JEREMIAH 31 - KHYINGEI PU'TLOU Bible (BSI)

Raal-manphopbi Khounarei Hakrao-nungkngaine Yenkallengkur

¹ Umpune paothutlei: “Kheen heiri Keine Israellei cheemkhur-bommairap nammaei Dunpu hoipirou, heitoubi yarapne Keiyei thimirap hoirouwa.”

² Umpune asitoubi yunlei: “Raalshonra himakni ringthung thimi rapne, ramthingra kringpikheiya phawurkhoula; Israel rapne mathrilnungei yenraphaei kheenrouri,

³ Umpune tlatnarei shakrung muyerbine, ‘Keine neiya kalui naimak-trim naimakni malungshipikhoula; ngam heineri Keine neinungei kalui naimakni kringpi'kheiya mutpiwurla,’ toubi shunpikhou.

⁴ Neiyari Keine hanui kallengni sabaangpirou, heirou nangri kallengni sheembaangthurou, O Israellei reidangwi! Heirou nangni hanui kallengni neiyei sengshek rapya shinbine heitoubi hakrao-nungkngaini knuy thimi raple nuymalnarou.

⁵ Nangne hanui kallengni Samaria'yei Lhungdoura yekul trunbine darkha lingpukthurou. Heitoubi loutrun thimi rapne trunwai trunthutbine heirapbei hei rapya chamaibine nungwairou.

⁶ Kouweiyo toulanungri, Ephraim Lhungdoura raal-kngaak thimi rapne, ‘Kanthouwalo, kani Zionra kaiyei Dunpu Umpuei leinara kawase,’ toubi ungraobi yunnei tlaini khat hungeirouhui.”

⁷ “Kouweiyo toulanungri Umpune asitoubi shunlei: ‘Jacobnung'tlim hou chouni nungkngaiyei laaya shalaklo, heirou lim rapbei krung rapnung'tlim hou chouni ungraolaklo. Hou chouni ungraobine, O Umpu, Israellei himaleithung, Neiyei thimi rapya kalpilaklo!’ toubi paobine mathanglaklo.

⁸ ‘Thilak, yayari Keine khalu lhangei ram'rouwei yenruiheilei; heitoubi Keine yaya tlaipangpa wadongna ram'rouwei yenmarkumheilei. Yaihangra mitdeo thimi raple, hodeek thimi rapkhi yaolei. Naodou pom napuiya rapkhi, heirou nao pukrou kyou napuiya rapkhi pulni yenruiheibi, ya thimi kulyomrul chungwani bi arou yenkallengbi hungtilheirou.

⁹ Yane chapthothoni yenkallengrou, heirou Keine yaya malung toudamlom yaya lam ruipirou; heirou Keine yaya kungruithung chayerbine, yani tapanbi kanelmaknungei lamayengthungni ruipirou. Kouweiyo toulanungri Keine Israel rapbei Pu khoini klei, heirou Ephraim'ri Keiyei cha samranme.’

¹⁰ Umpuei tloulhang rapya louninglaklo, O limrap, heitoubi tlatna ram samadru ruirei ram rapra paothutbine, ‘Israelya hulchekkur A heiwari aya hanui khumtilpithurou, heitoubi Ane aidoura yaosil pu naksine silpithurou,’ toubi shunpilak.

¹¹ Kouweiyo toulanungri Umpune Jacob'ya lhukthutpiwurla; heirou aya duiyei mantrangkur yeekna thimiyei hutrouwei Ani kalthutpiwurla.

¹² Heirouri yani Zion'yei Lhungdou chounara kakabi hakrao-nungkngaini ungraochabi laa sharou; heirouri Umpuei lhangai thang'alya mubine yaiyei mairungrap allouwa. Heirou yani lhangai trunwai lungrap, darkhayui rankhi, heirou olive shirek, yaorulrap, heirou halrul rapkhi ranran yenlhakrouwa. Heirouri yaiyei rongchan heiri yui leraoni chaibi khoukur yekulnakni hoirouwa, heirou yanungei hanui kallengni lhawai klah touri makrouwa.

¹³ Heirouri Israellei nangaka douwa rapne hakrao-nungkngaini nuyrouwa; heirou kartlang douwa raple, tara-tartrui rapkhi heinakni haraorou. Kouweiyo toulanungri Keine yaiyei lhawai klahyei kanrelya hakrao-nungkngai holyerrou; heirou yaiyei lhawai klah heinung'tlim manelbi malung damyerrou heitoubi haraoyerrou.

