JEREMIAH 2 - KHYINGEI PU'TLOU Bible (BSI)

Judah'ne Umpu ya Khingurkhounarei Ukning Hungnanungei Shunpikur

¹ Umpuei tloulhang rapne keinungei yongbi atoubi kyun:

² “Wabine, Jerusalemei thimi rapbei khnara mayeknungei paothutpilak: Umpune atoubi shunpilei: Nai douwei lhawai kyaoni kningya, heirou nu ngaimantirrei malungshi heinaksiya Keine ningthutlei. Nane ramthingra koukhi tuklhakhoumakna ramra leibi Keihilla chanthungkhouya Keine relthutlei.

³ Israelri Umpuei maibongra darkha hutlhahei naksine khyingni leikhou. Hei heiya chaloukur thimirap nammari mral langloumak yaomak; yaidoura klah-knangni norwurlei,” toubi Umpune paothutlei.

⁴ Ulleiyo tloulhang rapya louningpilaklo, O Jacobei cheemkhur'rap, heirou Israellei cheemkhur-bommairap na nammanekhi louningpilaklo!

⁵ Umpune atoubi yunlei: “Nai patar rapne Keiya kou mral raphamubi, yani Keirouwei tlatni chawurbine heitoubi koukhi karshukmak lhou rapya chanthungurbi, yaitamne karshukmak thimirap hoikurya koutouneiyo?

⁶ Heirou yani ‘Kaya Egypt'rouwei ruithutloubi, heitoubi thimi hukhatkhi yul dabi paalmakna ram, heirou thimi hukhatkhi karwaichamakna ram, kmehle, yui taarna(thlei traona) ram, thleipur bil-thimni leina ram, shitnruiyei ramthingra ruichakhoupi Pu Umpuri kourangawo?’ toukhi yunkhoumaklei.

⁷ Heirou Keine nayari marngirna ramra yenruilhakpibi naya ram heiyei trunwai heilim rapya naya chamaiyernungei toubi leiyerpikhou. Heiya naniri wachangbine heitoubi Keiyei ramya toumarmokwurbi, heirou Keiyei paalna ram heiwaya nani machinkna borh ram hoiyerwurla.

⁸ Suipipu rapne, ‘Umpuri kourangawo?’ toubikhi ngaiphamaklei. Heirou ayil shin thimi rapnekhi Keiya mupimakura; heirou lhou'urpu rapnekhi Keiya karhani borh lhou touwurla. Heirou thimkhui rapnekhi Baal thraiyei minra Pu'tlou shunthutdurla, heitoubi yanungei karshuknamak thrailha rapya hil chanthungbi leiwurchiya.”

⁹ “Ngam heineri asinung Keine neidoura mral piwurla,” toubi Umpune yunlei, “heirou neiyei yu-cha rapbei dourakhi mral dayerwurla.

¹⁰ Kittim phairuira heiralbine thilak, heitoubi Kedar'ra heimalhetbi knakni thithungyerlak; heitoubi bi heitamrou heinaksi lhouthuk leiwurkhoulako toubine thilhakbi raphathutyerlak!

¹¹ Lim khatne aiyei thrai rapya karshukmakme toubine martlengkur leiyurako? Heiya thimi rapneri koukhi karshukmaknara yaiyei thang'al Dunpuya martlengurla.

¹² Awaya mubine kngak khat hoiyalo, O Thangwanrap! Heitoubi chi-kanchunne leiyalo!” toubi Umpune paothutlei.

¹³ Kouweiyo toulanungri Keiyei thimi rapne lhangaimak lhou khintam touwurkhoula: Yane tuysir kanchirna hoibi klei Keiya khingurkhoula, heitoubi yuikhi omkartanmak yuiphum khat yani urbine khouwurla.

¹⁴ “Israelri shok khat khoini kleiko? Ayari shok khoini pukkhouko? Hei'nimanungri kouya tounei ari miyei hutchun hoikurawo?

¹⁵ Yangkong rapne Israelya rangpiwurla, yarapne aidoura kalni rangbine khungurla. Heitoubi yani Israellei ram rapya konmangurla, heirou aiyei khukarthil rapkhi toumaangurbine thimikhi klei yamakura.

¹⁶ Heiyakhi duinara Memphis'le Tahpanhes'rei thimi rapnekhi nai lurei shamya ngoumthaiwurbi rikrai phayerwurla.

¹⁷ Nai Dunpu Umpune naya ruichabine leiyeinung nani Aya khingurkhoubi naitamei doura heinaksi toukur nimaka?

¹⁸ Heiya nani Egypt'ra yukhounei karshuknari kou klei? Nile kungrei yuiya mongpharouko? Nimanung nani Assyria'ra wabine kouya ka'kna pharouwo? Euphrate kungrei yuiya mongmurou touneiko?

¹⁹ Naiyei lhangaimak lhou toukur heiwani naya tanti phayerrouwa; heirou naiyei thrai lhoura runkna lhou heiwani naya mral dayerrouwa. Ngam heineri nani naiyei Pu Dunpu, Umpuya khingurkhou touri kounakei thuithikur lhouwo touri nani ningmulak. Heirou Keiya chi-rikraiyo touri nanungei makkurame,” toubi Thangwan-Shimleiyei Pu Umpune paothutlei.

²⁰ “Kheen kounakei maibongrouwei Keine nai ngakhungrei putpuya toudeekwurbi, heirou naiyei naibom'rouwei phanphopkhou ruiya shattatdurpila. Heiya naniri ‘Keiri Neiyei watlhou toumakrou!’ toubine kyun. Kouweiyo toulanungri nani lhungbung chouna bi kantangra, heirou heengtrung mar'em holi kantangra chorit naimakei lhouya nane toubine leiwurkhoula.

