JEREMIAH 12 - KHYINGEI PU'TLOU Bible (BSI)

Jeremiah'ne Dunpunung Tlou Makat

¹ O Umpu, Nangne tharmuchim Pume. Heiyanungkhi keine Neinungei keiyei tlouthukya makatnileime; tanghakpani keine Nangkou tharmu chimmei ngamrou kartongrilnilei. Khril lhangaimak thimi rapri koutounei heinak tangbaang-choubaangkurawo? Heirou koungammei ukning hyingmak thimi rapri heinak klaiyei chaanra paalkurawo?

² Nangne yaya lingpukkhoubi, heirou yari yrung chetni yongura, heitoubi heikhi chungni heiyura, Nangri yaiyei murpalla leipilei, heiya yaiyei solungreiri tlatni leilei.

³ Heiya nangni keiya mupileime O Umpu. Nangne keiyei solungya mupibi Neiyei hoi-hoimakya thinanungei marshaklei. Lhangaimak thimi rapya hatnungei taangloukur yao naksine taangthutdurlaklo. Heitoubi malamthutnungei khaithutbi khoukur putnaksine yayari khaithutdurlaklo.

⁴ Ram heiwani kounak tlani kanrelbine leiheirouwo? Heirou phailou kantangei louhtrung-ramtrung rapne kounak tlani taarbine leiheirouwo? Kouweiyo toulanungri ram heirou paalbi klei thimi rapne lhangaimaknei ngamrou, ram heiyei yoo-yaa rapkhi, ramwaa rapkhi namma makurchiya. Ngamri yani yunlei: “Kanungei kou hungthukrouwo touri Dunpune mumakrou?”

Dunpune Jeremiah'nung loumallang

⁵ “Kounakpi nangni thimi raple chanshingnanarou lahwuranungri, koutoubi sapuk raple nangni chan'shingkna manirouwo? Heirou kounakpi nangni thlei karbilnara thikmthuilanungri, koutoubi nangni Jordan Kungruiyei thruyam hangra chachangrouwo?

⁶ Neiyei pukmalkna teinao rapnekhi heirou neiyei cheemkhur-bommai'hakrei thimi rapne rampha neiya thuithini toupilei, heirou neihilla kalni ungraobine leilei; heirou kounakpi yani neinungei lhangaimak yunbineakhi, yayari malungampimak.

⁷ Keine keiyei cheemkhur Israelya lakkurkhoula; Keiyei thimi rapya Keine khingurkhoula; Keiyei malungshi'kna thimi rapya yaiyei yeekna thimi rapbei hutra Keine pilhakwurla.

⁸ Keiyei thimi rapne Keinungei heengyao hangrei yangkongnaksi hoiyura; yani Keinungei hollhakbine ungraobi rangurla. Heitounei ngammei Keine yaya machinnawura.

⁹ Keiyei thimi rapri Keinungei waa kmai malaangnakni hoiyurako? Makhao rapne karhilni Keiya yanimakni leiyurako? Chabine ramhangrei ramyaa rapya namma markumlaka, heitoubi yaya madulyernanungei yenlaklo!

¹⁰ Yaosil purap kounakni Keiyei darkha yekul rapya toumaangurkhoula; heirou yani Keiyei yekulrap kounakyakhi tatmanuiwurbi kontumwurla. Heitoubi yani Keiyei karyuikna phailou kounakyakhi kontumwurbi karshukmak ramthing holyerwurla.

¹¹ Yane ramrap namma hangwalni horwurla, heirou hangwalni khingurkhoubi Keinungei kanrelni chappiwurla. Ngamri thimi hukhatnekhi heiwaya ukrei tlou khoini loupimakura.

¹² Wachangura mangkyer raallui rapne ramthingei chouna sittu ramra; kouweiyo toulanungri Umpuei raalshon'ne ram heiwaya khatlhang wadongna rouweini khatlhang wadongna phani madulrouwa; heineri bi heirouwei thimi hukhatkhi kying phamakura.

¹³ Yane gehu lung watuklhahou, heiya thrulung rapya luklhakkhoulei; yani khi-khlangni lhou churlei, heiya koukhi karshukmak. Yane trun luklhaknarou karshukmaknei ngamrou yaitamne rikraichalei, ngamri Umpuei meithukei malungkhakur heini heiwaya thukyerwurla.”

¹⁴ Keiyei thimi Israel rapbei paalnanungei Keine piwurkhou ramya lungloukur Keiyei khril lhangaimak cheemlhun rapbei ngamrou Umpune atoubi yunlei: “Thilak, yayari Keine phuithudurbi yai ram'rouwei khingthutdurnungei marshikkura; heirou Judah'yei cheemmai-bommai'yari yaihang'rouwei phuithutdurouwa.

¹⁵ Heiya Keine yaya phuithutkur hillouri asitoubi hungthukheirou touri Keine yaya kringpithurou, heitoubi hanuikhi ya napung-khatsolya ai'aiyei paalna bira, heirou ai'aiyei ramra hanui kallengni yenruilhakpithurou.

¹⁶ Heirouri asitoubi hungthukrouwa touri Umpune ringliyenri, yani Keiyei thimi rapya Baal thraiyei minra kantomyerkhou heinaksine, kounakpi yani Keiyei thimi rapya Keiminra kantomyerlanungri, yayari Keiyei thimi rapbei hangra phunbaangpithurou.

¹⁷ Heirou kounakpi yani ninglhakpimanungri, Keine lim rapya namma phuithutdurou, heitoubi khingthutdurbi toumaangurou,” toubi Umpune paothutlei.