ISAIAH 8 - KHYINGEI PU'TLOU Bible (BSI)

Damascus’le Samaria Kanelkur

¹ Heirouri Umpune keinungei shun, “Thlungpak tang khat loulak, heitoubi heiwaei doura ‘Maher-Shalal-Hash-Baz’ toubine thimi nammani pathranungei yukmayelak.

² Heitoubi Keine tloumayung khoine malungamkna suipipu Uriah'le, Jerebechiah'yei chanapawa Zechariah yarukhniya unglouheirou.”

³ Heirouri keine thimkhuiwinung wachangbi ale rkhum tilrilkur, heirou ari nao urwurbi chanapawa khat pukkur. Heirouri Umpune keinungei loushunkur: “Aiyei minri ‘Maher-Shalal-Hash-Baz’ toubi thulpilak;

⁴ kouweiyo toulanungri napawa douwa heichani ‘Pawa’ nimanung ‘Nuwi’ toubi ung heibongnung, Damascus'yei lalthumrap heirou Samaria'yei deekbaikur lalthumrap nammaya Assyria'yei krungni luklouchirouwa.”

⁵ Heirou hanuikhi Umpune keinungei duinara shunpithu:

⁶ “Heinaksi thimi rapne Shiloah'rei marnim tuysirya yanimaknei ngamrou Rezin'le, Remaliah'yei chanapawa Pekah'ya chitekwurbine yaasundakur heinaksine leiliyenri;

⁷ asinungri thilak, Pu Dupune yaidoura Euphrate kungtangrei tuywok naksine kalkur heirou mantrangkur Assyria'yei krungya heirou thang'allei toumani rapya yenlhakrouwa; heitoubi ya rapne khungpaal heirou kungpaal nammaya katpahoikur heinaksine thulhoibine kunglhakrouwa.

⁸ Heitoubi Judah'yei ram namma karyouni thullhakbi martlaochirouwa; heitoubi heirap nammaya thulhoiwurbi tonlouchibi aiyei ngak kaphani omdum'rouwa; heitoubi Aiyei sha rapne neiyei ramya dung-phei naimakni yabphopburouwa, O Immanu-el!”

⁹ Karbaiyuralo, O thimirap, heitoubi chaalsundawuralo; heitoubi naiyei khnani louninglaklo, tlaipangpal karyouwei klei limrap. Naitamni raal marshikbinekhi manikhoumarou, heitoubi naitam raal-shamb bangbine kansambikhi chaalsundawurbi lhawai lahrouwa.

¹⁰ Nane raal danungei kartongrilbi rangbinekhi, maithee phaheirou, heitoubi tlou kantomrilbikhi heiwane lousouchangmakrou. Kouweiyo toulanungri Umpuri kanung-lhangra kallhopbine leilei.

Umpu ne Thimkhuiya Shunmatupi

¹¹ Umpune Aiyei mantrangei hutya keidoura khoupibi keinungei heinaksi thimi rapbei chaanlamra chamaknanungei shunmatupibi Ane asitoubi kyun:

¹² “Yane muni lhangaimaknara raangbi kantlangni hut-dangbi klei heiwaya nangneri koukhi lhouhoipimak, heirou yaiyei chirilbi klei heiwakhi nangni phu-throbine chiwurmak, heirou neiyei lhawaikhi lahwurmak.

¹³ Heiya Thangwan-Shimleiyei Pu Dupuri Khyingme touri nangni ningmurou da; heitoubi nangni Ayatom phuthrole kalhonne chirou da.

¹⁴ Heirouri A heiri Khyingei kallena bom khat hoirou; heiya Israellei cheemkhur-bommai khintamnungeiri thikmthuina bi khat khoine, heirou tapanbi kanelna bi thlungtum khat hoirouwa; heitoubi Jerusalem'rei paalbi klei thimi rapnungei chaangkam khat hoirouwa.

¹⁵ Thimi kounakni thlungtum heiwarou taponloubi kanelbaangrouwa; heirou yarapne heiyei doura kanelbaangurbi harhar dani chaalchirouwa; ya rapne chang kamna bi heirouwei tatkhapbine manchirouwa.”

¹⁶ Pao heiwaya markumbine dangphopkhoulak, heitoubi shunmtupinei chaylam rapya heirou ayillei tloulam rapya Keiyei ruishik rapnungei simanlha nambine khoupilak.

¹⁷ Heirou Jacobei cheemkhur-bommai heinung'tlim rikraini mairung yulkhoukur Umpuya keine ngakrouwa; heirou keine Aya yuikhat-msulni karngeibine leirouwa.

¹⁸ Thilak, keile, heirou Umpune keinungei silnakur chanao rapri Zion Lhungdourei thrungbi klei Thangwan-Shimleiyei Pu Umpurei kying Israel rapnungei kngakei hutlha rap khoine leilei.

¹⁹ Heirou thimi rapne neinungei “Hillei hungthuknungei tlouya shunthutchang thimkhui rapnung kartongrilbine tlou ngaithilaklo,” toubine yunlanungri, “Lim khatdei thimi rapne yaiyei Dunpunung tlou kallangbi ngaithibom thukmako? Heirou koutoubi khring thimi rapbei ngamrou khithimi raprei tlou kallangbi ngaithirouwo?” toubi louyunlak.

²⁰ Heiya shunmtupikur ayillei tloulam raple, heirou shakhiyei tloubom rapya ninglhaklak! Kounakpi yani heirapbei hilthungni yunmakanungri, yaitlou rapri karshukmakei tlouthil.

²¹ Heirou yarapne marhotbi norkur ramra yenchaheirou; heirou yuikhat-chak'msulni norkurkhi yenkarthangeirou, heirouri yani mrimei kallou yarapri kanthi fyoubi malungkhabine yaiyei krungya thibi kansopirou, heitoubi manchopirou; heirou yaiyei Dunpu'yakhi kansopirou.

²² Heirouri yani yaiyei ram karhilni thipharou, heirouri thilak, klah-knangle, kmehle, chi'knaei shakrungni thim'rouwa; heirou yayari kmehyei rilla namlhakpirouwa.