JEREMIAH 19 - KHYINGEI PU'TLOU Bible (BSI)

Baikur Thlei-Phuwan

¹ Umpune asitoubi shunpilei: “Chawalo, heitoubi phusa thimirei phuwan khat walolak, heitoubi Judah'yei thimi rapbei ruichingpipu uparap thale, heirou suipipu uparap thakhi ruilouheilak.

² Heitoubi Ben-Hinnomei phaikarra wathukbi phubaihar khingmanpungna bi palshung shumtrum pongra wamayunglak. Heitoubi bi heitamrou Keine neinungei shunpirou kyou tloulhang rapya nangni yanungei shunpilak.

³ Nangne asitoubi yunpirou da: ‘O Judah'yei krungrap, heirou Jerusalem'ra paalbi klei thimirap, Umpuei tloulhang rapya louningpilaklo: Israellei Dunpu, Thangwan-Shimleiyei Pu Umpune asitoubi shunlei: Louthilak, Keine ram aei doura klah-knang yenpirouwa; heitoubi heiwaya loumayekkur thimirap nammane chi-mathunchirouwa.’

⁴ Ngamri Judah'yei thimi rapne Keiya lakkurkhoula, heitoubi yani ram awaya miram-mithrillei thrailha rapya urlhakbi khrumna bi hoiyerwurla; heitoubi yane bi heirouei bongnung yanekhi, yaiyei patar rapnekhi heirou Judah'yei Krung rapnekhi tekkhi mukhoumak thrailha rapya khrumbine malamput rapkhi meira hongbine makatdurla. Heitoubi bi heiwaya yani mralmak micham rapbei heeni thimyerwurla.

⁵ Heitoubi yani lhungbung chouna bi rapra Baal thraiya khrumnanungei thraibom kounakhi sheemwurkhoula, heitoubi heiyei thrai khrumna bi rapra yaiyei chanapawa rapya meira hongbine makatna malamput khoini makatrilwurla. Heinaksi lhou rapya Keine chay pikhoukhi mak, Keine shunpiwurkhou toukhi mak, heirou heinaksiri Keiyei solungrakhi ningmukhoumak.

⁶ Ngam heineri, thilak, anaksi tlaini khat hungeirouhui touri, bi heiwaya thimi rapne ‘Topheth’ nimanung ‘Ben-Hinnomei phaikar’ toubi min ungmakni ‘Hina phaikar’ toubine ungeirou,” toubi Umpune paothutlei.

⁷ “Heitoubi bi arouri Keine Judah'yei thimi rapbei heirou Jerusalem'ra paalbi klei thimi rapbei lhou waikraang nammaya koukhi karshukmakni hoiyerrouwa; heitoubi yayari Keine yaiyei yeekna thimi rapbei maibongra, heirou yaiyei rongchanya hatnungei rapha thimi rapbei hutra dayerbi raalshonra hiyerchirouwa; heitoubi Keine yaiyei khi'lhung rapya nungthourei traicha ramwaa rapbei heirou ramhangrei ramyaa rapbei ukchak hoiyerrouwa.

⁸ Heirou Keine khulil awaya tumni maangyerrouwa, heitoubi miyei laonanungei bi khat hoiyerrouwa. Heitoubi bi heirou heikral thimirap nammane bi heiwaya mubi kngakni thikhourouwa.

⁹ Heitoubi Keine yaya yeekna thimi raple, yaya hatnungei yaiyei rongchanya rapha thimi rapne yaya kuikoolwurbi khouyerrouwa, heitoubi yayari Keine yaiyei chanapuiya rapbei sarungrap, heirou yaiyei chanapawa rapbei sarung mitee rapya maiyerrou, heitoubi yani cheemlhun thimi rapbei sarung rapyakhi khatle-khatle mairilyerrouwa.”

¹⁰ “Heirouri nangni nangkou chamalkna thimi rapbei mit'thrilna maibongra thleiyei phuwan heiwaya umbailaka;

¹¹ heitoubi yanungei atoubine shunpilak: ‘Thangwan-Shimleiyei Pu Umpune atoubi yunlei: Thimi napung khatne thleiphuya umbaiwurbi hanui kallengni marchalbi sheemlouthramak heinaksine, Keine Judah'yei thimi rapya heirou heiyei khulilya toubairouwa, heitoubi yaiyei khi'lhungrap heiri Topheth'ra phumpirouwa; ngamri yaiyei khi'lhung rapya khi ruinanungei ramri deira maklei.

¹² Heisitoubi Judah'yei thimi rapya, heirou Khulil heirouwei paalbi klei thimi rapyakhi heisibil toupirouwa; heitoubi Khulil heiwayakhi Topheth nakrimni hoiyerrouwa.

¹³ Heirou Jerusalem'rei cheemrap nammakhi, heirou Judah'yei Krungkulrap nammakhi Topheth naksine touborhwurchila; ngamri thimi rapne yaiyei cheembung kantangra thrailha rapya khrumwurchiya; heitoubi kinni, tangla heirou sorwa rapya khrumbine, heitoubi heirap'nungei mrohkhi ikbine, heitoubi tuysir bunsundabine khrumrilwurla.’ ”

¹⁴ Heirouri Jeremiah'ne Umpune aya Pu'tlou shunthutpi'nungei heimalhetna bi Topheth'rei yenkallengurbi, heitoubi ani Pucheemra wabine heitoubi Pucheemyei yuntlangmaira mayungbi ani thimirap nammanungei atoubi kyun:

¹⁵ “Israellei Dunpu, Thangwan-Shimleiyei Pu Umpune atoubi shunpilei: ‘Thilak, Keine Khulil awaei doura, heirou heiyei rilla paalbi klei thimi rapbei doura karhani paothutdurkhou klah-knangni deekbai thuknungei lhou heiwari yaidoura yongdayernungei marshikwurla; ngamri yani Keiyei tloulhang rapya ninglhaknimakni yaiyei khna tipburchila(napal toubi ngak khangchoubi leiyura).’ ”