JEREMIAH 23 - KHYINGEI PU'TLOU Bible (BSI)

Raalmankur hillou lhukthutpi

¹ “Keiyei yaorulya hulchekurbi toumaangurpi yaosilpu rapnungei kounakei lah'kna!” toubi Umpune paothutlei.

² Ngam heini Israellei Dunpu Umpune Keiyei thimi rapya silpipu yaosilpu rapbei ngamrou atoubi yunlei: “Nane Keiyei yaorul rapya touchekurbi yaya hulmathumwurla, heini asinungri thilak, Keine neiyei touwurkhou lhangaimak lhounung tlim tanti pibi khlang lhakrouwa,” toubi Umpune paothutlei.

³ “Heirouri Keimsha'hakni himaleithung Keiyei yaorulrap nammaya dei ramra Keiyei hulchekurkhounarei khumtilbine ai'aiyei namh shaikhouna bira hanui yenhul'lhakpirou, heiyanungri yarap heiri hanuikhi pung-shaanni tangbaang-choubaangthurou.

⁴ Heitoubi Keine yaidoura yaosilpu rapkhi hanui khalbaangpibi, heitoubi heirapne yaya thilhakbi silpirou; heiyanungri yari chi'kna toukhi makrouwa, mathunkhi makrouwa, heirou yaihangrei khatchatomkhi kanwaimaangkur toukhi makrouwa,” toubi Umpune paothutlei.

David'yei Tharmuchim Ban Khat Hungthukrou

⁵ “Thilak, tlaini rapri hunglei,” toubi Umpune paothutlei; “Keine David'yei tharmuchim Ban khat kathukyerei kheenrou Ane Krung khoini thrungbine shingkheini lhou touthutrou; heirou ram heiyei doura tharmu chimni pichar toupibi lhou touheirou.

⁶ Ane thrungei chaanrou Judah'ri kalpi pharou, heirou Israelri yingni palrou. Heirou Aiyei minri ‘Umpuri kaiyei Khying Pu,’ toubine ungrou.

⁷ “Ngam heineri, thilak, tlainirap heiri hungtlungura,” toubi Umpune paothutlei; “Egypt ram'rouwei yaya yenruithutpikur Umpuei minra kantomlei,” toubi thimi rapne yunmakni;

⁸ “Israellei yu-cha rapya hulcheklhakurna ram khalu lhangrei, heirou ram kantangrei yenruithutpikur Puei minra kantomlei,” toubine yunnei tlaini hungeirouhui. Heihillouri yaiyaiyei ramra kyingni paalkarbillouwa.

Chimmak Thimkhui Rapya Yanimak

⁹ Thimkhui rapbei ngamrou kyun tlou: “Keiyei solungri rilla baiwurleiya, keiyei thrurap nammakhi kanthing-baiwurleiya; Umpuei ngamni, heirou Aiyei Khying Pu'tlouya mayekbi heiyei ngamne keiri tulmalip thiminakni hoiyura, heirou keiri tulni maniwurbi khyal yaomak thiminakni hoiyurame.

¹⁰ Kouweiyo toulanungri Judah'yei ram heiwari minu-micha lalnei chorit naimakei lhouni thimmura; ram heiwari manchowurnei ngamrou lhawai klah'ne kanrellura; ramhangrei heengna-ramna rapkhi, namhkhi yentaarwurchiya; yaiyei lhoutoukhi lhangaimak lhouthillura, heirou yaiyei toumane mantrangkhi lehwurbi chimmakura.

¹¹ Kouweiyo toulanungri thimkhuikhi heirou suipi pukhi khintamrek marmokura; Keiyei Pucheem rilla rampharou Keine yaiyei lhangaimakya mulhakurla,” toubi Umpune paothutlei.

¹² “Ngam heineri yaiyei lamri yanungei mehna tlairei lam kmalnaksi hoirouwa, heirou yayari heirouwei hullhakbi kanelyerrouwa; kouweiyo toulanungri Keine yaidoura tanti tounei kumrou yayari klah dayerrouwa.” toubi Umpune paothutlei.

¹³ Heiyakhi duinara Samaria'yei thimkhui raprouwei lhangaimak lhou touya Keine mulhakurla. Thimkhui rapne Baal'yei minra Pu'tlou shunthutpibi, heitoubi Keiyei thimi Israel rapya ruipheilouheila.

