JEREMIAH 28 - KHYINGEI PU'TLOU Bible (BSI)

Hananiah'ne Chimmak Pu'tlou Shunthutkur

¹ Kum heihakrou Judah'yei krung Zedekiah'ne thrungyoutir kum'phali hungtlungei tlun-phanga tlung tanglarou, Gibeon'rei Azzur'yei chanapawa thimkhui Hananiah'ne Pucheem rilla suipipu raple, kulyom rapbei maibongra keinungei atoubi shun:

² “Israellei Dunpu Thangwan-Shimleiyei Pu Umpune atoubi yunlei, ‘Babylon krungei putkhrit khangbaangkur putpuri Keine toudeekurla.

³ Babylon'yei krung Nebuchadnezzar'ne Umpuei Pucheemrei louthutloubi Babylon'ra yenheikur putchei-shungyangrap namma heiri kum-khniyei rillou Keine bi arou hanui yenmallengthurou.

⁴ Heirou Keine Jehoiakim'yei chanapawa, Judah'yei krung Jeco'neahyale Babylon'ra raalman khoiyei chakur Judah'yei thimirap namayakhi bi arou hanui yenruimallengpithurou,’ toubi Umpune paothutlei, ‘Ngamri Babylon krungei putkhrit putpuya Keine toudeekrouwa.’ ”

⁵ Heirouri thimkhui Jeremiah'ne Umpuei Pucheem rilla mayungbi klei suipipu raple, kulyomrap nammaei maibongra Hananiah'ya shunkur.

⁶ Heirou thimkhui Jeremiah'ne kyun, “Amen! Umpune heisibil toupilaksu, heirou Umpuei Pucheemrei putchei-shungyang raple, Babylon'ra raalman khoini chakur thimirap nammaya bi arou hanui yenmallengthurou toubi neiyei shunthutpikur Pu'tlou heiwari chim-chimmak touri Umpune mupilaksu.

⁷ Heisiya hoiyanungkhi Keine neinungei heirou thimirap nammanungei shunpirou kyou tloulhang awaya louningpilak!

⁸ Heirou bongnung neimaibongra heirou keimaibongra thimkhuirap kounakni lim kounakei heirou krungram tang kounakei doura karhani raalpao, butaam, heirou pharthraini norroume toubine paothutdurkhou.

⁹ Heiya kounakpi thimkhui rapne kying hoiroume toubine paothutkhou hoiyanungri, thimkhui heiwaei shunthutkhou tlouya chimni hungthukanungri, heinaksi thimkhui heiri tanghakpani Umpurei kyong thimkhuime toubine munarou.”

¹⁰ Heirouri thimkhui Hananiah'ne thimkhui Jeremiah'yei ngakkhungrei putpu heiwaya heiloukur heitoubi putpu heiwaya khribdeekur.

¹¹ Heitoubi Hananiah'ne thimirap nammaei maibongra atoubi kyun, “Umpune atoubi shunlei: ‘Anakrimni kum-khniyei rilla Babylon'yei krung Nebuchadnezzar'ne limrap nammaei ngak'khungra nanbangurkhou putpu heiri Keine toudeekpirouwa.’ ” Heirouri thimkhui Jeremiah'ne bi heirouwei shalkur.

¹² Heirou thimkhui Hananiah'ne thimkhui Jeremiah'yei ngakkhungrei putpuya loubine toudeekkur hillouri Umpuei tloulhangni Jeremiah'nung yongbine shun,

¹³ “Wabine Hananiah'nung asitoubi shunpilak: ‘Umpune atoubi yunlei, nangni heengei putpu rapya toudeekurla, heiya Keine heirapbei rungkhlang khoini thirrei putpu rapya sheempiwurla.’ ”

¹⁴ “Kouweiyo toulanungri Israellei Dunpu Thangwan-Shimleiyei Pu Umpune atoubi yunlei: ‘Keine limrap namyerrei ngakkhungra thirrei putpu khat nanbaangurla, heineri, yani Babylon'yei krung Nebuchadnezzar'ya watlhou tourou, heirouri yani aiyei shokrap khoini watlhu tourouwa. Heirou Keine ramhangrei ramyaa rapkhi aiyei hutra pilhakrouwa.’ ”

¹⁵ Heirouri thimkhui Jeremiah'ne thimkhui Hananiah'nung shun, “Asinungri louningpilak Hananiah, Umpune neiyari watyilmakme, heiya nangneri thimi rapya mandalbi malungamyerlei.

¹⁶ Ngam heineri Umpune atoubi yunlei: ‘Thilak, Keine neiyari tlaipang thleidourei louthutdurou waiyouwura. Kumtu'hakrou nangri hirouwa, ngamri nangne Umpuya karhani tlou sempiwurla.’ ”

¹⁷ Heisi toubine heikumyei tlun-eni tlung tanglarou hikur.