JEREMIAH 17 - KHYINGEI PU'TLOU Bible (BSI)

Judah'yei Khril Lhangaimakya Tantipi

¹ Judah'yei borh lhouri thirmsuini yemkhakbi mayelhakurla; heirapya yaiyei solungei thlungpakra thlungrilni khaklhakbi mayelhakurla. Heirou yaiyei khrahpal rapbei chithekrei halchee raprakhi khaklhakbine mayewurkhoula.

² Heirou yaiyei chanao rapnekhi lhungbungei lukbomrei heengtang holi kantangra yaiyei khrahpal rapya heirou Asherim thrai shutlai rapya ningthutbi khrumbine leiyeinung;

³ Purei klei Keiyei lhungdourei dunbi khou naiyei lalthumrap heirou naiyei cheem-keirap nammakhi nani borh touwurnei klah-man khoini raalman putchei khoini Keine malhetrouwa. Naiyei chouna lhungdourei thraibom rapkhi minungei pithutrouwa.

⁴ Heirou Keiyei pikhou nai patar raprei phathung paalna ram ramphakhi naiyei borhnung'tlim maangchirouwa. Heitoubi nayari Keine nai mukhoumakna ramra urlhakbi khoupirou, heitoubi naya yeekna thimi rapya watlhou toubine leiyerrouwa. Kouweiyo toulanungri Keiya malungkhayernei meiya toufyouwurla, heineri heiwane naidoura yongdabine klui nimakni kaangrouwa.

⁵ Umpune asitoubine shunpilei: “Tlaipang thimiya uklum thimiri, heirou thimiya malungambi uklum thimiri manchokur hoiniyasu; kouweiyo toulanungri ani Umpurouwei kallekthutdurlei.

⁶ Kouweiyo toulanungri ari shitnrui ramrei nbur heinakchani koukhi tangbang toukhi naimakrou. Heiya a heiri ramthingrei thlungyao hangra, heirou thimi palhramakna ramra pukbi klei heengtrung naksine paalrouwa.”

⁷ “Heiya Umpuya uklum thimiri likarsui lhangairou. Ngamri aiyei uklum heiri Umpunung klei.

⁸ Kouweiyo toulanungri a heiri kungruira lingpukhou heengtrung'naksi; aiyei yrung rapkhi kungpalthung runyerlei. Heineri nungshani yukphoubikhi ani chimaklei (marhuimaklei); Heiya aiyei heengna rapri mar'embidik leilei; heineri yui kattaarbikhi ari koukhi lhawai lahpimaklei. Heirou heikhi karyimmakni heibidik leilei.”

⁹ Tlaipang thimiyei solungri put namrouwei lhangaimak, heirou yunnungei makni thuithi; heiwari hunekhi ningmumak.

¹⁰ Umpu, Keiri solungya rapha, heirou ukningya marshakbi tirithilei. Heitoubi thimi napung-kantangnung ai'aiyei touwurkhou lhou rapbei mhei hilthungne, ai'aiyei phabom thuk klah-manya Keine phayerlei.

¹¹ Phaimlung(tentret) waani aiyei fyuikhoumak yuiya ophopbi keoyernaksine, khril lhangaimakni taal'lhakbi laldun thimi heiri aiyei chaan khatrekrou duntou naikhoumakrou; heirou aiyei chaan tlailam hungphabongnung, aiyei lalni aya khingurkhourou; heitoubi aiyei rongchan hungdongnarari yuntlungmak naksine hungdongrouwa.

¹² Kyou'rouwei chouni mathumbaangkur thang'allei Krungbom heiri, kaiyei khyingei khrumnabom heirime.

¹³ Israel rapbei malungamkna bom O Umpu, Neiyei khingurkhou thimirap namyeryari rikrai phayerheirou. Heitoubi Neiya lakkurkhoubi kallekthutkur thimirap nammari thlei rilla min mayebine khourouwa, ngamri yarapne khringei tuysir Umpuya khingurkhoula.

Jeremiah'ne maangyernanungei tloumakat

¹⁴ Keiya damyerpilaklo, O Umpu; heiyanungri keiri rairoume; keiya kalpilaklo, heiyanungri keiri kalpi pharoume. Kouweiyo toulanungri Neiya keine mathangleime.

¹⁵ Thilak, yani keinungei yunbine leilei, “Umpuei tloulhangri kourangawo? Asinunghak hungtlungyerlaklo!”

