JEREMIAH 11 - KHYINGEI PU'TLOU Bible (BSI)

Mardingkril Tloubomya Toubaikur

¹ Jeremiah'nung kyong Umpurei tloulhang rapne atoubi yunlei:

² “Mardingkur tloulhang rapya louningpilak, heitoubi heirapya Judah'yei thimi rapnungei, heirou Jerusalem'ra yuldabi klei thimi rapnungei shunpilak.

³ Yanungei atoubi shunpilak: Israellei Dunpu Umpune atoubi yunlei: ‘Mardingnei tloulhang rapya hil chanthungmak thimiri manchokur hoiniyasu.’

⁴ Keine nai patar rapya Egyptbei thir roushanei meithlan doura leikhounarei yenruithutyei kaalnung Keine yanungei chay pibine atoubi shunkur: ‘Keihouya louninglak, heitoubi Keine nanungei chay pikur hilthungni lhou toulak; heiyanungri nani Keiyei thimi hoirou, heirou Keine naiyei Dunpu hoirou.’

⁵ Heitoubi Keine naiyei patar rapnungei piroume toubi kantomkhou nushungyuile khuining kungsundana ram heiwaya nanungei hoiyerrou.” Heirouri keine loumallangbi, “Amen: Heisi hoilakasu, O Umpu,” toubi kyun.

⁶ Heirouri Umpune keinungei shun, “Tloulhangrap nammaya Judah'yei khukarthil rapbei rilla heirou Jerusalem'yei khullam rapra paothutbine shunpilak: ‘Mardingpikur tloulhang rapya nane ninglhakbi heitoubi heirapya hilthungni lhou toulaklo.’

⁷ Kouweiyo toulanungri Keine nai patar rapya Egypt'rouwei yenruithutyei kheenrouwei waiyoubine angtu rampha ‘Keihouya hil-chanthunglak!’ toubi kalleng-kallengni shunbine tlousherkhou.

⁸ Heiya yani hil-chanthung'khoumak, heirou yaiyei khnanikhi ninglhakpikhoumak; heinung tlimri yani napal toubine ai'ai solungei kningra lhangaimak lhouyadil toubine leiwurkhou. Heitounei ngammei mardingkur tloulhang raprei manchoya Keine yaidoura yongdayerkur; ngamri yani Keiyei chaytlouya chanthungkhoumak, heirou lhou khoinikhi toukhoumak.”

⁹ Heirouri Umpune hanuikhi keinungei shun, “Judah'yei thimi rapbei hangrale, heirou Jerusalem'ra paalbi klei thimi rapbei hangrakhi raal younanungei rangurame toubi Keine mulhakwurla.

¹⁰ Yane yaiyei patar rapne Keiyei tlouya ninglhakpimaknei borh lhoura kallenglhakura; yani thraidei rapya hil chanthungurbi heirapya khrumwurchiya; Israel cheemkhur-bommai raple Judah'yei cheemkhur-bommai rapri Keine yaiyei patar rapnungei Mardingpikhou tlou rapya toubaiwurla.”

¹¹ Heitounei ngammei Umpune atoubi yunlei: “Thilak, Keine Judah'yei thimi rapbei doura yani loukartleikur manimaknungei klah-knang yenpirouwa; heirouri yani trungpinanungei Keinungei chapni lou'ungbikhi, yayari Keine ninglhakpimakrou.

¹² Heirouri Judah'yei khukarthil raple, Jerusalem'ra paalbi klei thimi rapne chabi yani mrohkun hongbi khrumbi klei thrailha rapnungei chapni shuncharou, heiya thrailha rapneri yaiyei klah-knangei kheenrou kalpimakrou.

¹³ Kouweiyo toulanungri O Judah'yei thimirap, naiyei thrailha rapri naiyei khukarthillei mshingyakhi duini chungurame, heirou nani rikraikna Baal thrailha rapnungei mrohkun hongnanungei sabaangkur khrahpal rapri Jerusalem'yei khullam mshingyakhi duini chunglei.

¹⁴ Ngam heineri nangni a thimi rapnungei shunchapimak, heirou yanungei tlim hut lambine ungraopi, nimanung buchapikhi toumaka; kouweiyo toulanungri yani klah-knang dayeinung Keinungei shunchayei kheenrouri Keinekhi louningpimakrou.”

¹⁵ “Keiyei malungshiwi nu hoiyabikhi chorit naimakanungri keicheemra kou leibom thukrou?(Keicheemra leibi kouya tounarou?) Malamput rapbei anchum rapne naiyei klah-knangya limchangrouko? Heiyanungri nani chorit naimakei lhouya toubine nungkngaini leikur yarouko?”

¹⁶ Umpune kheen khatrou neiminri “Mar'embi karbuk Olive trung, heibam lhangai heitrung,” heiya lhimnung-martheeyei houle kalhonni Ane heitrung heiwaya mei shulhakurbi kaangtlumyerrouwa, heitoubi aiyei ban rapri karshukmakni dongrouwa.

¹⁷ Heirou Thangwan-Shimleiyei Pu, naya lingpukpikhou Umpune naidoura karhani tantiyei tlouya paothutdurla, ngamri Israellei cheemkhur-bommaile heirou Judah'yei cheemkhur-bommaini Baal thrainung malamput makatbine Keiya toumlungkhawurla.

Jeremiah'ya Hatnanungei Rangkur

¹⁸ Umpune keinungei mutpiwurnarou, yani keiya hatnanungei rangkurya keine mulhakurla. Yane keidoura lhangaimak lhou wairangurame touri keine muwurla.

¹⁹ Heiya keiri hatnungei tangloukur yaoshun naksine yani keiya hatnanungei, “Kane heengtrung heiwaya heiyei hei raple kalhonni toumaanglakase, heitoubi kani ayari ram arou ringyermaknungei hatdurlakase; heiyanungri aiyei minri hanui kallengni ningthutmarou,” toubi yunbine rangkhouya koukhi mukhoumak.

²⁰ Heiya O Thangwan-Shimleiyei Pu Umpu; Nangri chimni pichar toupi Pume; tlaipang thimiyei ukningya marshakbi changh thibi klei Pume. Nangne yaidoura tanti pibi khlang lhakurya keine thibi leilei. Kouweiyo toulanungri keiyei lhouthukya Neinungei keine heipilhaklei.

²¹ “Umpuei minri shunthutmak, nimanungri nangri kaihutra hirou,” toubi yunbine neiya hatnanungei raphabi klei Anathoth'rei thimi rapbei ngamrou Umpune atoubi yunlei:

²² “Thilak, yayari Keine tanti pirouwa! Kartlang douwa rapri raalshonra hichirouwa; heirou yaiyei chanapawa raple yaiyei chanapuiya rapri butaamni hichirouwa;

²³ Heitoubi bi heirouri himalei thimi rapri khatchatomkhi leithungmakrouwa. Kouweiyo toulanungri tanti pinei kumrouri Anathoth'rei thimi rapbei doura Keine klah-knang yenpirou.”