²¹ Heisiyanungkhi Keine nayari lhangaidui khalthutbine linglhakkur darkha yam'naksine, rongtlung lungya marphulbi lingpukurkhou. Heiyanungri koutounei nani Keirouwei kallekthutdurbi, koukhi karshukmak ramhangrei hei heimak darkha yamnaksi hoikurawo?

²² Nane udyuine takmathaibikhi, heirou saporne kalthi choumathaibikhi, naiyei borh'ne chulkur khmah heiwari Keiyei maibongra leileihui,” toubi Pu Dunpune paothutlei.

²³ ‘Keiri koukhi marmokmak, heirou keiri Baal'ya hil-chanthungkhi toumakme,’ toubine koutoubi nangni yunchangrou? Phaikarra neiyei karwaichakhouna lamya(hochunya) yukthilak! Nangne kou touwurkhoulawo touya ningmulak! Nangri ud kallani pa lhaochalumnung bi kantangra chanchakur heinaksime!

²⁴ Nangri ramhangrei klei gadha ching naksilei; heitoubi pa lhaocha'lumnang mangalbi nalhungni khrim mrupbi nampha naksilei. Ane msha illumnung huni ayari msuiphopbi khouchangrou? Pui lhochakur gadha pa khatne ayari koukhi lamakni klaine chanphachangrou!

²⁵ Kouya tounanungei neiyei ho'mathin tatkhokkur ramphane chancharou? Heirou kounungei neiyei khruk tarrebreb yuikhatne karwaicharou? Heiya nangneri: “Awari koukhatkhi karshukmakei lhou! Kouweiyo toulanungri keiri shakmumak miram-mithrilya malungshiwurla. Heineri keiri aihilla chanthungrouwa,” toubi yunthulei.

Israelri Tanti Phabomthuk

²⁶ “Mucha thimine mankur hillou rikrai phakur heinakshini Israellei cheemkhur thimi rapkhi rikraini philu khumphopburla. Yale, yaiyei krung rapkhi, krungcha rapkhi, yaiyei suipipu rapkhi heirou yaiyei thimkhui rapkhi rikrai phawurchila.

²⁷ Heengtrungnung kyun, ‘Nangri kai pawame,’ heirou thlungnung kyun, ‘Nangne keiya pukpime.’ Kouweiyo toulanungri yani Keilhangra namkal hollhakwurla, heiya yaiyei mairungri kalleklhakpimakura. Heiya yani klah-knang phayei kaallouri, ‘Kanthouwalo, heitoubi kaya kalpilaklo!’ toubine yunheirouhui.

²⁸ “Heiya nanungei khoiyei sheemthutkur naiyei thrailha rapri kourangawo? Yane kanthoubi naiyei klah-knangei kheenrouri naya kalpilaksu! Ngamri O Judah'yei thimirap, naiyei khukarthil mshing hilthungni naiyei thrailha rapkhi chungwani leiyura.

²⁹ Nane Keidoura tlou makatkuri koungammei? Na nammane Keiya karhani raal yuwurla,” toubi Umpune paothutlei.

³⁰ Naiyei chanao rapya Keine tanti piwurbinekhi, yane heiwaya loulhakbi lhangaikur touri koukhatkhi maklei. Thuithikur yangkongni sraltang-an maibi madulkur heinakshini, nai'mshaei raalshon rapne Keiyei thimkhui rapya shaat'hatdurla.

³¹ O Keiyei Judah'yei yu-charap, Umpuei tloulhang rapya thibine loulhaklaklo! Keiri Israel rapnungei ramthing holwurkhoulako? Nimanung kmehyei ram hoiwurkhoulako? Koutounei Keiyei thimi rapne, ‘Kari kaithukei chakur thimi rapme, kari Neinungei yenkallengkhoumarou,’ toubine yunkurawo?

³² Nangaka khatne aiyei mlena sinapar rapya malumchangrouko? Nimanung ngaimankhou nangakani aiyei shamb rapya malumrouko? Heisiya hoiyanungkhi, Keiyei thimi rapne Keiya malumwurkhounei tlainikhi sherchichangmakura.

³³ “Nangne neiya malungshipiya phananungei lam karsemphari kounakni khei! Heitounei thuithikur chorit naimak napuiya rapyakhi nangni marnopiwurla.

³⁴ Neiyei karkhupra mralmak kanring thimiyei heekhi poplei; yani muchananungei cheemkhar nambaibi wachangnarei nangni yaya loumankurkhi nimaklei. Heisiya hoiyanungkhi nangni heinakya loutouwurlei.”

³⁵ Heiya nangni kyun, “Keiri koukhi thimi hatnei mral makme; tanghakpani Aiyei malungkha heiri keirouwei kallekthutrou. Thilak, asinungri Keine neiya pichar tourouwa, kouweiyo toulanungri nangni, ‘Keiri koukhi mral makme,’ toubine yunlei.

³⁶ Koutounei nai ukningri heinak klaini holchakur! Nayari Assyria rapne rikrai piwurkhou heinakshini, Egypt rapnekhi nayari rikrai piwurthurouwa.

³⁷ Nane bi heiroueikhi naihutni nailura hutbur shuichabine shaalthutdurthurou. Kouweiyo toulanungri naiyei malungamkhou thimi rapyari Umpune yapimakura. Heirou nari yakou tangbaang-choubaang manikhoumarou.”