¹⁴ Heirou Keine suipipu rapya thoyerpirou, heirou Keiyei thimi rapya Keirouwei lhangai putlim rapne pilyerpirou,” toubi Umpune paothutlei.

¹⁵ Umpune atoubi yunlei: “Ramah'yei rilla hou khat mayeklei; kanrelnei heirou malung douni chaplei. Rachelni aiyei chanapawa rapnung'tlim chaplei, a heiri aiyei chanapawa rapnung'tlim chapnarou dongalo toubi manelkhi yamaklei. Ngamri yarapri hiwurchiya.”

¹⁶ Umpune atoubi yunlei: “Neiyei hou heiri chapnarei dongalo, heitoubi neiyei mitlung rapri mityui dayermakalo. Kouweiyo toulanungri neiyei lhounung'tlim klahman pirouwame,” toubi Umpune paothutlei; “Heirou yarapri yeekna thimi rapbei ram'rouwei yenkallengeirou.

¹⁷ Heineri nanungei hilleinung malungamna'nungei bom leileihui,” toubi Umpune paothutlei; “Heitoubi neiyei chanao rapne yaiyei ramra yenkallengeirou.

¹⁸ Ephraimni, ‘Nangne keiyari halpa douya put klaak'naksine raakpiwurla. Keiya hanui ruimallengpithubi loulhakpilaklo. Ngamri Nangri keiyei Pu Umpu Dunpume toubi klah-mrimni ungraochanei houya Keine loumyekkurla.

¹⁹ Kouweiyo toulanungri keine Neirouwei mai khreibi chakur hillou keiukning holwurbi yenkallengkur. Asinungri keine ukningra ningmuwurbi tewurbi, malung-thrammakni keiyei malungpakra huttumni umkname. Keiyei douwei touwurkhou lhangaimak lhounung'tlim keitamtom rikrai phacha'kna,’ toubi klah-mrimni ungraochanei houya Keine loumyekkurla.

²⁰ Ephraim'ri Keiyei malungshi'kna chanapawako? A heiri Keiyei kringkna chanao nimaka? Tanghakpani Keine aidoura yanimakni karyom shunkur, heisiyanungkhi Keine ayari karyomni ningthutpilei; heitounei ngammei Keine ayari Keiyei solungra kardonpilei; heineri Keine aidoura kringpikhei khoupirou,” toubi Umpune paothutlei.

²¹ “Neiyei lam muthrana'nungei thlung marpeibangbi hutlha lamhui sheemkhoulak. Lamhui shunbine lam shunmandolak. Neiyei solung heiri neiyei yenchaheina lamtangya mumanrekhoulak. Yenkallengalo, O Israellei reidangwi, heitoubi neiyei khukarthilra yenkallengalo!

²² O malungamkna makpi chanapuiya, nangya kounak tlani ukning biso-bibal naimakne karwaichaeirouwo? Kouweiyo toulanungri Umpune tlaipangpalra put ran khat sheemthutdurkhoula- Napuiya napung-khatne napawaya raphaeirou.”

²³ Israellei Dunpu, Thangwan-Shimleiyei Pu Umpune atoubi yunlei: “Keine Israel rapbei likarsui rongchanya kallenglhakyerei kheenrou, Judah'yei ramra heirou aiyei khukarthil rapbei rilla hanui kallengni yani ‘Tharmu chim Umpuei thrungna bi, Khyingei Lhungdou, Umpune neiya phor pilaksu!’ toubi yunthueirou.

²⁴ Heirouri Judah'le aiyei khukarthilrap namma heiri bi heirou paalmalnaheirou, heirou loutrun thimi raple yaosil thimi rapne bi heirou pulne lokpa kuichaheirou.

²⁵ Kouweiyo toulanungri kanring-kanwai raple, lhawai klah thimi rapya Keine malungdamni mathrilyerou.”

²⁶ Kheen heirouri keine mitrak kathukkurbi karhilni thiphakur, heirou keine kaningthutnarou keiyei rmong heiwari malung pilnakur.

Ranni tlou mardingpi

²⁷ Umpune asitoubi paothutlei, “Thilak, Keine Israel'le Judah'yei cheemkhur-bommaira tlaipang thimi raple yoo-yaakhi chungni punglhaknung lung tuklhaknei tlainirap hungeirouhui.

