JEREMIAH 25 - KHYINGEI PU'TLOU Bible (BSI)

Babylon'ra Raal Manlounungei Paothutpi

¹ Josiah'yei chanapawa Jehoiakim'ne Judah'yei krung khoini thrungei kheen kum-phali tlungeinung, heirou Nebuchadrezzar'ne Babylon'yei krung khoi lamkriyei kumrou Umpuei tloulhangni Judah'yei thimirap namyerrei ngamrou Jeremiah'nung atoubi shunpikur.

² Pao-laa heiwaya thimkhui Jeremiah'ne Judah'yei thimirap nammanungle, Jerusalem'ra paalbi klei thimirap nammanungei atoubi shunthutpikur,

³ “Amon'yei chanapawa Josiah'ne Judah'ra krung khoiyei kum chiple khyum tlungei waiyoubine angtu-rampha, kum somnile khyum hungtlung phani Umpuei tloulhang keinungei yongbi, heirou keine heirapya nanungei kalleng-kalleng shunthutpibikhi, naniri heirapya tekchakhi ninglhakhoumak.

⁴ Heirou Umpune Aiyei shokrap, thimkhui rapya nanungei kalleng-kalleng yenmalhetpikhou, heiya naniri yaya ningchipimak, heirou naiyei khnarakhi mayeklhakpimak.

⁵ Heirou yani shun, ‘Asinunghak na napung kantangni ai'aiyei lhangaimak lam'rouwei heirou naiyei lhangaimak lhourouwei lakkurkhoubi kallekthutlaksu, heitoubi Umpune bongei waiyoubi nanungei heirou naiyei patar rapnungei piwurkhou ramra kalui naimakni paallaksu.

⁶ Heitoubi thraidei rapbei hilla chanthungurbi heirapya khrumwurmak; heirou naihutni sheemthut-sathutkur thrailha rapya khrumwurbi Keiya malungkhayermak, heirou Keine naya klah dayerpimakrou.’

⁷ ‘Heiya naniri Keiya ninglhakhoumak,’ toubi Umpune paothutlei; ‘heinung'tlimri naihutni sheemthutkur thrailha rapya khrumbi Keiya malungkhayerbi heiwani naya klahyei tanti hoiyerlei.’ ”

⁸ Heingamei Thangwan-Shimleiyei Pu Umpune atoubi yunlei: “Nane Keitlouya chanthungmaknei ngamrou,

⁹ Thilak, Keine khalu lhangrei limrap nammanungle, heirou Babylon'yei krung, Keiyei shok Nebuchadnezzar'nung thimi malhetbi, heitoubi ram aei doura heirou arouwei paalbi klei thimi rapbei doura heirou ram heiyei karhilni paalbi klei limrap nammaei dourakhi karhani raal dayerbi, heitoubi Keine yaya tumni maangyerrou; heirouri yaya mubine thimi rapne chikandupburbi, heirou klui-naimak trim naimakni laonanei bi khoini maangyerrouwa.

¹⁰ Heiyakhi duinara, yaihangrei hakrao-nungkngaiyei houya, heirou nulou-chalounei hakrao-nungkngai langthounei houkhi, heirou yaihangrei chakhri taknei houkhi, heirou bi heiyei meishar kwaarkhi Keine louthutdurouwa.

¹¹ Heirouri ram namyerwa heiri shitnruiyei ramthingnakni hangwalni leiyerrouwa; heitoubi limrap heini kum somretbil Babylon krungya shok khoini watlhou toubine leirouwa.

¹² Heiya kum somret yenluikur heirouri, Babylon'yei krungle, heiyei lim rapya yaiyei borhnung tlim Keine tanti toueirouhui,” toubi Umpune paothutlei, “heitoubi yaiyei ramya kalui naimakni toumaangrouwa.

¹³ Heitoubi ram heiyei doura karhani shunthutdurkhou tloulhang raple, heirou Jeremiah'ne limrap heiyei doura paothutbi lailik aei rilla mayelhakurkhou tloubom rapya yongdayerouwa.

¹⁴ (Kouweiyo toulanungri, limrap kounakni heirou tang krung rapnekhi yayari shok hoiyerheirou; heirouri Keine yai touwurkhou lhou rapbei phabomthuk tantiya yanungei piheirou).”

Dunpuei Malungkhanei Daarkep

¹⁵ Kouweiyo toulanungri Israellei Pu Dunpune keinungei atoubi shunpilei: “Keihutrei malungkhanei daarkep awaya loubine, heitoubi awaya Keine neiya watyilkur thimirap nammaya pimonglak.

¹⁶ Heirou yani heiwaya mongbine pathutrou, heitoubi Keine yaihangra raalshon yenmalhetrou kyou heiyei tul mlipbine yuntlungmak naksine karwaicharouwa.”

¹⁷ Heirouri keine daarkepya Umpuei hutrouwei heiloubine, heitoubi Umpune keiya malhetkur limrap nammanungei pimongkur.

¹⁸ Jerusalem'rei thimi rapyakhi, Judah'yei khukarthil rapkhi, heirou yaiyei krung raple, yaiyei lhou'urpu upa rapyakhi daarkep heirouwei mongmlipyerbi nammaya maangyerkur. Heitoubi thimi rapne yaya kngakni thibi, manthapimakni laonawurbi manchokur heinakrimni angtu rampha hoileihui.

¹⁹ Heinakrimni Egyptbei krungkhi, aiyei lhou'urpu upa rapyakhi, aiyei shok rapyakhi, heirou aiyei thimirap nammayakhi Umpuei malungkhanei daarkep heirouwei mongyerkur.

