoini yorlhakbine kum-thrukbil naya watlhou toukhou leiyanungri ayari shok bom'rouwei malhetthutpirou da; heiya naiyei patar rapneri Keiyei tlouya chanthungkhoumak, heirou yaiyei khnarakhi tekchakhi ninglhakpikhoumak.’

¹⁵ Kheen lepchaei maibongra nanikhi nai ukning hollurbine Keiyei mit'thrilnara lhangai-chimya toukhoubi, thimi napung kantangni ai'aiyei Hebrewa teinao rapya shok bom'rouwei malhetpibi, Keiminra khrumnanungei Pucheem rilla Keiyei maibongra tlou mardingrilkhou hoiyanungkhi,

¹⁶ Nane naiyei ukning kallekthutdurbi, heitoubi Keiyei minya marmokyerbi thimi napung kantangni nai malhetthutkur shok napawa rapya heirou shok-napuiya rapya hanui kallengni ai'aiyei mdu-pamcha hilthungni loulhakurthubi, yaya naidaakra shok napawa heirou shok-napuiya khoini yenlhakkurthulei.”

¹⁷ Ngam heineri, Umpune asitoubi yunlei: “Nane ai'aiyei teinao rapya heirou mimiyei cheemlhun rapya shok bom'rouwei malhetthutpina'nungei paothutkur Keiyei chaytlouya chanthungpimakura; heineri Keine nanungei malhetthutnei paoya shunthutpilei,” toubi Umpune paothutlei, “Keine nayari raalshonra, butaamra heirou pharthraiyei chansherra malhetlhakrouwa. Heitoubi Keine nayari tlaipang limrap nammaei maibongra machinknani thimyerrouwa.

¹⁸ Heirou Keiyei mardingkur tlouya toubaikur thimi rapya heirou Keiyei maibongra mardingkur tloubomya ngaakmak thimi rapyari yani lhang'khni thukni bailhangbine heitoubi tlailamra karlhakbi poralna malamput halshun naksine hoiyerrou.

¹⁹ Halshunya lhang'khni bailhangbine heitoubi heiyei lhang'khniyei tlakra karlhakbi kral thimi rapri- Judah'yei lhou'urpu uparap, Jerusalemei lhou'urpu uparap, Krungei pichar bommei lhou'urpu msha'holkur thimirap, suipipu uparap, heirou ram heiyei thimirap namma heiriya. Yarap nammanekhi Keiyei mardingkril tloubomya toubaiwurkhou.

²⁰ Heirou yayari Keine yaya yeekna thimi rapbei hutra heirou yaiyei rongchanya hatnungei rapha thimi rapbei hutra pilhakrouwa. Heirouri yaiyei khi'lhung rapri nungthoura traichabi klei ramwaa rapbei heirou ramhangrei yaa-yoo rapbei murchak hoinayerrouwa.

²¹ Heirou Judah'yei krung Zedekiah'le heirou aiyei lhou'urpu rapyakhi Keine yaiyei yeekna thimi rapbei hutra, heirou yaiyei rongchanya hatnungei rapha thimi rapbei hutra, heirou Jerusalem'rouwei kallengthutkur Babylon krungei raallui rapbei hutra pilhakrouwa.”

²² Umpune asitoubi paothutlei: “Thilak, Keine chay pirouwa, heitoubi Keine raallui rapya Jerusalem Khulil arou hanui yenruilhakthurou; heitoubi yani Khulil heiyei doura karhani raal dabine luklouheirou; heitoubi Khulil heiwaya meini shulhakbi kaangtaakyerrou; heirouri Keine Judah'yei khukarthil rapya thimi paalthra'maknungei taakyerbi maangyerouwa.”