JEREMIAH 33 - KHYINGEI PU'TLOU Bible (BSI)

Umpu ei Kantompi Tlou

¹ Heirouri Jeremiah'ne raal'daang yuntlangmaira leiyeinung Umpuei tloulhangni hanuikhi khnui tlungni yongbine kyun:

² “Tlaipangpalya sheemthutbi heitoubi tlaipangpal heiwaya bichani khoupibi phunkanthoupi Pu, Aiyei minri Umpu toubi ung Ane asitoubine shunpilei:

³ ‘Keiya unglak, heiyanungri Keine neinungei lourulpirou; heitoubi nangni tekkhi mukhoumak kngakei lhoutang rapya Keine neinungei shunpirou.’

⁴ Kouweiyo toulanungri Israellei Dunpu Umpune raalsounara deekhromkur Krungkul heiyei cheem rapbei ngamrou, heirou Judah'yei krung rapbei Krungkullei cheem rapbei ngamrou asitoubi yunlei:

⁵ ‘Chaldea raple raal kardourilnung charou, heitoubi Khulil heiwari Keiyei kanthi fyoubi meithukei malungkhanei hatkur thimi rapbei khi'lhung rapne thimyernungei toukura; heitoubi Khulil heiyei thimi rapne khril lhangaimakei lhou tounei ngamrou Keiyei mairung heiri Khulil heirouwei yulkhoukur.

⁶ Heiya thilak, Keine bi heiyei thimi rapnungei sarung lhangai heirou kna damya yenpirou, heirou Keine yanungei kying heirou tharmuchimya mutpirou.

⁷ Heirou Keine Judah'yei thimi rapbei heirou Israel rapbei li karsuiyerpirou, heitoubi yayari Keine haallei naksine sheembaangpithurou.

⁸ Heirouri yani Keiya karhani borh touwurkhounei mralrap nammaya Keine chaamthaipirou; heirouri yani Keiya karhaei raal younei borh touwurkhouya Keine kukpirou.

⁹ Heirou Jerusalem Khulilyei min heiwari Keiyei haraokna min khat hoirou; heitoubi Keine yanungei lhangai lhou toupikurya mayekkur limrap nammanungeikhi thang'al hoinarou; heirou Keine Jerusalem'nungei toupiwurkhou lhangai lhourap nammaei ngamrou heirou Keine heiyei doura kying hoiyerpikur heiyei ngamrou limdei rapne kngakle kalhonne chibine kanchunrouwa.’ ”

¹⁰ “Kairam awari thimikhi paalmakura, heirou yaa-yoo rapkhi klei yamakni hangwalkur ramme” toubi nani yunlei; heiya Umpune atoubi yunlei: “Asinungri thimikhi heirou yaa-yookhi damakni hangwallei leikur Judah'yei khukarthil rapra heirou Jerusalem Khulillei khullam raprari

¹¹ Hakrao-nungkngaiyei houni, heirou nulou-shaldunnei hakrao-nungkngaiyei laangthounei houle, heirou thimi rapne Pucheemra Umpuya mathangbi: ‘Thangwan-Shimleiyei Pu Umpuya mathanglaklo; kouweiyo toulanungri Umpuri lhangai, heirou Aiyei malungshi-kringpikhei heiwari kalui naimak!’ toubi kanyerbine, heirou yani Pucheemra malamput makatbi mathangnei houni thimrouwa. Kouweiyo toulanungri Keine Judah'nungei lamkriyei naksine hanui kallengni lhangaiya toupithurou,” toubi Umpune paothutlei.

¹² Thangwan-Shimleiyei Pu Umpune asitoubi yunlei: “Bi awari asinungri thimikhi heirou yaa-yookhi damakni hangwalni leilei, heiya bi heirou Judah'yei khukarthil nammara, heirou yaosilna rambi kantangra heirou thimi rapne yaosilbi mathrilyerheirou.

