JAMES 1 - KHYINGEI PU'TLOU Bible (BSI)

¹ Dunpuei heirou Pu Jesu Christaei shikrui, James'rouwei karyemnei tlouya tlaipangpal karyouni trukchekkurbi klei Dunpuei thimi rapnung mayepilei.

Uklum Heirou Shingkhei

² Keiyei teinaorap, nai rongchanrou lhoulam limlimra naiyei ukningya marshakthinei trum hungei kalnung nai'msha naitamni likarsui lhangaime toubi loulak,

³ kouweiyo toulanungri, naiyei uklum heine heinaksi marshakthikurya yenmaneheilanungri, nane klui ramphane kanthram maneroume toubi mulak.

⁴ Nane mulhaklak touri naiyei kanthram'khei heine naya kouniroukhi kanelyermakrou, heiyanungri nanungei kouroukhi kwat naimakne rongtlung hoiyerpirou.

⁵ Kounakpi naihangra hukhatne roushing watdanungri, heinakya pimane Dunpunung ane buchalaksu; ngamri Dunpuri thimi nammanung kringpi kheine pilei.

⁶ Heiya nane shunchayei kaalnung koukhi khalcha'kna toumakne uklumle kalhonne shuncharou da. Heirou khalcha'kna thimi heiri martheeyei ilfletchabi klei samadrurei yuilhou naksilei.

⁷ Ngamri ukning khintam kroong thimi heiri aiyei toubi klei lhou heirou ukningra muidane mayungchangmaklei.

⁸ Kouweiyo toulanungri, heinaksi thimi heine Dunpu'rouwei koukhatkhi phanungei ningchamakniyasu.

Kanring Heirou Laldun

⁹ Christen kanring thimi khatya Dunpune mathumbangpiyei kalnung ane haraowasu,

¹⁰ heirou laldun Christen khatya Dunpune taangsundala'nungri, ane haraoniyasu. Kouweiyo toulanungri, dun thimi heiri ramhangrei heengpar-rampar naksi kimmeirou.

¹¹ Kinnine kathukyeinung aiyei meisha heine loutrung-ramtrung rapya kaanghatkur; heirou aiyei reipar rapkhi trulsundakur, heirouri aiyei lhangai thang rapkhi maangyerkur. Heinakrimne dun thiminekhi aiyei lhoubomra'tom chayeinung aitam maangurheirou.

Ukningya Marshakthi Heirou Malhim

¹² Ukningya marshakbi thiyei kaalnung malungamkna khoiyei kanthrambi douthimi heiri nungkngai hoirou, ngamri ane heinaksi marshakthiya kanthrambi raalkur heiyei ngamne, Dunpune aya malungshi thimi rapnung kantompikur khringei chaan heiya klah-man khoine phaheirou.

¹³ Heitoubi thimi khatya heinaksi marshakthi heiwini malhimlanungri, kheen heirouri ane “Anaksi malhim ari Dunpurei kyongme” toubine yunmakneyasu. Kouweiyo toulanungri, Dunpuyari lhangaimak lhawaine malhimchangmak, heirou thimi huyakhi Ahakne lhangaimaknara dananungei malhim younamak.

¹⁴ Heiya thimi khatya aitamtomei kningra martlaoloubi aya malhimnara dayerkur.

¹⁵ Heisitoubi aiyei lhangaimakei kning heine manewurbi heirou aya borhra dayerkur; heirou borh heine kadtangei kaalnung ayari khira dayerkur.

¹⁶ Keiyei malungshi'kna teinaorap, naya lalnara dayermak!

¹⁷ Ngamri lhangaiyei hutthul kantang, rongtlungei hutthul kantang heiri Thangmunrei klei kwaarya Sheempi Pu, heirou kwaar heiya kmeh hoiyermak Dunpu'rei yongpi.

¹⁸ Heirou Aiyei kning hilthungni kayari Aiyei chim tlouwei ngamne pukpiwurla, heine kayari asinung Aiyei hutsa rapbei hangra lamkriyei bomra khoupiwurla.

Ninglhakbi Heirou Lhoukhoiyei Touthut

¹⁹ Keiyei malungshi'kna teinaorap, kyun aya ningthutlak! Thimi kantangni ninglhakyei kaalnung khrang thimi hoiyalo, heiya yunthutyei kaalnungri muida thimi heirou malungkhatermak thimi hoiyalo.

²⁰ Ngamri thimiyei malungkhater heiwane Dunpuei chim lhouya touchangmak.

²¹ Heineri nane lhangaimak lhoura kanchangbi klei heirou ukning mardunnei lhou nammarouwei tlatni leiyalo. Heitoubi neiya kalpimane tlouya ukningra marnimni loulhakbi heitoubi Dunpu'nung pilhaklak.

²² Heirou Aiyei tlouya ninglhakbi tlou heine neitamya klal dayerwurmak; heinung tlimri nane tlou heiya ninglhakbine heitoubi heiwaya lhoukhoine touthutlak.

²³ Heirou huhuni tlou heiya ninglhakbi heirou lhoukhoine touthutmak thimirap heiri mingshella thibi ai'msha-aitamei lhimya kmu heinakrimlei.

²⁴ Ane aitamei mairungya thimanrebi heirou chutdurbi hillouri aiyei shakrung heiri kounaksiyo touri ane malumkur.

²⁵ Heiya hukhatne rongtlung heirou malhetthutpinei tloulamya thibi kanreni mubine, tlou heiya klaini ninglhakloubi malumkur toumakne, ninglhakur tlou heiya lhoukhoine touthutkur thimi heiri aiyei toukur heinung'tlim Dunpune phor pirou.

²⁶ Heirou thimi hukhatne a heiri tharmu klei thimime toubine ningchaleiko? Heiyanungri ane aiyei maleiya manphopmakanungri, aiyei tharmu klei heiri koukhi karsukmak hoirou, heirou ai'msha aitamya minamcha'kna.

²⁷ Dunpuei mit'thrilnara chimle heirou tharmuei lhouwo touri. seracha rapya heirou trulmei rapya lhangaine thikulpibi heirou yai klah-knang leina bomra trungpibi, heirou ai'msha aitamne tlaipangei borh lhourap'rouwei tlatni klei heinakya Dunpune yapilei.