JEREMIAH 3 - KHYINGEI PU'TLOU Bible (BSI)

Malungamkna Yaomak Israelrap

¹ Asitoubine yunlei, “Kounakpi napawa khatne aiyei nuya karkhaiwurla'nungri, nu heiwini airouwei shaallurou, heitoubi napawa napung-khatnung shal dunwurthurou. Heiyanungri shaltir heiwani aya hanui loulhakthurouwa? Ane loulhakthulanungri cheemmai heiri tangni mangmakrouwa? Heiya nangri thimi raple chorit naimakei lhouya touwurkhoula, heisiya hoiyanungkhi nangni Keinungei yenkallengthuleino! toubi Umpune paothutlei.

² Neimit mangalthutbine bungchouna wanshang ramra katthilak, neiyei touborhmakna bi kourou leileihui? Nangne lampaalra omphumbine Arabia rapne ramthingra kuichabi klei naksine malungshi napawa rapya chakngaakbi leikhoulei. Heitoubi nani ram heiwaya naiyei chorit naimakei lhouni heirou khril lhangaimakei lhou rapne borhyerwurla.

³ Heingamei nungkhi royermakura, heirou manthrallei nung-manrenkhi romakura. Heiramphakhi nangri chorit naimakei mairungni mitlung thunnilbine, rikraikhi mumakni leilei.

⁴ “Nangne asinunghak Keiya ungbine, ‘Keiyei Pawa, Nangri kei'douwei waiyoubi palui khoini ruipikhou nimakko?’ toubi yunlei.

⁵ ‘Koungamei Ane kalui naimakni malungkhabi leirouwo? Ane dong naimak-trim naimakni malungkharouko?’ Thilak, nangneri heisiya yunthulei, heiya nangni neiyei toukni borh lhou'mkheiya toubine leilei.”

Ukning Hungnanungei Ungpi

⁶ Heirouri Josiah'ne Judah'yei Krung khoini thrungei chaanrou Umpune keinungei atoubi shunpikur: “Israelne malungamkna yaomakei lhouya toukurya nangni mulako? Ane bungchouna bi kantangra kakabine, heitoubi heengtrung mar'emna holi kantangra omkhoubine chorit naimakei lhouya touwurkhoula.”

⁷ Heirouri Keine, “Ane lhangaimakei lhourap nammaya toutekloubi, hillouri ani Keinungei yenkallengroume toubine ningchakhou, heiya aniri yenkallengmaklei, heirou aiyei khril thuithikur teinaowi Judah'ne aiyei touwurkhou borh lhourap nammaya mulhakurla.

⁸ Heirou Israelne malungamkna yaomakni chorit naimakei lhoutouya Keine mulhakurnarouri aya karkhaiyernei yakril tlouya piwurbi aya Keirouwei malhetkur heiwari aiyei khril thuithikur teinaowi Judah'nekhi kmu; heisiya hoiyanungkhi ani koukhi chipimaklei, heinung tlimri akhi chawurbine chorit naimakei lhouya toubine leiwurlei.

⁹ Heirouri Israelne chorit naimakei lhoura wakhal naimakachaknei ngamrou, ram heiwaya ani touborhwurla. Heisitoubi ani ram heiwaya heengei thrailha raple thlungei thrailha rapya khrumyerwurbi mral leiyerwurla.

¹⁰ Heinaksiya mubinekhi aiyei khril thuithikur teinaowi Judah'nekhi aiyei ukning namma kyaoni Keinungei yenkallengmaklei, heinung tlimri ani toukarsabine leilei,” toubi Umpune paothutlei.

¹¹ Heirouri Umpune keinungei shun, “Uklum yaomakkur Israelri malungamnamak Judah'ya beiri tharmu chimni mulei.

¹² Khalu lhangra kabine pao awaya paothutbine shunpilaklo: ‘Malungamkna yaomak Israel yenkallengalo,’ toubi Umpune paothutlei; ‘Keine naidoura malungkhamakrou. Kouweiyo toulanungri Keiri kringpikheime,’ toubi Umpune paothutlei.

