JEREMIAH 30 - KHYINGEI PU'TLOU Bible (BSI)

Israelle Judah'ya Lhukthutpi'nungei Kantompi

¹ Jeremiah'nung Umpurei kyong tloulhang rapne atoubi yunlei:

² “Israellei Dunpu Umpune atoubi shunlei: Keine neinungei shunpikur tloulhangrap nammaya lailik khatra yukmayelak.

³ Kouweiyo toulanungri thilak, Keine Keiyei thimi Israel raple, Judah'ya kallenglhakyernei tlaini hungeirou, Keine yaiyei patar rapnungei piwurkhou ramra yaya Keine ruimallengpithurou, heitoubi yane ram heiwaya kalbine paalrouwa,” toubi Umpune paothutlei.

⁴ Umpune Israelle Judah'yei ngamrou yunkhou tloulhang rapri arapriya:

⁵ “Umpune atoubi shunpilei: ‘Klah-mrimni ungraochanei hou khat kani mayekurla; chi'knaei houni thimmura, heirou kying-malungdam touri maklei.’

⁶ Tloubom awaya ngaithibine ningthut-relthutlak: Napawa khatneya nao pukchang youknako? Heiyanungri Keiyei kmuri napawa napung kantangni yai-ukra hutni domphopbine napuiya naksine kna doubi leikurya koutouneiyo? Heirou yai mairung rapne marhuibi muidaikurya koungameiyo?

⁷ Ulleiyo, tlaini heiri kounakei thuithikur tlaini hoirouwo! Heinaksi tlainiri dei makroume! Heirou tlaini heiri Jacobei yu-cha rapnungei klah-mrimnei tlaini hoiroume; heiya yayari kalpirou.”

⁸ “Heiyei tlainirouri asitoubine hungthukeirou, ngamri Keine yaiyei ngakkhungrei putkhrit putpuya toudeekpirou; heitoubi Keine yaya kulchalbi manphopkhouya tangthrewurou, heirou miram-mithril rapne yayari shok hoiyermakarou,” toubi Thangwan-Shimleiyei Pu Umpune shunpilei.

⁹ “Heiya yane yaiyei Dunpu Umpule, Keine yanungei tlim mathumbangpirou kyou Krung David'ya watlhou tourouwa.

¹⁰ ‘Chimaklo, O Keiyei shikrui Jacob, heirou lhawai lahwurmaklo, O Israel.’ Kouweiyo toulanungri Keine neiya tlatnarouwei kalpirou, heitoubi neiyei yu-cha rapya raal manphopkhouna ram'rouwei kalthutpirou. Heirouri Jacob'ne yenkallengbi kyingni, heirou koukhatkhi houlungmakni leirouwa; heitoubi aidoura toumathunbi chiyerrou thimikhi hukhatkhi makrouwa,” toubi Umpune paothutlei.

¹¹ “Kouweiyo toulanungri Keine neiya kalhonpilei, heitoubi neiya Keine kalpirou,” toubi Umpune paothutlei. “Ngamri Keine neiya hulcheklhakwurna limrap nammaya Keine tumni maangyerrou. Heiya Keine neiyari chimni raphathutbi pichar tourou, heitoubi tanti pibomthuk rapyari tanti pimakneri horkhoumakrou.”

¹² Kouweiyo toulanungri Umpune asitoubi yunlei: “Neiyei kna-msei heiri damchangmakarou, heirou neiyei hemnabi heiri beimakni thuithiyura.

¹³ Neiyei tlouthuk heinung'tlim yunkalpirou thimiri hukhatkhi maklei, heirou neiyei kna-mseikhi dammakarou, heineri nangri kna raikhoumakarou.

¹⁴ Neiyei malungshi thimi rapkhi neiya malumwurchila. Yane neiya raphakhi toumakkura. Kouweiyo toulanungri Keine neiyari yeekna thimi khatya touhemkur heinaksine touhemwurla, heirou thuithi thimi khatya tanti pikurnaksine tanti piwurla. Ngamri neiyei borh heiwari tangachakura, heirou neiyei borh heiri mshing naimakura.

¹⁵ Kounungei naiyei hemkur heinung'tlim thibine ungraobi chapkurawo? Naiyei kna-mrim heiwari raikhoumakarou. Ngamri naiyei mralri chungachakura, heirou neiyei borhri mshing naimakura. Heingammei Keine heirapya neinungei toupikura.

¹⁶ Ngam heineri neiya madulkur thimirap nammaya madulrouwa; heirou neiya yanimak thimi rapya, ya napung kantangya raalman khoini chayerrouwa. Naya muloukur thimirap nammaya yaiyeikhi mulouyerrou, heirou neiya marhotkur thimi rapya marhotpirou.

¹⁷ Kouweiyo toulanungri Keine neiya sarung lhangaiyerrouwa, heirou Keine neiyei knaya damyerpirou,” toubi Umpune paothutlei. “Ngamri yani neiyari, ‘Awari Zion'me, hukhatnekhi aya lhouhoipimakni khingurkhou bihoume,’ ” toubi yunwurkhoula.

¹⁸ Umpune atoubi shunpilei: “Thilak, Keine Jacobei yu-cha rapbei likarsui mallenglhakpithurou, heitoubi aiyei paalna ram rapbei doura Keine kringpikhei mutpirou, heitoubi Khulil heiwaya aiyei deekhromkur marpeikhouna doura hanui sabaangyerthurou, heitoubi Krungkul heiwari aiyei bihakra hanui mayungyerthurou.

¹⁹ Heitoubi bi heirou paalbi klei thimi raprei mathangnei laa shanei hou wathukrou, heirou hakrao-nungkngaiyei laonei houkhi wathukrou. Heirou Keine yanungei chanaorap shunyerbi yai thimi mshing mandiyermakrou. Heirou Keine rikrai khrumkna hoiyerrou, heirouri yayari hunikhi manthamakni thi'msitmakrou.

²⁰ Yaiyei yu-cha rapkhi bongei naksine hoiyerrou, heirou yaiyei kulyomkhi Keimaibongra phunbaangpirou; heitoubi yaya marhotpikur thimi rapya Keine tanti pirou.

²¹ Heirou yaihangrei napung'khatne yaiyei ruipipu hoirou, heirou yaihangrei Krung khat kathukrou; heirou Keine aya pongra knakni yenruilhakrou, heitoubi aya Keipongra lou'unglhakpirou. Nimakanungri lou'unglhak'makanung huni Keipongra wachangamrou?” toubi Umpune paothutlei.

²² “Heirouri nani Keiyei thimirap hoirou, heitoubi Keine naiyei Dunpu hoirou.

²³ Thilak, Umpurei Lhimnung-martheetang mharkurya thilak; lhimnung-martheetang mharkur heiwari Umpuei meithukei malungkha heirime; lhimnung-martheetang mharkur heiwari khril-lhangaimak thimi rapbei ludoura yongdaeirou.

²⁴ Umpuei meithukei malungkha heiwari Aiyei ukningrei kning heiwaya malungpilni touthutchibongyen malungkha dongkhoumarou. Lhou heiwari nane hillou hungmueirou.”