¹⁴ Heirou Jerusalem'rei thimkhui rapbei hangrouweikhi beimak thuithiyei lhouya Keine mulhakurla; yani minu-micha lalnei chorit naimakei lhoule, mandallei lhouya touwurla. Heirou yani lhangaimakei lhoutou thimi rapya ukning thoubangurla. Heitounei ngammei thimi hukhatnekhi yaiyei lhangaimak lhou tounarei kallekthutkur yaomakura. Yarap namma heiri Keinungeiri Sodom'naksi hoiwurchiya. Heirou Jerusalem'ra paalbi klei thimi rapri Keinungeiri Gomorrah'naksi hoiwurchiya.

¹⁵ Heingammei Thangwan-Shimleiyei Pu Umpune thimkhui rapbei ngamrou asitoubine yunlei: “Thilak, thimkhui rapya Keine khlungkha rapya pimairouwa, heitoubi yanungei khruyui pimongrouwa. Kouweiyo toulanungri Jerusalem'rei thimkhui rapbei ngamni ram karyouni marmokbi borhwurchiya.”

¹⁶ Thangwan-Shimleiyei Pu Umpune atoubi yunlei: “Nanungei Pu'tlou shunthutpikur thimkhui rapbei tloulhang rapya nani ninglhakpimaklo. karshukmak tlouya yunbine malungamyer'nungei naya ruichalei. Yane Umpurei kar'ankmu tloukhi nimakpaya yaitam ukningrei kathuk tlou rapya kar'ankmu tloume toubi yunthutlei.

¹⁷ Yane Keiya yanimakni machin thimi rapya, Umpune yunlei: ‘Neinungei malungdam hoirou,’ toubi yunpibine leilei. Heirou yaitamei kningra chabine napaltou thimi rapnungei yani, ‘Naidoura koukhi klah-knang hungthukmakroume,’ toubi shunpibine leilei.”

¹⁸ “Heiya thimkhuirap hukhatne Umpuei Thangring rapbei hangra mayungbine Umpuei tloulhang rapya lhangaini ninglhakbine khalsundakur kyaoko? Ya hukhatnekhi ninglhakbine heirapya shunthutpikur kyaoko?

¹⁹ Thilak, Umpuei malungkhaei tanti heiwari lhimnung-marthee naksine yongrouwa; heiwari lhimnung-martheeni liptlai mhernaksine yongbi khril lhangaimak thimi rapbei lura yongdabi mherrouwa.

²⁰ Umpuei solungrei kning hilthungni Aiyei rangurkhou lhouwai heiwaya touthutdurbi luilhakbongyenri Umpuei malungkha heiwari hil-kallengbi dongkhoumakrou; heitoubi hilluirouri lhou heiwaya nane hungningmueirou.”

²¹ “Thimkhuirap heiya Keine yenmalhetkhoumak, heiya yani yaitamne chakur; ya rapnungei Keine shunpikhoumak, heiya yani yaitamei kningni shunthutkur.

²² Heiya yani kounakpi Keiyei Thangring rapbei hangra mayung'khouwanungri, yani Keiyei thimi rapnungei Keiyei Pu'tlou shunthutpikhourou; heitoubi yani yaiyei lhangaimak lam'rouwei kallekthutdurbi, heitoubi yaiyei lhangaimak lhou rapya lakkurkhourou.

²³ “Umpu Keiri naknarathil klei touneiko? Heirou tlatnabi deirakhi klei nimakme touneiko?” toubi Umpune paothutlei.

²⁴ “Thimi napung-khatne dumna bira muni yuldabi, Keine aya muphamakrou touneiko?” toubi Umpune paothutlei. “Keiri nungthou heirou tlaipangpal karyou'changmakrou marbuko?” toubi Umpune paothutlei.

²⁵ “Thimkhui rapne Keiminra chimmakni, ‘Keine rmong khat muwurla! Keine rmong khat muwurlame!’ toubi mandalbine shunthutpikurya Keine mayekwurla.

²⁶ Mandalbi Pu'tlou shunthutpi thimkhui rapbei solungra heinaksi minamnei ukningya kounak tlani khouweirouwo? Kouweiyo toulanungri heinaksi thimkhui rapne yaitamei ukningra minamnei tlouyathil ningchabine katyunthutlei.