¹⁶ Heiya keiri Neiyei yaosilna bom'rouwei trukthutkurkhi makkhui; heirou klah-knangei tlainiya hungyerkni touneikhi nimak. Neiyei kmu heiwariya, touri keimurrei yunthutkur tloulhang rapri Neiyei maibongra klei heiwariya.

¹⁷ Heiya keiyari toumathunbi chiyerpimaklo; Nangri chi'knaei kheenrou keiyei truklhakbi yulna bihoume.

¹⁸ Keiya marhotbi lahkyer thimi rapyari rikrai phayerlaklo; heiya keiyari rikrai nangyerpimaklo. Heirou yeekna thimi rapyari lam tamungyerlak, heiya keiyari tamungyerpimaklo; yaidoura klah-knangei tlainiya yenpilaklo, heitoubi yayari khnui thukni maangyerwurlaklo.

Sabbath Tlainiya Khyingni Ngaakbi Khou

¹⁹ Umpune keinungei asitoubine shunpilei: “Wawalo, heitoubi Benjamin'yei Palshungra shumtrumra wamayunglak, heirouwei Judah'yei Krung rapne wathuk-hungchang toubi karwaichalei, heitoubi Jerusalem Palshung shumtrum kantangrakhi mayunglak.

²⁰ Heitoubi bi heirou thimi rapnungei louyunlak: ‘Shumtrum'rap arouwei raalbine wathuk-hungchang toubi klei Judah'yei Krungrap, heirou Judah'yei thimirap namma, heirou Jerusalem'ra paalbine klei thimirap na nammakhi Umpuei tloulhang rapya louningpilaklo.’ ”

²¹ Umpune atoubi shunpilei: “Nane mukheini toulak, touri Mathrilnei tlainirou nani putkhrit urnungei yamakrou; heitoubi Jerusalemei Palshung shumtrumrakhi putkhrit urlhaknungei yamakrou.

²² Heitoubi nani Mathrilnei tlainirou nainaiyei cheem'rouwei kou putkhrit khatkhi urthutnungei yamakrou; heirou heininungri nani koulhou khatkhi pangnungei yamakrou; heiya Keine naiyei patar rapnungei chay piwurkhou heinakrimni nani Mathrilnei tlainiya khyingni ngaakrou da.

²³ Heiya yaneri ninglhakpimaklei, heirou ninglhakni toukhi maklei; heinung'tlimri yaiyei ngak khangchoubine napal toubine leikhou; heitounei shunmatupikur tloukhi loulhakpimaklei.”

²⁴ “Heiya kounakpi nani mukheini Keiyei shunkurya chanthungbi, heitoubi Mathrilnei tlainirou nani khukarthil heiyei Palshung shumtrumra putkhrit urlhakmakni, Mathrilnei tlainiya koulhoukhi churmakni khyingni ngaakrou da.

²⁵ Heiyanungri David'yei Krungbom doura omrou kyou krung rapne palshung heiyei shumtrumra wathuk-hungchang kalleicharou, heitoubi krung rapne yaiyei lhou'urpu upa raple kalhonni sapuk'kaari tungbine, heirou sapuk doura tungbine shumtrumra Judah'yei thimirap nammale kalhonni Jerusalem'ra wachangrou. Heirouri Jerusalemei khukarthil heiwari kalui naimakni thrungbine leirouwa.

²⁶ Heirou thimi rapne Judah'yei khukarthil raprei, heirou Jerusalem karhillei klei yultlai raprei, Benjamin ramrei, heirou kulrel lhangrei lhungdourei, heirou lhungdou ramrei, heirou Judah'yei khate Negeb'rei thimi rapne wachangni, meira pumni hongnungei makat putrap, malamthut putrap, trunwai lung makat putrap, heirou mrohkunrap, heirou mathangnei makat put rapya heilhakbine Pucheemra wachangrou.

²⁷ Heiya kounakpi nane Keiyei kyunya ninglhakmakni, Mathrilnei tlainiya khyingni ngaakmakne, heiyei tlainirou Jerusalemei palshung shumtrumra putkhrit urlhakbi hungchanga'nungri, shumtrum heirouwei Keine malungkhanei mei fyouwurbi, Jerusalemei Krungkul heiwaya tumni kaangtlumyerbi, mei heiwaya toumitchangmakrou.”