²⁸ Heirou asitoubikhi hungthukheirou, touri bongnung Keine Israel rapbei doura thirochabine yaya thikphur'thutdurbi taangdeeksundakur, heitoubi khingsundawurbi toumaangur'nungei marshikkhou. Heinakrimni asinungri Keine yaidoura thirochabine yaya linglhakur heitoubi sheembaang-sabaang'pinanungei marshikkura,” toubi Umpune paothutlei.

²⁹ “Heiyei tlaini raprouri thimi rapne, ‘Pa rapne darkha hei-khyur rapya chalouheibi, heirou chanao rapne ha mseilei,’ toubi yunrilmakarou.

³⁰ Heiya thimi napung-kantangni ai'ai-mshaei borh mralni hinarou; heirou darkha hei-khyur chalanungri thimi kantangni aiai'mshaei ha mseinarou.”

Ranni Mardingpi

³¹ “Thilak, tlainirap hunglei,” toubi Umpune paothutlei; “Keine Israellei cheemkhurle, Judah'yei cheemkhurle kalhonni ranni tlou mardingril khat khourouwa.

³² Tlou mardingkril heiri Keine bongei yai patar raple mardingrilbi, Keine yai hutbangra churbine Egypt ram'rouwei yenruithutbi, heirou Keine yanungei shal hoiknani leikhouwei kheenrou, yani toubaiwurkhou tloumarding heinaksiri nimakrou,” toubi Umpune paothutlei.

³³ “Heiya Keine heiyei tlaini rapbei hillou Israel cheemkhurle mardingrilnungei tlouri asitoubi leilei,” toubi Umpune paothutlei, “Keiyei chaylamya yaiyei solungra Keine lhakpirou, heitoubi Keine heirapya yaiyei solungra mayelhakpirou; heirouri Keine yaiyei Dunpu hoipirou, heitoubi yani Keiyei thimirap hoirouwa.

³⁴ Heirouri yani hanui kallengni yaiyei cheemlhunya, heirou ai'aiyei teinao rapya ‘Umpuya mulaklo,’ toubi shunthutrilmakarou; kouweiyo toulanungri yarap nammane mandirouweini tang ramphani Keiya muchirouwa,” toubi Umpune paothutlei; “ngamri Keine yaiyei borh mral rapya kukpirouwa; heirouri yaiyei borh rapya hanui kallengni ningthutpimakarou.”

³⁵ Nunghangnung yukwaarnanungei Kinniya sheempi, masanung albi warnanungei tanglale, sorwa rapyakhi sheempi, heirou samadruya toufyoubi tuylhouwei hou toulungpi Pu, Aiyei min Thangwan-Shimleiyei Pu toubi ung Pu Umpune atoubi yunlei:

³⁶ “Kounakni heinaksi tlaipang kullei youkna kanchekchanei hokarya Keirouwei kanchaiyanungri, Israellei shullamrei yu-cha rapkhi Keiyei mit'thrilna maibongrari kalui naimakni mitchirouwa,” toubi Umpune paothutlei.

³⁷ Umpune atoubi yunlei: “Kounakpi thangwanram nungthouya holmarkhe maneyanungri, heirou tlaipangpallei cheemmunya bal phormuchanga'nungri, Keinekhi Israellei yu-cha rapya yaiyei touthutkur lhourap namma heinung'tlim yaya khingthutdurou,” toubi Umpune paothutlei.

Jerusalem'ya Wai'maryayerrou

³⁸ Umpune asitoubi yunlei, “Thilak, thimirap heiri hungeirou, heitoubi Khulil heiri Umpunung'tlim Hananel'yei raal'daang shangkai'rouweine koknarei Palshungbil hanui kallengni sabaangei kheenrouri;

³⁹ Lamholna shungkrok heiri Gareb lhungdoubil engdang heiholmarkhebine, heitoubi Goah lhangra yenholmarkherou.

⁴⁰ Heitoubi phaitlai'ram nammaei khi'lhung raple heirou rahui rapkhi, heirou Kidron phaikarei phailourap nammakhi, kulkung lhangei Sapuk Palshung koknabil waphani namyerwa heiri Umpunungei marthingthutrou; heitoubi heirapya tekkhi phuichutmakni nimakanung kalui naimaknungei toumaangmakne khourouwa,” toubi shunpilei.