JEREMIAH 13 - KHYINGEI PU'TLOU Bible (BSI)

Jeremiah'yei Phaikhringei Shintlakrui Toubudmaangkur

¹ Umpune keinungei atoubi shunpi, “Chalaka, heitoubi neinungei phaikhringei phisuirei shintlakrui khat lolak, heitoubi neiyei shintlakra heiwaya yitlaka, heiya phisuirei heiri yuira tekkhi lupdokmak.”

² Heisi tounarouri keine Umpuei shunpikur tloulhang hilthungni shintlakrui phisuirei khat walobine heitoubi heiwaya keiyei shintlakra yitkur.

³ Heirouri Umpuei tloulhangni keinungei khnui tlungni(hanuikhi) yongbine atoubi shunpithu:

⁴ “Nangne lobi neiyei shintlakra yitloukur phisuirei heiwaya urloubine heitoubi Euphrate'ra walaka, heitoubi bi heirou thlungkhan tlakra yulkhoulaka.”

⁵ Heisi tounarouri keine Euphrate'ra wawurbi, heitoubi Umpuei tlouni keinungei chay pikur hilthungni keine heiwaya yulkhoukur.

⁶ Heitoubi tlaini beimak tlani leikur hillouri Umpune keiya shunpithu: “Kanthoubi, Euphratera wathuwalo, heitoubi Keine neinungei chay pibi phumkur shintlakrui phisuirei heiwaya waphorthutbi yenheithulak.”

⁷ Heirouri keine Euphrate'ra wawurbine, heitoubi thlei toubine, heitoubi shintlakrui phisuirei heiwaya keiyei phorphumkhounarei walouthutkur, heirouri thilak, shintlakrui phisuirei heiwari maktham budtatdurbi koukhi karshukmakni maangurchiya.

⁸ Heirouri Umpuei tloulhangni keinungei yongbine atoubi shunpithu:

⁹ “Umpune atoubi yunlei: ‘Heinakrimni Keine Judah'yei tangchakurya heirou Jerusalemei tangchabi kanyerchakur heiwaya maangyerheirou.

¹⁰ Anaksi khril lhangaimak thimi rapne Keiyei tlousherbi shunkur tlou rapya ninglhakpimaklei. Yarapne yaitmamei ukningrei kningyathil toukhoubi ngak'kalni chakhou; yani thrailha rapya hil-chanthung'khoubi, heitoubi heirapya watlhou toukhou; heirou heirapbei maibongra kanellhakbine khrumkhou. Yarap heiri shintlak rui phisuireini butdurbi koukhi karshukmakni chulmangkur heinaksine koukhi karshukmakni namma maangchirouwa.

¹¹ Kouweiyo toulanungri shintlak ruini thimi napung khatdei shintlakra karbilni yitphopbi khoupinaksine, Israellei cheemkhur-bommairap nammale, Judah'yei cheemkhur-bommairap namyakhi Keinungei karbilni yitphopbine khoupikur,’ toubi Umpune paothutlei; ‘ngamri yarapri Keiyei thimi hoinanungei, mincha Lim hoinanungei, mathangna'nungei, heirou Keiyei thang'al hoinanungei toubi khalthutpikhou, heiya yaneri shunya ninglhakpikhoumak.’ ”

Darkha Heiyui Khangei Hutlha

¹² “Nangne yanungei tloulhangrap awaya shunpilak: ‘Israellei Pu Dunpune atoubi yunlei: Khangrap namma heiri darkha yui shungthimlak.’ Heirouri yani neinungei louyunrou, ‘Khangrap namma heiri darkha yui shungthimroume touri kakhi kmu nimaka?’

¹³ Heirouri nangni yanungei shunlak: ‘Umpune asitoubi yunlei: Thilak, ram arouwei paalbi klei thimirap nammaya-David'yei Krungbom doura ombi klei Krung rapya, suipipu rapya, thimkhui rapya, heirou Jerusalem'ra paalbi klei thimirap namyakhi Keine tul malipyerrouwa!

