JEREMIAH 27 - KHYINGEI PU'TLOU Bible (BSI)

Putkhrit Darou Younei Hutlha

¹ Josiah'yei chanapawa Zedekiah'ne Judah'yei krung hoiyoutirnung tloulhangrap a Umpurei yongbine Jeremiah'nung shun:

² Umpune keinungei atoubi shunpilei: Putpu khatle hangcheirap sheembine heitoubi heirapya neiyei ngakkhungra khangbaangbi huklhaklak;

³ Heitoubi Edom'yei krungnungle, Moabei krungkhi, Ammon'yei chanao rapbei krungei, Tyre'yei krungnungei heirou Sidon'yei krungnungei pao shunbine, Jerusalem'ra Judah'yei Krung Zedekiah'yei leinara wakur aiyei paocha thimi rapnungei pao manthunthunglak.

⁴ Heitoubi yaya chay pibine yaiyei lhou'urpu rapbei bira hungbine atoubi hungsunpiyerlak: “Israel rapbei Dunpu, Thangwan-Shimleiyei Pu Umpune atoubi shunlei, heineri nani naiyei lhou'urpu rapnungei asitoubi hungsunpilak:

⁵ Keine tlaipangpalya, heirou heiyei doura ringbi klei yoo-yaa rapya Keiyei tangkur mantrangni, heirou Keiyei lamthutkur hutbangni sheempiwurkhou, heitoubi heirapya Keiyei mit'thrilnara ya'kni thimi rapnungei pilhakbi silnakur.

⁶ Heini asinungri Keine ram nammaya Babylon'yei krung Keiyei shok Nebuchadnezzar'yei hutra pilhakurla; heirou ramhangrei yaa-yoo rapkhi aya watlhou touyernanungei toubi Keine anungei pilhakbi silnawurla.

⁷ Heirou tlaipang limrap nammane aya, aiyei chanao rapya, heirou aiyei yu-cha rapya ai'mshaei ram heiwani hungdong'bongyen watlhou toubi leiheirou; heirouri hillouri lim kounakni, heirou krungtang kounaknikhi Nebuchadnezzar'ya yaiyei shok hunghoiyereirou.”

⁸ “Heiya kounakpi hukounak lim rapne nimanung krungram rapne Babylon'yei krung Nebuchadnezzar'ya watlhou tounimak yaowanungri, heirou aidaakra putkhrit urnimak yaowanungri, heinaksi limya Keine raalshonle, butaamle heirou pharthraiyei chansherni tanti pirou,” toubi Umpune paothutlei; “Yaya toumaangchi'bongyen Aihutne norheirou.

⁹ Heiya nari klalyei Pu'tlou shunthutpibi klei naiyei thimkhui rapya, kar'ankmu thimi rapya, rmong kman thimi rapya, heirou meirui deekbi thuitou thimi rapya ninglhakpimak; kouweiyo toulanungri yani nanungei, ‘Nane Babylon'yei Krungya watlhou toumaklo,’ toubi shunheirou.

¹⁰ Ngamri yani nanungei chimmakni shunthutpirou, heitoubi heiwani naya nai ram'rouwei lhatni urthutlourou, heitoubi Keine naya hulthutloubi, naya maangyerheirou.

¹¹ Heiya lim rapne Babylon krungei daakra kunlhakbi aiyei putkhritya urbine aya watlhou toupikur lim rapyari Keine yai ramra leiyerrou,” toubi Umpune shunthutpilei; “Heirou yani heirouwei truncha-trunmaibine paalheirou.”

¹² Heirou tloulhangrap namma heinakrim Judah'yei Krung Zedekiah'nungkhi: “Naiyei ngakkhungrap kunsundabi Babylon krungei putkhrit putpuya urbi lousoulak, heitoubi ayale aiyei thimi rapya watlhou toubine nani pallaklo!” toubi shunpilak.

¹³ “Babylon krungya watlhou toumak lim rapbei doura karhani Umpune paothutdurkhou heinaksine, koutoubi nani raalshonra, butaamra heirou pharthraiyei chansherra hirouwo?

¹⁴ Ngam heineri nani chimmak Pu'tlou shunthutpi thimkhui rapne nanungei, ‘Nane Babylon krungya watlhou toumaklo,’ toubi shunthutpi heiwaya ninglhakpimak, kouweiyo toulanungri yani nanungei mandallei tlouya yunpilei.

¹⁵ Kouweiyo toulanungri yayari Keine yenmalhetpikur nimak,” toubi Umpune paothutlei; “Heiya yani nanungei Keiminra chimmakya shunthutpibi, Keine naya hulthutdurbi maangyernanungei toubine yani nanungei shunthhutpilei. Heiyanungri nakhi, heirou shunthutpi thimkhui rapkhi namma maangchirouwa.”

¹⁶ Heirouri keine suipipu rapnungle, thimirap namma'nungeikhi shunbi: “Umpune atoubi shunpilei: Thimkhui rapne nanungei, ‘Thilak, Umpuei Pucheemrei daarkeprap heiri asinunghak Babylon'ra hanui urlouthurouwa,’ toubi shunthutpikur tloulhang rapya ninglhakpimak, kouweiyo toulanungri yani nanungei mandallei tlouya shunthutpilei.

¹⁷ Yaiyei shunthutpiya ninglhakpimak; Babylon krungya watlhou toupilak, heitoubi ringlak! Koutounei Khulil Jerusalem heiri maangrouwo?

¹⁸ Heiya kounakpi yani thimkhuihak hoiyanungri, heirou kounakpi Umpuei tloulhangrap heini yanungei kalhonpi hoiyanungri, yani Thangwan-Shimleiyei Pu Umpunung shunchalaksu, heitoubi Umpuei Pucheemra leithung daarkep raple, Judah krungei Krungkulla heirou Jerusalem'ra klei putchei-shungyangrap heiri Babylon'ra urlhakmakasu.”

¹⁹ Kouweiyo toulanungri Thangwan-Shimleiyei Pu Umpune Pucheemrei shutlai rapbei ngamrou, samadru-lhingtangei ngamrou, yungphu rapbei ngamrou, heirou Khulil rilla leithung putchei-shungyang rapbei ngamrou atoubine yunlei:

²⁰ “Heirapri Babylon krung Nebuchadnezzar'ne Jehoiakim'yei chanapawa Judah'yei krung Jeco'neah'ya Judah'yei lhou'urpu uparap nammale, Jerusalemei upa rapya raal manloubi Jerusalem'rouwei Babylon'ra urlouyei kaalnung ruilouheimakni lakkurkhoupi.

²¹ “Moi, Israellei Dunpu, Thangwan-Shimleiyei Pu Umpune Aiyei Pucheem rillale, Judah krungei Krungkul rilla, heirou Jerusalem'ra leiwurkhou daarkeprap heirou putchei-shungyang rapbei ngamrou atoubi shunpilei:

²² ‘Heirapri Babylon'ra urlhaklourou, heitoubi Keine heirapya hungyilthinei tlaini phani bi heirou khoubine louleirou,’ toubi Umpune paothutlei; ‘Heitoubi Keine heirapya yenmallengthubi, bi atamrou hanui khoulhakpithurou.’ ”