JEREMIAH 26 - KHYINGEI PU'TLOU Bible (BSI)

Jeremiah'ne Pucheem Rilla Kar'anbi Pu'tlou Shunthutpikur

¹ Josiah'yei chanapawa Jehoiakim'ne Judah'yei krung hoiyoutirnung Umpurei Pu'tlou khat yongbine kyun.

² “Umpune atoubi shunpilei: ‘Umpuei Pucheem yuntlangmaira mayungbine, heitoubi Pucheem heiyei rilla Pukhrumrou wachangkur Judah'yei khukarthillei thimirap nammanungei Keine neinungei chay pibi shunpikur tloulhangrap nammaya khathakhi karlhikmakni shunpilak.’

³ Heiyanungri yani ninglhakbi, thimi rapne ai'aiyei lhangaimak lhourouwei kallekthutkurkhi kya, heiyanungri Keikhi yaiyei lhangaimak lhou rapbei ngamni yaidoura thuithikur tanti pinanungei rangurkhou heirouwei Keiyei ukning holkur kya.”

⁴ “Nangne yanungei shunpilak, ‘Umpune atoubi yunlei: Kounakpi nane Keiya ninglhakpima'nungri, heirou Keine naimaibongra malanthutkur Chaylamya chanthungmakanungri,

⁵ heirou Keine nanungei Keiyei shik thimkhui rapya kalleng-kalleng yenmalhetbi shunpikurya ninglhakpimaka'nungri,

⁶ Keine Pucheem awaya Shiloh'rei naksine thukyerrouwa; heitoubi Khulil awaya tlaipangpallei limrap nammaei manchona bi khat hoiyerrouwa.’ ”

⁷ Jeremiah'ne tloulhangrap heiwaya Pucheem rilla yunyeinung suipipu raple, thimkhuirap heirou thimirap nammane kanre-kandangni mayekthungkur.

⁸ Heirou Jeremiah'ne thimirap nammanungei shunthutpinung Umpune anungei shunpikur tlou rapya yunpichikur heirouri, suipipu raple, thimkhuirap, heirou thimirap nammane aya manbi kyun, “ ‘Nangri hirou da!’

⁹ Kounungei nangni Umpuei minra, ‘Pucheem awari Shiloh'yeinakni hoirouwa, heitoubi Khulil awakhi yul dathramakni mangrouwa,’ toubi shunthutpikuro?” Heirou thimirap nammane Pucheem rilla Jeremiah'ya karhungphopbine khoukur.

¹⁰ Heirou Judah'yei lhou'urpu upa rapne tlouthuk heiwaya loumayeknarouri, yani Krungkulrouwei wathukbine Pucheemra kabine heitoubi Pucheem wachangna Ran Shumtrum pongra wa'omkur.

¹¹ Heirouri suipipu raple thimkhui rapne lhou'urpu rapnung heirou thimi rapnungei kyun, “Napawa ari hibom thuk! Ngamri ani Umpuei minra shunthutdurla, tloubomrap heiri nai mayekthungkur heiwariya.”

¹² Heirouri Jeremiah'ne lhou'urpu raple, thimirap nammanungei loushun, “Na nammaei mayekthungkur tloulhang rapya Umpune keiya Pucheem aei doura karhani, heirou Khulil aei dourakhi shunthutpinanungei yenmalhetpikurame!

¹³ Ngam heineri, asinungri, naiyei choritlam raple, naiyei lhoulam rapkhi martlengbi touchimlak, heitoubi naiyei Pu Dunpuei houya chanthunglaka; heiyanungri Umpunekhi Aiyei ukning holwurbi, Aiyei naidoura shunthutdurkhou thuithikur tantiyei wairangkur heiwaya martlengurou.

¹⁴ Heiya keinungeiri, thilak, keiri naihutra manphopbi leikur awariya. Nane lhangairoume, heirou naikningni chimroume touya heisi toupilaka.

¹⁵ Heiya nane akhatri kanre-kandangni ningmupilak, touri kounakpi nani keiya hatlanungri, koukhi mralmak thimi khatdei heeri naimshaei dourale, Khulil aei doura, heirou heiyei rilla paalbi klei thimirap nammaei doura yongdayerrou. Kouweiyo toulanungri tanghakpani Umpune keiyari tloulhangrap awaya nanungei shunthutpinanungei yenmalhetpikura.”

¹⁶ Heirouri lhou'urpu upa raple, thimirap nammane suipipu raple thimkhui rapnung shun, “Napawa ari hibom thukmakrou; kouweiyo toulanungri ani kanungei kaiyei Dunpu Umpuei minra shunthutpiwurla.”

¹⁷ Heirouri Judah'yei ram heiyei ruipipu uparap thani traikanthoubi heitoubi kartilbi klei kulyom rapnungei atoubi shun;

¹⁸ “Moresheth'rei thimkhui Micah'ne Judah'yei krung Hezekiah'yei chaanrou Pu'tlou shunthutbi, Judah'yei thimirap nammanung shunpikhou: ‘Thangwan-Shimleiyei Pu Umpune atoubi shunpilei: Zion'ri phailounak khuiphongrouwa, heitoubi Jerusalem'ri kmang putchei rapya khingmanpungna bi hoirou, heirou Pucheem mayungkhouna Lhungdouri shaat'taakkur heengyao hoirouwa.’

¹⁹ Judah'yei Krung Hezekiah'ne heirou kulyomni Micah'ya hatkurko? Ane Umpuya chi-rikraini chabi heitoubi Aiyei kringpikheiya phananungei tounarou Umpune Aiyei yaidoura paothutdurkhou tanti heiwaya Aiyei ukning hollurbi thikmallengkur nimako? Heiya kaniri borh-lhou touwurbi kaitamya tangni karhayerwurla.”

²⁰ Bongnung kheen khatrou napawa napung-khatne heinakrim Umpuei minra shunthutkhou louklei. A heiri Kiriath-Jearim'rei Shemiah'yei chanapawa Uriah toubi ung, ani Khulil Jerusalem doura karhani heirou Judah'yei rammei doura karhani Jeremiah'yei shunthutkur heinakrimni shunthutkhou.

²¹ Jehoiakim'le, aiyei raalluirap nammale, heirou lhou'urpu uparap nammane Uriah'yei shunthutpikur tloulhang rapya mayekurla, heirouri krungni aya hatnungei raphakur. Heiya Uriah'ne pao heiwaya mayeklhakurbi chiwura, heitounei ani Egypt'ra trukkur.

²² Heirouri krung Jehoiakim'ne Egypt'ra Achor'yei chanapawa Elnathan'ya, thimirap thale kalhonni yukmalhetkur.

²³ Heirouri yani Uriah'ya Egypt'rei yenmanheibi heitoubi aya krung Jehoiakim'nung yenruilhakur, heirouri krungni aya raalshon'ne shat'hatkur. Heitoubi aiyei khi'lhung heiwaya thimichung phumnara khinglhakbine phumkur.

²⁴ Heiya Shaphan'yei chanapawa Ahikam'ne Jeremiah'ya kalhonbi ngaksilpikur. Heitounei ngamrou ayari thimi rapbei hutra hatnungei pilhakmakur.