JEREMIAH 10 - KHYINGEI PU'TLOU Bible (BSI)

Thrailha Khrumnei Ngamrou Israel Rapya Maangyerkur

¹ O Israel cheemkhurrei thimirap, nanungei shunpikur Umpuei tloulhangya louningpilaklo.

² Umpune atoubi yunlei, “Limdei rapne chabi klei lamya mulouheibi chanthungmak, heirou nungthourei kngakei hutlha rapya mubine nai lhawai lahwurmak; ngamri limdei rapri heinakpiya mubi lhawai klah'ne chirilkhou.

³ Limdei rapbei heengrei khakbine sheemthutkur thrailhaya khrumnei lhou louyoukna heiri karshukmakei lhou. Ngamri yarap heiri heengyao hangrei shaat'thutbi hutshakhei thimi rapne hutshu yrengbi sheemthutkur putcheithil.

⁴ Yarapne yaiyei thrailha rapya kulshanle, sina lhopbangbine kansampilei, heitoubi sekni thirmsui yemphopbine kanelmaknungei dunkhoulei.

⁵ Thrai lharap heiri mchanghei yekul tlaira waa chinanungei bunkhou thimi lhanaksi, yari tloukhi yunmak, chakhi-chaheimak, heiya yayari khangbine urcharou da. Thrailha rapyari chimak, ngamri yani neiya koukhi touyemchangmakrou, heirou neiya trungpikhi manemakrou.”

⁶ O Umpu, Nangnaksiri dei hukhatkhi makme; Nangri tang, heirou Neiminri mantrang tangni klei.

⁷ O Lim rapbei Krung, Neiya chimakrouri hu leileiyo? Neitam'tomya chi-rikraibom thukme! Kouweiyo toulanungri tlaipang limrap nam'rouwei, heirou Krungbom namrouwei shingkhei napawa rapbei hangrakhi Nangnaksiri khatomkhi yaomaklei.

⁸ Heiya ya shingkhei thimirap namma heiri yuntlungmak heirou pang thimithil. Yaiyei tlousempiya louna heiwari heengrei sathutkur thrailha tomngeime.

⁹ Iksoubi shungthutkur kulshan heiwari Tarshishrei yenheikur, heirou sinari Uphaz'rei kyenme. Heirapri thirya lhangsa rapbei heirou sinasa lhangsa rapbei sheemthutkur hutshathil. Thrailha rapbei phishamb rapri khmongduple mraokhmuk kimyei shambthil, heirapkhi ya-kyek hutshakhei thimi rapbei yekthutkur hutshathil.

¹⁰ Heiya Umpuri chim Dunpu; Ari khring Dunpu heirou kalui naimakei Krung Ane meithukni malungkhaei kheenrouri tlaipang thleidouri kanthingurlei. Heirou Aiyei meithukei malungkhana maibongra lim rapne loudouchangmak.

¹¹ Nane yanungei atoubi yunpilak, “Thangwanram rapya heirou tlaipangpalya sheemkhoumak thrai rapri tlaipang dourouwei heirou nungthou daakrouwei maangchirouwa.”

¹² Dunpu'ne Aiyei mantrangni tlaipangpalya sheemkhoupi, heirou Aiyei roushingni thleidoupalya phunbaangpikhou. Heirou Aiyei khyal kleiyei lhouni nungthou rapya mherthutpikur.

¹³ Ane Aihou chouni kat'ungraoyei kheenrouri nungthoura yui-rameidang hungkallonglei. Heitoubi Ane tlaipangpal thleidongrei rameiyao katshunkyer. Nung royeinung Ane tliplaikhi alkyer. Heitoubi Aiyei lalkeirei Ane martheekhi heishathutkyer.

¹⁴ Thimi napung kantangri yuntlungmakthil, heirou khyal yaomakthil; sinasa lhangsharap nammari yaiyei sheemthutkur thrailha rapbei ngamrou rikrai phayerheirou; kouweiyo toulanungri yaiyei thrai lharap heiri chimmak thraithil, heirou yari kounilkhi somak.

¹⁵ Yai thrailha rapri koumankhi naimak, heirou koukhi karshukmakei lhouthil. Yaya pichar touyei kheenrouri yarap nammakhi maangchirouwa.

¹⁶ Heiya Jacobei Dunpuri thrailha rapnaksi nimaklei; kouweiyo toulanungri Ari nammaya Sheempi Pu, heirou Israel'ri Aiyei thimithil, heirou Thangwan-Shimleiyei Pu touri Aiyei min.

Raalman Khoini Chawurnei Kheen

¹⁷ Naiyei putyum rapya khulmallongbi khukarthil rillouwei truknanungei marshiklakalo; kouweiyo toulanungri nayari raal manlounanungei kuikoolwurlame!

¹⁸ Ngamri Umpune atoubi yunlei: “Ram arouwei paalbi klei thimi rapyari kheen arou Keine khingthutdurouwa; heitoubi Keine yaidoura klah dayerrouwa; heiyanungri yaya klaini manlouheirou.”

¹⁹ Ulleiyo, keiri lahwurame, ngamri keiri thuithini hyemmura; keiyei kna awari damchangmarou; heisiyanungkhi keine kyun, “Kna awari keisiruk hoikura, keine awaya dourou dawura!”

²⁰ Keiyei khuiluphi cheemkhi deekmangura, heirou keiyei ruifret rapkhi namma tatdurchiya. Heirou keiyei chanapawa rapkhi keirouwei lakkurkhoubi chawurchiya, hukhatkhi keipongra leimakura. Heineri keiyei khuiluphiri hanui kallengni taangbaangbi thikyengpirou thimiri hukhatkhi makura, heirou keiyei yarkhalna phiyeng rapya yarbaangpiroukhi hukhatkhi makkura.

²¹ Kouweiyo toulanungri yaosilpu rapri yuntlungmak thimi hoiwurchiya; ngamri yani Umpurei kya tlouya ngaithitoukhi naimakura, heitounei ngammei yanungei tangbang toukhi makura; heitoubi yaiyei yaorul rapri nammane chekmangurchiya.

²² Khalu lhangrei kyong ungraochakur raal-paoya louningthilaklo! Judah'yei khukarthil rapya udthukni kontlummurbi, yekshang rapbei pur hoiyerrouwa!

Jeremiah'ne Dunpu'nung Shunchakur

²³ O Umpu, tlaipang thimi rapbei rongchanri yaihutra makme touri keine mulei; heirou thimi hukhatnekhi aiyei rongchanyei hokarya ruipichangmaklei.

²⁴ O Umpu, kringpibi keiya bei touchimpilaklo! Nangne malungkhawanungri keiri hirou'tomngeime!

²⁵ Neiyei malungkhakur heiri Neiya shak mumak lim rapbei doura, heirou Neiya khrumchamak bommai rapbei doura shungsundalaklo. Ngamri yani Jacobei bommai rapya toumaangurla, heitoubi yaya madulwurla; heitoubi yaiyei ram rapya kontumwurla!