¹³ Heirou yaosilpu rapne lhungdou ramrei khukarthil rapra, kulrel lhangei nimna phairui ramrei khukarthil rapra, Negeb lhangei khukarthil rapra, Benjamin ramra heirou Jerusalem karhilni klei ramra, heirou Judah'yei khukarthil dei rapra yaosil pu rapne yaiyei yaorul rapya silbi kansherbine khouheirou.” toubi Umpune yunlei.

Aiyei Ban David'yei Krungbom

¹⁴ Umpune asitoubi paothutlei, “Thilak, Keine Israel cheemkhurrei ngamrou Judah'yei cheemkhurrei ngamrou kantombi shunthutdurkhou tloulhang rapya lhangaini hungtlungyernei kheen hungeirou.

¹⁵ Heiyei tlaini raprou, heirou heiyei kheenrou Keine David'yei shullamrei tharmuchim Ban khat hungthukyerrou; heitoubi Ane tlaipang doura tharmu chimni heirou lhangai-karbilne pichar toupiheirou.

¹⁶ Heiyei tlainirap heirouri Judah'ya kalpirou heitoubi Jerusalem'ra paalbi klei thimi rapne kyingne heirou koukhatkhi shuikngam makne paallou. Heirou Ban heiyei minri ‘Umpuri kaiyei Tharmuchim Pu’ touri Umpuri kaiyei Ralthutpinabom Pu toubine ungrou.

¹⁷ Kouweiyo toulanungri Umpune atoubi yunlei: Israel cheemkhurei Krungbom doura omrou thimiri David'yei shullamrei thimi hukhatkhi watmakrou;

¹⁸ Heirou Keimaibongra Puwatlhou tourou thimi suipipu rapkhi heirou trunwai lung makatrou thimikhi heirou dongnaimakni malam putya meira hongbi makatrou thimi suipipu rapkhi Lev cheemkhurei watmakrou.”

¹⁹ Heirou Umpuei tloulhangni Jeremiah'nung yongbi kyun:

²⁰ “Umpune atoubi yunlei: ‘Kounakpi nani Keiyei mardingpikur tloulhangya nunghangei kheenrou nimanung masa kmehyei kheenrou toubaichanganungri heinaksi tlaini heiri heirou heinaksi masa heiri ai'aiyei kheenrou thukmakniyasu!’

²¹ Heiyanungri Keiyei shikrui David'nungei Keiyei mardingrilkur tloubom heiwakhi baiwurniyasu; heitoubi aiyei krungbom doura omnungei chanaokhi pukmakniyasu; heitoubi Keiyei mardingkril tloubom heiwari Lev cheemkhurreikhi baikur hoiniyasu.

²² Heiya nungthourei sorwaya sherchichangmak heinaksine heirou samadru ruirei shitnruiya hunekhi holmarkhe manemak'naksine chanao shunnanungei Keine Keiyei shikrui David'le heirou Keiyei Puwatlhou pu Levi'ya kantombi mardingurla.”

²³ Heirou Umpuei tloulhangni Jeremiah'nung yongbi atoubi kyun:

²⁴ “Thimi rapne ‘Umpune Aiyei khalthutkur cheemkhur khintamya yapimakni horthutdurla; toubi kyunya nangni mayekpimakurako?’ Heisithil yunbi yani Keiyei thimi rapya yaiyei mit'thrilnara limkhat khoini manthapimakura!”

²⁵ Umpune asitoubi yunlei: “Kounakpi Keiyei mardingkril tloubom heini nungkhatnui nimanung masa khatchakhi mayungbi leimakanungri, heirou nungthourei heirou tlaipang dourei limlim nammaya bi chane loukhoumakanungri;

²⁶ Keine Jacob'le heirou Keiyei shikrui David'yei yu-cha rapya yapimakni horthutdurlarou; heitoubi aiyei yu-cha raprei napung khatya Abraham, Isaac heirou Jacobei chanao rapbei doura pu khoini thrungyernanungei khalthutkhoumakrou. Heiya Keine yaiyei likarsuiya kallenglhak'yerpirou, heirou yaidoura kringpikhei khoupirou.”