²⁷ Heitoubi yani yaitam khatle-khat heinaksi rmong rapya yunthutrilbine Keiyei thimi Judah rapya Keiminya malumyernanungei wairaanglei. Heinakrimni yaiyei patar rapnekhi Baal thraiya khrumkhoubi Keiminya malumwurkhou nimaka?

²⁸ Rmong kman thimkhui heini aiyei rmong heiwaya shunthutpilaksu, heiya Keiyei paolaaya ninglhakloukur thimkhui heiwani chimni shunthutpilaksu. Heiya gehu lungle sapulri koutoubi pulni khouchokthrahrou?” toubi Umpune paothutlei.

²⁹ “Keiyei tloulhangri meinaksi nimako?” toubi Umpune shunlei, “Heiwari thlungyakhi harhar dani umchaalchang sheknaksi nimako?

³⁰ Ngam heineri, thilak, Keiri yanung-yanung mulourilbi Keiyei tloulhang rapya lehne shunthutpikur mandal thimkhuiei doura karhani leiyura,” toubi Umpune paothutlei.

³¹ “Thilak, Keiri mandalbi yaitamyei maleini, ‘Umpune paothutlei,’ toubi paothutkarsa thimkhui rapbei doura yanimakni leirouwa,” toubi Umpune paothutlei.

³² “Thilak, Keiri rmong rapya leh'ne shunthutbi paothutkur thimkhui rapbei doura yanimakni leiyura,” toubi Umpune paothutlei. “Keine yaya khalthutbi watyilbi yenmalhetkur nimakanungkhi, yani chimmakya leh'ne shunthutbi, chimmakya marnopiwurbi heiwani Keiyei thimi Judah'ya leh'ne ruipheiloula. Heiwini yani Keiyei thimi Judah rapya koukhi tungchayer manimakrou,” toubi Umpune paothutlei.

³³ “Thimirap hukounak khatne, nimanung, thimkhui khatne, nimanung suipipu khatne neinungei atoubi yunbi, ‘Umpuei putkhrit paolaa heiri kouwo?’ toubi ngailanungri nangni yanungei, ‘Put khritdei paolaa touri kouya hoirou, na heiriya! Keine naya khingthutdurouwa!’ toubi louyunpilak,” toubi Umpune paothutlei.

³⁴ “Heirouri kounapi thimkhui heiwani, nimanung, suipipu heini, nimanung, thimi rapne, ‘Umpuei putkhrit paolaa,’ toubi minlhangbi yunlanungri, Keine ayale, heirou aiyei cheemkhur-bommai nammaei doura tanti yenpirou.

³⁵ Heisitoubi na thimi napung kantangni ai'aiyei cheemlhun rapnung, nimanung, ai'aiyei teinao rapnung yunbi, ‘Umpune koutoubi loumallangurla?’ nimanung, ‘Umpune koutoubi yunwurla?’ toubi ngaiphaheirou.

³⁶ Kouweiyo toulanungri, nani Umpuei Pao-laa putkhritya ningthutkhoumarou. Ngamri thimi napung kantangni ai'aiyei kning tlouya ukrei tlou khoini yunrillouwa, heitoubi nani kaiyei Dunpu, Thangwan-Shimleiyei Pu Umpuei tloulhang rapri leh'ne holfletdurla.

³⁷ Heirou nani thimkhui rapnungei, ‘Umpune nanungei kou loumallangurla?’ nimanung ‘Umpune nanungei kou shunpiwurla?’ toubi ngaithilak.

³⁸ Heiya kounakpi nani, ‘Umpuei putkhrit paolaa,’ toubi yunlanungri,” Umpune paothutlei, “Keine naya, ‘Umpuei paolaa,’ toubi yunmaknungei shunbinekhi, nani ‘Umpuei paola,’ toubi shunthutdurnei ngamrou;

³⁹ Thilak, Keine naya malumwurbi, heitoubi nayari naiyei patar rapnungle, nanungei piwurkhou khukarthil raple kalhonni tlatnara khingthutdurou.

⁴⁰ Heitoubi nayari Keine kalui naimak-trim naimakni malumchangmakei rikrai phayerrouwa.”