JEREMIAH 1 - KHYINGEI PU'TLOU Bible (BSI)

Jeremiah'ya Ungbi Watkyil

¹ Benjamin'yei ram Anathoth'rei klei suipipu rapbei hangrei Hilkiah'yei chanapawa Jeremiah'yei tloulhangrap:

² Amon'yei chanapawa, Judah'yei Krung Josiah'ne krung hoiyei kum chiple-khyum tlungei kaallou Umpuei tloulhang rapya atoubi shunpilei.

³ Heirou Josiah'yei chanapawa Jehoiakim'ni Judah'yei krung hoiyei kaalloukhi, heirou Josiah'yei chanapawa Zedekiah'ne Judah'yei krung hoiyei kum chiple-khatdei luiwaiyei tlun-phanga tlung tangla'roukhi Umpuei tloulhangni yongbi, Jerusalemni raalman khoini urloukur kheen phani Jeremiah'ne Pu'tlou shunthutpikur.

⁴ Asinungri Umpuei tloulhangni keinungei yongbine atoubi shunpilei:

⁵ “Neiyari Keine nai nuwiyei ukwaira sheempibongei waiyoubi Keine neiya kmu. Heirou neiya pukthutbongei waiyoubi Keine neiya Puwatlhounungei laini khaithutdurkhoula. Heitoubi Keine neiya lim rapnungei thimkhui khat khoini lhoubom lhakpiwurkhoula,”

⁶ Heirouri keine kyun, “Ulleiyo, Pu Dunpu! Thilak, keiri kouya yunserouwo! Keiri koukhi muheimakme! Kouweiyo toulanungri keiri douwahuime!”

⁷ Heiya Umpune keinungei shun, “Nangne, ‘Keiri douwahuime’ toubine yunmaklo. Kouweiyo toulanungri Keiyei watyilna bi kantangra nangni charou dame. Heitoubi Keine neiya chay pibine shunkur tloulhang rapya nangni yunthutrou dame.

⁸ Ya hukhatyakhi chimakrou da. Kouweiyo toulanungri neiya kalthutpinanungei Keine neiya kalhonpileime,” toubi Umpune yunlei.

⁹ Heirouri Umpune Aiyei hutbang malamthutbine heitoubi keiyei murpalla thirpikur (palpikur), heitoubi Umpune keinungei shun, “Thilak, Keiyei tloulhang rapya Keine neiyei murpaalra (maleira) lhakpiwurlame.

¹⁰ Thilak, angturi Keine neiyari lim rapbei doura, Krungbom rapbei doura khalbangurbi lhoubom lhakpiwurla. Nangne phuithutkurkhi, tangdeekkurkhi, toumaangkurkhi, kontum-konthromkurkhi, sabaangkurkhi heirou linglhakurkhi maninei neihutra kleime touri nangni mulaka.”

¹¹ Heirou Umpuei tloulhangni keinungei yongbine atoubi kyun, “Jeremiah, nangri kou kar'anmulei?” Heirouri keine loukyun, “Keine almond heengbanyei shungkrok khat muleime.”

¹² Heirouri Umpune keinungei heikyun, “Nangne lhangaini muwurla, kouweiyo toulanungri Keiyei tloulhang rapya chimni hungthuknanungei Keine karngeibi leilei.”

¹³ Heirouri Umpune keinungei hanui kallengni (khnui tlungne) shunthut: “Nangne kouya kar'anmulei?” Heirou keine loumallangbi kyun, “Meithlan doura phu khat phulsoubi, khalu lhangrouwei mai kallekthutbi klei khat keine kar'anmuleime.”

¹⁴ Heirouri Umpune keinungei shun, “Khalu lhangrei thuithikur lhangaimak hungthukbine ram heiyei thimi rapya klah-knang dayerheirou.

¹⁵ Kouweiyo toulanungri thilak, asinungri Keine khalu lhangrei Krungram nammaei cheemmai-bommai rapya ungthutrouwa,” toubi Umpune paothutlei; “Heitoubi yani hungthukbi Jerusalemei palshung shumtrum rapbei maibongra minung-minung ai'aiyei krungbom khatsol sabaangrillouwa; heitoubi raalpal nammaei karhilni, heirou Judah'yei khukarthil nammaei doura karhani mayungbine leirouwa.

¹⁶ Heirouri yaidoura Keine yai touwurkhou lhangaimak lhou rapbei hilthungni Keiyei Pichar tourouwa. Kouweiyo toulanungri yani Keiya khingurkhoula, heitoubi dei thrailha rapnungei malamput makatdurla, heitoubi yaihutni sheemthutkur thrailha rapya yani khrumwurla.

¹⁷ Asinungri neiyei shintlakrui raaklaka, heitoubi kanthoubi Keine neinungei chay pikur tlou rapya namma yanungei shunthutpilaka. Nangne yaya chiwurmak, nimanungri Keine neiya yai maibongra maithee phayerrou.

¹⁸ Asinungri thilak, angturi Keine neiyari ram heiyei thimirap nammaei, suipipu rapbei, Krungcha rapbei heirou Judah'yei krung rapbei maibongra karhani thirrei shutlai bunbine, kulshanei raalpalni kuikoolbi sabaangkur khukarthil khat hoiyerwurla.

¹⁹ Heirou yani neidoura raal tourou, heiya yani neiyari manikhoumakrou; kouweiyo toulanungri neiya kalpinanungei Keine neiya kalhonpilei,” toubi Umpune paothutlei.