²⁰ Heirou miram-mithrillei thimirap nammayakhi, Uz ramrei krungrap nammayakhi, Philistine ramrei krungrap nammayakhi, heirou Ashkelon, Gaza, Ekron ram raprei thimi rapyakhi, heirou Ashdod'ra himalei thimi rapyakhi daarkep heiwaya mongyerkur.

²¹ Edom, Moab, heirou Ammon'yei chanaorap namyakhi mongyerkur.

²² Heirou Tyre'yei krungrap nammakhi, Sidon'yei krungrap nammakhi, heirou samadru ruirei nimna ramrei krungrap nammakhi;

²³ Heirou Dedan, Tema, Buz'rei thimirap, heirou sham thumni dan(tlaipangpal wadongnara paalbi klei) thimirap nammayakhi;

²⁴ Heirou Arabia'yei krungrap nammayakhi, heirou shitnrui ramthingra paalbi klei miram-mithrillei krungrap nammayakhi;

²⁵ Heirou Zimri'yei krungrap nammayakhi, Elam'yei krungrap nammayakhi, heirou Media'yei krungrap nammayakhi;

²⁶ Heirou khalu lhangei tlatnaram heirou nakna ramrei klei krungrap nammayakhi thangknaini mongyerkur; heirou tlaipangpallei thleimai dourei klei krungram nammayakhi (Umpuei malungkhanei daarkep heirouwei) mongyerbi, heitoubi yaihillouri Sheshachya mongyerthurou.

²⁷ Heirouri nangni yanungei shunrou, “Israellei Dunpu, Thangwan-Shimleiyei Pu Umpune atoubi yunlei: ‘Keiyei malungkhanei daarkep arouwei monglak, heirouwei mongmliploubi pathutdurlak; heitoubi mlipbi kanellhakbine Keine naihangra yenmalhetrou kyou raalshonrei kanthoumaka.’ ”

²⁸ Heirou kounakpi yani neihutrei daarkep awaya loubine mongnimaka'nungri, yaya atoubi shunlak, “Thangwan-Shimleiyei Pu Umpune atoubi yunlei, ‘Nane daarkep arouwei shuimakni mongrou da!’

²⁹ Kouweiyo toulanungri thilak, Keiminra phunbaangkur Khulil aei doura Keine thuithiei klah-knang yen'unglhak'yourouwa; heitoubi nayari tanti pimakni malhetpirou marbuleiko? Nayari tanti pimakni leemni malhet'khoumarou; kouweiyo toulanungri Keine tlaipangpal thleidoura paalbi klei thimirap nammaei doura raalshon ungsundawurla,” toubi Thangwan-Shimleiyei Pu Umpune paothutdurla.

³⁰ “Ngam heineri, Jeremiah nangni tloulhangrap namma heiwaya yaidoura karhani shunthutbi yanungei atoubi yunpilak: ‘Umpune chouna lhangrei yuk-ungraorou, heirou Aiyei khying Pucheem'rouwei hou chouni yukpaorou. Ane hou mantrangni Aiyei thimirul rapbei doura karhani yuk’ungraorou. Darkha heishum thimi rapbei hounakni, tlaipang karyouwei paalbi klei thimirap nammaei doura karhani Ane yukpaorou.

³¹ Malungkhaei hou tang khat tlaipang wadong phani paokaryourouwa; kouweiyo toulanungri Umpune limrap nammaei doura yanimakni malungkhawura; tlaipang thimi limrap nammaei doura Ane pichar yenrouwa; heitoubi lhangaimak thimi rapyari Ane raalshonra dayerrouwa,” toubi Umpune paothutlei.

³² Thangwan-Shimleiyei Pu Umpune atoubi shunpilei, “Thilak, lhangaimak heiri lim khatrouwei wathukbi lim khatra karyouwura. Heirou thuithikur lhimnung-martheetang tlaipangpal wadongnarei katfyouwura.

³³ Heirou heiyei tlainirouri Umpune hatkur thimi rapri tlaipangpal khatlhang wadongna rouweini khatlhang wadongna phani dabine leirouwa; heitoubi khi'lhungrap heiwaya hunikhi khulpi toukhi makrou, khi ruipikhi toumakrou, heirou yanung'tlim hukhatnekhi kanrel-laasherbi chapkhi toumakrou. Khi'lhungrap heiri thleimaira deenak dabine chulchirouwa.

³⁴ Kanrillaklo, yaosil purap, kalni ungraobi chapbalo. Heirou nailura rahui chaiphangbine kalletchalaklo, yaorulya ruipi purap! Kouweiyo toulanungri naya hatnanungei heirou hulchekurnei tlaini heiwari hungurame; heitoubi nari phubaihar naksine dabairouwa.

³⁵ Yaosilpu rapbei loutruknanungei ramkhi makrouwa; heirou suipipu upa rapbei trukyulnanungei bikhi makrouwa.

³⁶ Yaosilpi pu rapbei chapnei houya mayeklei, heirou ruipipu rapbei klah-mrimnei ungraochanei houya mayeklei; ngamri Umpune yaiyei namh pishaina ramya toumaangurla.

³⁷ Heirou Umpuei meithukei malungkhawurnei ngamrou namh-yao hangei kying ramya shitnrui ramthing holyerwurla.

³⁸ Yangkong naksine Aiyei yulna birei wathukkura; kouweiyo toulanungri marhotkur thimi rapbei raalshonyei ngamni, heirou Umpuei meithukei malungkhawurnei ngammei yaiyei ram heiri mangura.”