¹³ ‘Neiyei mralyatom ningmulak, touri nangni neiyei Pu Dunpuei doura karhani borh touwurkhoula. Heitoubi neiyei sharungei maduya miram-mithrillei thimi rapnungei heengtrung mar'emna holi kantangra chorit naimakni leipiwurkhoubi, heirou Keiyei tlouya hil-chanthung'khoumakura,’ toubi Umpune paothutlei.

¹⁴ “Yenkallengalo, O uklum yaomak chanapawarap,” toubi Umpune paothutlei; “Kouweiyo toulanungri Keiri neiya marnopi Pume. Keine na napung-khatya khukarthil khatrouwei, heirou napung-khniya cheemkhur-bommai raprei louthutbine Zionra yenlhakpirou.”

¹⁵ Heirouri Keine nanungei malungamkna yaosilpi pu rapya yenpirou; heitoubi yani naya phab dapile kalhonni roushing'kheini ruipirou.

¹⁶ Heirouri nani ram heirou paalbine thimi mshingkhi katchungduiyei kheenrouri nani, ‘Umpuei Mardingpina theengkung’ toubine mintlangbine yunrilmakarou, heirou heiwaya solungrakhi ningthutkhoumarou, heirou ningthutkhi ningthutrilmarou, heirou kardon toukhi makarou, heirou hanui kallengni khlang khat sheemthutkhi tourilmarou.

¹⁷ Kheen heirouri yani Jerusalem'ya, ‘Umpuei Krungbom’ toubine ungrouwa. Heitoubi Umpuei minnung tlim tlaipang limrap nammane Jerusalem'ra wakar'umrouwa. Heirouri thimi rapne yaiyei khril lhangaimakei touwurkhouna lhoura hukhatnekhi chanthung'makarou.

¹⁸ Heiyei kheen heirouri Judah'yei thimi(cheemmai) rapne Israellei cheemmai raple chamalnarouwa; heirouri yani khalu lhangei ram'rouwei yuthukbine heitoubi Keine naiyei patar rapbei palnanungei piwurkhou ramra yuchangrouwa.

¹⁹ “Heirouri Keine ningchakhou: ‘Keine naya Keiyei chanao rapbei hangra khoupibi, heitoubi Limrap nam'rouwei yerrouwei lhangai paalnanungei ramya koutoubi piserou!’ Heirou Keine kyun, ‘Nangne Keiyari: Keiyei Pawa, toubine ungrou. Heitoubi nangni Keihilla chanthungnarei kallekurmakroume,’ toubine ningchakhou.

²⁰ Heiya chorit naimakpi napuiya khatne aiyei shalya malungamkna yaomakni khingurkhou heinaksine, nangnikhi Keiya malungamkna yaomakni khingurkhoulame, O Israellei cheemkhur-bommai!” toubi Umpune paothutlei.

²¹ “Lhungbung chounayei wannara hou khat katmayeklei; hou heiwari Israellei chanao rapbei chapni shunchanei houlei. Ngamri yani lam lehne chimmaknara chawura, heitoubi yaiyei Dunpu Umpuya yani malumwurkhoula.

²² Yenkallengalo, O malungamnamak chanaorap. Keine naiyei malungamnamakya damyerpiroume.” “Thilak, kane Neinungei yenkallenglei; kouweiyo toulanungri Nangri kaiyei Dunpu Umpume.

²³ Tanghakpani lhungbung doura thrailha khrumbine ralthutpiya pharoume toubi malungamkhouri karshikmakei lhoume. Tanghakpani Israellei ralthutpina bomri kaiyei Dunpu Umpurei yongrou.

²⁴ Heiya kaidouwei waiyoubine rikraikna shakrungei thrailha khrumnei watlhou rapne kaiyei nutar-patar rapbei trunthutkhou trunwai lungrap, heirou yaiyei dunkhou ui-waa, halrul-yaorul rapkhi, heirou yaiyei chanapawa-chanapuiya rapkhi namma madullouchila.

²⁵ Kane rikraini maira philu khumphopbi leiyurase; kaiyei chorit naimakei lhouni kaya makhubphopburlaksu; kouweiyo toulanungri kale kaiyei patar rapne kaidouwei waiyoubine angtu rampharou kaiyei Dunpu Umpuya karhani borhlhou touwurkhoula, Heirou kani kaiyei Dunpu Umpuei houya chanthungmakura.”