¹⁴ Heitoubi yayari Keine khatle-khat hatrilyerrou, heirou pa raple chanao rapkhi hatrilyerrou,’ toubi Umpune paothutlei; ‘Yayari Keine kringpikheikhi mutpimakrou, lhawaikhi lapimakrou, heirou malungshipikhi toupimakrou, heiya yayari tlumni maangyerrouwa.’ ”

Raalman Khoini Malhetna'nungei Tlousher Pikur

¹⁵ “Khna khangchoubine louningpilak; tangchawurbi napal touwurmak; kouweiyo toulanungri Umpune yunthutdurla:

¹⁶ ‘Naiyei Pu Dunpuya mathanglaklo; Ane naidoura kmeh yongdayer'bongnung, heirou naiyei honi kmehyei lhungdoura tatlhakbi tapanbi kanelbongnung! Nane kwaarya maduni ningcharou, heiya Ane heiwaya masa chi'kna shakrungei kmehra holyerrou.

¹⁷ Heiya kounakpi nani ninglhak'pimanungri, naiyei tangchakur heiwinung'tlim keiyei solungra muni chapbi leirouwa; heirou keine chapnarou keiyei mitlung rapri mityuini thimrouwa.’ Ngamri Umpuei yaorul rapri raalman khoini urloubi chawurchirouwa.

¹⁸ Tloubom awari Krungnungei shunpilak, heirou aiyei puiwi Krungnu'yakhi shunpilaklo. ‘Neiyei Krungbom'rei yongchummuralo; kouweiyo toulanungri neiyei lhangai-karyuiknaei Krunglukhup heiri neilurouwei lupsundawurame.’

¹⁹ Negeb'rei Khukarthil rapkhi namma palshung rotphopburchila, heineri heiwaya thimi hukhatnekhi latpirou makura. Judah'ri namma raalman khoini chawurchiya, yarap nammaya raalman khoini urlouheichila.”

²⁰ “Jerusalem, neiyei mitni katmangalthutbine khalu lhangrei hungbi klei heiwaya louthilaklo. Neinungei pilhakbi thikulpinanungei silnawurkhou lhangai yaorul rapri kourangachiya?

²¹ Heirou nangni shunmatubi marnopiwurkhou, neiyei palui rapme toubi malungamni ningchakhou thimi rapne Ane neidoura ruipipu khoini khalbangurlanungri nangni kouyunrou? Heiwari neinungei napuiya khatne naopuknei manshan knanakni klah hoimakrouwa?

²² Heirou kounakpi neiyei ukningra ningchabi, ‘Koutounei anaksi lhou rapya keidoura keinungei hungthukkurawo?’ toubi yunlanungri; neiyei borh lhouni chungachakurnei ngammei hungthukkura; heirou neiyei karkhupkhi thiklhukwurla, heirou neiyei hohil rapkhi mulhakurlak.

²³ Ethiopia thimini aiyei hak'unrei kimya hollurbi martlengkur manirouko, nimanung humeni aiyei myekya mangchangrouko? Heinaksine lhangaimak lhouya tounara kanchangkur Jerusalem nangri lhangaiyei lhouya holchangrouko?

²⁴ Ngam heineri Keine nayari ramthingrei martheeni shafletchakur sapul taarnakni khrechekrouwa.

²⁵ Awari Keirouwei holthutbi tamkur naiyei siruk hoikura,” toubi Umpune paothutlei; “Ngamri nani Keiya malumwurkhoula, heitoubi chimmak thrailha rapya malungambi leiyura.

²⁶ Heingamei Keine neiyei karkhupya neiyei lu katduini khangflaiwurbi, heitoubi neiyei rikraikna heiwari thimi nammane mulhakbi laonarouwa.

²⁷ Neiyei thuithikur machinknaei lhou rapya Keine mulhakwurla; nangni lhungdoura heirou ramhangra rikraikhi mumakni chorit naimakei toukur lhourap, heirou kro-pilkhi naimakni sarungya yorbine chorit naimakni lhou touwurkhouya mulhakbi Keine machinwura. Ulleiyo, neinungei lah'knaei lhouwame, O Jerusalem! Kounak tlani nangni heinaksi machinkna hyingmak lhoura leiheirouwo!”