JAMES 2 - KHYINGEI PU'TLOU Bible (BSI)

Ukning Lhangaimak Khalbi Tlou Toubai Thimiya Tlousher

¹ Keiyei teinaorap, kai thang'allei Pu Jesu Christa'ya uklum thimirap khoine, nane thimiyei mairungya thibine kouniroukhi lam lailini pichar toumakrou da.

² Kounakpi dun thimi khatne hutmayungra sina nalhakbi heirou manklu punshelya upbine, heirou kanring thimi khatne punshel chunchanya upbine naiyei kartilnara wachanganungri,

³ heirou nane punshel manklu upbi wachangkur thimiya louthibi nane anungei rikrai khrumkna mutbine, “Bom lhangainara ommalo,” heitoubi punshel chunchanya upbi wachang thimi heiyari, “Nangri heilhangra heimayunga, nimanung thleira keiyei hopongra hei'omma,” toubi yunrouko!

⁴ Heiyanungri nangri naihangra lhang da'kyer thimi heirou lhangaimak ukningni pichar toupi thimi hoimakeiya?

⁵ Ninglhakpilak, keiyei malungshi'kna teinaorap! Dunpune tlaipangpal arou kanring thimi rapya uklumnara dun thimi hoiyernanungei, heirou aya malungshipi thimi rapnung kantompikur Krungramya phayernanungei khalthutdurla.

⁶ Heiya naneri heinaksi thimi rapyari rikrai khrumpimaklei. Naya marhotpi heiri dun thimirap nimakeiya? Heitoubi pichar bira naya urlhakbi rikraikyer heiri dun thimi nimakeiya?

⁷ Heitoubi nanungei pikur lhangaiyei minya yane yunborhkur nimakeiya?

⁸ Heirou Khyingei Lailikrei mayelhakuri, “Neiyei cheemlhunyei thimiya neimsha neitamya malungshinakne malungshilak,” toubi kyun Krung'rammei tloubom heiya nane hilthung hoiyanungri, nane chim lhouya toulei.

⁹ Heiya nane thimiya shakrungra thibine lhou thuithini toupilanungri, nane borhyei lhouya touwurla, heirou Tloulamni nayari tloulam toubai thimi rapme toubine pichar dapiwurla.

¹⁰ Heirou huhuni chaylam khatchatom baiyerlanungri chaylam namma baiyerkur thimi hoilei.

¹¹ Ngamri “Minu-micha lalmak” toubi kyun thimi heine “Thimi hatmak” toubikhi yunthulei. Heiyanungri nane minu-michaya lalmanungkhi, thimi hatlanungri, nari tloulamya baikyer thimi hoileihui.

¹² Heiyanungri malhetthutpi mane tloulamni yaidoura pichar touweirou thimi rapnakni, nane tlou yunlak heirou lhoukhi toulak.

¹³ Kouweiyo toulanungri Dunpune kringpikhei mak thiminung kringpikhei yaomakne pichar touweirou; heiya kringpikhei thimineri pichar touyeinung hakrao pharou.

Uklum Heirou Lhou

¹⁴ Keiyei teinaorap, thimi hukhatne aiyei uklum kleime toubi yunbine, uklum heiwaya lhoukhoine mutpinungei makkanungri, aiyei kyun heiri kouya lhangai hoirouwo? Heirou aiyei uklum heine aya kalpi manerouko?

¹⁵ Kounaksi keiyei teinaorap nimanung keiyei charwi rapni punshel upnungkhi makne, heirou chanung-mainungkhi makne leibi,

¹⁶ nangni yanungei “Dunpune naya phor pilaksu heirou na klumni leiyalo, heirou ukthoni leiyalo,” toubi yunbikhi, heirou nane yai chaanrou changbom thukya thulpitou makanungri, nai heiyunpinei lhangai kou leirouwo?

¹⁷ Heineri uklum heirouei lhoukhoiyei touthutkur yaomakanungri, uklumtomni khi hoirou.

¹⁸ Heiya thimi hukhatne atoubi yunrou, “Neiyeiri uklum leilei heirou keiyeiri lhoukhoine touthutlei.” Heine arouri neiyei uklum heiya lhou yaomakne mutpilak, heiya keiyeiri lhoukhoine keiyei uklumya mutrou.

¹⁹ Heirou Dunpu khattomni toubi nangni uklumlei, heine beimak lhangailei! Heinakrimne lhangaimak lhawainekhi uklumlei heirou chi-kanchunlei.

²⁰ Heiya yuntlungmak thimirap, lhou yaomakei uklum heiri khime touri mutyernileiko?

²¹ Kaiyei patar Abrahamya koutoubi Dunpuei bomra chimyerkuro toulanungri, ane aiyei chanapawa Isaac'ya khrahpal doura makatbi aiyei uklumya lhoukhoine mutnei ngamrou aya chimyerkur.

²² Heisitoubi aiyei uklum heine lhoulekou pulni chamalnabi klei nane muchangmako? Heitoubi aiyei uklum heiri lhouni rong tlungkyer.

²³ Heirou Khyingei Lailikra atoubi kyun heiri hungtlungura, “Abraham'ne Dunpuya uklum, heirou aiyei uklum heiyei ngamne Dunpune aya chimyerpikur thimi khat khoine loulhakpikur.” Heisitounei ngamrou Abraham'ya Dunpuei paluime toubi ungpikur.

²⁴ Heiyanungri, nane thilak touri thimi napung khatya aiyei lhouni Dunpuei maibongra chimyerpikur, heiya aiyei uklum heinetom nimak.

²⁵ Heirou chorit naimakpi Rahab'nungkhi heinakrim thukkurkhou. Ane Israellei raalmucha rapya aicheemra unglhakbi heirou yaya trungpikur, heitoubi lam deira kartleiyerbi shaalyerkur heiyei ngamne aya Dunpune chimyerpikur.

²⁶ Heinakrimne, lhawai yaomak sharungne khi hoinaksi, lhou yaomak uklum heikhi khi.